প্রেস ইনফোর্মেসন ব্যুরো (পি.আই.বি.) না ভারত লৈঙাক্কী মপুং ওইবা ঈ-পাউ শন্দোক্নবা এজেন্সী ওইনা, তোঙান তোঙানবা মেদিয়া প্লেতফোর্মশিংগী খুত্থাঙদা মতম চানা, অচুম্বা অমসুং মরিক চুম্বা ঈ-পাউ থাদোক্লি। প্রসার ভারতিনা পব্লিক সর্ভিস ব্রোদকাস্তিংগী থৌওং পাঙথোক্নবা মরুওইবা শক্লোন লৌরি। ঈ-পাউশিং তোঙান তোঙানবা ফম্পাকশিং শীজিন্নদুনা লম-লমগী লোল অমসুং লোলথৈশিং য়াওনা লোল কয়াদা ঈ-পাউ শন্দোক্লি।

লৈঙাক্না মাগী থৌরম অমসুং খুজিল থৌরাংশিংগা মরী লৈনবা অরানবা পাউশিং লাকশিন্নবা পি.আই.বি. দা ফেক্ত চেক য়ুনিত (এফ.সি.য়ু.) অমা লিংখৎলে। এফ.সি.য়ু.না মওং মরিল নাইবা ফেক্ত-চেক্কিং প্রোসেস অমগী খুত্থাঙদা লৈঙাক্কী মন্ত্রালয়শিং, দিপার্তমেন্তশিং, পি.এস.য়ু.শিং অমসুং অতৈ কেন্দ্র লৈঙাক্কী লুপশিংগা মরী লৈনবা ৱাফমশিংগী অচুম চুমদা তাক্লি। মসিনা তোঙান তোঙানবা ফম্পাকশিংগী খুত্থাঙদা অচুম্বা ঈ-পাউশিং শন্দোক্লি।

দুরদর্শন অমসুং আকাসবানিনা মখা তানা মখোয়গী পাউগী বুলেত্তিন, থৌরমশিং অমসুং দিজিতেল প্রোগ্রামশিংগী খুত্থাঙদা অচুম্বা ঈ-পাউশিং শন্দোক্লি। দিদি নিউজনা থাজবা য়াবা সোর্স কয়াগী খুত্থাঙদা অকনবা ফেক্ত-চেক্কিং, ক্রোস-ভেরিফিকেসনগী খুত্থাঙদা অমসুং পাউ শন্দোকত্রিঙৈদা ইদিতরিএল স্ক্রুতিনী য়াওবা মরোল নাইবা ইদিতরিএল মেকানিজম অমা ইন্দুনা চৎলি। পি.আই.বি. ফেক্ত চেক কন্তেন্ত অসি অরানবা পাউ অমসুং অরানবা ৱাফমশিং থেংননবগীদমক দুরদর্শন অমসুং আকাসবানি নিউজ অমসুং দিজিতেল প্লেতফোর্মশিংগী খুত্থাঙদা চাং নাইনা হাপ্লি।

লৈঙাক্না ইনফোর্মেসন তেক্নোলোজী এক্ত, ২০০০ গী মখাদা ইনফোর্মেসন তেক্নোলোজী (ইন্তরমেদিয়রী গাইদলাইন্স এন্দ দিজিতেল মেদিয়া ইথিক্স কোদ) রুল্স, ২০২১ ফোঙখ্রে। রুল্স অসিনা ইন্তরমেদিয়রশিংগী ইনগদবা ৱাফমশিং পীরি, দিজিতেল নিউজ অমসুং ও.তি.তি. প্লেতফোর্মশিংগী পব্লিসরশিংগী কোদ ওফ ইথিক্স অমা পীরি। মসিনা পব্লিসরশশিংগী সেল্ফ-রিগুলেসন, সেল্ফ-রিগুলেসন বোদিজ অমসুং কেন্দ্র লৈঙাক্কী ওভরসাইত মেকানিজম অমা য়াওবা মরোল অহুম নাইবা গ্রীভান্স রিদ্রেসেল মেকানিজম অমা শেম্লি।

লৈঙাক্না দিভেলপমেন্ত, কম্ম্যুনিকেসন এন্দ দিসেমিনেসন ওফ ফিল্মিক কন্তেন্ত (দি.সি.দি.এফ.সি.) স্কীম, ইন্দিয়া সিনে হব (আই.সি.ঐচ.) অমসুং নেস্নেল ফিল্ম হেরিতেজ মিসন (এন.এফ.ঐচ.এম.) য়াওনা থৌরাং কয়াগী খুত্থাঙদা ফিল্ম অমসুং মেদিয়া সেক্তরবু য়োকখৎলি। দি.সি.দি.এফ.সি. স্কীম্না ফিল্ম ফেস্তিভেল পাঙথোকপা, ইন্দিয়ন সিনেমা য়োকখৎপা, ইন্তরনেস্নেল পার্তিসিপেসন, প্রিজর্ভেসন অমসুং মরী লৈনবা থবক থৌরমশিংদা শেলগী তেংবাং পীরি। ইন্দিয়া সিনে হবনা সিঙ্গল ৱিন্দো মেকানিজম অমগী খুত্থাঙদা ফিল্ম নম্বগী পর্মিসন ফংহল্লি, অমসুং ভারতপু ফিল্ম নম্বগী লমথুংফম অমা ওইনা য়োকখৎলি। এন.এফ.ঐচ.এম.না ভারতকী সিনেমাী লনশিং লীদুনা থম্বা, রেস্তোর, দিজিতাইজ অমসুং অর্কাইব্স তৌবগী থবক পায়খৎলি।

লৈঙাক অসিনা মেদিয়া অমসুং ব্রোদকাস্তিংগী মালেমগী এঙ্গেজমেন্ত মপাঙ্গল কনখৎহন্দুনা মালেমগী থাক্তা মেদিয়া কোওপরেসন শৌগৎলি।

লৈঙাক অসিনা মে ২০২৫ দা মুম্বাইদা অহানবা ৱর্ল্দ ওদিও ভিজুএল এন্দ এন্তরতেনমেন্ত সম্মিত (ৱেব্স) পাঙথোকখ্রে। মসিনা মেদিয়া অমসুং এন্তরতেন্মেন্ত সেক্তরবু “ক্রিএত ইন ইন্দিয়া, ক্রিএত ফোর দি ৱর্ল্দ” গী খুত্থাঙদা ভারতবু কন্তেন্ত শেম্বগী মালেমগী মফম অমা ওইহন্নবগী পান্দমগী মখাদা পুশিল্লক্লে। সম্মিত অসিনা ভারতকী ক্রিএতরশিং, প্রদ্যুসরশিং অমসুং স্তার্তঅপশিংবু লৈবাক ১০০ হেনবদগী মালেমগী বাইয়র, ইনভেস্তর, ও.তি.তি. প্লেতফোর্ম অমসুং তেক্নোলোজী লুচিংবশিংগী পুন্না থবক তৌমিন্ননবা ফম্পাক অমা পীরি।

ব্রোদকাস্তিং সেক্তরদা, প্রসার ভারতিনা মালেমগী ব্রোদকার্তরশিংগা কন্তেন্ত-শেয়রিং এরেঞ্জমেন্ত অমসুং পার্ত্নর ওর্গনাইজেসনশিংগা ব্রোদকাস্তিং এগ্রীমেন্ত তৌনদুনা মালেম পুম্বদা ব্রোদকাস্তিং ওর্গনাইজেসনশিংগা মরী ফনা থম্লি। মসিনা ব্রোদকাস্তিংদা তেংবাংননবগীদমক তোঙান তোঙানবা লৈবাকশিংদগী ব্রোদকাস্তরশিংগা মেমোরেন্দা ওফ অন্দরস্তেন্দিং ৪৮ তৌনদুনা, কন্তেন্ত, প্রোফেস্নেল এক্সপর্তিজ অমসুং খ্বায়দগী ফবা থৌওংশিং তাথোক তাশিন তৌনহল্লি।

ৱাফম অসি ঙসি লোক সভাদা দোক্তর অলোক কুমার সুমন্না হংলকপা ৱাহং অমগী অইবা পাউখুম ওইনা ইনফোর্মেসন অমসুং ব্রোদকাস্তিং অমদি পার্লিয়ামেন্তরী এফ্যার্সকী কেন্দ্র মন্ত্রী দোক্তর এল. মুরুগন্না পীখিবনি।

*****