প্রধানমন্ত্রীগী লোইশঙ
প্রধান মন্ত্রী শ্রী নরেন্দ্র মোদী সিক্কিমগী গেংতোক্ত পাংথোকপা সিক্কিমনা রাজ্য ওইরকপগী ৫০ শুবা থৌরমশিং লোইশিনবগী থৌরম শরুক য়াখ্রে
মহৌশাগী ফজবা অমসুং থবক শুবা-নোম্বা কনবগী মমিং চৎলি, সিক্কিম য়াংনা চাউখৎপা উরে: প্রধান মন্ত্রী
লম্বীদগী ঐনা উবা খ্বাইদগী ফবা থবকশিংগী মনুংদা অমদি, সিক্কিমগী লম্বীশিং লু-নানবা অসিনি: প্রধান মন্ত্রী
মীৎ অসিনা অমোৎপা অমতা উখিদে, নুংশিৎশু শেংখি, লম্বীশিংসু লু-নানখি, সিক্কিমগী মীয়াম তশেংনা মহৌশাগী অকোয়বগী ফিবম ঙাক-শেনবা মীওইশিংনি, রাজ্য অসিগী ব্রান্দ এম্বেসেদরশিংনি: প্রধান মন্ত্রী
সিক্কিমদা লম্বী-থোঙ অমসুং ইনফ্রাষ্ট্রকচর শেমগৎনবা ঐখোয়না মীৎয়ং চঙলি; চহি খর অসিদা, মফম অসিদা কিমি চা কয়াগী হায়ৱেশিং শেমগৎলে, খুঙ্গং খুদিংমক লম্বীশিং শেমগৎনবা থবক য়াংনা পায়খৎলি: প্রধান মন্ত্রী
সিক্কিমগী অতোপ্পা অচৌবা থৌনা অমদি শান্নবদা লৈরি; নহারোলশিংনা অচৌবা ফম্বাকশিংদা মখোয়গী তৌবা ঙম্বশিং অমসুং হৈথোই-শিংথোইবা উৎলে: প্রধান মন্ত্রী
হকশেলগী ইনফ্রাষ্ট্রকচর ফগৎহনবগা লোয়ননা মীয়ামদা মমল হোংবা অনা-লাইয়েংগী খুদোংচাবা ফংহন্নবা ঐখোয়গী সরকারনা থবক পায়খৎলে: প্রধান মন্ত্রী
মমাংদা, লায়রবশিং লেম্না অনা-লাইয়েংগী খুদোংচাবা ফংনবা ঐখোয়না অয়ুস্মান কার্দশিং পীখ্রে; হৌজিক মসিগী খুদোংচাবা অসি চহি ৭০ অমসুং মসিগী মথক্ত লৈবা অহলশিংদা ফংহল্লে, জন ঔসাধি কেন্দ্রশিংদা হিদাক-লাংথকশিং মমল য়াম্না হোংনা ফংহল্লে: প্রধান মন্ত্রী
ওর্গনিক ফার্মিং অমসুং নেচরেল ফার্মিংগী সিক্কিমগী নমুনা অসি লৈবাক শীনবা থুংবগী ইথিল অমা ওইরে: প্রধান মন্ত্রী
সিক্কিমগী পুন্সি মহিং অমসুং সিক্কিমগী ৱাশক ঙসিদি লৈবাক অসিগী পান্দমগী তৎন-থানবা য়াদ্রবা শরুক অমা ওইরে: প্রধান মন্ত্রী
থাগৎখিবা:
28 APR 2026 3:00PM by PIB Imphal
ঙসি প্রধান মন্ত্রী শ্রী নরেন্দ্র মোদীনা সিক্কিমগী গংতোক্ত লুপা করোর লিশিং কয়াগী চাউখৎ-থৌরাংগী প্রোজেক ৩০ হেন্না হৌদোকপা অমসুং শঙ্গাবগা লোয়ননা সিক্কিমনা রাজ্য ওইরকপগী ৫০ শুবা থৌরমশিং লোইশিনবগী থৌরম শরুক য়াখ্রে।
পালজোর ষ্টদিয়মদা মীয়ামদা ৱা ঙাংবদা, রাজ্য অসিগা মহাক্কা লৈনবা অচেৎপা মরী অদু প্রধান মন্ত্রীনা ফোঙদোকখি। উরৈশিংগী লৈকোল য়েংলুবদা মহাক্না পুক্নিংদা ফাওখিবা অদু ফোঙদোক্লদুনা, প্রধান মন্ত্রীনা হায়খি মদুদি মহৌশাগী ফজরবা মচুশিং উবদা মহাক্কী পুক্নিং হুখি। সিক্কিমগী ইষ্টর্ন পেরাদাইজ অসি ওর্কিদ গার্দেন হায়না খঙনরি, মসিগী ফজবা, শান্তি অমসুং অধ্যতিক্কী নুংঙাইবা লাম্বা লৈতে। মসিগী ফজবা উবা ফংবা অসি লাইবক ফবনি। মচুশিং অমসুং মখোয়গী ফজবশিংদা হৌজিক ফাওবা ঐগী ৱাখল লুপ্লি।
প্রধান মন্ত্রীনা হায়খি মদুদি ঈশ্বরগী ওইবা ফিবম অমদা সিক্কিগী চহি ৫০ গী খোঙচৎ হরাওবা ফোঙদোকপা অসি য়াম্না মরুওই। থৌরম অমা পুৱারি ওইবা অমসুং ঈশ্বরগী ওইবা ফিবম অমদা পাংথোকপদা, মসিগী ফজবা শরুক কয়া হেনগৎলি। কলাকারশিংগী নাৎকী থৌরমশিং, মীয়ামগী থৱায় য়াওবা অমসুং চীঙজাউশিং অমসুং অতিয়াগী ফজবনা পালজোর ষ্টদিয়মদা মিত্রংগুম্লবা শক্তম অমা ওইহল্লে। মহৌশাগী অকোয়বগী ফিবম অমসুং নাৎ পুন্না হিংমিন্নবগুম্না ফাওহল্লে। হায়রিবা নিংশিংবশিং অসি মতম পুম্নমক্ত ঐগী থম্মোয়দা লৈহৌরগনি।
সিক্কিমদা য়ৌরকপদা মহাক্কী হরাওবা ফোঙদোক্লদুনা, নোং-চিংগী ফিবম ফত্তবদগী মমাঙদা মহাক গেংতোক য়ৌরকপা ঙমখিদবা অমসুং বাগদোগ্রাদগী ওনলাইন্দা মহাক্না মীয়ামগা উনখিবা অদু প্রধান মন্ত্রীনা নিংশিংখি। প্রধান মন্ত্রীনা হায়খি মদুদি মীয়ামগা হকথেংননা উনবা ফংখিদবগী নিংবা কাইবা অদু মহাক ফাওরি অমসুং মসিগী খুদোংচাবা অসি মহাক্না ঙাইরাকপনি। ঙাইজরকপা অদু ঙসিগী থৌরম অসিদা নিংবা থুংলে।
সিক্কিমগী মীয়ামগা উনবা, মখোয়গী ইং-তপ্পা, চমচবা অমসুং মোমোন নোকপা মাইথোঙশিংনা মতম পুম্নমক্ত মহাক্কী শান্তি পুরকখিবগী মতাংদা প্রধান মন্ত্রীনা পাউদমখি। মপুং ওইবা থৌরম অসিগী মমাঙদা, মহাক্না শক্নাইরবা মীওইশিং, পদ্ম এৱার্দ ফংলবশিং, কলাকারশিং অমসুং ফুতবোল শান্নরোয়শিং য়াওনা সিক্কিমগী হৈথোই-শিংথোইরবা মীওইশিং উনখি অমসুং তোঙান তোঙানবা হিরমশিংদা খন্ন-নৈনখি। মহাক্না হায়খি মদুদি সিক্কিমগী মীয়ামগা উনবদা মতম পুম্নমক্ত তোঙানবা মখলগী অপেনবা অমা ফাওই।
হৌখিবা নুমিদাংৱাইরমদা পাংথোকখিবা রোদ সো নিংশিংলদুনা, প্রধান মন্ত্রীনা হায়খি মসি কাউবা ঙম্লরোইদবা অমনি। গাঞ্জু লামা দ্বারদগী লোক ভবন ফাওবা, মখোয় মশাগী নাৎকী ফিজোল, ঈশৈ অমসুং চৎনবীশিংগা লোয়ননা য়েলহৌমী ফুরুপ ২১ গা লোয়ননা, মশিং য়াম্লবা সিক্কিমগী মীয়াম্না মখোয়গী নুংশিবা অদু উৎখি। ফিবম অদু অচৌবা কুহ্মৈ অমা ওইখি। প্রধান মন্ত্রীনা হায়খি মদুদি মীয়ামগী খুৎশিংদা ঐখোয়গী নুংশিরবা মচু অহুমগী ফিরালশিং পায়দুনা অমসুং ভারত মাত কি জয় অমসুং বন্দে মাতরম লাউদুনা, মহৌশা লাইরেম্বীগী তম্পাক্ত মচু কয়াগী লৈরাংশিং লৈশাৎ তম্বগা মান্নখি; অপুনবা ফিবম অদুদা এক ভারত শ্রেস্থা ভারতকী ৱাখল্লোনগী মমি তাখি।
প্রধান মন্ত্রীনা হায়খি মদুদি মশিং য়াম্লবা নুপীশিং, অঙাংশিং অমসুং অহলশিং শরুক য়াখি। লম্বীদা লাকপদা মহাক্না খ্বাইদগী পেনবদি সিক্কিমগী লম্বীশিং লু-নানবা, মফম খুদিংমক্ত অমোৎপা উদবা অমসুং নুংশিৎ অমসুং লম্বীশিং অনিমক শেংবা অসিনা ওইখি। মহাক্না হায়খি মদুদি সিক্কিমগী মীয়াম তশেংনা মহৌশাগী অকোয়বগী ফিবম ঙাক-শেনবা মীওইশিংনি, রাজ্য অসিগী ব্রান্দ এম্বেসেদরশিংনি।
রোদসো অমসুং থৌরমগী তৌবীমল খঙবা উৎলদুনা, প্রধান মন্ত্রীনা মীয়াম অমসুং কলাকারশিং থাগৎপা ফোঙদোকখি অমসুং কুহ্মৈ অসিদা সিক্কিম অমসুং লৈবাক অসিগী মীয়ামদা হরাওবা ফোঙদোকখি। মীয়ামগী থৌরম অদুদা ৱাশক্লদুনা, প্রধান মন্ত্রীনা হায়খি মদুদি অদোমগী নুংশিবা অমসুং থৌজালশিংগী লমন শিংনবা ঐনা পায়খৎপা য়াবা থবকশিং পায়খৎকনি।
সিক্কিমগী খোঙচৎ অসি মীওইবগী গুনশিং অমসুং হেরিতেচগা লোয়ননা চাউখৎপগী খোঙচৎ অমনি হায়রদুনা, প্রধান মন্ত্রীনা হায়খি মদুদি মীরোল কয়াগী থবকশিংনা খোঙচৎ অসি খুমাঙচাউশিনবনি। সিক্কিমগী হেরিতেচ ঙাক-শেন্নবা অমসুং চাউখৎপা য়াংখৎনবা পুকচেল শেংনা রাজ্য সরকারনা থবক পায়খৎলি। সরকারগী ওইনা, সিক্কিম অমসুং অৱাং-নোংপোক অসি লৈবাক অসিগী মরুওইবা খক নত্তনা ভারতকী ‘অষ্ট লাক্ষমী’ ওইরি। মরম অদুনা ‘এক্ত ইষ্ট’ পোলিসিদা থবক তৌবগা লোয়ননা, অৱাং-নোংপোক্কী ‘এক্ত ফাষ্ট’ গী ঐখোয়না ৱারেপ লৌরে।
প্রধান মন্ত্রীনা হায়খি লম্বীশিং, পৱার, তুরিজম, হকশেল অমসুং ইজুকেসন য়াওনা ঙসি লুপা করোর লিশিং কয়াগী প্রোজেক ৩০ হেনবা শঙ্গারে অমসুং উরেপ-উয়ুং তম্লে। ২০২৩ গী মতুংদা অৱাং থংবা সিক্কিমগী লম্বী-থোঙগী খুদোংচাদবশিং কোকহন্নবা অখন্নবা মীৎয়েং চঙলে। অকায়-অতোই থোকখ্রবা লম্বী-থোঙ শেমগৎনবা ঐখোয়না মীৎয়েং চঙলে।
তুরিজম ইকোনোমি অসি সিক্কিমগী খ্বাইদগী কনবা মপাঙ্গলনি হায়রদুনা, প্রধান মন্ত্রীনা হায়খি মদুদি ভারতকী অপুনবা লমগী চাদা ১ য়ৌদ্রবসু লৈবাক অসিগী লৈ মখলগী চাদা ২৫ হেন্না, উচেক মখল ৫০০ রোম, কুরাক মখল ৭০০ রোম, ফজরবা উমং অমসুং চিং-লেম্লবা কাঞ্চেনজুঙ্গা সিক্কিমদা লৈরি। অসুক য়াম্না লৈবদগী, মীওই খুদিংমক্না সিক্কিমদা হঞ্জিন-হঞ্জিন চৎনিংলি।
প্রধান মন্ত্রীনা হায়খি মদুদি তুরিজম্না সিক্কিমদা মশিং য়াম্লবা মীওইশিং শেন ফংহল্লি অমসুং রাজ্য অমগী অফবা ইনফ্রাষ্ট্রকচর লৈরবা মতম খক্তদা তুরিজম চাউখৎলি। চহি খর অসিদা, মফম অসিদা কিমি চা কয়াগী হায়ৱেশিং শেমগৎলে অমসুং খুঙ্গং খুদিংমক লম্বীশিং শেমগৎনবা থবক য়াংনা পায়খৎলি। মতম অমদা ৱাখলনা লাম্বা ফংলমদবা অনৌবা ইনফ্রাষ্ট্রকচর হৌজিক থবক ওইনা পায়খৎলে। মরম অদুনা ঐখোয়না সিক্কিমগী লম্বী-থোঙ অমসুং ইনফ্রাষ্ট্রকচরদা মীৎয়েং চঙলি।
মরুওইবা লম্বী-থোঙগী প্রোজেকশিং পল্লদুনা, প্রধান মন্ত্রীনা হায়খি মদুদি বাগদোগ্রা-গেংতোক এক্সপ্রেসৱে অমসুং সেবোক-রাংপো রেল লাইন লৈবাক অসিগা সিক্কিমগা শম্নহনবা মরুওইবা লম্বীশিংনি। অনৌবা নেসনেল হায়ৱেশিং শেমগৎলি অমসুং গেংতোকগুম্বা সহরশিংদা তুংগী তঙাইফদবা রিং রোদগুম্বা প্রোজেকশিং পায়খৎলি। মাইকৈ অসিদা থবকশিং খুমাঙচাউশিল্লি।
সেবোক-রাংপো রেল লাইন ২০০৮-০৯ দা অয়াবা পীখিবনি অদুবু থবক অমতা শুদনা ফাইলশিংদা পন্দুনা লৈখি। সেন্তরদা হৌজিক পাল্লিবা সরকার অসি লাক্লবা মতুংদা চাউখৎ-থৌরাংগী থবক অমুক পায়খৎপা হৌরকখি। অহানবা ওইনা, সিক্কিমদা রেলৱেজ য়ৌরে হায়না প্রধান মন্ত্রীনা ফোঙদোকখি।
প্রধান মন্ত্রীনা হায়খি মদুদি তুরিজম চাউখৎনবা অনৌবা ৱাখলশিং দরকার ওই। অনৌবা ৱাখল খনবগী খুদমশিং ওইনা ভালেধুঙ্গা, য়েন-য়াং অমসুং পেল্লিংদা রোপৱেশিং শাগৎলি, ভালেধুঙ্গাদা স্কাইৱাল্ক অমা শেমগৎলি অমসুং সিংসোর ব্রিজদা গ্লাস দেগ স্কাইৱাল্ক অমগী শেম-শারি। নথুলা অমসুং নামলিগুম্বা মফমশিংদা ঙমখৈগী থবকশিং ফগৎনবা থবকশিং য়াংনা পায়খৎলি। পায়খৎলিবা থবকশিং অসিনা অদোম হিংবদা লাইহনগনি, লমকোয়বা মীওই মশিং হেনগৎহনগনি, অদোমগী শেন্থোক হেনগৎহনগনি অমসুং থবক হেন্না ফংনবা অহেনবা খুদোংচাবশিং পীগনি।
প্রধান মন্ত্রীনা হায়খি মদুদি সিক্কিমদা লৈরিবা ইকো-ৱেলনেস তুরিজম অসি সরকারনা য়োকখৎলি। মফম অসিগী মীয়ামদা তুরিজমগী ইনকম য়াম্না লাক্নবা, হোমষ্টে ১,০০ শেমগৎলি অমসুং এদভেঞ্চর তুরিজমগী ইনফ্রাষ্ট্রকচরশিং শেমগৎলি। লমদম অসিগী মীয়াম তুরিজমদগী হকথেংননা কান্নবশিং ফংনবা ঐখোয়না খুদোংচাবশিং শেমগৎলে।
প্রধান মন্ত্রীনা হায়খি মদুদি সিক্কিমগী অতোপ্পা অচৌবা থৌনা অমদি শান্নবদা লৈরি, ফুতবোল, বোক্সিং অমসুং আর্চরিগুম্বা অচৌবা ফম্বাকশিংদা নহারোলশিংনা মখোয়গী তৌবা ঙম্বশিং অমসুং হৈথোই-শিংথোইবা উৎলে, রাজ্য অসিগী অমসুং লৈবাক অসিগী মিংচৎ পুরক্লে। অদোমগী হৈথোই-শিংথোইবনা সিক্কিম অমসুং ভারত চাউথোকচহল্লে।
প্রধান মন্ত্রীনা হায়খি মদুদি রাজ্যগী অমসুং লৈবাক্কী মিংচৎ পুরকখ্রবা সিক্কিমগী শান্নবগী হৈথোই-শিংথোইবা য়োকখৎপা দরকার ওই। খেলো ইন্দিয়া অমসুং ফিত ইন্দিয়া খোঙজংশিংগী খুৎথাংদা সরকারনা থবক কয়া পায়খৎলে। ষ্টেৎ স্পোর্তস একাদেমীশিং অমুক হিঙ্গৎহনবা অমসুং সিক্কিম প্রেমিয়র লিগগুম্বা থৌরমশিং য়োকখৎপগা লোয়ননা জাল লাল প্রধানগী মিংদা অনৌবা বোক্সিং একাদেমি অমা য়াওনা স্পোর্তস অমসুং কলচরেল ভিলেজশিং শেমগৎলে, মালেম থাক্কী শান্নবগী মচাক-মথুমশিং ফংহন্নবা রাজ্য অসিনা থৌরাং তৌরে। মসিনা সিক্কিমগী নহারোলশিংদা খুদোংচাবশিং হেন্না পীগনি অমসুং মখোয়গী শান্নবদা হেন্না মকোক থোঙনবা মখোয়গী মতেং পাংগনি।
প্রধান মন্ত্রীনা হায়খি মদুদি ঙসি শঙ্গারিবা প্রোজেকশিংগী মনুংদা হকশেলগা মরী লৈনবা অচৌবা থবক কয়া য়াওরি। মতম অমদা হকশেলগী থবকশিং মতিক চানা লৈতদবদগী লমকোয়বা মীওইশিং লাকপা ফাওবদা থিন্থহনখি। হৌজিক অওনবা লাক্লে। ঙসিদি খুদোংচাদবা অদু লৈত্রে।
প্রধান মন্ত্রীনা হায়খি হৌজিক সিক্কিমদা অয়ুস্মান অরোগ্যা মন্দির ২০০ রোম থবক তৌরি অমসুং দিষ্ট্রিক হোস্পিতাল মরি, তরসিয়ারি হোস্পিতালশিং অমসুং ৱেলনেস সেন্তরশিংদা মীওই লিশিং কয়াদা অয়ুসকী খুদোংচাবশিং পীরি। দ্রোজোং নামগ্যাল সোৱা রিগপা হোস্পিতাল শঙ্গাবগা লোয়না, সিক্কিমগী অনা-লাইয়েংগী থবক হেন্না ফগৎলগনি।
প্রধান মন্ত্রীনা হায়খি মদুদি হকশেলগী মচাক-মথুমশিংগা লোয়ননা অহোংবা মমলদা অনা-লাইয়েংগী খুদোংচাবা পীনবা সরকারনা থবক পায়খৎলে। মমাংদা, লায়রবশিং লেম্না অনা-লাইয়েংগী খুদোংচাবা ফংনবা ঐখোয়না অয়ুস্মান কার্দশিং পীখ্রে; হৌজিক মসিগী খুদোংচাবা অসি চহি ৭০ অমসুং মসিগী মথক্ত লৈবা অহলশিংদা ফংহল্লে, জন ঔসাধি কেন্দ্রশিংদা হিদাক-লাংথকশিং মমল য়াম্না হোংনা ফংহল্লে। থবকশিং অসিনা অদোম হিংবদা লাইহনবা খক নত্তনা অদোমগী মেদিকেলগী চাদিংশু হন্থহল্লে।
প্রধান মন্ত্রীনা হায়খি মদুদি শেন-থুম চাউখৎপা অমসুং রিছোর্সকী লমদা মালেমগী মীৎয়েং য়াংনা হোংলক্লি, হৌজিক তুংকোইনা চৎনবা য়াবা পুন্সি মহিং, মৈখু থাংদবা ইনর্জি অমসুং ওর্গনিক ওইবা চীঞ্জাক্ত মালেম্না মীৎয়েং চঙলে। মসিগী তুংগী চাউখৎপা অসিদা অৱাং-নোংপোক অমসুং সিক্কিমনা মরুওইবা মফমশিং ওইরকপদা হরাওই। মাইকৈ অসিদা সিক্কিমনা লৈবাক শীনবা থুংবগী মাইকৈ তাক্লি। ২০১৬ দা সিক্কিম মপুংফাবা ওর্গনিক রাজ্য অমা ওইরে হায়না মশামক্না লাউথোকখি, লৈবাক অসিগীদমক খুদম অমা ওইরে।
প্রধান মন্ত্রীনা হায়খি মদুদি ওর্গনিক ফার্মিংদা সিক্কিমনা মাংজিল থাবা অসি থাগৎনিঙাইনি। চেঙ পুথোকপা খক্তগী নত্তনা ওর্গনিক চেঙ পুথোকপগীদমক হৌজিক দেমাজোং মমিং চৎলে। অচৌবা কার্দোমোন, শিং, য়াইঙং, অভোকাদো অমসুং কিৱি হৌজিক লৈবাক অসিগী অমসুং মালেমগী কৈথেলশিং য়ৌরে অমসুং হিদাক ওইনা শীজিন্নবা য়াবা পাম্বী মখল চা কয়ানা লমদম অসিগী মীয়ামগী শেন ফংফম ওইরে। নেরেল ফার্মিং য়োকখৎনবা ওর্গনিক প্রোসেসিং প্লান্ত অমা লিংখৎলে, লৌমীশিংদা য়োনফমশিং হকথেংননা ফংহল্লে। ওর্গনিক ফার্মিং অমসুং নেচরেল ফার্মিংগী সিক্কিমগী নমুনা অসি লৈবাক শীনবা থুংবগী ইথিল অমা ওইরে। সিক্কিমগী পুন্সি মহিং অমসুং সিক্কিমগী ৱাশক ঙসিদি লৈবাক অসিগী পান্দমগী তৎন-থানবা য়াদ্রবা শরুক অমা ওইরে।
প্রধান মন্ত্রীনা হায়খি মদুদি সিক্কিমগী শেন-থুম চাউখৎপা সেল্ফ-হেল্প গ্রুপশিং অমসুং নুপীশিংনা মরুওইবা থৌদাং লৌরি। মখোয়গী পোৎথোকশিং অচৌবা কৈথেলশিংদা য়ৌহনবদা দিজিতেল ইন্দিয়ানা অচৌবা থৌদাং অমা লৌরি। ঙসিদি হায়রিবা নুপীশিং অসি ‘শ্বায়াম সিক্কিম’ গুম্বা প্লেতফোর্মশিংনা মতেং পাংলি।
প্রধান মন্ত্রীনা হায়খি মদুদি সিক্কিমগী য়াম্লবা ক্লিন ইনর্জিগী খুদোংচাবা অসি মহৌশাগী অকোয়বগী ফিবম ঙাকপগা লোয়ননা শীজিন্নগদবনি। মহৌশাগী অকোয়বা ফিবম ঙাক-শেনবা হায়বসি সিক্কিমগী মীয়ামগী চৎনবীনি। এক পের মা কে নাম থবক্ত মখোয়না শরুক য়াবগীদমক থাগৎলি অমসুং ‘মেরো রুখ মেরো সান্ততি’ থবক্কী মখাদা, অঙাং পোকপা খুদিংগী উ পাম্বী ১০৮ থারে। থবক অসিনা মালেম শীনবা থুংবা ইথিল অমা পীগনি হায়না ঐনা থাজৈ।
মীওই খুদিংমক মহৌশাগী অকোয়বগী ফিবম ঙাক-শেন্নবা থবক মখা তানা পায়খৎনবা তকশিল্লদুনা, প্রধান মন্ত্রীনা হায়খি মদুদি মসি তুংগী মীরোলশিংগীদমক ঙাক-শেনগদবা হেরিতেচ অমনি। মসি তুংগী মীরোলশিংগীদমক ঐখোয়না ঙাক-শেনগদবা ঐখোয়গী থবক অমনি।
মহাক্কী ৱারোল লোইশিল্লকপদা, প্রধান মন্ত্রীনা হায়খি মদুদি সিক্কিমগী চাউখৎ-থৌরাং য়াংখৎনবা অমসুং বিকসিত ভারতকী মঙলানদা মতেং পাংনবা অপুনবা ওইনা থবক পায়খৎকদবনি। সিক্কিম অনৌবা থাকশিংদা পুখৎপা হায়বসি মহাক্কী থাজবনি। থৌরম অসিদা মীয়াম অমুক হন্না মহাক্না থাগৎপা ফোঙদোক্লদুনা প্রধান মন্ত্রীনা হায়খি মদুদি অদোমগী অফবা তুংলমচৎ অমসুং মখা তানা নুংঙাই য়াইফনবা ঐনা য়াইফ পাউজেল পীজরি।
সিক্কিমনা রাজ্য ওইরকপগী ৫০শুবা থৌরম লোইশিনবা থৌরমদা ৱা ঙাংখি। রাজ্য অসিগী মহৌশাগী ফজবা অমসুং থবক শুবা-নোম্বা কনবগীদমক মমিং চৎলি, রাজ্য অসি য়াংনা চাউখৎপা উরে। https://t.co/hFUftLcfk7
— নরেন্দ্র মোদী (@narendramodi) April 28, 2026</center
***
(রিলিজ আই.দি.: 2256367)
ভিজিতর কাউন্তর : 8