La pynlong man ka por ia ki jingïakren hapdeng ki myntri sorkar halor ki jingjia ha ka thain West Asia ha ka National Media Centre. Ha ka jingïalang kaba mynta ka sngi (16 tarik Lber 2026), ki Petroleum and Natural Gas, Ports, Shipping and Waterways, bad External Affairs ki la ïasam ïa ki jingtip halor ka jingpynbiang bording, ki kam ba iadei bad ka duriaw, ka bha ka miat jong ki nongshong shnong ka India ha ka thaiñ bad ki sienjam ai jingtip paidbah kiba ïadei bad kane. Ia ki jingpynshai kiba kum kine la pynlong kham mynshwa ha ka 11, 12 bad 13 tarik u Lber.

Ka jingpynbiang bording bad ka jingdon umphniang

Ha kaba ïadei bad ka jinglong jingman kaba la mih na ka jingkhang ïa ka Strait of Hormuz, ka Tnad Petroleum and Natural Gas ka la ai jingtip sha ki lad pathai khubor halor ka jinglong jingman jong ka jingpynpoi umphniang bad ki lad ki lynti ba la shim ban pynthikna ïa ka jingiai don ki mar umphniang bad LPG. Katkum ka jingong ka Tnad:

Ka Umphniang bym pat pynkhuid bad ki jaka pynkhuid umphniang

• Baroh ki karkhana pynkhuid umphniang ki treikam borbah bad ki pynbiang ia ka umphniang bym pat pynkhuid. Ka India ka dang lah ban pyndap ialade ha ka jingpynmih petrol bad diesel bad ym donkam ban wanrah ia kine ki umphniang nabar ri ban pyndap ia ka jingdawa hapoh ka ri.

Ki jaka die umphniang

• Ym don kano kano ka jingjia ha kaba ym don umphniang kumba la ioh jingtip na kino kino ki jaka die umphniang jong ki kompeni pynbiang umphniang, bad dang iai bteng ban pynbit pynbiang man ka por ia ka jingpynbiang petrol bad diesel.
• La kyntu ia ki nongshong shnong ban ym thied kyrkieh namar ka petrol bad ka diesel ka dap

Natural Gas

• Ia ki kam ba kongsan la ai jingiada ban ioh ia ka LPG kaba kynthup ia ka 100% ka jingpynbiang ia ka PNG bad CNG, katba ia ka jingpynbiang na ka bynta ki karkhana bad ki nongkhaii la buh ha ka 80 percent.
• La pynshlur ia ki nongpyndonkam ia ka LPG ha ka kam kamai kajih ha ki nongbah bad ki jaka sor ban pynkylla sha ka PNG, bad ki jaka treikam kum ki hotel, ki jaka bam, ki hospital bad ki hostel ki lah ban ioh ia ki connection PNG lyngba ki City Gas Distribution (CGD) ba la ai bor.
• Ki nongpyndonkam ki lah ban aplai na ka bynta ki connection PNG lyngba ka email, ki rynsan jong ki nongthied, ki shithi ne ki call centre jong ki kompeni CGD, bad lah ban ioh kloi ia ki connection ha ki jaka ba la don lypa ki pipeline.
• Katto katne ki kompeni CGD ki ai jingmyntoi ban kyntiew ia ki connection PNG, kynthup ka gas kaba khlem jingsiew kaba shongdor T.500 na ka bynta ki nongpyndonkam hapoh ka ri da ka Indraprastha Gas Ltd. bad ka GAIL Gas Ltd., ka jingmap ia ki jingsiew bai kyntiew kyrteng kaba T. 500 na ka bynta ki nongpyndonkam PNG hapoh ri bad ka jingthep pisa na ka bynta ki nongpyndonkam ha ki kam khaii da ka Mahanagar Gas Ltd., bad ka jingmap ia ki jingthep pisa na ka bynta baroh ki connection ba iadei ba ki kam khaii da ka BPCL.
• Ka Sorkar ka dang pyniar ia ka rynsan jong ka CGD bad ka PNGRB ka la ai jingmut ia ki tnad CGD ban pynsted ia ka jingpyndonkam ia ki jingdon jingem, ban pynshlur ban pyndonkam ia ki connection kiba la don lypa bad ban pynduna ia ka por ban sdang ban pynbiang.

LPG

• Dang iai buddien ia ka jingpynbiang LPG ha kaba iadei bad ka jinglong jingman ha ka sain pyrthei.
• Ym don kano kano ka jingjia ha kaba ym don umphniang kumba la ioh jingtip ha ki jaka sam LPG.
• Ka jingphah buh LPG online ka la kiew na kumba 84% sha kumba 90% ha kylleng ki karkhana.
•  La pyniar ia ka jingkynthup ia ka Delivery Authentication Code (DAC) na ka 53% shwa ka jingeh sha kumba 72% ban iada na ka jingpynkylla ia ki cylinder ha ka kyrdan jong ki nongsam.
• Katto katne tylli ki Jylla bad ki UT kiba kynthup ïa ka Bihar, Delhi, Haryana, Rajasthan, Manipur bad Maharashtra ki la pynmih ïa ki hukum ban ai ïa ka Non-domestic LPG katkum ki jingbthah jong ka Sorkar India.

Ki Jingialang ba la pynlong da ki Sorkar Jylla

• Ki Sorkar Jylla bad ki UT ki dang iai bteng ban leh ia ka bynta kaba kongsan ha kaba buddien ia ka jingpynpoi ia ki mar ba donkam kynthup ia ka Petrol, Diesel bad LPG.
• Kiba bun ki Jylla bad ki UT ki la buh ïa ki control room ban buddien ïa ka jinglong jingman bad ki dang pynlong ïa ki jingïalang bad ki lad pathai khubor ban ai jingtip ïa ki nongshong shnong.

Ki kam na ka bynta ka jingtehlakam

• Ki Sorkar Jylla ki la shim ia ki sienjam ban khanglad ia ka jingpynlang bad pyniaid iew beain ia ka petrol, diesel bad LPG.
• La pynlong ia ki jingkhynra ha ki katto katne ki Jylla ba kynthup ia ka Uttar Pradesh, Haryana, Andhra Pradesh, Madhya Pradesh, Assam bad Mizoram, ban tehlakam ia ki jingpynlang bad jingpyniaid iew beain ia ka LPG.
• Ki heh jong ki kompeni die umphniang PSU ki la pynlong ia ka jingleit jurip ha palat 1,100 tylli ki jaka die umphniang bad ki jaka sam LPG ban pynthikna ia ka jingpynpoi kaba iaid beit iaid ryntih bad ban iada na ka jingpyndonkam bakla.

Kiwei kiwei ki sienjam jong ka Sorkar

• Ka jingthmu ba kongsan jong ka Sorkar ka long ban pynthikna ïa ka jingpynbiang LPG hapoh ka ri khlem jingthut, khamtam eh na ka bynta ki longïing bad ki kam ba kongsan kum ki hospital bad ki jaka pule.
• Ka jingpynmih LPG hapoh ka ri na ki jaka pynkhuid umphniang ka la kiew kumba 36 percent.
• Hapoh ka jingpynkylla ia ka LPG Control Order kaba ha ka 14 tarik u Lber 2026, ki nongpyndonkam kiba don ia ka connection PNG ki dei ban aiti noh ia ki connection LPG hapoh jong ki bad kim lah ban ioh ia ki connection LPG ba thymmai.
• La pynkylla ia ka por phah buh sha ka 25 sngi ha ki jaka sor bad haduh 45 sngi ha ki jaka nongkyndong ban pynthikna ia ka jingsam kaba ryntih.
• La mang sa 48,000 KL ka umphniang sharak sha ki Jylla bad ki UT, bad la pyndonkam da kiwei pat ki umphniang kum ka umphniang sharak bad u dewiong ban pynduna ia ka jingeh ha ka jingdawa LPG.
• Ki Kompani umphniang PSU ki pynshlur ia ka jingphah buh LPG da ka lad digital ban pynduna ia ka jingphah buh kyrkieh, katba la kyrpad ia ki sorkar Jylla bad UT ban pynlong ia ki jingjurip ban tehlakam ia ki kam beain.

Ka jingai jingmut ia ki paidbah

• La ai jingmut ia ki nongshong shnong ban ym sheptieng namar ba ka sorkar ka dang iai bteng ban pynneh ia ka jingdon jong ka LPG kaba biang na ka bynta ki longiing bad ki kam ba kongsan.
• Ka jingdie ia ki tyndong LPG ba pyndonkam ha ka kam khaii, kaba la pynduna kham mynshuwa, la pynneh biang shi bynta bad la pynbiang ia ki Sorkar Jylla bad UT ban sam nyngkong.
• Ïa ki tyndong LPG lah ban phah buh lyngba ki lad digital kum ka IVRS, SMS, WhatsApp, ki mobile application jong ki kompeni umphniang bad ki rynsan e-commerce.
• La kyrpad ia ki nongshong shnong ban kiar na ki jingphah buh kyrkieh, pyndonkam ia ki rynsan digital ban phah buh bad kiar na ka jingleit sha ki jaka pynbiang LPG khlem da donkam.
• La pynshlur ia ki nongpyndonkam ban pyndonkam da kiwei pat ki umphniang kum ka PNG bad ki kor shet induction ne elektrik katba lah bad ban tyngkai ia ka bording.
• Ka Sorkar bad ki Kompani umphniang PSU ki dang bteng ban pynphriang jingtip shaphang ka jingpynpoi LPG khlem jingpynthut, bad la kyrpad ia ki lad pathai khubor ban shaniah ha ki tyllong khubor jong ka sorkar ban lait na ki jingtip kiba bakla.

Ka jingshngain ha ki kam duriaw bad ki kam pyniaid jhad

Ka Tnad Ports, Shipping and Waterways ka la ai jingtip halor ka jinglong jingman ha duriaw ha ka thaiñ Persian Gulf bad ki sienjam ba la shim ban iada ia ki nongleit nongwan bad ki jhad jong ka India. Katkum ka jingong ka Tnad:

• Baroh ki nongleit nongwan jong ka India lyngba ki duriaw ki don ha ka jingshngain bad ym don kano kano ka jingjia ba iadei bad ki nongleit jingleit jong ka India lyngba ki duriaw ha kine ki 24 kynta ba la dep.
• Kumba ka long mynta, ki don 22 tylli ki jhad kiba don ka lama India bad 611 ngut ki nongleit jingleit kiba dang don ha ka thain sepngi jong ka thain Persian Gulf. Ka Directorate General of Shipping ka dang iai bteng ban buddien ia kane ka jinglong jingman ha ka jingiatreilang bad ki trai lieng, ki agency jong ka RPSL bad ki Indian Mission.
• Na ki ar tylli ki jhad kit LPG kiba don ka lama India kiba la iaid lyngba ka Strait of Hormuz ha ka 14 tarik Lber kiba kit kumba 92,712 MT ka LPG, ka jhad Shivalik ka dei ban sangeh ha ka kad lieng Mundra ha ka por 1700 baje mynta ka sngi ryngkat ki kot ki sla kiba la pyndep ban pynthikna ia ka jingmih, katba la khmih lynti ba ka jhad Nanda Devi kan poi lashai mynstep.
• Ka jhad ba don ka lama India, ka Jag Laadki, kaba kit kumba 80,800 MT ka umphniang Murban, ka la mih na UAE ha ka 14 tarik Lber 2026 bad ka don ha lynti ban wan sha India. Ka jhad bad baroh ki nongleit nongwan jong ka India ki don ha ka jingshngain.
• Naduh ba la pyntreikam ïa ka DG Shipping Control Room, la jubab haduh 3,030 tylli ki phone call bad kumba 5,497 tylli ki email na ki nongleit nongwan lyngba ki duriaw, ki bahaïing hasem jong ki bad kito kiba don bynta ha ka kam duriaw kiba pan jingïarap, kynthup palat 310 tylli ki jingphone bad 597 tylli ki email ha ki 48 kynta ba ladep.
• Ka DG Shipping ka la pynsuk ban pynphai biang ïa 286 ngut ki nongleit jingleit jong ka India lyngba ki duriaw na ka thaiñ Gulf haduh mynta, kynthup ïa 33 ngut kiba la pynphai biang ha ki 48 kynta ba ladep .
• Ki kad lieng kiba heh ha kylleng ka ri ki la buddien bha ia ka leit ka wan ki lieng bad ka jingpynkit ia ki mar bad ki ai jingkyrshan ia ki lynti pyniaid lieng bad kito kiba don bynta ha ka jingpynkit mar, kynthup ia ki jingpynduna dor ha ka jaka buh lieng, ka bai wai jaka buh lieng bad ka jingsiew ban buh mar.
• Ki kad lieng ki ïatreilang bad ka Customs bad kiwei kiwei kiba don bynta ha kane ka kam ban pynsuk ïa ka kam kit mar.
• Ka JNPA ka la pynbiang ïa ka jaka buh mar ba shipor na ka bynta ki mar kiba leit sha ka thaiñ Middle East bad ka la ai jingpynlait 100 percent ïa ka bai wai jaka bad ka bai sah por bad kumba 80 percent ka jingpynlait ïa ka bai reefer container plug-in haduh 15 sngi na ka bynta ki mar kiba mih na ka JNPA.
• Mynta kam don ka jingkhapngiah ha kano kano ka kad lieng kaba kongsan, bad ki jingkit kiba shalan shabar ri ha JNPA ki la hiar na kumba 5,600 sha kumba 3,900 eiei.
• Ki kad lieng ki ai ruh ïa ka jaka buh lieng kaba shngain na ka bynta ki lieng kiba kit mar kiba leit sha ka thain Gulf kiba ym lah ban iaid lyngba mynta.
• La thaw ia ka kynhun jong ki tnat sorkar hapoh ka Directorate General of Shipping ryngkat bad ki dkhot na ka Customs, ki kad lieng bad kiwei kiwei kiba don bynta ha kane ka kam ban weng ia ki jingeh ha ka jingtreikam.
• Ka tnad ka dang bteng ban ïatreilang bad ka Tnad kam bar ri, ki Indian Mission, ki kompeni pynkit mar da ki lieng bad kito kiba don bynta ha ka kam duriaw ban pynthikna ïa ka jingshngaiñ bad bha ka miat jong ki nongleit nongleit jong ka India lyngba ki duriaw katba dang pynneh ïa ka jingïaid beit jong ka khaii pateng ha ki duriaw bad ka jingtreikam jong ka kad lieng.

Ka jingshngain jong ki briew jong ka India ha ka thain

Ka Tnad kam bar ri ka la ai jingtip kaba thymmai halor ka jinglong jingman jong ki briew jong ka India ha ka thaiñ bad ka la ai jingtip ba ki Indian Mission ki dang bteng ka jingiakren bad ki briew jong ka ri. Ka la ong:

• Ka Sorkar India ka dang bteng ban buddien ïa ka jinglong jingman kaba ïadei bad ki briew jong ka ri kiba don ha Iran, ha kaba ka jingshngaiñ bad bha ka miat jong ki ka long kaba kongsan tam. Palat 550 ngut ki nong India kiba don ha Iran ki la rung sha Armenia lyngba ka thain khappud ryngkat ka jingiarap na ka Embassy jong ka India ha Tehran, katba palat 90 ngut ki nong India ki la rung ruh sha Azerbaijan.
• Ka Embassy jong ka India ha Tehran ka dang treikam pura.
• Ha kine ki khyndiat sngi ba la dep, ki la pynkynriah ïa ki samla pule na India na ki jaka ba shabar jong ka Tehran sha ki jaka ba kham shngaiñ hapoh Iran.
• Ka Sorkar ka dang iakren bad ki kompeni kiba ai kam ïa ki nongleit nongwan jong ka India lyngba ki duriaw bad kito kiba trei ha ka kam tong dohkha ha Iran ban pynthikna ïa ka jingshngaiñ jong ki, bad la ai jingmut ïa baroh ki nong India ban bud ïa ki jingbhah jong ka Embassy.
• Ka Tnad kam Bar ri ka dang bteng ban buddien ia ka jinglong jingman kaba nang kiew ha ka thain West Asia bad ka thain Gulf. Ka jingshngain, ka bha ka miat bad ka jingshngain jong ka briew jong ka ri ka dang long ka mat ba kongsan tam jong ka Sorkar.
• Ka control room ba kyrpang jong ka MEA ka dang treikam ban jubab ia ki jingkylli na ki nong India bad ki bahaiing jong ki, katba ka jingiatreilang ka dang iaid shakhmat bad ki Sorkar Jylla bad ki Union Territory.
• Ki Indian Mission bad ki Post ha kylleng ka thain ki dang bteng ban pyntreikam ia ki helpline baroh arphew saw kynta, ban pynneh ia ka jingiakren bad ki briew jong ka ri bad ban ai ia ki jingbthah ba thymmai.
• Ki Mission ki dang iakren bad ki bor synshar ha ka thain bad ki dang ai jingiarap ïa ki nong India kiba sahkut bad ki nongleit jngoh kai, kynthup ïa ka jingkyrshan visa, ka jingïarap ha ka liang ka jingpynbiang bad ka jingpynsuk ïa ka leit ka wan. Ka jingïatreilang ka dang ïaid shakhmat ruh bad ka Tnad Ports, Shipping and Waterways ban ïarap ïa ki nongleit jingleit jong ka India lyngba ki duriaw ha kane ka thaiñ.
• Naduh ka 28 tarik Rymphang 2026, kumba 2,20,000 ngut ki nongleit nongwan ki la wanphai na ki thaiñ West Asia bad Gulf sha India.
• Ha UAE, ka jingpynher liengsuiñ na Dubai International Airport ka dang sdang biang suki suki hadien ba la pynsangeh shipor mynta ka sngi.
• Ki don katto katne ki liengsuin kiba pynher da ka India bad UAE kiba la treikam na Abu Dhabi, Ras Al Khaimah bad Fujairah. Katkum ka jingtip kaba lah ban ioh, palat 45 tylli ki liengsuin ki la thmu ban leit sha ki jaka bapher bapher ha India mynta ka sngi .
• La bthah ia ki nongleit nongwan ba kin wad jingtip na ki kompeni liengsuin na ka bynta ki por ba la pynbeit thymmai bad ki lah ban iakren bad ka Indian Embassy ha Abu Dhabi lane ka Consulate ha Dubai lyngba ki helpline kiba treikam baroh arphew saw kynta ban ioh jingiarap.
• Ki liengsuin ki dei kiba la pynher na ki kad liengsuin bapher bapher ha Saudi Arabia bad Oman sha ki jaka ha India.
• Ka Qatar airspace ka dang plie shi bynta, ha kaba la khmih ba ka Qatar Airways kan pyntreikam 3 tylli ki liengsuiñ sha India, mynta bad lashai ka sngi.
• Ka Kuwait airspace ka dang khang naduh ka 28 tarik Rymphang 2026. Ki liengsuiñ ba kyrpang jong ka Jazeera Airways la khmih lynti ba kin leit sha India na ka kad liengsuiñ Al Qaisumah ha Saudi Arabia.
• Na ka bynta ki nong India kiba don ha Bahrain bad Iraq, ha kaba dang khang ia ka airspace, dang bteng ban plié lad ia ka leit ka wan lyngba ka Saudi Arabia.
• Hadien ka jingshah thombor ha ka nongbah Sohar ha Oman ha ka 13 tarik Lber 2026 ha kaba arngut ki nong India ki la duh noh ïa la ka jong ka jingim, ka Embassy jong ka India ha Muscat ka dang iakren bad ki bahaïing bad ki bor synshar jong ka Oman. La khmih lynti ban wanrah shen ia ki met iap. Ka Embassy ka dang buddien ruh ïa ka jinglong jingman jong ki nong India kiba la mynsaw, ha kaba ym uba la mynsaw jur.
• Ka kynhun jong ka Mission ha Basra ka dang ïai bteng ban ïarap ïa 15 ngut ki nongtrei ha ka lieng Safesea Vishnu na India kiba la ioh ban pynlait bad kiba sah mynta ha kawei ka Hotel ha Basra. Ka Mission ka dang iatreilang bad ki bor synshar jong ka Iraq na ka bynta ban wanphai kloi sha India bad na ka bynta ban wanrah ia ki met iap jong uwei u nong India uba la khlad noh .

Ka Sorkar ka la pynpaw biang ba ka dang ïai bteng ban buddien ïa ki jingjia ha West Asia bad ban pynneh ïa ka jingïatreilang hapdeng ki Tnad bad ki agency. La shim ia ki sienjam kiba donkam ban pynthikna ia ka jingpynkhreh ha kylleng ki kama ba kongsan bad ban iada ia ki jingmyntoi jong ka ri.

***