Ha ka:
15 NOV 2026 12:19PM by PIB Shillong
Ka NITI Aayog kan sdang ïa ki san tylli ki Phrang Ai Jinghikai kiba ha ka kyrdan jong ka Ri ha ka 17 tarik u Naiwieng 2026, ban shim jinghikai na ki 25 tylli ki snem jong u Myntri Rangbahduh, u Shri Narendra Modi, kum u Nongïalam jong ka Sorkar. Kane kan pule bniah ïa kine ki 25 snem jong ka jingshakri paidbah, khnang ba ki jinghikai kiba mih na kane kin kylla long ka bynta jong ka jingtip ba ïasam lang jong ka ri baroh kawei. Kan sa lum bad pynrung jingthoh ïa ki jingïathuh bad ki jingshem jong kito kiba la don bynta ha kane ka jingïaid lynti, bad ban pynkylla ïa kine ki jingtip baroh sha ki jinghikai kiba ai jingmyntoi lang ïa baroh.
U Myntri Rangbahduh u la shimti ïa ka shuki kum u Myntri Rangbah jong ka jylla Gujarat ha ka 7 tarik u Risaw, 2001. Hadien ba u la shakri palat ïa ka khatar snem kum u Myntri Rangbah jong katei ka jylla, u la shimti ïa ka shuki kum u Myntri Rangbahduh jong ka India ha u bnai Jymmang, 2014, bad mynta u la ïaid ha ka jingshakri jong ka sien treikam kaba lai. Da ka jingkynjoh sha ka 25 snem ka jingshakri myn ha ka 7 tarik u Risaw, 2026, kane ka la sakhi ïa ka por treikam kaba jrong tam kaba la bteng khlem jingdkut kum u nongïalam ba ha khlieh duh jong ka Sorkar ba la jied da ki paidbah ha India.
Ha baroh kane ka por, ka rukom synshar paidbah ka la shong nongrim ha ka jingmut jong ka Pradhan Sevak, ha kaba la shim ba man la kawei pa kawei ka shuki bad ka tnat treikam jong ka Sorkar ki don na ka bynta ban shakri ïa ki paidbah. Ka Antyodaya ka la thew ïa ka jingroi jong uwei pa uwei u briew ruh, katba ka Jan Bhagidari ka la pynlong ïa ka roi ka par kum ka jingïaid lynti kaba ïashimbynta lang da ki paidbah. Ki nongrim saiñpyrkhat kum ka Sabka Saath, Sabka Vikas, Sabka Vishwas, Sabka Prayas ki la nang pynkhlaiñ shuh shuh ïa kane kum ka sienjam treilang ha ka Ri. Ka thong jong ka Viksit Bharat ha shuwa u snem 2047 ka la nang plie lad bad pynïar shuh shuh ïa kane, da kaba kylli ïa man ki shlem ba kin pyrkhat bad kin trei na ka bynta ka India katba ka nang jam sha ka jingdap 100 snem jong ka jinglaitluid.
Bun na ki jinghikai kiba ka India ka la ïoh halor ka jingsynshar bad ka jingpynïaid Ri ha kane ka kyrdan kaba heh, la ïohpdiang na ki jingshem bad ki jingïathuh jong ki ophisar, ki shlem treikam bad ki paidbah kiba la shim ïa kine ki rai bad kiba la pyntreikam ïa ki haduh kaba kut. Kine ki sienjam ai jinghikai kin sa lum bad pynrung jingthoh ïa ki jingïathuh bashisha hi ki jong ki bad kan bishar bniah ïa ki da ka rukom wad bniah kaba shong nongrim ha ka jingstad ki jingpule. Yn sa pynkylla ïa kine sha ki tiar kiban ai jinghikai, kiban kynthup ïa ki jingpule bniah halor ki jingjia (case studies), ki kot wadbniah bad ki tiar ba pyndonkam haba hikai, na ka bynta ki nongïaleh eksamin kam pynïaid sorkar, ki jaka ai jinghikai, ki skulbah, ki khynnah pule bad na ka bynta ki paidbah hi baroh kawei.
Kita ki san tylli ki Phrang Ai Jinghikai yn sa pynleit jingmut halor kine ki phang ba ïadei bad ka Jingpynïaid ïa ka Sorkar: “Leadership as Mission” ha u Naiwieng 2026, “Governance as Delivery” ha u Kyllalyngkot 2027, “Development as Inclusion” ha u Ïaïong 2027, “Civilisational Identity” ha u Naitung 2027 bad “India as a Global Force” ha u Nailur 2027.
Kane ka Phrang Ai Jinghikai ba nyngkong “Leadership as Mission”, yn sa pynlong ha Bharat Mandapam, New Delhi ha ka 17 tarik u Naiwieng 2026. Kan sa pule ïa ka jingïalam lyngba ki rai bakyrpang ba la shim kiba la paw shabar bad ha kata ka rukom ha kaba kito ki jingrai ba la shim la pynkylla kum ki jingmih sha ki paidbah nongshong shnong.
U Shri Anurag Jain, u Chief Executive Officer, ka NITI Aayog, un sa pdiang ïa ki nongwan ïashimbynta bad u Shri Ashok Kumar Lahiri, u Vice Chairman, ka NITI Aayog, un sa ai ïa ka jingkren sdang. U Dr. P.K. Mishra, u Principal Secretary sha u Myntri Rangbahduh, un sa ai ïa ki jingkren maitphang, bad u Shri Uday Kotak, u Founder, ka Kotak Mahindra Bank, ruh un sa ai katto katne ki kyntien na ka liang jong u. U Dr. R. Balasubramaniam, u Dkhot ka NITI Aayog, un sa pyni ïa ka rukom pynïaid jong kane ka Phrang Ai Jinghikai.
Saw tylli ki jingjia ba kongsan kiba yn sa sam da kito kiba la donbynta hi dalade ha ka por ba shim ïa ki rai bakongsan, kin sa long ka pdengduh jong ka sngi. U Shri Rajeev Topno, u Additional Chief Secretary, jong ka sorkar Gujarat, un sa kren halor ka jingtei biang ïa ka Kutch hadien ka jingkhynñiuh jumai jong u snem 2001. Ka Ms. Preeti Sudan, ka Health Secretary barim ka sorkar pdeng kaba dei ruh ka Chairman barim jong ka UPSC, kan sa kren halor kumno la leh haba la wan lynshop ka khlam Covid-19. U Shri Shailesh Kumar Singh, Secretary barim, ka Ministry of Rural Development, un sa kren halor ka sienjam Lakhpati Didi. U Dr. S. Somanath, u Chairman barim ka ISRO, un sa sam ïa ki jingshem jong u halor ka jingplie ïa ka ïoh ka kot ha ka haw haw.
Ka jingïathir nia halor ka “Leadership for Viksit Bharat” yn sa pynïaid da u Shri B.V.R. Subrahmanyam, u Chief Executive Officer, barim ka NITI Aayog. Ki riew shemphang kiban wan ki kynthup ïa u Shri Arvind Kumar Sharma, u Cabinet Minister for Urban Development and Energy, jong ka Sorkar Uttar Pradesh, u Prof. Vishal Gupta, jong ka Indian Institute of Management Ahmedabad, ka Ms. Debjani Ghosh, ka dkhot bakyrpang jong ka NITI Aayog, bad ka Ms. Narayani Bhatia, ka Joint Magistrate, jong ka Hardoi.
U Dr. T.V. Somanathan, u Cabinet Secretary, un sa pynkut ïa kane ka jingai jinghikai bad un sa pyllait ïa ka Karmayogi Sankalpa ha ka rynsan iGOT Karmayogi. Lyngba ka Sankalpa, ki civil servant ruh ha kylleng ka Ri kin sa kular ban wanrah ïa ka jingkylla kaba kyrpang ha ka jingpyrshang jong ka jingïalam jong ki.
Haduh kumba 900 ngut ki nongïashimbynta la khmihlynti ba kin wan ha kane ka workshop, ha kaba 250 ngut kin sa shimbynta beit beit ha ki jingïapyni nia. Kine kin sa kynthup ïa ki 150 ngut ki ophisar sorkar, kiba kynthup ïa ki Secretaries bad ki heh ophisar jong ka Sorkar Pdeng bad ka Sorkar Jylla bad ki District Collector jong ki District ba don ïa ka jingangnud. Ki nongïashimbynta kin sa kynthup ruh ïa ki 25 ngut ki khynnah pule jong ki shlem pule bahakhmat bad ki skulbah, bad 50 tylli ki kynhun ïatreilang bad ki nongïoh jingmyntoi jong ki national flagship schemes. Ka jingïaphylliew jingmut ha ki kynhun yn sa pynïaid da ki 25 tylli ki nongpynbiang case kiba la shah hikai hapoh jong ka sienjam Amrit Gyaan Kosh jong ka Capacity Building Commission. Ïa baroh ki jingïakren yn sa pyni hapoh jong ka rynsan iGOT Karmayogi.
***