"வணக்கம்! லோகித் (பிரம்மபுத்திரா) நதிக்கரை மக்களுக்கு எனது மரியாதையையும் அன்பையும் சமர்ப்பிக்கிறேன்!"

அசாம் மாநில ஆளுநர் திரு. லட்சுமண் பிரசாத் ஆச்சார்யா அவர்களே, முதலமைச்சர் திரு. ஹிமந்த பிஸ்வா சர்மா அவர்களே, முன்னாள் முதலமைச்சர் திரு. சர்பானந்த சோனோவால் அவர்களே, மத்திய அமைச்சரவையில் உள்ள எனது சகாக்கள் திரு. ராம் மோகன் நாயுடு அவர்களே, திரு. முரளிதர் மோஹோல் அவர்களே, திரு. பவித்ரா மார்கெரிட்டா அவர்களே, அசாம் மாநில அமைச்சர்களே, மற்ற பிரமுகர்களே, மற்றும் எனது அருமை சகோதர சகோதரிகளே.

நான் எனது உரையைத் தொடங்குவதற்கு முன்பாக, உங்கள் அனைவரிடமும் ஒரு வேண்டுகோளை விடுக்கிறேன். இன்றைய நாள் ஒரு வெற்றியின் நாள்; ஒரு வகையில் இது வளர்ச்சியைத் திருவிழாவாகக் கொண்டாடும் நாள். இது அசாமின் வளர்ச்சி மட்டுமல்ல, ஒட்டுமொத்த வடகிழக்கு மாநிலங்களின் வளர்ச்சிக்கான கொண்டாட்டமாகும். எனவே, நீங்கள் அனைவரும் உங்கள் கைபேசிகளை எடுத்து, அதிலுள்ள ஒளிவிளக்கை  ஒளிரச் செய்து, இந்த வளர்ச்சித் திருவிழாவில் ஒரு அங்கமாக மாறுமாறு கேட்டுக்கொள்கிறேன்.

அனைவருடைய கைபேசி விளக்குகளும் ஒளிர வேண்டும்! இதோ பாருங்கள், அசாம் மாநிலம் வளர்ச்சியைத் திருவிழாவாகக் கொண்டாடுவதை நாடு முழுவதுமே உங்களின் பலத்த கரகோஷத்தின் மூலம் காணப்போகிறது. வளர்ச்சியின் ஒளி சென்றடையும் போது, வாழ்வின் ஒவ்வொரு பாதையும் புதிய உயரங்களைத் தொடத் தொடங்கும். உங்கள் அனைவருக்கும் மிக்க நன்றி.

நண்பர்களே,

அசாம் மண்ணுடனான எனது ஆழமான தொடர்பு, அந்த நாட்டு மக்களின் அன்பு மற்றும் பாசம், குறிப்பாக அசாம் மற்றும் வடகிழக்கு மாநிலங்களின் எனது தாய்மார்கள் மற்றும் சகோதரிகளிடமிருந்து எனக்குக் கிடைக்கும் அரவணைப்பு மற்றும் சொந்தம் கொண்டாடும் உணர்வு ஆகியவை என்னை இடைவிடாது ஊக்குவிப்பதோடு, வடகிழக்கு மாநிலங்களின் வளர்ச்சிக்கான எங்களது உறுதியை மேலும் வலுப்படுத்துகின்றன. இன்று அசாமின் வளர்ச்சியில் ஒரு புதிய அத்தியாயம் சேர்க்கப்படுவதை நான் காண்கிறேன், இந்தச் சூழலில் பாரத ரத்னா திரு. பூபேன் அண்ணார் (ஹசாரிகா) அவர்களின் வரிகள் மிகவும் பொருத்தமானவையாக அமைகின்றன. "லுயிடோர் பார் ஜிலிகாய் துலிபோலோய், ஆமி ப்ரோதிக்ஞாபோத்த! ஆமி ஹான்கல்பபோத்த!" - இதன் பொருள், லுயிட் (லோகித்) நதிக்கரைகள் ஒளிரும், இருளின் ஒவ்வொரு சுவரும் தகர்க்கப்படும், இது நிச்சயம் நடக்கும்; இதுவே எங்களது உறுதிப்பாடு, இதுவே எங்களது வாக்குறுதி.

நண்பர்களே,

பூபேன் அண்ணார் அவர்களின் இந்த வரிகள் வெறும் பாடல் மட்டுமல்ல, அவை அசாம் மீது அன்பு கொண்ட ஒவ்வொரு மாமனிதரின் உறுதியாகும். இன்று அந்த உறுதிப்பாடு நம் கண்முன்னே நிரூபிக்கப்பட்டு வருகிறது. வலிமைமிக்க பிரம்மபுத்திரா நதி எவ்வாறு அசாம் வழியாகத் தடையின்றிப் பாய்கிறதோ, அதேபோல பா.ஜ.க-வின் இரட்டை-எஞ்சின் அரசின்) கீழ் இங்கும் வளர்ச்சியின் ஓட்டம் தொடர்ச்சியாகப் பாய்ந்து கொண்டிருக்கிறது. லோகப்பிரியா கோபிநாத் பர்தோலோய் விமான நிலையத்தின் புதிய முனையத்தின் இன்றைய திறப்பு விழா எங்களது உறுதிப்பாட்டிற்கு ஒரு சான்றாகும். இந்த புதிய முனையக் கட்டிடத்திற்காக அசாம் மக்கள் அனைவருக்கும் மற்றும் ஒட்டுமொத்த தேசத்திற்கும் எனது மனமார்ந்த வாழ்த்துகளைத் தெரிவித்துக் கொள்கிறேன்.

சகோதர சகோதரிகளே,

சிறிது நேரத்திற்கு முன்புதான், திரு. கோபிநாத் பர்தோலோய் அவர்களின் சிலையைத் திறந்து வைக்கும் பாக்கியம் எனக்குக் கிடைத்தது. திரு. பர்தோலோய் அவர்கள் அசாமின் முதல் முதலமைச்சர் ஆவார்; அவர் அசாமின் பெருமையாகத் திகழ்ந்தவர். அசாமின் அடையாளம், அசாமின் எதிர்காலம் மற்றும் அசாமின் நலன்கள் ஆகியவற்றில் அவர் ஒருபோதும் சமரசம் செய்து கொண்டதில்லை. அவருடைய இந்தச் சிலை, வரும் தலைமுறையினருக்குத் தொடர்ந்து ஊக்கமளிப்பதோடு, அசாம் மாநிலத்தைப் பற்றிய பெருமித உணர்வையும் அவர்களிடம் விழித்தெழச் செய்யும்.

நண்பர்களே,

நவீன விமான நிலைய வசதிகளும், அதிநவீன போக்குவரத்து உள்கட்டமைப்புகளும் எந்தவொரு மாநிலத்திற்கும் புதிய வாய்ப்புகள் மற்றும் சந்தர்ப்பங்களுக்கான நுழைவாயில்களாக அமைகின்றன. இவை அந்த மாநிலத்தின் வளர்ந்து வரும் தன்னம்பிக்கைக்கும், மக்களின் நம்பிக்கைக்குமான தூண்கள் ஆகும். அசாமில் இத்தகைய பிரம்மாண்டமான நெடுஞ்சாலைகளும் விமான நிலையங்களும் கட்டப்படுவதைக் காணும்போது, "இப்போதுதான் அசாமுக்கு நீதி வழங்கப்படத் தொடங்கியுள்ளது" என்று நீங்களும் கூறுகிறீர்கள்.

இல்லையென்றால் நண்பர்களே,

அசாம் மற்றும் வடகிழக்கு மாநிலங்களின் வளர்ச்சி என்பது காங்கிரஸ் அரசின் நிகழ்ச்சி நிரலிலேயே இருந்ததில்லை. காங்கிரஸ் அரசுகளும் அதில் இருந்தவர்களும், "அசாம் மற்றும் வடகிழக்கு மாநிலங்களுக்கு யார் செல்வார்கள்?" என்று கூறி வந்தனர். "அசாம் மற்றும் வடகிழக்கு மாநிலங்களுக்கு நவீன விமான நிலையங்கள், நெடுஞ்சாலைகள் மற்றும் சிறந்த ரயில்வே வசதிகள் ஏன் தேவை?" என்று காங்கிரஸ் கேட்டு வந்தது. இந்த மனப்போக்கின் காரணமாகவே, காங்கிரஸ் பல தசாப்தங்களாக இந்த ஒட்டுமொத்தப் பிராந்தியத்தையும் புறக்கணித்தது.

நண்பர்களே,

கடந்த 6-7 தசாப்தங்களாக காங்கிரஸ் செய்து வந்த தவறுகளை, இந்த மோடி ஒவ்வொன்றாகச் சரிசெய்து வருகிறார். காங்கிரஸ் ஆட்கள் வடகிழக்கு மாநிலங்களுக்குச் செல்கிறார்களோ இல்லையோ, நான் வடகிழக்கு மற்றும் அசாமிற்கு வந்தவுடனேயே எனது சொந்த மக்களிடையே இருப்பதாக உணர்கிறேன். திரு மோடி அவர்களுக்கு, அசாமின் வளர்ச்சி என்பது ஒரு தேவை, ஒரு பொறுப்பு மற்றும் ஒரு கடமைப்பாடாகும்.

அதனால்தான் நண்பர்களே,

கடந்த 11 ஆண்டுகளில், அசாம் மற்றும் வடகிழக்கு மாநிலங்களுக்காக லட்சக்கணக்கான கோடி ரூபாய் மதிப்பிலான வளர்ச்சித் திட்டங்கள் தொடங்கப்பட்டுள்ளன. இன்று அசாம் முன்னேறி வருவதுடன் புதிய சாதனைகளையும் படைத்து வருகிறது. பாரதிய நியாய சன்கிதா (இந்திய நீதிச் சட்டம்) சட்டத்தை அமல்படுத்துவதில் இந்தியாவிலேயே அசாம் முதன்மை மாநிலமாக உருவெடுத்துள்ளது என்பதை அறிந்து நான் மகிழ்ச்சியடைகிறேன். 50 லட்சத்திற்கும் அதிகமான திறன்மிகு முன்-பணம் செலுத்தும் மின் மீட்டர்களை பொருத்தி அசாம் ஒரு புதிய சாதனையையும் படைத்துள்ளது. காங்கிரஸ் ஆட்சியின் போது, லஞ்சம் மற்றும் வாரிசு அரசியல் இன்றி அசாமில் அரசு வேலை பெறுவது சாத்தியமற்ற ஒன்றாக இருந்தது. ஆனால் இன்று, ஆயிரக்கணக்கான இளைஞர்கள் எந்தவித லஞ்சமோ அல்லது வாரிசு அரசியலோ இன்றி இங்கே வேலை வாய்ப்புகளைப் பெற்று வருகின்றனர். பா.ஜ.க. அரசாங்கத்தின் கீழ், அசாமின் கலாச்சாரம் ஒவ்வொரு தளத்திலும் ஊக்குவிக்கப்படுகிறது. கடந்த ஆண்டு ஏப்ரல் 13-ம் தேதி நடைபெற்ற அந்த நிகழ்வை என்னால் மறக்க முடியாது; அன்று குவஹாத்தி மைதானத்தில் 11,000-க்கும் மேற்பட்ட கலைஞர்கள் இணைந்து 'பிஹு' நடனமாடினர். இந்த நிகழ்வு கின்னஸ் உலக சாதனையில் இடம் பிடித்தது. இது போன்ற புதிய சாதனைகளை உருவாக்குவதன் மூலம் அசாம் வேகமாக முன்னேறி வருகிறது.

நண்பர்களே,

இந்த புதிய முனையக் கட்டிடம் குவஹாத்தி மற்றும் அசாமின் கையாளும் திறனை கணிசமாக அதிகரிக்கும். ஒவ்வொரு ஆண்டும் 1.25 கோடிக்கும் அதிகமான பயணிகள் இந்த முனையத்தின் வழியாகப் பயணம் செய்ய முடியும்! இதன் பொருள், பெரும் எண்ணிக்கையிலான சுற்றுலாப் பயணிகள் அசாமுக்கு வர முடியும் என்பதாகும். அன்னை காமாக்யா தேவியைத் தரிசிக்க வரும் பக்தர்களுக்கும் இந்த வசதி பயணத்தை எளிதாக்கும். இந்த புதிய விமான நிலைய முனையத்திற்குள் நுழையும்போது, "வளர்ச்சி மற்றும் பாரம்பரியம்" என்ற மந்திரத்தின் உண்மையான அர்த்தம் என்ன என்பது தெளிவாகத் புரியும். அசாமின் இயற்கை மற்றும் கலாச்சாரத்தை மனதில் கொண்டே இந்த விமான நிலையம் வடிவமைக்கப்பட்டுள்ளது.

முனையத்தின் உள்ளே பசுமை நிறைந்திருக்கிறது; இது ஒரு உட்புறக் காடு போன்ற அமைப்பைக் கொண்டுள்ளது. இதன் வடிவமைப்பு சுற்றியுள்ள இயற்கையிலிருந்து ஈர்க்கப்பட்டு உருவாக்கப்பட்டுள்ளது, இது ஒவ்வொரு பயணியும் அமைதியையும் நிம்மதியையும் உணருவதை உறுதி செய்கிறது. இதன் கட்டுமானத்தில் மூங்கில் பெருமளவில் பயன்படுத்தப்பட்டுள்ளது. மூங்கில் என்பது அசாம் மக்களின் வாழ்க்கையில் ஒரு அங்கமாகும்; அது இங்கு வலிமையையும் அழகையும் ஒருசேரக் காட்டுகிறது. ஆனால், தில்லியில் இருந்த கடந்த கால அரசாங்கங்களுக்கு இந்த மூங்கில் என்றால் என்னவென்று கூடத் தெரிந்திருக்கவில்லை.

நீங்கள் ஆச்சரியப்படுவீர்கள், 2014-ல் நீங்கள் எனக்குப் பணியாற்றும் வாய்ப்பை வழங்குவதற்கு முன்பு, நம் நாட்டில் ஒரு சட்டம் இருந்தது; அந்தச் சட்டத்தின்படி உங்களால் மூங்கிலை வெட்ட முடியாது. ஏன் என்று யாராவது எனக்கு விளக்குங்கள்? ஏனெனில், அவர்கள் மூங்கில் என்பது ஒரு 'மரம்' என்று கூறினார்கள். அது மரம் என்று வகைப்படுத்தப்பட்டவுடன், அதைச் சார்ந்த அனைத்துக் கதவுகளும் அடைக்கப்பட்டன. ஆனால், உலகம் மூங்கிலை ஒரு 'புல் வகைத் தாவரம்' என்று நம்புகிறது. நாங்கள் அந்தச் சட்டத்தை நீக்கி, அதை புல்  வகைக்குள் கொண்டு வந்தோம், அதுதான் உண்மையில் மூங்கிலின் அடையாளம். அதன் பிறகுதான், இன்று மூங்கிலைக் கொண்டு இவ்வளவு பிரம்மாண்டமான கட்டிடம் கட்டப்பட்டுள்ளது. இன்று நீங்கள் சமூக வலைதளங்களைப் பார்த்தால், இந்திய விமான நிலையங்களின் வடிவமைப்புகள் உலகம் முழுவதும் பேசப்படுவதைக் காணலாம்.

நண்பர்களே,

இந்த உள்கட்டமைப்பு மேம்பாடு ஒரு மிகப்பெரிய செய்தியை உலகுக்குச் சொல்கிறது. இது இந்தியாவின் வளர்ச்சிப் பயணத்தின் அடையாளமாக மாறி வருகிறது. இது தொழில்துறையை ஊக்குவிக்கிறது, முதலீட்டாளர்களுக்குப் போக்குவரத்துத் தொடர்பில்  நம்பிக்கையை அளிக்கிறது மற்றும் உள்ளூர் தயாரிப்புகள் உலகம் முழுவதும் ஏற்றுமதி செய்யப்படுவதற்கான வழியைத் திறந்துவிடுகிறது. எல்லாவற்றிற்கும் மேலாக, புதிய வாய்ப்புகள் உருவாகும் இளைஞர்களுக்கு இது மிகப்பெரிய நம்பிக்கையை அளிக்கிறது. அதனால்தான், இன்று அசாம் இத்தகைய மகத்தான சாத்தியக்கூறுகளின் பாதையில் உயர்ந்து பறப்பதைக் காண்கிறோம்.

நண்பர்களே,

இன்று இந்தியாவின் மீதான உலகத்தின் பார்வை மாறியுள்ளது, அத்துடன் இந்தியாவின் பங்களிப்பும் மாறியிருக்கிறது. இந்தியா இப்போது உலகின் மூன்றாவது பெரிய பொருளாதாரமாக மாறப்போகிறது. வெறும் 11 ஆண்டுகளில் இது எப்படிச் சாத்தியமானது?

நண்பர்களே,

நவீன உள்கட்டமைப்பின் வளர்ச்சி இதில் மிக முக்கியப் பங்கு வகிக்கிறது. இந்தியா 2047-ம் ஆண்டிற்காகத் தன்னைத் தயார்படுத்தி வருகிறது. வளர்ச்சியடைந்த இந்தியா எனும் அந்த உறுதிப்பாட்டை நிறைவேற்ற, நாம் உள்கட்டமைப்பில் அதிக கவனம் செலுத்தி வருகிறோம். இதில் மிக முக்கியமான விஷயம் என்னவென்றால், நாட்டின் ஒவ்வொரு மாநிலமும், ஒவ்வொரு பிராந்தியமும் இந்த மகத்தான வளர்ச்சிப் பிரச்சாரத்தில் பங்கெடுத்து வருகின்றன. பின்தங்கிய நிலையில் உள்ளவர்களுக்கு நாம் முன்னுரிமை அளித்து வருகிறோம். நாட்டின் ஒவ்வொரு மாநிலமும் இணைந்து முன்னேறவும், வளர்ச்சியடைந்த இந்தியா எனும் இலக்கிற்குப் பங்களிக்கவும் ஏதுவாக எமது அரசு இந்தத் திசையில் செயல்பட்டு வருகிறது. இன்று அசாம் மற்றும் வடகிழக்கு மாநிலங்கள் எங்களது இந்த இலக்கிற்குத் தலைமை தாங்கி வழிநடத்துவதைக் கண்டு நான் மகிழ்ச்சியடைகிறேன்.

கிழக்கு நோக்கிய கொள்கையின் மூலம் வடகிழக்கு மாநிலங்களுக்கு நாம் முன்னுரிமை அளித்துள்ளோம்; அதன் விளைவாக, இன்று அசாம் இந்தியாவின் "கிழக்கு நுழைவாயிலாக" உருவெடுத்து வருவதை நாம் காண்கிறோம். இந்தியாவை ஆசியான் (ASEAN) நாடுகளுடன் இணைக்கும் ஒரு பாலமாக அசாம் திகழ்கிறது. இந்தப் பயணம் இன்னும் நீண்ட தூரம் செல்லும். மேலும், வளர்ந்த இந்தியாவின் பல துறைகளில் அசாம் ஒரு உந்துசக்தியாக  மாறும்.

நண்பர்களே,

இன்று அசாம் மற்றும் ஒட்டுமொத்த வடகிழக்கு மாநிலங்களும் இந்தியாவின் வளர்ச்சிக்கான புதிய நுழைவாயிலாக மாறி வருகின்றன. பல்முனை போக்குவரத்து இணைப்பு  மீதான எங்களது அர்ப்பணிப்பு, இந்தப் பிராந்தியத்தின் திசையையும் நிலையையும் மாற்றியுள்ளது. அசாமில் புதிய பாலங்கள் கட்டப்படும் வேகம், புதிய கைபேசி கோபுரங்கள்  நிறுவப்படும் வேகம் மற்றும் ஒவ்வொரு வளர்ச்சித் திட்டத்தின் வேகம் என அனைத்தும் இன்று கனவுகளை நனவாக்கி வருகின்றன. பிரம்மபுத்திரா நதியின் குறுக்கே கட்டப்பட்டுள்ள பாலங்கள், அசாமின் போக்குவரத்துத் தொடர்பிற்கு ஒரு புதிய வலிமையையும், புதுப்பிக்கப்பட்ட தன்னம்பிக்கையையும் அளித்துள்ளன.

சுதந்திரத்திற்குப் பிந்தைய 6-7 தசாப்தங்களில், இங்கு வெறும் மூன்று முக்கிய பாலங்கள் மட்டுமே கட்டப்பட்டன. ஆனால், கடந்த ஒரு தசாப்தத்தில், நான்கு புதிய மெகா பாலங்கள் கட்டி முடிக்கப்பட்டுள்ளன; மேலும் பல வரலாற்றுச் சிறப்புமிக்க திட்டங்கள் வடிவம் பெற்று வருகின்றன. போகிபீல் மற்றும் தோலா-சாதியா போன்ற மிக நீளமான பாலங்கள், அசாமை உத்தி ரீதியாக (Strategically) மேலும் வலுப்படுத்தியுள்ளன. ரயில்வே இணைப்பிலும் ஒரு புரட்சிகரமான மாற்றம் ஏற்பட்டுள்ளது. போகிபீல் பாலம் திறக்கப்பட்டதன் மூலம், மேல் அசாம் மற்றும் நாட்டின் பிற பகுதிகளுக்கு இடையிலான தூரம் குறைந்துள்ளது. குவஹாத்தியில் இருந்து நியூ ஜல்பய்குரி வரை இயக்கப்படும் வந்தே பாரத் விரைவு ரயில், பயண நேரத்தை மேலும் குறைத்துள்ளது. நாட்டின் நீர்வழிப் போக்குவரத்து மேம்பாட்டின் பலன்களையும் அசாம் பெற்று வருகிறது. சரக்கு போக்குவரத்து 140 சதவீதம் அதிகரித்துள்ளது; இது பிரம்மபுத்திரா வெறும் நதி மட்டுமல்ல, பொருளாதார சக்தியின் ஓட்டம் என்பதற்கான சான்றாகும். பாண்டுவில் முதலாவது கப்பல் பழுதுபார்க்கும் வசதி உருவாக்கப்பட்டு வருகிறது; வாரணாசியில் இருந்து திப்ருகார் வரையிலான கங்கா விகாஸ் உல்லாசக் கப்பல்  பயணம் குறித்து பெரும் உற்சாகம் நிலவுகிறது, இது வடகிழக்கு மாநிலங்களை உலகளாவிய உல்லாசக் கப்பல் சுற்றுலா வரைபடத்தில் இடம்பிடிக்கச் செய்துள்ளது.

நண்பர்களே,

அசாம் மற்றும் வடகிழக்கு மாநிலங்களை வளர்ச்சியிலிருந்து ஒதுக்கி வைத்ததன் மூலம் காங்கிரஸ் அரசாங்கங்கள் செய்த பாவத்தால், நாட்டின் பாதுகாப்பு, ஒற்றுமை மற்றும் ஒருமைப்பாட்டிற்கு மிகப்பெரிய இழப்பு ஏற்பட்டது. காங்கிரஸ் ஆட்சியின் கீழ் பல தசாப்தங்களாக வன்முறை செழித்து வளர்ந்த நிலையில், இப்போது நாம் வெறும் 10-11 ஆண்டுகளுக்குள் அதனை முடிவுக்குக் கொண்டு வருவதை நோக்கி நகர்ந்து கொண்டிருக்கிறோம். வன்முறையும் இரத்தக் களரியும் ஒருகாலத்தில் சாதாரணமாக இருந்த வடகிழக்கு மாநிலங்களில், இன்று 4G மற்றும் 5G தொழில்நுட்பத்தின் மூலம் தொலைதூரப் பகுதிகளுக்கும் டிஜிட்டல் இணைப்பு சென்றடைந்து கொண்டிருக்கிறது. ஒரு காலத்தில் வன்முறை பாதிப்புக்குள்ளான மாவட்டங்களாகக் கருதப்பட்டவை, இன்று வளர்ந்து வரும் மாவட்டங்களாக உருவெடுத்து வருகின்றன. வரும் ஆண்டுகளில், இதே பகுதிகள் தொழில்துறை வழித்தடங்களாகவும் மாறும். அதனால்தான் வடகிழக்கு மாநிலங்கள் குறித்து ஒரு புதிய தன்னம்பிக்கை உருவாகியுள்ளது. நாம் இதனை மேலும் வலுப்படுத்த வேண்டும்.

நண்பர்களே,

அசாம் மற்றும் வடகிழக்கு மாநிலங்களின் வளர்ச்சியில் நாம் வெற்றி பெற்று வருவதற்கு முக்கியக் காரணம், இந்தப் பிராந்தியத்தின் தனித்துவம் மற்றும் கலாச்சாரத்தை நாம் பாதுகாத்து வருகிறோம் என்பதுதான். காங்கிரஸ் மற்றொரு பாவத்தையும் செய்திருந்தது; இந்த இடத்தின் அடையாளத்தையே அழிப்பதற்கு அது சதி செய்திருந்தது. இந்தச் சதி என்பது ஒரு சில ஆண்டுகால விஷயம் மட்டுமல்ல! காங்கிரஸின் இந்தப் பாவத்தின் வேர்கள் சுதந்திரத்திற்கு முந்தைய காலத்துடன் தொடர்புடையவை. அந்த நேரத்தில், முஸ்லீம் லீக் மற்றும் பிரிட்டிஷ் அரசு இணைந்து இந்தியப் பிரிவினைக்கான அடித்தளத்தைத் தயார் செய்து கொண்டிருந்தபோது, அசாமை ஒருங்கிணைந்த வங்காளத்தின் ஒரு பகுதியாக, அதாவது கிழக்கு பாகிஸ்தானாக மாற்றுவதற்கு ஒரு திட்டம் இருந்தது. அந்தச் சதியின் ஒரு அங்கமாக மாற காங்கிரஸ் கட்சி தயாராக இருந்தது. அப்போதுதான் திரு. பர்தோலோய் அவர்கள் தனது சொந்தக் கட்சிக்கு எதிராக நிமிர்ந்து நின்றார். அசாமின் அடையாளத்தை அழிப்பதற்கான இந்தச் சதியை அவர் எதிர்த்தார் மற்றும் அசாம் நாட்டிலிருந்து பிரிக்கப்படுவதிலிருந்து காப்பாற்றினார். பாரதிய ஜனதா கட்சி எப்போதும் கட்சிப் பாகுபாடுகளுக்கு அப்பாற்பட்டு ஒவ்வொரு தேசபக்தரையும் மதிக்கிறது. திரு அடல் அவர்களின் தலைமையில் பாரதிய ஜனதா கட்சி ஆட்சிக்கு வந்தபோது, திரு பர்தோலோய் அவர்களுக்கு பாரத ரத்னா விருது வழங்கி கௌரவிக்கப்பட்டது.

சகோதர சகோதரிகளே,

திரு பர்தோலோய் அவர்கள் சுதந்திரத்திற்கு முன்பே அசாமைத் தனித்துக் காப்பாற்றினார், ஆனால் அவருக்குப் பிறகு, காங்கிரஸ் மீண்டும் அசாம்-விரோத மற்றும் தேசவிரோத நடவடிக்கைகளைத் தொடங்கியது. காங்கிரஸ் தனது வாக்கு வங்கியை அதிகரிப்பதற்காக மதரீதியான திருப்திப்படுத்தும் (Religious appeasement) சதிகளைத் தீட்டியுள்ளது. வங்காளம் மற்றும் அசாமில், தங்களது வாக்கு வங்கியாக இருக்கும் ஊடுருவல்காரர்களுக்கு அவர்கள் முழு சுதந்திரம் அளித்துள்ளனர். இந்தப் பிராந்தியத்தின் மக்கள் தொகை அமைப்பே (Demography) மாற்றப்பட்டுள்ளது. இந்த ஊடுருவல்காரர்கள் நமது காடுகளை ஆக்கிரமித்து, நமது நிலங்களைக் கைப்பற்றியுள்ளனர். இதன் விளைவாக, ஒட்டுமொத்த அசாம் மாநிலத்தின் பாதுகாப்பும் அடையாளமும் இன்று கேள்விக்குறியாகியுள்ளது.

நண்பர்களே,

இன்று திரு ஹிமந்தா அவர்களின் அரசும், அவருடைய குழுவினர் அனைவரும் அசாமின் வளங்களை இந்த சட்டவிரோத மற்றும் தேசவிரோத ஆக்கிரமிப்புகளிலிருந்து விடுவிக்க கடினமாக உழைத்து வருகின்றனர். அசாமின் வளங்கள் அசாம் மக்களுக்கே பயன்படுவதை உறுதி செய்ய ஒவ்வொரு மட்டத்திலும் பணிகள் நடைபெற்று வருகின்றன. ஊடுருவலைத் தடுக்க மத்திய அரசும் கடுமையான நடவடிக்கைகளை எடுத்துள்ளது. சட்டவிரோதமாக ஊடுருவியவர்களை வெளியேற்றுவதற்காக அவர்கள் அடையாளம் காணப்பட்டு வருகின்றனர்.

ஆனால் சகோதர சகோதரிகளே,

காங்கிரஸ் கட்சியினரும் இண்டி (INDI) கூட்டணியினரும் தேசவிரோத செயல்திட்டங்களுடன் பகிரங்கமாக வெளிவந்துள்ளனர். சட்டவிரோத குடியேறிகளை வெளியேற்ற வேண்டும் என்று நாட்டின் உச்ச நீதிமன்றமே கூறியுள்ளது. ஆனால், இந்த ஆட்கள் ஊடுருவல்காரர்களுக்கு ஆதரவாகப் பேசி வருகின்றனர். இவர்களுடைய வழக்கறிஞர்கள் நீதிமன்றத்தில் ஊடுருவல்காரர்களைக் குடியமர்த்துவதற்காக வாதாடுகிறார்கள். நியாயமான தேர்தலுக்காகத் தேர்தல் ஆணையம் SIR (சட்டரீதியான விசாரணை மற்றும் சீரமைப்பு) பணிகளை மேற்கொள்ளும்போது, இவர்கள் நாட்டின் ஒவ்வொரு மூலையிலும் அமைதியற்ற நிலையில் இருக்கிறார்கள். இத்தகைய மனிதர்கள் நமது அசாம் சகோதர சகோதரிகளின் நலன்களைப் பாதுகாக்க மாட்டார்கள். இவர்கள் உங்கள் நிலங்களையும் காடுகளையும் மற்றவர்கள் ஆக்கிரமிக்க அனுமதிப்பார்கள்; இவர்களது தேசவிரோத மனப்போக்கு பழைய காலத்தைப் போன்ற வன்முறை மற்றும் அமைதியற்ற சூழலை மீண்டும் உருவாக்கக்கூடும். எனவே, எனது அசாம் சகோதர சகோதரிகளே, நாம் மிகவும் எச்சரிக்கையாக இருக்க வேண்டும். திரு. பர்தோலோய் போன்றவர்கள் தங்கள் வாழ்நாள் முழுவதும் எதற்காக அனைத்தையும் தியாகம் செய்தார்களோ, அந்த அசாமின் அடையாளத்தை நாம் பாதுகாக்க வேண்டும். அசாம் மக்கள் ஒற்றுமையாக இருக்க வேண்டும். அசாமின் வளர்ச்சி தடம் புரண்டு விடாமல் நாம் காப்பாற்ற வேண்டும், காங்கிரஸின் சதிகளை ஒவ்வொரு கணமும், ஒவ்வொரு அடியிலும் முறியடித்துக் கொண்டே இருக்க வேண்டும்.

நண்பர்களே,

இன்று உலகம் இந்தியாவை நம்பிக்கையுடன் உற்று நோக்குகிறது. இந்தியாவின் எதிர்காலத்தின் புதிய சூரிய உதயம் வடகிழக்கு மாநிலங்களிலிருந்துதான் நிகழ வேண்டும். இதற்காக, நமது கனவுகளை நனவாக்க நாம் இணைந்து செயல்பட வேண்டும். அசாமின் வளர்ச்சியை நாம் முன்னணியில் வைக்க வேண்டும். நமது கூட்டு முயற்சி அசாமை புதிய உயரத்திற்கு கொண்டு செல்லும் என்று நான் நம்புகிறேன். வளர்ச்சியடைந்த இந்தியா எனும் கனவை நாம் நனவாக்குவோம். அந்த வளர்ச்சியடைந்த இந்தியாவுக்கான பாதை, ஒரு வளர்ச்சியடைந்த அசாம் மூலமாகவே அமைக்கப்படும். இந்த நம்பிக்கையுடன், புதிய முனையத்திற்காக உங்கள் அனைவருக்கும் மீண்டும் ஒருமுறை எனது வாழ்த்துகளைத் தெரிவித்துக் கொள்கிறேன். உங்கள் அனைவருக்கும் மிக்க நன்றி. என்னுடன் சேர்ந்து சொல்லுங்கள் -

வந்தே மாதரம்.

வந்தே மாதரம்.

வந்தே மாதரம்.

வந்தே மாதரம்.

வந்தே மாதரம்.

வந்தே மாதரம்.

வந்தே மாதரம்.

----

(Release ID: 2207075)

AD/VK/KR