નીતિ આયોગ દ્વારા સરકારના વડા તરીકે પ્રધાનમંત્રી શ્રી નરેન્દ્ર મોદીના 25 વર્ષના કાર્યકાળમાંથી દેશ માટે બોધપાઠ મેળવવાના હેતુથી રાષ્ટ્રીય કાર્યશાળા શ્રેણીનું આયોજન 

નીતિ આયોગ સરકારના વડા તરીકે પ્રધાનમંત્રી શ્રી નરેન્દ્ર મોદીના પચીસ વર્ષમાંથી બોધપાઠ લેવા માટે 17 નવેમ્બર 2026ના રોજ પાંચ રાષ્ટ્રીય કાર્યશાળાઓની શ્રેણી શરૂ કરશે. આ શ્રેણી જાહેર નેતૃત્વના આ ક્વાર્ટર સદીના (પચીસ વર્ષના) સમયગાળાનો અભ્યાસ કરશે જેથી તેના બોધપાઠ રાષ્ટ્રના સહિયારા જ્ઞાનનો ભાગ બને. તે આ યાત્રાનો ભાગ રહેલા લોકોના અનુભવોનું દસ્તાવેજીકરણ કરશે અને તેને એવા જ્ઞાનમાં રૂપાંતરિત કરશે જે સૌને લાભદાયી નીવડે.

પ્રધાનમંત્રીએ 7 ઓક્ટોબર 2001ના રોજ ગુજરાતના મુખ્યમંત્રી તરીકે કાર્યભાર સંભાળ્યો હતો. તે પદ પર બાર વર્ષથી વધુ સમય સુધી સેવા આપ્યા બાદ, તેમણે મે 2014માં ભારતના પ્રધાનમંત્રી તરીકે કાર્યભાર સંભાળ્યો હતો અને હાલમાં તેઓ સતત ત્રીજી મુદત માટે સેવા આપી રહ્યા છે. 7 ઓક્ટોબર 2026ના રોજ પચીસ વર્ષ પૂર્ણ થવા સાથે, આ ભારતમાં ચૂંટાયેલી સરકારના વડા તરીકેનો સૌથી લાંબો સતત કાર્યકાળ દર્શાવે છે. આ સમગ્ર સમયગાળા દરમિયાન, શાસન 'પ્રધાન સેવક'ના વિચાર પર આધારિત રહ્યું છે, જે હેઠળ સરકારની દરેક કચેરી નાગરિકોની સેવા કરવા માટે અસ્તિત્વ ધરાવે છે. અંત્યોદયે અંતિમ વ્યક્તિના સ્તરે પ્રગતિનું માપદંડ નક્કી કર્યું છે. જનભાગીદારીએ વિકાસને એક જનઆંદોલન બનાવ્યું છે. 'સબકા સાથ, સબકા વિકાસ, સબકા વિશ્વાસ, સબકા પ્રયાસ'ના સિદ્ધાંતે આને એક સહિયારા રાષ્ટ્રીય ઉપક્રમ તરીકે વધુ મજબૂત બનાવ્યું છે. 2047 સુધીમાં વિકસિત ભારતના લક્ષ્યે આ અભિગમને એક લાંબી ક્ષિતિજ પૂરી પાડી છે, જે દરેક સંસ્થાને સ્વતંત્રતાની શતાબ્દી નજીક આવી રહી છે ત્યારે ભારત માટે આયોજન કરવા અને કાર્ય કરવા જણાવે છે.

આ સ્તરે શાસન કરવા વિશે ભારતે જે કંઈ શીખ્યું છે તેમાંથી ઘણું બધું એવા અધિકારીઓ, સંસ્થાઓ અને નાગરિકોના અનુભવમાં સમાયેલું છે જેમણે આ નિર્ણયો લીધા અને તેને પાર પાડ્યા. આ શ્રેણી તેમના પ્રત્યક્ષ અનુભવોની નોંધ લેશે અને શૈક્ષણિક ચોકસાઈ સાથે તેમની તપાસ કરશે. તે સિવિલ સર્વન્ટ્સ, તાલીમ સંસ્થાઓ, યુનિવર્સિટીઓ, વિદ્યાર્થીઓ અને વ્યાપક જનતા માટે કેસ સ્ટડીઝ, સંશોધન પત્રો અને શિક્ષણ સામગ્રી સહિત સંસ્થાકીય શિક્ષણ સામગ્રીમાં તેમનો વિકાસ કરશે.

પાંચ રાષ્ટ્રીય કાર્યશાળાઓ નીચેના શાસન વિષયો પર કેન્દ્રિત રહેશે: નવેમ્બર 2026માં “લીડરશીપ એઝ મિશન”, જાન્યુઆરી 2027માં “ગવર્નન્સ એઝ ડિલિવરી”, એપ્રિલ 2027માં “ડેવલપમેન્ટ એઝ ઇન્ક્લુઝન”, જુલાઈ 2027માં “સિવિલાઈઝેશનલ આઈડેન્ટિટી” અને સપ્ટેમ્બર 2027માં “ઈન્ડિયા એઝ અ ગ્લોબલ ફોર્સ”.

પ્રથમ રાષ્ટ્રીય કાર્યશાળા, “લીડરશીપ એઝ મિશન”, 17મી નવેમ્બર 2026ના રોજ ભારત મંડપમ, નવી દિલ્હી ખાતે યોજાશે. તે ચોક્કસ નિર્ણયો કે જેમાં નેતૃત્વ દૃશ્યમાન થાય છે અને જે રીતે તે નિર્ણયો નાગરિકો માટે પરિણામોમાં રૂપાંતરિત થાય છે તેના દ્વારા નેતૃત્વનો અભ્યાસ કરશે. નીતિ આયોગના મુખ્ય કાર્યકારી અધિકારી (CEO) શ્રી અનુરાગ જૈન સહભાગીઓનું સ્વાગત કરશે અને નીતિ આયોગના ઉપાધ્યક્ષ શ્રી અશોક કુમાર લાહિરી પ્રારંભિક સંબોધન કરશે. પ્રધાનમંત્રીના અગ્ર સચિવ ડો. પી.કે. મિશ્રા ઉદ્ઘાટન મુખ્ય વક્તવ્ય આપશે, અને કોટક મહિન્દ્રા બેંકના સ્થાપક શ્રી ઉદય કોટક મુખ્ય વક્તવ્ય આપશે. નીતિ આયોગના સભ્ય ડો. આર. બાલાસુબ્રમણ્યમ કાર્યશાળાની રૂપરેખા રજૂ કરશે.

મહત્વપૂર્ણ નિર્ણયોનો પ્રત્યક્ષ ભાગ રહેલા લોકોના ચાર પ્રત્યક્ષ અનુભવો દિવસનો મુખ્ય ભાગ બનશે. ગુજરાત સરકારના અધિક મુખ્ય સચિવ શ્રી રાજીવ ટોપનો 2001ના ભૂકંપ બાદ કચ્છના પુનઃનિર્માણ પર બોલશે. ભૂતપૂર્વ કેન્દ્રીય આરોગ્ય સચિવ અને UPSCના ભૂતપૂર્વ અધ્યક્ષ સુશ્રી પ્રીતિ સૂદન કોવિડ-19 સામેના પ્રતિભાવ પર બોલશે. ગ્રામીણ વિકાસ મંત્રાલયના ભૂતપૂર્વ સચિવ શ્રી શૈલેષ કુમાર સિંહ લખપતિ દીદી પર બોલશે. ISROના ભૂતપૂર્વ અધ્યક્ષ ડો. એસ. સોમનાથ અવકાશ અર્થતંત્રને ખુલ્લું મૂકવા અંગે પોતાના અનુભવો શેર કરશે.

“વિકસિત ભારત માટે નેતૃત્વ” વિષય પર પેનલ ચર્ચાનું સંચાલન નીતિ આયોગના ભૂતપૂર્વ મુખ્ય કાર્યકારી અધિકારી (CEO) શ્રી બી.વી.આર. સુબ્રહ્મણ્યમ દ્વારા કરવામાં આવશે. પેનલિસ્ટ્સમાં ઉત્તર પ્રદેશ સરકારના શહેરી વિકાસ અને ઊર્જા કેબિનેટ મંત્રી શ્રી અરવિંદ કુમાર શર્મા, ઇન્ડિયન ઇન્સ્ટિટ્યૂટ ઓફ મેનેજમેન્ટ અમદાવાદના પ્રો. વિશાલ ગુપ્તા, નીતિ આયોગના ડિસ્ટિંગ્વિશ્ડ ફેલો સુશ્રી દેબજાની ઘોષ અને હરદોઈના જોઈન્ટ મેજિસ્ટ્રેટ સુશ્રી નારાયણી ભાટિયાનો સમાવેશ થશે.

કેબિનેટ સચિવ ડો. ટી.વી. સોમનાથન કાર્યશાળાનું સમાપન કરશે અને iGOT કર્મયોગી પ્લેટફોર્મ પર કર્મયોગી સંકલ્પ લોન્ચ કરશે. સંકલ્પ દ્વારા, દેશભરના સિવિલ સર્વન્ટ્સ તેમની પોતાની નેતૃત્વ પ્રણાલીમાં ચોક્કસ પરિવર્તન લાવવા માટે પ્રતિબદ્ધ થશે.

કાર્યશાળામાં આશરે 900 સહભાગીઓ હાજરી આપે તેવી અપેક્ષા છે, જેમાંથી 250 વિચાર-વિમર્શમાં સીધો ભાગ લેશે. આમાં કેન્દ્ર અને રાજ્ય સરકારોના સચિવો અને વરિષ્ઠ અધિકારીઓ તથા મહત્વાકાંક્ષી જિલ્લાઓના જિલ્લા કલેક્ટરો સહિત 150 સરકારી અધિકારીઓનો સમાવેશ થશે. સહભાગીઓમાં અગ્રણી સંસ્થાઓ અને યુનિવર્સિટીઓના 25 વિદ્યાર્થીઓ, અને રાષ્ટ્રીય ફ્લેગશિપ યોજનાઓના 50 સામુદાયિક ભાગીદારો અને લાભાર્થીઓનો પણ સમાવેશ થશે. જૂથ ચર્ચાઓનું માર્ગદર્શન ક્ષમતા નિર્માણ આયોગની અમૃત જ્ઞાન કોષ પહેલ હેઠળ પ્રશિક્ષિત 25 કેસ ફેસિલિટેટર્સ દ્વારા કરવામાં આવશે. કાર્યવાહીનું જીવંત પ્રસારણ iGOT કર્મયોગી પ્લેટફોર્મ પર કરવામાં આવશે.

SM/BS/JT

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com