اطلاعات و نشریات کی وزارت نے آج نئی دہلی میں ریاستوں اور مرکز کے زیر انتظام علاقوں کے اطلاعات و تعلقات عامہ کے محکموں کے سکریٹریوں کے ساتھ ایک قومی کانفرنس کا انعقاد کیا۔ اس کانفرنس میں مرکز اور ریاستوں کے سینئر اہلکار ایک ساتھ جمع ہوئے تاکہ اہم اقدامات پر غور و خوض کیا جا سکے اور اطلاعات، نشریات، میڈیا اور تخلیقی معیشت کے شعبوں میں تال میل کو مضبوط بنایا جا سکے۔

اطلاعات و نشریات کی وزارت کے سکریٹری، جناب چنچل کمار نے کانفرنس کی صدارت کی اور غور و خوض کے دوران شریک ریاست/مرکز کے زیر انتظام علاقوں کے اہلکاروں کے ساتھ تبادلہ خیال کیا۔ وزیر اعظم کے وژن کا حوالہ دیتے ہوئے، جس کے تحت بھارت کی نرم طاقت اور تخلیقی معیشت کو قومی ترقی کی سات دھاروں، سپت دھارا، میں شامل کیا گیا ہے، سکریٹری نے بھارت کی وسیع تخلیقی صلاحیتوں کو بروئے کار لانے اور عوامی مواصلات کو مضبوط بنانے کے لیے مرکز اور ریاستوں کے درمیان مضبوط اور زیادہ منظم تعاون کی ضرورت پر زور دیا۔ انھوں نے کہا کہ تخلیقی معیشت، جس میں ثقافت، تخلیقی صلاحیت اور تجارت شامل ہے، روزگار پیدا کرنے، سرمایہ کاری کو راغب کرنے اور بھارت کے عالمی اثر و رسوخ کو بڑھانے کی صلاحیت رکھتی ہے۔

ریاستوں اور مرکز کے زیر انتظام علاقوں کی متنوع طاقتوں کو اجاگر کرتے ہوئے، سکریٹری نے کہا کہ تخلیقی معیشت کی ترقی کے لیے کوئی ایک ماڈل نہیں ہو سکتا۔ انھوں نے زور دیا کہ ہر ریاست اور مرکز کے زیر انتظام علاقے کی ثقافتی طاقتوں، ادارہ جاتی صلاحیتوں اور علاقائی ہنر کو اس کی تخلیقی صلاحیتوں کو بروئے کار لانے کے لیے استعمال کیا جانا چاہیے۔

انھوں نے مرکز-ریاست کے درمیان بہتر تعاون کے شعبوں کو بھی اجاگر کیا، جن میں بنیادی ڈھانچہ، کاروبار کرنے میں آسانی، صلاحیت سازی، علاقائی مواد اور تخلیقی ایکو سسٹم شامل ہیں۔ ویوز 2027، ویوز بازار، ویو ایکس اور کریئیٹ اِن بھارت چیلنجز جیسے قومی پلیٹ فارم ملک بھر کے تخلیق کاروں اور اسٹارٹ اپس کو بازاروں، سرمایہ کاروں، ٹیکنالوجی اور عالمی شراکت داری تک زیادہ رسائی فراہم کر سکتے ہیں۔

شریک ریاست اور مرکز کے زیر انتظام علاقوں کے اہلکاروں نے مختلف اقدامات کے نفاذ کے حوالے سے اپنے تجربات اور خدشات کا اظہار کیا اور وزارت کے ساتھ تال میل اور مشغولیت کو مزید مضبوط بنانے کے طریقوں پر تبادلہ خیال کیا۔ ریاستی سطح پر صلاحیت سازی کی ضرورت کو بھی اجاگر کیا گیا، جس میں ریاستوں نے بہتر مواصلات، مشغولیت اور باقاعدہ کانفرنسوں کے ذریعے وزارت سے زیادہ حمایت کی درخواست کی۔ اہلکاروں نے وزارت کے ساتھ زیادہ قریب سے تعاون کرنے اور اورنج اکانومی کو مضبوط بنانے میں فعال طور پر حصہ لینے کی بھی خواہش کا اظہار کیا۔

کانفرنس کے دوران کئی اہم موضوعات پر تبادلہ خیال کیا گیا، جن میں ریاستی حکومتوں کے ذریعے کیبل آپریٹرز کے لیے رائٹ آف وے (RoW) میکانزم کا نفاذ؛ ویوز 2027 کا روڈ میپ؛ ویوز بازار اور مارکیٹ تک رسائی کو مضبوط بنانا؛ پبلک سروس براڈکاسٹنگ کے بنیادی ڈھانچے کی توسیع؛ ویوز او ٹی ٹی پلیٹ فارم پر صارف کے ذریعے تیار کردہ تخلیقی مواد کو فروغ دینا؛ انڈین سائن ہب (ICH) اور فلم فیسیلیٹیشن آفس (FFO) پورٹلز کا دو طرفہ انضمام؛ اور فلم شوٹنگ اور لائیو ایونٹس کی اجازت کے لیے سنگل ونڈو ICH پورٹل کو اپنانا شامل ہیں۔

کانفرنس میں مواد کی مشترکہ تیاری، ریاست کے مخصوص پروگرامنگ اور عوامی رسائی کو بڑھا کر پبلک سروس براڈکاسٹنگ کو مضبوط بنانے؛ لائیو ایونٹس کے شعبے کو فروغ دینے؛ آئی آئی ایم سی کی تربیتی سہولیات کے ذریعے ڈی آئی پی آر افسران کی صلاحیت سازی؛ پریس سیوا پورٹل کے ذریعے پریس اینڈ رجسٹریشن آف پیریوڈیکلز (پی آر پی) ایکٹ، 2023 کے تحت ڈیجیٹل فریم ورک میں منتقلی؛ اور سمگرہ شکشا فریم ورک کے تحت ریاستی حکومتوں کو کتابوں کی فراہمی کے ذریعے لائبریریوں کو مضبوط بنانے پر بھی غور و خوض کیا گیا۔

کانفرنس میں پبلک سروس براڈکاسٹنگ، لائیو ایونٹس کے شعبے، ڈی آئی پی آر افسران کی صلاحیت سازی، میڈیا اور اشاعتی شعبے میں ڈیجیٹل تبدیلی اور عوامی رسائی کے اقدامات سے متعلق مختلف مسائل پر بھی غور و خوض کیا گیا۔

سکریٹری نے پی آئی بی کے علاقائی دفاتر، ریاستی اطلاعات و تعلقات عامہ کے محکموں، اور دوردرشن اور آکاشوانی کی علاقائی اکائیوں کے درمیان ریاست کے مخصوص مواد اور رسائی کے لیے قریبی تال میل کا بھی مطالبہ کیا۔ انھوں نے اعادہ کیا کہ وزارت تخلیقی معیشت کو مضبوط بنانے اور عوامی مواصلات کو بہتر بنانے کے لیے نئے خیالات، ریاست کی قیادت میں اقدامات اور شراکت داری کے ماڈلز کے لیے کھلی ہے۔

اس کانفرنس میں اطلاعات و نشریات کی وزارت کے سینئر اہلکاروں کے ساتھ ساتھ ملک بھر کی ریاستوں اور مرکز کے زیر انتظام علاقوں کے اطلاعات و تعلقات عامہ کے سکریٹریوں اور نمائندوں نے شرکت کی، جو مرکز اور ریاستوں کے درمیان قریبی تال میل اور مشترکہ عزم کا غماز ہے۔

***

(ش ح - ع ا)

U.No. 2600