پرسار بھارتی نے آج 57ویں انٹرنیشنل فلم فیسٹیول آف انڈیا (آئی ایف ایف آئی) کے تحت کلا اکیڈمی، پنجی میں اپنی پہلی اسکرپٹ پچنگ لیب ’پیج سے پچ تک‘ کا افتتاح کیا۔ پرسار بھارتی کے چیئرمین پدم شری پرسون جوشی کے تصور پر مبنی اس پہل کو سالانہ قومی پلیٹ فارم کی شکل دینے کا منصوبہ ہے، جہاں ملک بھر کے ابھرتے ہوئے قلم کار فیچر فلموں، دستاویزی فلموں اور مختصر فلموں کے زمرے میں ہندوستان کی دس زبانوں میں اپنے اصل اسکرپٹ پیش کرسکیں گے۔

اس موقع پر خطاب کرتے ہوئے پرسون جوشی نے ذاتی تجربات اور ثقافتی نقطۂ نظر سے جڑی حقیقی کہانیوں کی اہمیت پر زور دیا۔ انہوں نے کہا کہ پرسار بھارتی منفرد آوازوں کو پروان چڑھانے اور ملک کے مختلف حصوں سے ابھرنے والی کہانیوں کو ایک پلیٹ فارم فراہم کرنے کے لیے پُرعزم ہے۔ ان کے مطابق ہندوستان کا ہر خطہ اور ہر لوک روایت اپنی الگ کہانیاں رکھتی ہے، جنہیں وہاں کی مقامی ثقافت کی قدر افزائی کے ذریعے ہی حقیقی معنوں میں بیان کیا جاسکتا ہے اور سمجھا جاسکتا ہے۔

دوردرشن کی ڈائریکٹر جنرل محترمہ رینا سونوال کولی نے استقبالیہ خطاب کیا اور ہندوستان کے لسانی و تخلیقی تنوع کو اجاگر کرنے میں اس پہل کے کردار پر روشنی ڈالی۔
اسکرپٹ پیش کرنے کے ان اجلاسوں میں دس شرکاء ممتاز جیوری کے سامنے اپنے اصل اسکرپٹ پیش کر رہے ہیں۔ جیوری میں پدم شری منوج جوشی، اداکار اور بہترین معاون اداکار کے قومی فلم ایوارڈ یافتہ؛ سندیپ بالاکرشنا، ہندوستانی تاریخ، ثقافت اور ادب کے مصنف، مدیر اور آزاد محقق؛ شری نارائن سنگھ، فلم ساز اور ایڈیٹر، جو ٹوائلٹ: ایک پریم کتھا اور بتی گل میٹر چالو جیسی فلموں کے لیے معروف ہیں؛ اور اننت وجے، قومی فلم ایوارڈ یافتہ صحافی، مصنف اور فلمی نقاد نیز ایف ٹی آئی آئی، پونے کی گورننگ کونسل کے نائب چیئرمین شامل ہیں۔

افتتاحی تقریب میں پریس انفارمیشن بیورو کے پرنسپل ڈائریکٹر جنرل جناب دھیریندر اوجھا؛ پریس انفارمیشن بیورو کے پرنسپل ڈائریکٹر جنرل اور پریس رجسٹرار جنرل آف انڈیا (پی آر جی آئی) جناب یوگیش کمار باویجا؛ اور وزارتِ اطلاعات و نشریات کے جوائنٹ سکریٹری (نشریات و انتظامیہ) جناب پرتھول کمار نے شرکت کی۔
اسکرپٹ پچنگ لیب کا انعقاد 21 سے 23 نومبر 2026 تک کیا جا رہا ہے۔ اس سالانہ پہل کے ذریعے پرسار بھارتی ابھرتے ہوئے قلم کاروں کو فلمی صنعت کے ماہرین سے جوڑنے اور انہیں اپنی تخلیقی کہانیوں کو فیچر فلموں، دستاویزی فلموں اور مختصر فلموں کی شکل میں پردۂ سیمیں تک پہنچانے کے مواقع فراہم کرنے کا خواہاں ہے۔
’پیج سے پچ تک‘ کے فاتحین کا اعلان 24 نومبر 2026 کو کیا جائے گا۔


آئی ایف ایف آئی لوئڈ یہاں ملاحظہ کریں:
https://www.pib.gov.in/iffi/57/iffiLoid.aspx?yr=2026&lang=1®=48
******
( ش ح ۔ م ش ع ۔ م ا )
UR. No-8069