প্রধান মন্ত্রী শ্রী নরেন্দ্র মোদীনা কোবিদ-১৯গী মায়োক্তা চত্থরিবা ভারতকী লান্দা তুংগী পোরম য়াৎনবগীদমক ঙসি লৈবাক অসিগী রাজ্য অমসুং য়ুনিয়ন তেরিতোরী পুম্নমক্কী মুখ্য মন্ত্রীশিংগা ৱারী শানখ্রে।

প্রধান মন্ত্রীনা মহাক্কী হৌদোক্কী ৱারোলদা হায়খি, “হৌজিক ঐখোয়দা ৱাফম অসি ময়েক শেংনা তাক্লে মদুদি ভারত্তা লাইচৎ অসি করম-করম্বা জিওগ্রাফিকেল লমদমশিংদা শন্দোক্লি অমদি খ্বাইদগী শোকহল্লিবা মফমশিংনা করম-করম্বনো। মসিদসু নত্তনা হৌখিবা চয়োল খরদা ওফিসিয়েলশিংনা অসিগুম্বা মখলগী ফিভমশিংদা জিলাগী থাক ফাওবা ওপরেতিং প্রোসিজরশিং নীংথিজনা খঙবা ঙম্লে।”

প্রধান মন্ত্রীনা হায়খি মদুদি কোবিদ-১৯ শন্দোরকপগী মতাংদা নীংথিজনা খঙবা ঙম্বা অসিনা মসিগী মায়োক্তা শোক্নরিবা লান অসি নিয়ম চুম্না শোক্নবদা লৈবাক অসিনা মতেং ওইরগনি।

মহাক্না হায়খি, “মরম অদুনা হৌজিক ঐখোয়না কোরোনাভাইরসকী মায়োক্তা চত্থরিবা লান অসিদা ঐখোয়গী অদুগুম্লবা লালোং অদুদা পুক্নীং চংবা ঙম্লগনি। ঐখোয়গী নাক্তা শিংনবা অনি লৈরি- লাইনাগী ত্রান্সমিসন রেৎ হন্থনবা, অমদি গাইদলাইন পুম্নমক ঙাক্না চৎতুনা পব্লিক এক্তিবিতী তপ্না-তপ্না হেঙ্গৎহনবনি, অমদি ঐখোয়না পান্দম অনিমক অসি ফংনবগী মায়কৈদা থবক তৌবা তাই।”

প্রধান মন্ত্রীনা মখা তানা হায়খি মদুদি হৌজিক খুঙ্গংগী লমদমশিংদা কোবিদ-১৯ শন্দোকপা থিংনবা হোৎনবা তাই।

প্রধান মন্ত্রীনা ফোংদোকখি মদুদি ইকোনোমীদা রোদমেপ অমা থৌরাং তৌনবীদমক রাজ্যশিংনা থমলক্লিবা ৱাফমশিংদা খন্ন-নৈনরে।

মুখ্য মন্ত্রীশিংনা কোবিদ-১৯গী মায়োক্তা লৈবাক অসিগী লান্দা প্রধান মন্ত্রীগী লীদরশিপ্পু শিংথাখি অমসুং লৈবাক অসিদা মেদিকেল অমসুং হেল্থ ইনফ্রাস্ত্রকচর চেৎশিলহনবগী মথৌ তাবা অদুসু ফোংদোকখি। মখোয়গী মরক্তগী কয়া অমনা ফোংদোকখি মদুদি মাইগ্রেন্তশিংগী হল্লকপগা লোয়ননা অখন্ননা খুঙ্গংগী লমদমশিংদা ফ্রেস ইনফেক্সনগী থোংদা লাইচৎ শন্দোরকপা থিংনবগীদমক সোসিয়েল দিস্তেন্সিং গাইদলাইনশিং চেকশিন্নবা চৎনহনবা, মাস্ক অমসুং সেনিতাইজেসন শিজিন্নবদা পুক্নীং চংবা মথৌ তাই।

মীরৈবাক্তগী হল্লকপা পন্দুনা লৈরিবা ভারত মচাশিংবু শুংশোই-শোইদনা ক্বরেন্তাইন তৌবদসু অকনবা ৱাফম থমখি। ইকোনোমীদা মুখ্য মন্ত্রীশিংনা মখোয়গী ৱাফমশিংদা এম.এস.এম.ই.শিং, পাৱরগুম্বা ইনফ্রাস্ত্রকচর প্রোজেক্তশিংদা দরকার ওইবা তেংবাং পীনবা, লোনশিংদা শেন্দোয়গী চাং হন্থহন্নবা অমদি এগ্রিকলচরগী ওইবা পোত্থোকশিং কৈথেলদা য়ৌহনবদা অকনবা ৱাফম থমখি।

প্রধান মন্ত্রীনা কোবিদ-১৯গী মায়োক্তা লৈবাক অসিগী লান্দা মরুওইবা থৌদাং লৌবগীদমক অমদি এক্সপরিয়েন্সনা থল্লবা মমল য়াম্লবা পাউতাকশিংগীদমক মুখ্য মন্ত্রীশিংবু থাগৎপা ফোংদোকখি।

প্রধান মন্ত্রীনা হায়খি মদুদি ঐখোয়না মসি খঙগদবনি মদুদি কোবিদ-১৯গী মতুংদা মালেম অসি মপুংফানা অহোংবা লাক্লে। হৌজিক মালেমগী লাঞ্জাওগী মতৌগুম প্রি-কোরোনা, পোস্ত-কোরোনাগী মালেম ওইরগনি। মসিগী ঐখোয়গী থবক তৌবগী মওং-মতৌদা মরুওইবা অহোংবা পুরক্লগনি।

মহাক্না হায়খি মদুদি মীওই অমদগী হৌরগা মীওইবা জাতি পুম্বা পুন্সিগী অনৌবা লম্বী অসি “জন সে লেকর জগ তক”কী প্রিন্সিপলদা য়ুমফম ওইরগনি।

ঐখোয় পুম্নমক্না মালেমগী অনৌবা রিয়েলিতীগীদমক থৌরাং তৌগদবনি হায়না মহাক্না হায়খি।

মহাক্না হায়খি, “ঐখোয়না লোকদাউনবু তপ্না-তপ্না লৌথোক্নবা মিৎয়েং থম্লগসু, ঐখোয়না নীংশিংগদবদি হৌজিক ফাওবা ঐখোয়না ভেক্সিন নত্ত্রগা সোলুসন অমত্তা ফংদ্রি, ভাইরস অসি থেংননবা খ্বাইদগী চাউবা খুৎলায়দি সোসিয়েল দিস্তেন্সিংনি।”

প্রধান মন্ত্রীনা খুদুপ অনিগী অরাপ্পগী মরুওইবা অদুদা অমুক হন্না অকনবা ৱাফম থমখি অমদি হায়খি মদুদি মুখ্য মন্ত্রী কয়া অমনা নুমিদাং কার্ফ্যু থম্নবগীদমক থম্লক্লিবা ৱাফম অদু পাংথোকপনা মীয়ামগী মরক্তা চেকশিনবা হেঙ্গৎহল্লগনি।

মহাক্না মুখ্য মন্ত্রী পুম্নক্কী মফমদা লোকদাউনগী মতাংদা অকক্নবা ফীদবেক পীরক্নবা হায়জখি।

প্রধান মন্ত্রীনা হায়খি মদুদি, ঐখোয়গী মাংদা লাক্কদৌরিবা অদুগুম্লবা তোঙান-তোঙানবা শিংনবা কয়া লোইশিন্নবা অপুনবা মিৎয়েং অমা ঐখোয়না মথৌ তাগনি। লৈবাক অসিদা মোন্সুন্না লাক্লবদা নন-কোবিদ লাইনা কয়া অমা শন্দোরক্লগনি, মদুগীদমক ঐখোয়না ঐখোয়গী মেদিকেল অমসুং হেল্থ সিস্তেমশিং শেম-শাবা অমদি চেৎশিলহনবা তাই।

এজুকেসন সেক্তরদা তিচিং অমসুং লর্নিংগী অনৌবা মোদেলশিং করম্না চৎনহনগদগে হায়বদা পুক্নীং চংনবা মহাক্না পোলিসী মেকরশিংদা হায়খি।

তুরিজমগী মতাংদা ঙাংলদুনা প্রধান মন্ত্রীনা হায়খি মদুদি মহাক্না দোমেস্তিক তুরিজমদা পোতেন্সিয়েল উবা ফংলি অদুবু ঐখোয়না মসিগী মওং-মতৌগী মতাংদা খনবা মথৌ তাই।

মহাক্না হায়খি, “ঐহাক্না চেৎনা উবা ফংলে মদুদি লোকদাউনগী অহানবা ফেজদা দরকার ওই খনবা খোংথাংশিং অনিশুবা ফেজদা মথৌ তাখিদে অমদি মতৌ অসুম্না অহুমশুবা ফেজদা দরকার ওই খনবা খোংথাংশিং মরিশুবা ফেজদা মথৌ তাদে।”

ত্রেন সর্বিসশিং অমুক হন্না হৌদোকপগী মতাংদা ঙাংলদুনা প্রধান মন্ত্রীনা হায়খি মদুদি ইকোনোমিক এক্তিবিতী ফগৎহন্নবগীদমক মসি মথৌ তাই, অদুবু মসিগা লোয়ননা মহাক্না হায়খি মদুদি রুৎ পুম্নমক্তা মথৌ তৌবা হৌখিরোই। অকক্নবা ত্রেন মশিং খরদমক চেনগনি হায়না প্রধান মন্ত্রীনা হায়খি।

প্রধান মন্ত্রীনা হায়খি মদুদি মহাক্না অফবতা উবা ফংলি, রাজ্য অমত্তনা নীংবা কায়বা উৎলকপা লৈত্রি অমদি অসিগুম্লবা কলেক্তিব দিতর্মিনেসন অসিনা ভারতপু কোবিদ-১৯গী মায়োক্তা শোক্নরিবা মসিগী লান্দা মায় পাকহনগনি।

প্রধান মন্ত্রীনা হায়খি মদুদি কোবিদ-১৯ মতুংগী য়ুগনা তাঞ্জাশিংসু পুরক্লি মদুগী ভারতনা কান্নবা লৌগদবনি।  

****