ঙসি অঙনবা মতমদা প্রধান মন্ত্রী শ্রী নরেন্দ্র মোদীনা নীতি আয়োগতা শক্নাইরবা ইকোনোমিস্ত অমসুং এক্সপর্তশিংগী কাংলুপ অমগা ৱারী শানখ্রে। ৱারী শানবগী থিমদি "আত্মনির্ভরতা অমসুং স্ত্রকচরেল ত্রান্সফোর্মেসন: ভিক্সিৎ ভারতকীদমক এজেন্দা" হায়বা অসিনা ওইখি।

মীয়াম তিনখিবা অদুদা ৱা ঙাংলদুনা, প্রধান মন্ত্রীনা 2047 ফাওবগী ভারতকী খোঙচৎকী মরুওইবা য়ুম্বীশিং অদু ফোংদোকখি। ভিক্সিৎ ভারত অসি নেস্নেল এস্পিরেসন অমনি হায়না পল্লদুনা প্রধান মন্ত্রীনা হায়খি মদুদি 2047 ফাওবদা চাউখৎলবা ভারত অমগী মঙলান অসি সরকারগী পোলিসীদগী হেন্দুনা মীয়ামগী অশেংবা এস্পিরেসন অমা ওইরে। অসিগুম্বা অহোংবা অসি এজুকেসন, কঞ্জ্যুমর অমসুং গ্লোবেল মোবিলিতীগী চাউখৎলক্লিবা মওংশিংদা উবা ফংই। মসিনা ইন্সতিত্যুস্নেল কেপাসিতী হেনগৎহনবা অমসুং এস্পিরেস্নেল সোসাইতী অমগী মথৌ তাবশিং ফংহন্নবা প্রোএক্তিব ইনফ্রাস্ত্রকচর প্লানিং মথৌ তাহল্লি।

প্রধান মন্ত্রীনা মখা তানা মালেমগী ওইবা কেপাসিতী শেমগৎনবা অমসুং মালেমগী ওইবা ইন্তিগ্রেসন ফংনবগীদমক মিসন মোদকী রিফোর্মশিং পাংথোকপগী তঙাইফদবা অদুদা অকনবা ৱাফম থমখি। অশাংবা মতমগী গ্রোথ লেংদনা থম্নবগীদমক, প্রধান মন্ত্রীনা তোঙান তোঙানবা সেক্তরশিংদা মিসন মোদ রিফোর্মশিং পাংথোক্নবা হায়খি। মহাক্না হায়খি মদুদি ভারতকী পোলিসী শেম্বা অমসুং বজেৎ শেম্বদা 2047কী ভিজনগা লোয়ননা লেপকদবনি। মালেমগী থবক শুরিবা মীওইশিং অমসুং মালেমগী কৈথেলশিংগীদমক লৈবাক অসি মরুওইবা মফম অমা ওইদুনা লৈহন্নবা হোৎনবগী তঙাইফদবা অদুগী মতাংদসু মহাক্না ফোংদোকখি।

ৱারী শানবগী মনুংদা, ইকোনোমিস্তশিংনা মেন্যুফেকচরিং অমসুং সর্ভিস সেক্তরশিংদা প্রদক্তিবিতী অমসুং কম্পিতিতিবনেস হেনগৎহন্নবগী মতাংদা স্ত্রেতেজিক ইন্সাইৎশিং শেয়র তৌখি। য়ুমথোংশিংদা শেল তুংশিনবা হেনগৎহনবা, মপাঙ্গল ইনফ্রাস্ত্রকচর শেমগৎপা অমসুং কত্তিং-এদজ তেক্নোলোজী শীজিন্নদুনা স্ত্রকচরেল ত্রান্সফোর্মেসন য়াংখৎহনবদা খন্ন-নৈনখি। গ্রুপ অসিনা আর্তিফিসিএল ইন্তেলিজেন্স (AI) গী থৌদাং অসি ক্রোস সেক্তরেল প্রদক্তিবিতীগী ইনেবলর অমা ওইনা নৈনখি অমসুং ভারতকী দিজিতেল পব্লিক ইনফ্রাস্ত্রকচর (DPI) গী মখা তানা পাকথোক-চাউথোকহন্নবগী মতাংদা খন্নখি।

শরুক য়ারিবশিংনা 2025দা মমাংদা অমুক্তা ওইখিদ্রিবা মওংদা মখল কয়াগী রিফোর্মশিং পাংথোকপা অমসুং লাক্কদৌরিবা চহি অসিদা মখোয়বু হেন্না চেৎশিলহনবা অসিনা ভারতনা খ্বাইদগী য়াঙনা চাউখৎলক্লিবা মালেমগী শেন্মিৎলোনশিংগী মরক্তা অমা ওইবগী লম্বীদা মাংজিল থানা চংশিনবা অমসুং অনৌবা খুদোংচাবশিং ফংহন্নবা হোৎনগনি হায়না পনখি।

খন্ন-নৈনবা অদুদা শরুক য়াখিবা মশক নাইবা ইকোনোমিস্তশিং অমসুং এক্সপোর্ত কয়ামরুম অদুদা শ্রী শঙ্কর আচার্য়, শ্রী অশোক কে ভত্তচার্য়, শ্রী এন.আর. ভানুমুর্তী, কুমাতি অমিতা বত্রা, শ্রী জনমেজায়া সিনহা, শ্রী অমিত চন্দ্র, কুমারি রাজানি সিনহা, শ্রী দিনেশ কানাবর, শ্রী বসন্তা প্রধান, শ্রী মদন সবনাবিস, কুমারি অশিমা গোয়ল, শ্রী ধর্মকির্তি জোশি, শ্রী উমাকান্ত দাশ, শ্রী পিনাকী চক্রবোর্তী, শ্রী ইন্দ্রনিল সেন গুপ্তা, শ্রী সমিরন চক্রবোর্তী, শ্রী অভিমান দাস, শ্রী রাহুল বজোরিয়া, কুমারি মোনিকা হলন অমসুং শ্রী সিদ্ধার্থা সনয়াল য়াওখি।

***