गोवा, 20 नोव्हेंबर 2026
राष्ट्रीय चित्रपट उदरगत महामंडळान (NFDC) 57व्या भारतीय आंतरराष्ट्रीय चित्रपट महोत्सवाक (IFFI) दिव्यांग व्यक्ती आनी हालचालींचेर मर्यादा आशिल्ल्या व्यक्तींसयत सगळ्या चित्रपटमोगीखातीर चड सुलभ आनी सर्वसमावेशक करपाच्या उद्देशान ‘स्वयम’ (Svayam) ह्या संस्थे वांगडा भागीदारी केल्या. ह्यो दोनूय संस्था तिसरे फावट एकठांय काम करतात. ह्या आदी 55व्या इफ्फी आनी 18व्या मुंबय आंतरराष्ट्रीय चित्रपट महोत्सवाच्या (MIFF) वेळारय तांणी भागीदारी केल्ली.
अॅक्सेसिबिलिटी पार्टनर म्हणून, स्वयम, महोत्सवाच्या साबार सुवातींचेर प्रवेश सुलभता परीक्षण करता. ह्या परीक्षणांत संभाव्य अडथळे वळखून, अभ्यागतांक सुरक्षित, आनीकय आरामदायी आनी स्वतंत्रपणान प्रवेश सुनिश्चित करपाखातीर, गरजेचे उपाय सुचयतले.
ह्या भागीदारींत महोत्सवाच्या स्वयंसेवकांखातीर अपंगत्व (दिव्यांग) आनी प्रवेशयोग्यता ह्या विषयांचेर संवेदनशीलता कार्यशाळांचोय आस्पाव आसा. ह्या सत्रांनी आदरपूर्वक संवाद, सर्वसमावेशक सहाय्य आनी सहभागा संबंधित विशिष्ट गरजो आशिल्ल्या व्यक्तींक व्यावहारिक पद्धतीन मजत कशी करची, हाचेर लक्ष केंद्रीत करतलें.

'अॅक्सेसिबिलिटी सिम्युलेशन झोन' हो अभ्यागतांक आनी महोत्सवाकडेन संबंदीत व्यक्तींक, दिव्यांग व्यक्ती आनी हालचालींचेर मर्यादा आशिल्ल्या व्यक्तींक दैनंदिन जिणेत येवपी अडचणी समजून घेवपाची एक संवादात्मक संदी लेगीत उपलब्ध करून दितलो. समावेशक आनी सगळ्यांक सुलभ अशा सार्वजनिक सुवातींच्या म्हत्वा विशीं जागरूकता, सहानुभूती आनी समज वाडोवप, हो ह्या उपक्रमाचो उद्देश आसा.
ह्या भागीदारी विशीं उलयतना ‘स्वयम’च्यो व्यवस्थापकीय संचालक स्मीनू जिंदाल हाणी म्हळें, “प्रवेशयोग्यता म्हळ्यार फकत रॅम्प बांदप वा भौतिक सुवाती अडथळे मुक्त करप इतलेंच न्हय. तर दर एका मनशाक समाजांत समानतेन वांटो घेवपाखातीर मान, स्वातंत्र्य आनी संदी उपलब्ध करून दिवप. सिनेमा हें एक प्रभावी माध्यम आसा. तें लोकांक एकठांय हाडटा, सीमा ओलांडटा आनी मानवी अणभवांच्या विविधतेचो उत्सव मनयता. देखून, चित्रपट महोत्सव सगळ्यांक समानपणान आपलेपणान वागोवपी आनी सुलभ आसप गरजेचें आसा. 57वो इफ्फी हो एनएफडीसी वांगडा आमचें सहकार्य, समावेशकतेक महोत्सवाच्या अणभवाचो एक अविभाज्य भाग करपाच्या दिकेन म्हत्वाचें पावल आसा. आमी अशा इफ्फीची कल्पना करतात, जंय वय, तात्पुरती दुखापत वा कायमस्वरूपी दिव्यांगत्वाक लागून आशिल्ली हालचालींची मर्यादा, कोणाच्याच चित्रपटाचो आनंद घेवच्या आड येवची ना.”
ह्या उपक्रमाचें म्हत्व अधोरेखित करतना, एनएफडीसीचे व्यवस्थापकीय संचालक श्री. धीरज सिंग हाणी म्हळें, “भारतीय आंतरराष्ट्रीय चित्रपट महोत्सव सिनेमाच्या सार्वत्रिक भाशेचो उत्सव मनयता आनी हो महोत्सव खऱ्या अर्थान सगळ्यांखातीर उक्तो आसप म्हत्वाचें आसा. ‘स्वयम’ वांगडा आमची भागीदारी 57वो इफ्फी महोत्सव सगळ्या चित्रपटमोगीखातीर चड सुलभ, समावेशक आनी सगळ्यांचें समानपणान स्वागत करपाच्या दिशेन एक म्हत्वाचो पांवडो आसा. प्रवेशयोग्य आयोजन स्थळां आनी प्रशिक्षित, संवेदनशील स्वयंसेवकांच्या माध्यमांतल्यान, दर एका व्यक्तीक मान, आराम आनी स्वातंत्रपणान महोत्सवांत वांटो घेवपाक मेळटलें, असें वातावरण तयार करपाचें आमचें उद्दिष्ट आसा. भारतांतल्या समावेशक सांस्कृतिक आनी चित्रपटविषयक कार्यावळींखातीर हो उपक्रम एक अर्थपूर्ण आनी आदर्श असो मापदंड प्रस्थापित करतलो, अशी आमकां आस्त आसा.”
हें सहकार्य भारताच्या ह्या प्रतिष्ठित चित्रपट महोत्सवाक खऱ्या अर्थान समावेशक करपाच्या दिकेन मारील्लें आनीक एक म्हत्वाचें पावल आसा. ह्या उपक्रमांतल्यान दिव्यांग व्यक्ती आनी मर्यादित गतिशीलता आशिल्ल्या व्यक्तींक मानान आनी स्वतंत्रपणान महोत्सवांत वांटो घेवपाची, हेरां कडेन जोडून रावपाची आनी कथाकथनाच्या अद्भुत अणभवाचो आनंद घेवपाची संद मेळटली.
IFFILOID – Volume 5, Issue 1 : 20 November 2026
* * *
पीआयबी मुंबई | मनाली प्रभूगांवकर/मोनाली प्रभू/दर्शना राणे