কোবিদ-১৯ লাইচৎ কিবা অমসুং হিংনবা থবক শুবা ফংলোই হায়বগী অকিবা অসিনা মরুওইবা মরমশিং ওইদুনা শিন্মীশিংনা মখোয়গী য়ুমশিংদা চৎনবা হোৎনরকপনি হায়না রাজ্যশিংদা য়ুনিয়ন হোম এফেয়ার্স মিনিস্ত্রিনা খঙহনখ্রে। কোইচৎ চৎতুনা থবক শুরিবা শিন্মীশিং অসিগী অৱাবশিং কোকহন্নবা কেন্দ্রগা খুৎশম্নদুনা রাজ্য সরকারশিংনা থবক কয়া পায়খৎলে। থবকশিং অদুদি :

• রাজ্যশিং অমসুং রেলৱেজ মিনিস্ত্রিগী মরক্ত মতেং পাংনদুনা অহেনবা অখন্নবা ত্রেনশিং চেল্লে ;
• কোইচৎ চৎতুনা থবক শুরিবা শিন্মীশিং হোন্নবা বস মশীং হেনগৎহল্লে ; রাজ্যশিংগী ঙমখৈ লান্না শিন্মীশিং পুবা বসশিং চংবগী অয়াবা পীরে;
• ত্রেনশিং/বসশিং থাগদবা মতম ময়েক শেংনা লাউথোক্লে, চমম্নবগা লোয়ননা তোকঙা শন্দোকপনা শিন্মীশিংগী মরক্তা লৈতাদবা ফাওহল্লি ;
• খোঙনা চৎলিবা শিন্মীশিংগী পোথাফমশিং, সেনিতেসন, চীঞ্জাক অমসুং অনা-লায়েংগী খুদোংচাবশিং লম্বীশিংদা রাজ্যশিংনা মরাংকাইনা ফংহল্লে ;
• খোঙনা চৎলিবা শিন্মীশিং দিস্ত্রিক ওথোরিতিশিংনা পোথাফমশিং, অনকপা বস নৎত্রগা রেলৱেজ স্তেসনশিংদা পুনবা শীনগদবনি;
• শিন্মীশিংগী মরক্ত য়াওরিবা নুপীশিং , অঙাংশিং অমসুং অহলশিংগী অকক্নবা দরকার ওইবশিং পীনবা অখন্নবা থবক পায়খৎকদবনি ;
• পোথাফমশিংদা মতম শাংনা ক্বারেনতাইন তৌহনগনি হায়না থাজবা লৈরিবা অসি কোকহন্নবা দিস্ত্রিক ওথোরিতিশিংনা এন জি ওশিংগী মীহুৎশিং মতেং পাংহনগদবনি। মখোয়না পাম্লিবা মতম ফাওবা পোথাফমশিংদা লৈনবা শিন্মীশিংগী পুক্নিং থৌগৎকদবনি।
• শিন্মীশিংগী লৈফমশিং অমসুং মোবাইল নম্বরশিং লৌশিনগদবনি। মসিনা মখা তারকপদা মখোয়গী খোঙ্গুল লিবদা মতেং ওইগনি।

মখোয়গী পন্থুংফমশিং য়ৌনবা শিন্মীশিং লম্বী ময়াই নৎত্রগা রেলৱেজ ত্রেকশিংদা চৎহন্দনবা দিস্ত্রিক ওথোরিতিশিংদা মিনিস্ত্রিনা অমুক হন্না খঙহল্লি। দরকারগী মতুংইন্না ত্রেনশিং চেন্নবা মখোয়না রেলৱেজ মিনিস্ত্রিদা হায়জগদবনি।

****