गोंय, 21 नोव्हेंबर 2026
प्रसार भारतीन आयज 57व्या भारतीय आंतरराष्ट्रीय चित्रपट महोत्सवाचो (IFFI) एक भाग म्हणून पणजे कला अकादमीत आपल्या पयल्या पटकथा सादरीकरण कार्यशाळेचो ‘पेज से पिच तक’ हाचो शुभारंभ केलो. प्रसार भारतीचे अध्यक्ष पद्मश्री प्रसून जोशी हांच्या संकल्पनेतल्यान साकार जाल्ल्या ह्या उपक्रमाक वर्सुकी राष्ट्रीय व्यासपीठ म्हणून विकास करपाचें येवजिला. ह्या माचयेर देशभरांतल्या नवोदित लेखकांक फीचर फिल्म्स, माहितीपट आनी लघुपट ह्या विभागांनी धा भारतीय भाशांनी आपल्यो मूळ पटकथा सादर करपाची संदी मेळटली.
_20261121203817_8d21e3.jpeg)
ह्या वेळार उलयतना श्री. प्रसून जोशी हांणी वैयक्तिक अणभव आनी सांस्कृतिक दृष्टिकोनांचेर आदारीत प्रामाणिक कथा-कथनाच्या म्हत्त्वाचेर भर दिलो. विशिष्ट आवाजांक प्रोत्साहन दिवपाखातीर आनी देशाच्या वेगवेगळ्या भागांतल्यान उदयाक येवपी कथांक माची उपलब्ध करून दिवपाखातीर प्रसार भारती कटिबद्ध आसा, अशें तांणी सांगलें. भारताच्या दर एका प्रदेशाची आनी लोकपरंपरेची स्वतःची वैशिष्ट्यपूर्ण कथासंपदा आसा. त्या प्रदेशाच्या मूळ संस्कृतीची जाण आनी समज आसल्या बगर ह्यो कथा खऱ्या अर्थान सांगप आनी समजून घेवप शक्य ना, अशेंय तांणी नमूद केलें.

दूरदर्शनच्यो महासंचालिका सुश्री रीना सोनवाल कौली हांणी येवकाराचे उलोवप केलें आनी भारतांतल्या भाशिक आनी सर्जनशील विविधतेचें दर्शन घडोवपांत ह्या उपक्रमाची म्हत्त्वाची भूमिका अधोरेखित केली.
पटकथा सादरीकरणाच्या सत्रांनी धा सहभागी आपापल्यो मूळ पटकथा प्रतिष्ठित परीक्षक मंडळासमोर सादर करतात. ह्या प्रतिष्ठित परीक्षक मंडळांत पद्मश्री मनोज जोशी, अभिनेते आनी सर्वोत्कृष्ट सहाय्यक अभिनेत्याचो राष्ट्रीय चित्रपट पुरस्कार फावो जाल्ले कलाकार; संदीप बालकृष्ण, भारतीय इतिहास, संस्कृती आनी साहित्याचे लेखक, संपादक आनी स्वतंत्र संशोधक; श्री. नारायण सिंग, ‘टॉयलेट : एक प्रेम कथा’ आनी ‘बत्ती गुल मीटर चालू’ ह्या चित्रपटांखातीर वळखतात ते चित्रपट निर्माते आनी संपादक; तशेंच अनंत विजय, राष्ट्रीय चित्रपट पुरस्कारान सन्मानित पत्रकार, लेखक आनी चित्रपट समीक्षक आनी एफटीआयआय, पुणेच्या गव्हर्निंग काउन्सिलाचे उपाध्यक्ष हांचो आस्पाव आसा.

उक्तावण सुवाळ्याक प्रेस इन्फॉर्मेशन ब्युरोचे प्रधान महासंचालक श्री. धीरेंद्र ओझा; भारताचे प्रेस रजिस्ट्रार जनरल (PRGI) आनी प्रधान महासंचालक श्री. योगेश कुमार बावेजा; तशेंच म्हायती आनी वितरावण मंत्रालयाचे संयुक्त सचिव (प्रसारण आनी प्रशासन) श्री. पृथुल कुमार उपस्थित आशिल्ले.
पटकथा सादरीकरण कार्यशाळेचें आयोजन 21 ते 23 नोव्हेंबर 2026 ह्या काळांत केलां. ह्या वर्सुकी उपक्रमाच्या माध्यमांतल्यान नवोदित लेखकांक चित्रपट उध्येगांतल्या वेवसायिकां कडेन जोडप आनी तांच्या मूळ संकल्पनांचें फीचर फिल्म्स, माहितीपट आनी लघुपटांच्या स्वरूपांत रुपांतर करपाच्यो संदी उपलब्ध करून दिवप, हो प्रसार भारतीचो उद्देश आसा.
‘पेज से पिच तक’ ह्या उपक्रमांतल्या जैतिवंतांची घोशणा 24 नोव्हेंबर 2026 ह्या दिसा करतले.


Read IFFILOID here: https://www.pib.gov.in/iffi/57/iffiLoid.aspx?yr=2026&lang=1®=48
* * *
पीआयबी मुंबई | मनाली प्रभूगांवकर/मोनाली प्रभू/दर्शना राणे