ತೆರಿಗೆದಾರರಿಗೆ 'ಜೀವನದ ಸುಲಭತೆ'ಯನ್ನು ಖಚಿತಪಡಿಸಿಕೊಳ್ಳಲು ನೇರ ತೆರಿಗೆಗಳ ಕುರಿತು ಹಲವಾರು ಪ್ರಸ್ತಾಪಗಳನ್ನು ಕೇಂದ್ರ ಹಣಕಾಸು ಮತ್ತು ಕಾರ್ಪೊರೇಟ್ ವ್ಯವಹಾರಗಳ ಸಚಿವರಾದ ಶ್ರೀಮತಿ ನಿರ್ಮಲಾ ಸೀತಾರಾಮನ್ ಅವರು ಇಂದು ಸಂಸತ್ತಿನಲ್ಲಿ 2026-27ರ ಕೇಂದ್ರ ಬಜೆಟ್ ಭಾಷಣದಲ್ಲಿ ಘೋಷಿಸಿದ್ದಾರೆ.

ಜೀವನದ ಸುಲಭತೆ

ಮೋಟಾರು ಅಪಘಾತ ಕ್ಲೇಮುಗಳ ನ್ಯಾಯಮಂಡಳಿಯು ನೈಸರ್ಗಿಕ ವ್ಯಕ್ತಿಗೆ ನೀಡುವ ಯಾವುದೇ ಬಡ್ಡಿಗೆ ಆದಾಯ ತೆರಿಗೆಯಿಂದ ವಿನಾಯಿತಿ ನೀಡಲಾಗುವುದು ಮತ್ತು ಈ ಖಾತೆಯಲ್ಲಿನ ಯಾವುದೇ ಟಿಡಿಎಸ್ ಅನ್ನು ತೆಗೆದುಹಾಕಲಾಗುತ್ತದೆ ಎಂದು ಬಜೆಟ್ ಪ್ರಸ್ತಾಪಿಸುತ್ತದೆ. ವಿದೇಶಿ ಪ್ರವಾಸ ಕಾರ್ಯಕ್ರಮದ ಪ್ಯಾಕೇಜ್ ಮಾರಾಟದ ಮೇಲಿನ ಟಿಸಿಎಸ್ ದರವನ್ನು ಪ್ರಸ್ತುತ 5 ಪ್ರತಿಶತ ಮತ್ತು 20 ಪ್ರತಿಶತದಿಂದ 2 ಪ್ರತಿಶತಕ್ಕೆ ಇಳಿಸಲು ಇದು ಪ್ರಸ್ತಾಪಿಸುತ್ತದೆ. ಮತ್ತು ಇದಕ್ಕೆ  ಯಾವುದೇ ಮೊತ್ತದ ನಿಬಂಧನೆ ಇಲ್ಲ.

ಉದಾರೀಕೃತ ರೆಮಿಟೆನ್ಸ್  ಯೋಜನೆ (LRS) ಅಡಿಯಲ್ಲಿ ಶಿಕ್ಷಣ ಮತ್ತು ವೈದ್ಯಕೀಯ ಉದ್ದೇಶಗಳಿಗಾಗಿ ಟಿ.ಸಿ.ಎಸ್. ದರವನ್ನು ಶೇಕಡಾ 5 ರಿಂದ 2ಕ್ಕೆ ಇಳಿಸುವುದು ಇದರ ಗುರಿಯಾಗಿದೆ. ಅಸ್ಪಷ್ಟತೆಯನ್ನು ತಪ್ಪಿಸಲು ಮಾನವಶಕ್ತಿ ಸೇವೆಗಳ ಪೂರೈಕೆಯನ್ನು ನಿರ್ದಿಷ್ಟವಾಗಿ ಗುತ್ತಿಗೆದಾರರಿಗೆ ಟಿ.ಡಿ.ಎಸ್. ಉದ್ದೇಶಕ್ಕಾಗಿ ಪಾವತಿಯ ವ್ಯಾಪ್ತಿಗೆ ತರಲು ಪ್ರಸ್ತಾಪಿಸಲಾಗಿದೆ. ಹೀಗಾಗಿ, ಈ ಸೇವೆಗಳ ಮೇಲಿನ ಟಿ.ಡಿ.ಎಸ್. ಶೇಕಡಾ 1 ಅಥವಾ 2 ಪ್ರತಿಶತದಷ್ಟು ಮಾತ್ರ ಇರುತ್ತದೆ.

ತೆರಿಗೆದಾರರಿಗೆ ಸುಲಭ

ಸಣ್ಣ ತೆರಿಗೆದಾರರಿಗೆ ಒಂದು ಯೋಜನೆಯನ್ನು ಪ್ರಸ್ತಾಪಿಸಲಾಗಿದೆ, ಇದರಲ್ಲಿ ನಿಯಮ ಆಧಾರಿತ ಸ್ವಯಂಚಾಲಿತ ಪ್ರಕ್ರಿಯೆಯು ಮೌಲ್ಯಮಾಪನ ಅಧಿಕಾರಿಗೆ ಅರ್ಜಿ ಸಲ್ಲಿಸುವ ಬದಲು ಕಡಿಮೆ ಅಥವಾ ಶೂನ್ಯ ಕಡಿತ ಪ್ರಮಾಣಪತ್ರವನ್ನು ಪಡೆಯಲು ಅನುವು ಮಾಡಿಕೊಡುತ್ತದೆ. ಬಹು ಕಂಪನಿಗಳಲ್ಲಿ ಸೆಕ್ಯುರಿಟಿಗಳನ್ನು ಹೊಂದಿರುವ ತೆರಿಗೆದಾರರ ಅನುಕೂಲತೆಗಾಗಿ/ಸುಲಭತೆಗಾಗಿ, ಠೇವಣಿದಾರರು ಹೂಡಿಕೆದಾರರಿಂದ ಫಾರ್ಮ್ 15G ಅಥವಾ ಫಾರ್ಮ್ 15H ಅನ್ನು ಸ್ವೀಕರಿಸಲು ಮತ್ತು ಅದನ್ನು ವಿವಿಧ ಸಂಬಂಧಿತ ಕಂಪನಿಗಳಿಗೆ ನೇರವಾಗಿ ಒದಗಿಸಲು ಬಜೆಟ್ ಪ್ರಸ್ತಾಪಿಸುತ್ತದೆ. ಡಿಸೆಂಬರ್ 31 ರಿಂದ ಮಾರ್ಚ್ 31 ರವರೆಗೆ ನಾಮಮಾತ್ರ ಶುಲ್ಕವನ್ನು ಪಾವತಿಸುವುದರೊಂದಿಗೆ ರಿಟರ್ನ್ಸ್ ಪರಿಷ್ಕರಿಸಲು ಲಭ್ಯವಿರುವ ಸಮಯವನ್ನು ಇದು ವಿಸ್ತರಿಸುತ್ತದೆ.

ಸಡಿಲಗೊಳಿಸಿದ ತೆರಿಗೆ ರಿಟರ್ನ್ ಟೈಮ್‌ಲೈನ್

ತೆರಿಗೆ ರಿಟರ್ನ್‌ಗಳನ್ನು ಸಲ್ಲಿಸುವ ಸಮಯವನ್ನು ಬದಲಾಯಿಸಲು ಬಜೆಟ್ ಪ್ರಸ್ತಾಪಿಸಿದೆ. ಐಟಿಆರ್ 1 ಮತ್ತು ಐಟಿಆರ್ 2 ರಿಟರ್ನ್‌ಗಳನ್ನು ಹೊಂದಿರುವ ವ್ಯಕ್ತಿಗಳು ರಿಟರ್ನ್ ಸಲ್ಲಿಕೆಯನ್ನು ಜುಲೈ 31 ರವರೆಗೆ ಮುಂದುವರಿಸಬಹುದು ಮತ್ತು ಆಡಿಟ್ ಮಾಡದ ವ್ಯವಹಾರ ಪ್ರಕರಣಗಳು ಅಥವಾ ಟ್ರಸ್ಟ್‌ಗಳಿಗೆ ಆಗಸ್ಟ್ 31 ರವರೆಗೆ ಸಮಯಾವಕಾಶ ನೀಡಲು ಪ್ರಸ್ತಾಪಿಸಲಾಗಿದೆ. ಅನಿವಾಸಿಗಳಿಂದ ಸ್ಥಿರ ಆಸ್ತಿಯ ಮಾರಾಟದ ಮೇಲಿನ ಟಿಡಿಎಸ್ ಅನ್ನು ಟ್ಯಾನ್ (TAN)  ಅಗತ್ಯವಿರುವ ಬದಲು ನಿವಾಸಿ ಖರೀದಿದಾರರ ಪ್ಯಾನ್ ಆಧಾರಿತ ಚಲನ್ ಮೂಲಕ ಕಡಿತಗೊಳಿಸಿ ಠೇವಣಿ ಮಾಡಲು ಪ್ರಸ್ತಾಪಿಸಲಾಗಿದೆ.

ಸಣ್ಣ ತೆರಿಗೆದಾರರ ಮೇಲೆ ಗಮನ ಕೇಂದ್ರೀಕರಣ

ವಿದ್ಯಾರ್ಥಿಗಳು, ಯುವ ವೃತ್ತಿಪರರು, ತಂತ್ರಜ್ಞಾನ ಉದ್ಯೋಗಿಗಳು, ಸ್ಥಳಾಂತರಗೊಂಡ ಅನಿವಾಸಿ ಭಾರತೀಯರು ಮತ್ತು ಇತರರಂತಹ ಸಣ್ಣ ತೆರಿಗೆದಾರರ ಪ್ರಾಯೋಗಿಕ ಸಮಸ್ಯೆಗಳನ್ನು ಪರಿಹರಿಸಲು, ಈ ತೆರಿಗೆದಾರರು ನಿರ್ದಿಷ್ಟ ಗಾತ್ರಕ್ಕಿಂತ ಕಡಿಮೆ ಆದಾಯ ಅಥವಾ ಸ್ವತ್ತುಗಳನ್ನು ಬಹಿರಂಗಪಡಿಸಲು ಒಂದು ಬಾರಿ 6 ತಿಂಗಳ ವಿದೇಶಿ ಆಸ್ತಿ ಬಹಿರಂಗಪಡಿಸುವ ಯೋಜನೆಯನ್ನು ಪರಿಚಯಿಸುವ ಗುರಿಯನ್ನು ಹೊಂದಿದೆ. ಈ ಯೋಜನೆಯು ಎರಡು ವರ್ಗಗಳ ತೆರಿಗೆದಾರರಿಗೆ ಅನ್ವಯಿಸುತ್ತದೆ, ಅವುಗಳೆಂದರೆ (ಎ) ತಮ್ಮ ವಿದೇಶಿ ಆದಾಯ ಅಥವಾ ಆಸ್ತಿಯನ್ನು ಬಹಿರಂಗಪಡಿಸದವರು ಮತ್ತು (ಬಿ) ತಮ್ಮ ವಿದೇಶಿ ಆದಾಯ ಅಥವಾ ಬಾಕಿ ತೆರಿಗೆಯನ್ನು ಪಾವತಿಸಿದವರು, ಆದರೆ ಸ್ವಾಧೀನಪಡಿಸಿಕೊಂಡ ಆಸ್ತಿಯನ್ನು ಘೋಷಿಸಲು ಸಾಧ್ಯವಾಗದವರು.

ವರ್ಗ (ಎ) ಯಲ್ಲಿ, ಬಹಿರಂಗಪಡಿಸದ ಆದಾಯ/ಆಸ್ತಿಯ ಮಿತಿ 1 ಕೋಟಿ ರೂಪಾಯಿಗಳವರೆಗೆ ಎಂದು ಪ್ರಸ್ತಾಪಿಸಲಾಗಿದೆ. ಅವರು ಆಸ್ತಿಯ ನ್ಯಾಯಯುತ ಮಾರುಕಟ್ಟೆ ಮೌಲ್ಯದ 30 ಪ್ರತಿಶತ ಅಥವಾ ಬಹಿರಂಗಪಡಿಸದ ಆದಾಯದ 30 ಪ್ರತಿಶತವನ್ನು ತೆರಿಗೆಯಾಗಿ ಮತ್ತು ದಂಡದ ಬದಲಿಗೆ 30 ಪ್ರತಿಶತವನ್ನು ಹೆಚ್ಚುವರಿ ಆದಾಯ ತೆರಿಗೆಯಾಗಿ ಪಾವತಿಸಬೇಕಾಗುತ್ತದೆ ಮತ್ತು ಇದರಿಂದಾಗಿ ಕಾನೂನು ಕ್ರಮದಿಂದ ವಿನಾಯಿತಿ ಪಡೆಯುತ್ತಾರೆ. ವರ್ಗ (ಬಿ)ಯಲ್ಲಿ, ಆಸ್ತಿ ಮೌಲ್ಯವು 5 ಕೋಟಿ ರೂಪಾಯಿಗಳವರೆಗೆ ಎಂದು ಪ್ರಸ್ತಾಪಿಸಲಾಗಿದೆ. ಇಲ್ಲಿ, 1 ಲಕ್ಷ ರೂಪಾಯಿ ಶುಲ್ಕವನ್ನು ಪಾವತಿಸುವುದರೊಂದಿಗೆ ದಂಡ ಮತ್ತು ಕಾನೂನು ಕ್ರಮ ಎರಡರಿಂದಲೂ ವಿನಾಯಿತಿ ಲಭ್ಯವಿರುತ್ತದೆ.

*****