মেদাম প্রসিদেন্ত, ভারত অমসুং য়ুরোপিয়ন য়ুনিয়নগী ব্যুজিনেসকী লুচিংবশিং অমসুং পুম্নমক্কী মফমদা ঐহাক্না য়াইফ পাউজেল পীজরি।

ইন্দিয়া-য়ুরোপিয়ন য়ুনিয়ন ব্যুজিনেস ফোরম অসিদা শরুক য়াবসিদা ঐহাক্না য়াম্না নুংঙাইবা ফাওই। য়ুরোপিয়ন য়ুনিয়ন কাউন্সিলগী প্রসিদেন্ত অমসুং কম্মিসন তু ইন্দিয়াগী ভারত খোঙচৎ অসি অচম্বা দিপ্লোমেতিক খোঙচৎ অমা নত্তে। মসিদি ভারত অমসুং য়ুরোপিয়ন য়ুনিয়নগী মরীগী ওইবা অনৌবা য়ুগ অমা হৌদোকপনি। ভারতকী গনতন্ত্র দিবস পালন থৌরমদা য়ুরোপিয়ন য়ুনিয়নগী লুচিংবশিংনা অথোইবা মীথুংলেন ওইনা শরুক য়াবা, ভারত অমসুং য়ুরোপিয়ন য়ুনিয়ন অনিগী মরক্কী পুৱারীদা খ্বাইদগী চাউবা এফ.তি.এ. লোইশিনখিবা, অদুগা ঙসিনা সি.ই.ও. কয়া অমগা লোয়ননা অশুক য়াম্না চাউরবা মওংদা ইন্দিয়া-য়ুরোপিয়ন য়ুনিয়ন ব্যুজিনেস ফোরম শীল্লিবা অসিগুম্বা মায় পাকপা কয়া অসিনা মালেমগী খ্বাইদগী চাউবা গনতন্ত্রগী শক্তি অনিগী মরক্তা মমাংদা অমুক্তা পাংথোকখিদ্রিবা মায় পাকপগী খুদম অমা ওইরি।

মরুপশিং,

মসিগী মরী অসি শোইবদগী লাকপা নত্তে; ঐখোয়না মার্কেত ইকোনোমী ওইনা ঐখোয়গী অমত্তা ওইনা মান্নবা ভেল্যুশিং লৈরি। ঐখোয়না মালেম্বু তংদু লৈতাহনবগী মতাংদা প্রাইওরিতী কয়া শেয়র তৌমিন্নখি, ঐখোয়গী মীয়মগী মরক্তা মহৌশাগী ওইবা নক্নবা অমসু লৈরি। মসিগুম্বা মপাঙ্গল লৈবা ফম্বাক অসিদা ঐখোয়না ঐখোয়গী মরীবু অৱাংবা থাক্তা পুখৎলি। ঐখোয়না মরী অসিবু মালেমগী খ্বাইদগী ইথিল পীবা পার্ত্নরশিপ অমা ওইনা শেম্লি। অদুগা মসিগী মহৈ অসি ঐখোয়না ময়েক শেংনা উবা ফংলে। হৌখিবা চহি ১০দা ঐখোয়গী লল্লোন ইতিক তৌবগী চাংনা শরুক অনি হেনগত্তুনা বিলিয়ন য়ুরো ১৮০ য়ৌখ্রে। য়ুরোপকী কম্পেনী ৬০০০ হেনবনা ভারত্তা থবক তৌরি। য়ুরোপিয়ন য়ুনিয়ন্না ভারত্তা বিলিয়ন য়ুরো ১২০০ হেন্না থাদরি। ভারতকী কম্পেনী ১৫০০ হেনবশু য়ুরোপিয়ন য়ুনিয়ন্দা লৈরি অমসুং ভারতনা মফম অসিদা থাদখিবা শেনফমশু চাউরাক্না বিলিয়ন য়ুরো ৪০ য়ৌখ্রে। ঙসিদি, হীরম খুদিং – আর. অমসুং দি., মেন্যুফেকচরিং অমসুং সর্ভিস্তা ভারত অমসুং য়ুরোপকী কম্পেনীশিংগী মরক্তা অচেৎপা মরী লৈনরি। অদোমগুম্বা ব্যুজিনেসকী লুচিংবশিং অসিনা মসিগী কান্নবা লৌরি অমসুং মসিবু ওইথোকহল্লি।

মরুপশিং,

ঙসি, মালেমগী কারবারদা ঙসি চাউনা তংদু লৈতাদবা অমা ওইরি। কম্পেনী খুদিংমক্না মখোয়গী মার্কেত স্ত্রেতজী অমসুং পার্ত্নরশিপশিং অসি নৌহৌননা অমুক নৈনরি। মসিগুম্বা মতম অসিদা মসিগী এফ.তি.এ. অসিনা কারবারগী মালেমদা ময়েক শেংবা অমসুং থাজবা য়াবা পাউজেল অমা পীরি। মসিদি মথৌ পাংথোকপা ঙম্বা, থাজবা য়াবা অমসুং তুংগী খল্লগা চঙমিন্নবা পার্ত্নরশিপ অমা শেম্নবা নাকল অনিমক্কী কারবারগী খুন্নাইদা পীবা পাউজেল অমা ওইরি। মসিগী এফ.তি.এ. অসিগী খুদোংচাবা অসি নাকল অনিমক্না লৌগনি হায়বগী ঐহাক্না অচেৎপা থাজবা থম্লি।

মরুপশিং,

ভারত অমসুং য়ুরোপিয়ন য়ুনিয়নগী মরক্তা লৈরিবা ব্যুজিনেস পার্ত্নরশিপ অসিনা প্রাইওরিতী কয়াদা কান্নবা পীগনি। হীরম অসিগা মরী লৈননা, ঐহাক্না প্রাইওরিতী অহুমগী মতাংদা হায়গনি। অহানবা – ঙসিদি ত্রেদ, তেক্নোলোজী অমসুং ক্রিতিকেল মিনরেলশিং অসি মালেমদা খুৎলায় ওইনা শিজিন্নরে। ঐখোয়না তেংবাংনরিবা অসি দি-রিস্ক তৌনবা ঐখোয়না পুন্না হোৎনমিন্নফম থোকই। ই.ভি., বেত্তরী, চিপ অমসুং এ.পি.আই.শিংদা লৈরিবা দিপেন্দেন্সী হন্থহন্নবা ঐখোয়গী কারবারগী খুন্নাইশিংনা থবক তৌমিন্নবা য়াদবরা? ঐখোয়না মহুৎ শিনবা য়াবা থাজবা য়াবা সপ্লাই চেন অমা শেম্বা য়াগদরা? অনিশুবা – ভারত অমসুং য়ুরোপিয়ন য়ুনিয়ন্না দিফেন্স ইন্দস্ত্রী অমসুং ফ্রন্তিয়র তেক্নোলোজীদা মিৎয়েং চঙনরি। ঐহাক্না অদোম্না দিফেন্স, স্পেস, তেলিকোম অমসুং এ.আই.গুম্বা সেক্তরশিংগী পার্ত্নরশিপ হেনগৎহন্নবা হায়জরি। অহুমশুবা – ক্লীন অমসুং সস্তেনেবল ফ্যুচর অসি ঐখোয় অনিমক্কী প্রাইওরিতী ওইরি। গ্রীন হাইদ্রোজেন্দগী সোলর ইনর্জী অমসুং স্মার্ত গ্রিদ ফাওবদা ঐখোয়না পুন্না পাংথোকমিন্নবা রিসর্চ হেনগৎহনগদবনি অমসুং হীরম খুদিংদা শেল থাদবশু হেনগৎহনগদবনি। স্মোল মোদ্যুলর রিএক্তর অমসুং সস্তেনেবল মোবিলিতীদশু ইন্দস্ত্রী অনিমক্না থবক শুমিন্নগদবনি। মসিগা লোয়ননা, ৱাতর মেনেজমেন্ত, সর্ক্যুলর ইকোনোমী অমসুং সস্তেনেবল এগ্রিকলচরদা ঐখোয়না মরী লৈনবা ৱারোইশিন পুন্না পুথোকমিন্নগদবনি।

মরুপশিং,

ঙসিগী পুৱারী ওইরবা ৱারেপশিং অসিগী মতুংদা অদোমগী মফমদা অখন্নবা থৌদাং অমা লৈরবনি। হৌজিক্তি, মথংগী খোঙথাং অসিদি কারবারগী খুন্নাইনা থাংগদবনি। ঐখোয় মশেল তেংবাংমিন্নরবা মতমদখক্তা ঐখোয়গী পার্ত্নরশিপ্না অমনা অমবু থাজগদৌরিবনি। অদোমগী হোৎনজমন্দগী ঐখোয়গী মান্নবা প্রাইওরিতীশিং অসি ফংবা ঙমগনি। ঐখোয়গী তৌবা ঙম্বশিং চুংশিনমিন্নরসি অমসুং মালেম পুম্বগী শাহৌ লৌবগী দবল ইঞ্জিন অমা ওইরসি।

অদোম্বু থাগৎচরি।

***