Ka Tnad kam pohiing (MHA) ka dang buddien bha ia ka jinglong jingman jong ka aiom slap ha kylleng ka ri. Hapoh ka jingialam jong u Myntri Rangbahduh ka ri u Narendra Modi bad ka jingpyniaid jong u Myntri kam pohiing jong ka sorkar pdeng u Amit Shah, ka MHA ka ai baroh ka jingkyrshan kaba donkam sha ki jylla bad ki Union Territory ba shah ktah ha kaba pynbeit ia ki jingeh kiba mih na ka jingjur u slap.

Ha u bnai Naitung, 2026, ka ri ka la mad ia ka jinghap slap kaba jur bad ka jingtwa khyndew ha ki katto katne ki bynta kum ha Nagaland, Arunachal Pradesh, West Bengal, Assam, Gujarat, Maharashtra, Dadar bad Nagar Haveli, Daman, J& K bad kiwei kiwei ki jaka.

Ka Integrated Control Room (ICR-ER) jong ka Tnad kam pohiing ka dang ïatreilang bad kiwei pat ki tnad sorkar pdeng ba kynthup ïa ka India Meteorological Department (IMD), Central Water Commission (CWC) bad ka Indian National Centre for Ocean Information Services (INCOIS) na ka bynta ban pynpoi ïa ki jingpynbna ha ka por kaba biang sha ki State Emergency Operation Centre bad ki District Emergency Operation Centre. Nalor ka jingpynsaphriang ïa ki jingai jingtip lypa ia ki Jylla/UT bad ki District, ka Control Room ka peitngor ïa baroh ki kam pynlait im baroh arphew saw kynta.

Ka National Disaster Response Force (NDRF) ka la trei borbah bad ki tnad Sorkar Jylla, ki pulit ka Jylla bad ki SDRF ha baroh kine ki jaka na ka bynta ki kam pynlait im bad ki kam ai jingïarap ban iada ïa ka jingim jong ki briew. Ka NDRF ka la buh lypa ia ki kynhun jong ka ha ki jaka ba kham don ha ka jingma ban pynsted ia ka por ai jingiarap. Hapoh ka shi taiew ba la dep, 52 ngut ki riew paidbah la ioh ban pyllait im da ki kynhun NDRF katba 2206 ngut ki riew paidbah la pynkynriah sha ki jaka kiba kham shngain ha kylleng ki Jylla/UT kiba shah ktah.

Ha ka jingiatreilang bad ka MHA, ka tnad iada ri (M0D) ka la pyntreikam ruh ia ki jingdon jingem jong ka ha ka por ba duna tam ban iada ia ki briew kiba sahkut, ban ai jingiarap ia ki Kynhun ai jingiarap ha kaba kit ia ki briew bad ki tiar bad ban sam ia ki tiar jingiarap.

Ka jingialang bishar bniah ha kaba iadei bad ka jingpynkhreh na ka bynta ki jingshlei um hashuwa ka aiom slap bad ka jingshit tasam ha kylleng ka ri, la pyniaid da u Myntri kam pohiing ka sorkar pdeng u Amit Shah ha ka 10 tarik u Jymmang, 2026. Ha ka jingbuddien, la pynlong sa kawei pat ka jingialang da ka MHA ha ka 03 tarik u Jylliew, 2026 ban bishar bniah ia ka jingpynkhreh baroh na ka bynta ka jingjur slap, cloudburst, ki jingshlei um bad ki jingtwa khyndew ha Jammu bad Kashmir. Ka jingpynkhreh ha shilynter ka lynti ïaid Char Dham yatra ruh la bishar bniah da ka MHA man ka por.

Hapoh ki jingbthah jong u Myntri kam pohïing ka sorkar pdeng u Amit Shah, ki kynhun jong ki Myntri Sorkar Pdeng ki la leit jngoh ïa ki jaka ba la shah ktah jong ka Arunachal Pradesh bad Assam naduh ka 07 tarik haduh ka 10 tarik u Naitung 2026, na ka bynta ban peit bniah ïa ka jingjur ka jingjulor bad ban ai jingïarap pisa kaba donkam sha kine ki Jylla na ka NDRF. La pynbeit ba sa kawei pat ka kynhun jong ki Myntri Sorkar Pdeng kan leit jngoh ia ka thain ba la shah ktah jong ka Assam naduh ka 25.07.2026 na ka bynta ban bishar bniah ia ka jingduhnong bad jingjulor namar ka jingjur slap bad ka jingshlei um kaba iabteng.

Watla ka jingjur slap ba dang shen ka la buh jingeh ïa ki briew ha ki katto katne ki jylla, ka la pynduna ïa ka jingantad ia ka jingduna ka jinghap slap kaba long kumba 30 percent sha kumba 15 percent.

******