Ka Tnad Information & Broadcasting ka la pynlong ia ka National Conference bad ki Secretary jong ki Tnad Information and Public Relations jong ki jylla bad ki Union Territory ha nongbah New Delhi mynta ka sngi. Ha kane ka jingialang la iadonlang ki heh ophisar na ka Sorkar Pdeng bad ki Jylla ban iamir jingmut halor ki sienjam ba kongsan bad ban pynkhlain ia ka jingiatreilang ha ki kam ai jingtip, ka jingpynbna paidbah, ki media bad ka ioh ka kot kaba iadei bad ka kam saindur.

U Secretary ka Tnad Information & Broadcasting u Chanchal Kumar, u la pynïaid ïa kane ka jingialang bad u la ïakren ruh bad ki ophisar jong ka Jylla/UT kiba la ïashim bynta ha ki jingïaphylliew jingmut. Haba kren shaphang ka jingthmu jong u Myntri Rangbahduh ba donburom, ha kaba la buh ïa ka bor bad ka ïoh ka kot ba iadei bad ka kam saindur jong ka India hapdeng ki Saptdhara, ki hynniew tylli ki lad jong ka jingkiew shaphrang jong ka ri, u Secretary u la ban jur ïa ka jingdonkam jong ka jingïatreilang kaba kham khlaiñ bad kaba kham ryntih hapdeng ka sorkar Pdeng bad ki Jylla ban pyndonkam ïa ka bor ba iar jong ka India bad ban pynkhlain ia ka jingai jingtip paidbah. U la ong ba ka ioh ka kot kaba iadei bad ka kam saindur, kaba kynthup ia ka kolshor, ka kam saindur bad ka khaii pateng, ka don ka lad ban pynmih ia ki lad ioh kam ioh jam, ban khring ia ki nongbei tyngka bad ban kyntiew ia ka bor jong ka India ha ka pyrthei.

Haba ban jur ia ki jingkhlain bapher bapher jong ki Jylla bad ki Union Territory, u Secretary u la ong ba ym lah ban don kawei ka rukom na ka bynta ka jingkiew shaphrang jong ka ioh ka kot kaba iadei bad ka kam saindur. U la ban jur ba dei ban pyndonkam ïa ki bor ha ka kolshor, ki bor jong ki jaka treikam bad ka sap jong man la ka Jylla bad ka Union territory ban pynurlong ïa ka lad saindur jong ka.

U la ban jur ruh ïa ki bynta ban kyntiew ïa ka jingïatreilang hapdeng ka Sorkar Pdeng bad ki Jylla, kynthup ïa ki jingdon jingem, ka jingsuk ban sdang ïa ki kam, ka jingkyntiew ia ka bor treikam, ki prokram kiba iadei bad ki thain bad ki kam saindur. Ki rynsan jong ka ri kum ka WAVES 2027, ka WAVES Bazaar, ka WaveX bad ka Create in India Challenges ki lah ban ai ia ki nongsaindur bad ki start-up na kylleng ka ri ka lad kaba kham heh ban ioh ia ki iew, ki nongbei tyngka, ka teknoloji bad ki jingiatreilang ha ka pyrthei.

Ki ophisar jong ka Jylla bad UT kiba ïashim bynta ki la ïasam ïa ki jingshem bad ki jingeh jong ki ha kaba ïadei bad ka jingpyntreikam ïa ki sienjam bapher bapher bad ki la ïakren ïa ki lad ki lynti ban pynkhlain shuh shuh ïa ka jingïatreilang bad ka Tnad. La iakren ruh shaphang ka jingdonkam ban kyntiew ia ka bor treikam ha ki Jylla, ha kaba ki Jylla ki pan ia ka jingkyrshan kaba radbah na ka Tnad lyngba ka jingkyntiew ia ka jingai jingtip, ka jingiatreilang bad ki jingialang ba man ka por. Ki ophisar ki la pynpaw ruh ïa ka jingkwah jong ki ban ïatreilang kham jan bad ka Tnad bad ban ïashim bynta shitrhem ban pynkhlaiñ ïa ka ioh ka kot na ki kam saindur.

Ha kane ka jingialang, la pynlong ia ki jingiamir jingmut halor ki katto katne ki phang kiba kongsan, kynthup ia ka jingpyntreikam ia ka rukom treikam Right of Way (RoW) na ka bynta ki nongpynbiang cable da ki Sorkar Jylla; ka jingpynkhreh na ka bynta ka WAVES 2027; ka jingpynkhlaiñ ïa ka WAVES Bazaar bad ka jingïoh rung sha ki ïew ki hat; ka jingpynheh ia ki jingdon jingem ban ai jingtip paidbah; ka jingkyntiew ia ki prokram ba la shna da ki nongpyndonkam ha ka rynsan Waves OTT; ka jingpyniasoh ia ki rynsan Indian Cine Hub (ICH) bad Film Facilitation Office (FFO); bad ka jingpdiang ia ka rynsan single-window ICH na ka bynta ki jingioh jingbit ban ring phlim bad ki jingpyni live ia ki prokram.

Ka jingialang ka la iakren ruh ban pynkhlain ia ka jingpynbna paidbah lyngba ka jingpynmih lang ia ki prokram, ki prokram ba kyrpang jong ki Jylla bad ka jingkyntiew ia ka jingai jingtip sha ki paidbah; ka jingkyntiew ia ka kam pyni live ia ki prokram; ka jingkyntiew ia ka bor treikam jong ki ophisar DIPR lyngba ki lad ai jinghikai jong ka IIMC; ka jingkylla sha ka rukom treikam digital hapoh ka Press and Registration of Periodicals (PRP) Act, 2023 lyngba ka Press Sewa Portal; bad ka jingpynkhlain ia ki jaka buh kot lyngba ka jingpynpoi ia ki kot sha ki Sorkar Jylla hapoh ka rukom treikam Samagra Shiksha.

Ka jingialang ka la iamir jingmut ruh halor ki mat kiba bun kiba iadei bad ka jingai jingtip sha ki paidbah, ka kam pyni live ia ki prokram, ka jingkyntiew ia ka bor treikam ki ophisar jong ka DIPR, ka jingpynkylla digital ha ka kam media & jingpynmih prokram bad ki sienjam ai jingtip sha ki paidbah.

U Secretary u la kyntu ruh ia ka jingiatreilang kaba jan hapdeng ki Regional Office jong ka PIB, ki Tnad Information and Public Relations jong ka jylla, bad ki regional unit jong ka Doordarshan bad Akashvani na ka bynta ki prokram ba kyrpang ba iadei bad ki jylla bad ka jingpynsaphriang jingtip. U la pynpaw biang ba ka Tnad ka kloi ban pdiang ia ki jingmut thymmai, ki sienjam ba ialam da ka Jylla bad ki rukom iatreilang ban pynkhlain ia ka ioh ka kot ba iadei bad ka kam saindur bad ban kyntiew ia ka jingai jingtip sha ki paidbah.

Ha kane ka jingialang la sakhi ïa ka jingïashim bynta na ki heh ophisar jong ka Tnad Information & Broadcasting, ryngkat ki Secretary I&PR bad ki nongmihkhmat na ki Jylla bad ki Union Territory ha kylleng ka ri, kaba pyni ïa ka jingïatreilang kaba jan bad ka jingïatrei lang hapdeng ka Sorkar Pdeng bad ki Jylla.

****