কেন্দ্ৰীয় গৃহ তথা সমবায় মন্ত্ৰী শ্ৰী অমিত শ্বাহে নতুন দিল্লীত ভাৰত টেক্সিৰ 'সাৰথী' সকলৰ সৈতে মত বিনিময় কৰে।

মত বিনিময়ৰ সময়ত কেন্দ্ৰীয় গৃহ তথা সমবায় মন্ত্ৰী শ্ৰী অমিত শ্বাহে কয় যে যিসকলে শ্ৰম কৰে তেওঁলোকে লাভ অৰ্জন কৰাৰ সুযোগ পোৱা উচিত। 'সাৰথী' সকলক প্ৰকৃত গৰাকী আখ্যা দি তেওঁ কয় যে ইয়াৰ উদ্দেশ্য হৈছে টেক্সিৰ গৰাকীক সমৃদ্ধিশালী কৰি তোলা। শ্ৰী শ্বাহে কয় যে সাৰথীসকল 'ভাৰত টেক্সী'ৰ মালিক আৰু ইয়াৰ লাভতো তেওঁলোকৰ এটা অংশ থাকিব। সমবায় মন্ত্ৰীগৰাকীয়ে কয় যে আগন্তুক তিনি বছৰৰ ভিতৰত সমগ্ৰ দেশৰ প্ৰতিখন পৌৰ নিগমত 'ভাৰত টেক্সি' উপলব্ধ হ'ব।

শ্ৰী অমিত শ্বাহে কয় যে দেশৰ পাঁচটা প্ৰধান সমবায়ক একত্ৰিত কৰি ভাৰত টেক্সি প্ৰতিষ্ঠা কৰা হৈছে। তেওঁ কয় যে 'সাৰথী' ৰ সংখ্যা বৃদ্ধি হোৱাৰ লগে অংশীদাৰ হ'ব বিচৰা যিকোনো 'সাৰথী'য়ে ৫০০ টকা মূল্যৰ শ্বেয়াৰ ক্ৰয় কৰি মালিকানাৰ অধিকাৰ লাভ কৰিব। শ্ৰী শ্বাহে লগতে কয় যে যেতিয়া ভাৰত টেক্সিৰ পৰিচালনা সমিতিৰ নিৰ্বাচন অনুষ্ঠিত হ'ব, তেতিয়া কিছুমান আসন সাৰথীসকলৰ বাবে সংৰক্ষিত কৰা হ'ব। এবাৰ সাৰথীসকল পৰিচালনা সমিতিৰ অংশ হ'লে তেওঁলোকে নিজেই আন চালকসকলৰ স্বাৰ্থ আৰু উদ্বেগ সুৰক্ষিত আৰু প্ৰতিনিধিত্ব কৰিব।

কেন্দ্ৰীয় সমবায় মন্ত্ৰীগৰাকীয়ে কয় যে ভাৰত টেক্সিৰ উদ্দেশ্য ব্যক্তিগত কোম্পানীৰ দৰে বৃহৎ লাভ উপাৰ্জন কৰা নহয়। তেওঁ কয় যে ভাৰত টেক্সিৰ লক্ষ্য হৈছে আমাৰ চালক ভাতৃসকলক শক্তিশালী কৰা। তেওঁ কয় যে ভাৰত টেক্সিৰ শ্বেয়াৰ সৰথীসকলৰ হাতত আছে, আৰু তেওঁলোক নিজেই মালিক; সেয়েহে, ভাৰত টেক্সিৰ নীতিও সৰথীসকলে নিৰ্ণয় কৰিব। তেওঁ লগতে কয় যে ভাৰত টেক্সি হৈছে চালকসকলৰ নিজৰ কোম্পানী, আৰু সহযোগিতা ইয়াৰ পথ প্ৰদৰ্শক নীতি হ'ব লাগে। ভাৰত টেক্সীয়ে সৰথীসকলৰ সামৰ্থ্যৰ সদ্ব্যৱহাৰ কৰিব, তেওঁলোকৰ সদ্ব্যৱহাৰ নকৰিব।

শ্ৰী অমিত শ্বাহে কয় যে ভাৰত টেক্সিৰ মুঠ উপাৰ্জনৰ ২০শতাংশ ভাৰত টেক্সিৰ একাউণ্টত সাৰথীসকলৰ মূলধন হিচাপে জমা কৰা হ'ব আৰু টেক্সীখনে কিমান কিলোমিটাৰ যাত্ৰা কৰিছে তাৰ ওপৰত ভিত্তি কৰি ৮০শতাংশ ধন সাৰথীসকলৰ একাউণ্টলৈ ঘূৰাই দিয়া হ'ব। শ্ৰী শ্বাহে কয় যে প্ৰাৰম্ভিক ৩ বছৰ ভাৰত টেক্সিৰ সম্প্ৰসাৰণৰ দিশে অগ্ৰসৰ হ'ব আৰু তাৰ পাছত হোৱা লাভৰ ২০ শতাংশ ভাৰত টেক্সিৰ হাতত থাকিব আৰু ৮০শতাংশ সাৰথী ভাতৃসকলক ঘূৰাই দিয়া হ'ব।

কেন্দ্ৰীয় গৃহ তথা সমবায় মন্ত্ৰীগৰাকীয়ে কয় যে ভাৰত টেক্সিৰ শুভাৰম্ভ হৈছে এক গুৰুত্বপূৰ্ণ সমবায় আন্দোলন। তেওঁ কয় যে ইয়াৰ অধীনত ভাৰত টেক্সীয়ে সাৰথীসকলৰ টেক্সী বন্ধক ৰাখিব আৰু সমবায় বেংকৰ জৰিয়তে তেওঁলোকক ঋণ প্ৰদান কৰিব।

শ্ৰী অমিত শ্বাহে কয় যে ভাৰত টেক্সী প্ৰসংগত কোনো কথা লুকুৱাই ৰখা নহ'ব। তেওঁ কয় যে জাননীৰ জৰিয়তে সাৰথীসকলক প্ৰতিটো তথ্য প্ৰদান কৰি 'ভাৰত টেক্সি' বিশ্বৰ আটাইতকৈ স্বচ্ছ কেব সেৱাত পৰিণত হ'ব। তেওঁ উল্লেখ কৰে যে ভাৰত টেক্সীয়ে সাৰথীসকলৰ ন্যূনতম কাৰ্য্যকৰীতাৰ ওপৰত ভিত্তি কৰি এক ন্যূনতম কিলোমিটাৰ হাৰ স্থাপন কৰি কাম কৰিব। শ্ৰী শ্বাহে উল্লেখ কৰে যে ভাৰত টেক্সীত গাড়ীৰ মূল্য, পেট্ৰ'লৰ ব্যৱহাৰ আৰু ন্যূনতম লাভক একত্ৰিত কৰি এক আধাৰ হাৰ সৃষ্টি কৰা হ'ব আৰু এই সেৱা নিৰ্দিষ্ট হাৰৰ তলত চলিব নোৱাৰিব। শ্ৰী শ্বাহে কয় যে ভাৰত টেক্সিৰ উদ্দেশ্য লাভ উপাৰ্জন কৰা নহয় কিয়নো সাৰথীসকল নিজেই এই সমবায়ৰ স্বত্বাধিকাৰী

কেন্দ্ৰীয় সমবায় মন্ত্ৰী শ্ৰী অমিত শ্বাহে কয় যে ভাৰত টেক্সীত 'সাৰথী দিদি' (মহিলা চালক)ৰ ধাৰণা সন্দৰ্ভত চিন্তা চৰ্চা কৰা হৈছে। ভাৰত টেক্সিৰ 'সাৰথী দিদি' সুবিধাই মহিলা সাৰথীসকলক আত্মনিৰ্ভৰশীল কৰি তুলিব আৰু মহিলা যাত্ৰী তথা সাৰথীসকলৰ সুৰক্ষা নিশ্চিত কৰিব। তেওঁ কয় যে আগন্তুক দিনবোৰত ভাৰত টেক্সি এপত 'সাৰথী দীদী' নামেৰে এটা ব্যৱস্থা কৰা হ'ব যাতে এগৰাকী অকলশৰীয়া মহিলা যাত্ৰীয়ে স্বাভাৱিকভাৱেই এগৰাকী 'সাৰথী দীদী'ক অগ্ৰাধিকাৰ দিব পাৰে।

শ্ৰী অমিত শ্বাহে কয় যে ভাৰত টেক্সি ৱেবছাইটত সাৰথীসকলৰ অভিযোগৰ বাবে এটা বিশেষ ব্যৱস্থা ৰখা হ'ব, য'ত তেওঁলোকে মোবাইল নম্বৰ ব্যৱহাৰ কৰি লগ ইন কৰিব পাৰিব আৰু তেওঁলোকৰ সকলো সমস্যা দাখিল কৰিব পাৰিব। ইয়াৰ ওপৰত ভিত্তি কৰি নীতিসমূহ সংশোধন কৰাৰ প্ৰয়াস চলোৱা হ'ব। ভাৰত টেক্সীয়ে যেনেকৈ সাৰথীসকলৰ সমস্যা সমাধান কৰিব, অন্য টেক্সী কোম্পানীসমূহেও তেনে কৰিব লাগিব। শ্ৰী শ্বাহে কয় যে ভাৰত টেক্সিৰ উদ্দেশ্য হ'ব লাগে গ্ৰাহকক সুখী কৰি ৰখাৰ লগতে সাৰথীৰ কল্যাণ নিশ্চিত কৰা।

কেন্দ্ৰীয় গৃহ তথা সমবায় মন্ত্ৰীগৰাকীয়ে কয় যে সাৰথীসকলে কেতিয়াও নিজকে চালক বুলি কোৱা উচিত নহয়; ইয়াৰ পৰিৱৰ্তে, তেওঁলোকে গৌৰৱেৰে নিজকে সাৰথী বুলি কোৱা উচিত। তেওঁ কয় যে সাৰথীসকলৰ মনত এই মৰ্যাদা আৰু গৌৰৱৰ ভাৱ জাগ্ৰত কৰাটো ভাৰত টেক্সীৰ দায়িত্ব। ভাৰত টেক্সীয়ে সংস্কাৰৰ বাবে সকলো সম্ভাৱনা অন্বেষণ কৰিব, আৰু ই আগবাঢ়ি যোৱাৰ লগে প্ৰতিটো সমস্যাৰ সমাধানো সম্ভৱ হ'ব। শ্ৰী শ্বাহে লগতে কয় যে সাৰথীৰ প্ৰতি সমাজৰ দৃষ্টিভংগী সলনি কৰাটোও সাৰথীসকলৰ দায়িত্ব।

শ্ৰী অমিত শ্বাহে কয় যে টেক্সি খণ্ডৰ সমস্যাবোৰ কেৱল এক সঠিক ব্যৱস্থা বিকশিত কৰিয়েই সমাধান কৰিব পাৰি। তেওঁ কয় যে বৰ্তমানৰ প্ৰতিষ্ঠান সমূহৰ উদ্দেশ্য সাৰথীসকলৰ কল্যাণ নহয়। শ্ৰী শ্বাহে কয় যে ভাৰত টেক্সিৰ উদ্দেশ্য হৈছে সাৰথীসকলৰ কল্যাণ আৰু গ্ৰাহকৰ সৈতে ভালদৰে ব্যৱহাৰ কৰা। তেওঁ লগতে কয় যে ভাৰত টেক্সিৰ সাৰথীসকলৰ সৈতে নিৰন্তৰ আলোচনা আৰু তেওঁলোকৰ অসুবিধাসমূহ শুনাৰ কাৰ্যসূচী চলি থাকিব তথা অনলাইন মাধ্যম, শাৰীৰিক বৈঠক আৰু কল চেণ্টাৰৰ জৰিয়তে সাৰথীসকলৰ সৈতে যোগাযোগ অব্যাহত থাকিব।

***

RK/AK/PR/PS/DD