Ka prokram ïakren ba kyrpang jong u Myntri Rangbahduh Narendra Modi bad ki samla pule, ka Pariksha Pe Charcha (PPC), kan sdang biang bad ka bynta kaba 9 jong ka ha ka sngi Thohdieng, 6 tarik Rymphang 2026 ha ka por 10 baje mynstep ban ïakren halor ka jingeh ha ka por eksamin bad ban rakhe ïa ki eksamin kum ka Utsav bad ka bynta ba kongsan jong ka jingim.

Ïa kane ka prokram yn pyni lyngba ka YouTube Channel jong u Myntri Rangbahduh ka ri u Narendra Modi, ka Doordarshan (DD), bad ha ki rynsan social media jong ka Tnad Pule Puthi. Nalor kata, ki rynsan OTT, kum ka WAVES OTT, Amazon Prime Video, Jio, ZEE5, Sony LIV, bad Spotify (ka rynsan audio), kin pyni live ia ka Pariksha Pe Charcha.

Ha ka jingïahap bad ka NEP 2020, ka jingmut jong ka PPC ka thmu ban pynwandur thymmai ïa ka jingshem jong ki khynnah skul shaphang ka eksamin da kaba kyntiew ïa ka jingsngew skhem, ka jinglong babha, bad ka bha ka miat ba pura, bad ban rakhe ïa ka aiom eksamin kum ka Utsav. U Myntri Rangbahduh u la batai ïa ki jingsngew jong u ha ka kot jong u kaba la ai kyrteng “Exam Warriors”, kaba lah ban ïoh ha ki ktien bapher bapher bad kumjuh ruh ka Braille, ha kaba u la ban jur ïa ka jingngeit halade bad ban jur ïa ka jingdonkam ban ïakren shaphang kine ki mat khnang ba ki khun jong ngi kin ïoh ïa ka jinglong khynnah kaba dap da ka jingkmen kaba ki dei hok ban ïoh.

La saindur da u Myntri Rangbahduh ka ri, ka Pariksha Pe Charcha ka long kaba ai mynsiem bad kaba saindur thymmai, kaba wanrah ïa ki bynta kiba thymmai man la u snem. Ha ka sien kaba nyngkong, la sdang ia ka PPC 2026 ha ki jaka bapher bapher ba kynthup ia baroh ki bynta jong ka ri. Nalor ka Delhi, la pynlong ia ka PPC 2026 ha 4 (saw) tylli ki jaka bapher bapher - ha Coimbatore ha Tamil Nadu, Raipur ha Chhattisgarh, Dev Mogra ha Gujarat bad Guwahati ha Assam, kaba kynthup ïa ka thaiñ Mihngi, Sepngi, Shatei, Shathie bad Pdeng jong ka Ri.

Kum shi bynta jong ka jingpynkhreh ïa ka Pariksha Pe Charcha 2026, la pynlong ïa ki prokram kiba iadei bad ki khynnah skul ha kylleng ki skul ha ka ri, kynthup ïa ka Swadeshi Sankalp Daud, ka jingïamareh/ïaid kjat ba la ïalam da ki khynnah skul kaba kyntiew ïa ka mynsiem ban shaniah halade, bad ki jingïakob kylli jingkylli bad thoh kot ba la pynlong ha ki Kendriya Vidyalaya halor ka Parakram Diwas. Kumba 2.26 klur ngut ki samla pule ki la iashim bynta ha kine ki prokram.

Ha ki snem kiba la leit noh, ka prokram ka la nang kiew sha ka Jan Andolan ha ka ri baroh kawei, kaba la sakhi ïa ka jingïashim bynta kaba ym pat ju iohi mynno mynno ruh na ki khynnah skul, ki kmie ki kpa, bad ki nonghikai ha kylleng ka ri. Mynta u snem, ka jingpynrung kyrteng na ka bynta ka Pariksha Pe Charcha kaba 9 ka la tam ïa baroh kiba mynshwa, ha kaba palat 4.50 klur ngut ki khynnah skul, ki nonghikai, bad ki kmie ki kpa ki la pynrung kyrteng lyngba ka rynsan MyGov. Kane ka jingïashim bynta shitrhem ka long ka jingpynshisha ïa ka jingiai kyrshan bad jingïatreilang jong baroh ki Jylla bad ki UT bad kumjuh ruh ki kynhun kiba don hapoh ka Tnad Pule Puthi ha kaba pynïaid shakhmat ïa ki jingthmu jong kane ka sienjam ha ka jingïatreilang bad ka Tnad Pule Puthi. Ka jingpyniasoh shuh shuh ia ki nongiashim bynta bad ka PPC, katba nang mih ki sngi, ka long ka dak kaba shai jong ka jingkongsan kaba kane ka prokram ka wanrah ha ka jingim jong baroh.

*****