U Myntri Kam Pohiing jong ka sorkar pdeng uba dei ruh u Myntri ka Tnad treilang u Amit Shah u la sdang ia ka jingiakren kaba kyrpang hapoh Rajya Sabha halor ka jingdap 150 snem ka jingrwai jong ka ri ka ‘Vande Mataram’.

U Myntri Kam Pohiing ka sorkar pdeng u Amit Shah u la ong ba ka jingdonkam ban iakren ia ka Vande Mataram bad ban iai aiti lut ha ka ka la don ha ka por ba la thaw nyngkong ia ka, ka la sah ha baroh kawei ka jingiakhun laitluid, ka dang iai bteng haduh mynta, bad kan iai don ha u snem 2047 ynda ka India kan paw kum ka Ri Bakhraw shisha. Ka Vande Mataram ka dei ka jingthaw kaba iaineh shirta kaba wanrah ia ki jingsngew jong ka jingaiti lut, bad ka kamram sha ka Mei India. U la ong ba ki don ki briew kiba pyrshang ban kren beain ia ka jingpyndon burom ia ka Vande Mataram da kaba pyniadei bad ka elekshon ban wan ha West Bengal. U Shah u la ong ba ka Vande Mataram kam long tang ha West Bengal ne ha India; hangno hangno ha ka pyrthei ba don kiba ieit ia ka jinglaitluid, ki ju rwai ia ka Vande Mataram wat ha ki jingialang barieh jong ki. U Myntri Kam Pohiing u la ong ba wat haduh kine ki sngi, haba u shipai ha khappud ne u pulit na ka bynta ka jingpahara hapoh ka ri u aiti iala ka jingim, ka mantra kaba don ha ki rmiang shyntur jong u ka long ka Vande Mataram.

U Amit Shah u la ong ba ka jingrwai Vande Mataram ka la long ka jingpynbna ia ka jinglaitluid, ka jingai mynsiem ia ka jingiakhun laitluid, bad ka bor kaba la pyllait ia ka Mei India na ki kynjri jong ka jinglong mraw. Dei ka Vande Mataram kaba ai mynsiem ïa ki riewshlur jong ka ri India, wat haba ki aiti iala ka jingim, ban kha pat bad ban aiti biang ïa la ka jingim na ka bynta ka Mei India ha ka jingkha kaba hadien. U la ong ba bun ki riewpyrkhat bad ki riewstad kiba khraw ki ioh mynsiem na ka Vande Mataram ban pynlong ba ka ri kaba hyndai jong ngi kan iaid shaphrang ha ka lynti jong ka kolshor ba iaineh shirta jong ka haduh ki spah snem. U Shah u la ong shuh shuh ba ka jingiakren, jingpyndonburom, bad jingrakhe ia ka Vande Mataram kaba long ha baroh ar tylli ki iing dorbar kan iarap ia ki khun, ki samla, ki khynnah samla, bad ki pateng ban wan jong ngi ban sngewthuh ia ka jingmut kaba jylliew jong ka bad ban buh ia ka nongrim na ka bynta ka jingkha pat bad jingtei pat ia ka ri.

U Myntri Kam Pohiing jong ka sorkar pdeng u la ong ba la thaw da u Bankim Chandra Chattopadhyay, ia ka jingrwai Vande Mataram la pynmih paidbah nyngkong eh ha ka 7 tarik u Naiwieng 1875. U la ong ba shen hadien ba la thaw ia ka, ka Vande Mataram ka la kylla stet kum ka dak jong ka jingieid ri, ka jingaiti lut, bad ka jingngeit ha ka ri, bad ka la prat lynti na ka bynta ka jingiakhih laitluid jong ngi. Baroh ngi dei ban kynmaw ia ka tynrai ha kaba la thaw ia ka Vande Mataram. U la batai ba ka jinglong jong ka jingthaw ia ka kalong da ki spah snem jong ki jingwan hiar thma jong ki nongbud ia ka niam Islam kiba la pynjot ia ka kolshor bad ka histori jong ka ri, bud sa ka jingpyrshang jong ki phareng ha ka por ba ki synshar ban pynbor ia ngi ban pdiang ia ka riti dustur bad ka kolshor kaba thymmai. Dei ha kum kane ka por ba u Bankim Babu u la thoh ia ka Vande Mataram. U Shah u la ong ba u Bankim Chandra Chattopadhyay u la pynthymmai bad pynskhem biang ia ka riti dustur barim jong ngi, ia ka jingmut jong ka jingiatylli ka ri ha ka kolshor, bad ia ka dustur ba neh junom jong ngi ban pyndon burom ia ka ri kum ka Blei. Ka sorkar ha kata ka por ka la pyrshang ban pynduh ia ka, ka la khang ban rwai ia ka, bad ia kiba ong Vande Mataram la shoh bad set phatok ia ki. Hynrei, da kaba jop ia kine ki jingkhang baroh bad khlem kano kano ka jingpynbna paidbah kaba la pynbeit, ka jingrwai ka la ktah ia kawei pa kawei ka dohnud bad ka la saphriang naduh Kashmir haduh Kanyakumari. U la bynrap ba ka Vande Mataram ka la kylla long ka mantra jong ka jingpynkylla dur na ka bynta baroh kito kiba bat ïa ka jingburom ïa ka kolshor jong ka ri India.

U Amit Shah u la ong ba ha ka por jong ka jinglong mraw, bun na ki temple, ki skulbah, ki jaka saindur, ka rep ka riang bad ki jaka pule jong ngi ki la shah pynjot, hynrei ym don ba lah ban pyndam noh ia ka jinglong tynrai jong ka kolshor jong ngi na ka mynsiem jong ki briew. Ha kata hi ka khyllipmat, la donkam ban pynkyndit bad pynbeit thymmai ia kata hi ka mynsiem, bad dei thik ha kata ka por ba u Bankim Babu u la thaw ia ka Vande Mataram. Ki phareng ne kito kiba la pdiang ia ka riti dustur jong ki kim lah ban khanglad ia ka. U la ong ba ka Vande Mataram ka la kyrsiew thiah ia ka ri kaba la klet noh ia la ka jong ka bor ba kyrpang. Ka Vande Mataram ka la pyndep ia ka kam ban pynim pat ia ka mynsiem jong ka ri. U Maharshi Aurobindo u la ong ba ka Vande Mataram ka dei ka mantra jong ka jingkha pat ia ka ri India, bad kane ka jingong ka pynpaw shisha ia ka jingkhraw jong ka Vande Mataram. U Shah u la bynrap ba ka jingsngew ba jylliew jong u Sri Aurobindo ïa ka Vande Mataram ka la kylla long ka tyllong ba ai mynsiem ia uwei pa uwei u khynnah jong kane ka ri bad ka la long ka mantra jong ka jinglaitluid jong ngi.

U Myntri kam pohiing jong ka sorkar pdeng bad u Myntri ka Tnad treilang u la ong ba ka ri jong ngi ka long kaba kyrpang ha ka pyrthei baroh kawei; Kadei tang ka India kaba la pynbeit ia ki pud ki sam jong ka da ka kolshor jong ka, bad dei kane hi ka kolshor kaba la tehsong ia ka India. Dei u Bankim Chandra Chattopadhyay uba la ktik ia ka jingmut jong ka jingiatylli hapoh ka kolshor ha ka juk jong ka jingsynshar phareng. U la ong ba ka bynta kaba pyniatylli ia ka ri jong ngi ka dei ka kolshor jong ngi, bad dei ka jingpyrta kaba jem jong ka Vande Mataram kaba, ha ka sien kaba nyngkong, ka la pynskhem ia ka nongrim jong ka jingiatylli ha ka kolshor. U Shah u la ong ba mynta ka ri baroh kawei ka pdiang bad iaid shakhmat da ka jingthmu jong ka jingiatylli ha ka kolshor. U Myntri kam pohiing u la ong ba ka ri India kam dei tang ka jaka; ka dei ka dak jong ka Kmie jong ngi, bad ngi rwai ia ki jingrwai jingmane ia ka. Ka Vande Mataram ka long thik kata ka jingpynpaw ia ka jingaiti lut. Ha ka jingthaw ia ka Vande Mataram, la batai ia ka jingmut jong ka Bharat Mata da ka jingsngew ba jylliew: La pyni ia ka kum ka nongpynbiang ia ka um, ki soh, bad ka roi ka par; la pynitynnad da ki syntiew, kiba pynsngewbha ia ka dohnud bad ka jingmut jingpyrkhat; bad kum ka dur hi jong ka Saraswati, ka Lakshmi bad ka Durga. U la ong ba, ha ka jingshisha, ka roi ka par, ka jingshngain, ka jingnang jingstad, bad ka jingkiew shaphrang jong ngi lah ban ioh tang lyngba ka jingaiei bad jingmane ia ka Mei India. Ka jingshlur jong ka Durga, ka jingpahuh jong ka Lakshmi, bad ka jingstad jong ka Saraswati lah ban ai ha ngi tang da ka jingaiei jong ka Mei India bad ka khyndew kyntang jong kane ka ri. Dei na kata ka daw ba ngi dei ban nguh bunsien ha ka jingburom ia ka.

U Amit Shah u la ong ba ka ri ka ai ia ngi ia ka jinglong bad ka ktien jong ngi, ka pynlong ia ka nongrim jong ka rukom im, bad ka ai lad ban kyntiew ia ka jingim jong ngi. U la ong ba ym don kaei kaei kaba lah ban kham khraw ban ia ka ri, bad ia kane ka jingsngew la pynim pat da u Bankim Chandra Chatterjee. Ha ka juk kaba dum jong ka jinglong mraw, ka Vande Mataram u la wan kum ka jingshai, ka la wanrah ia ka jingthrang ban ioh ia ka Swaraj ha ki dohnud jong ki briew da kaba iarap ia ki ban pynduh ia ka jingmut jingpyrkhat jong ka jinglong mraw. U Shah u la ong ba ha ka por jong ka jingialeh ban ioh jinglaitluid, ki kyntien ba khatduh ba la kren da baroh ki nongialeh jong ngi katba ki dang pdiang ia ka jingshah pyniap ki long ‘Vande Mataram’. U la iathuh ba ha ka snem 1907, la sdang ia kawei ka kot khubor phareng kaba kyrteng ka Vande Mataram ha Calcutta, ha kaba u Editor jong ka u dei u Maharshi Aurobindo. Ka sorkar Bilat ka la khein ia ka kum ka kotkhubor kaba wanrah jingma tam bad ka la pynngat ia u Aurobindo ha ka jingpynkhihwin, bad ka la pynshitom ia u.

U Myntri kam pohiing u la ong ba ha u snem 1896 u Gurudev Tagore u la rwai paidbah ia ka Vande Mataram ha ka sien kaba nyngkong ha ka jingialang jong ka Congress. Ha u snem 1905, ha ka jingialang ha Varanasi, ka myllung bakhraw ka Sarala Devi Chaudhurani ka la rwai ia ka Vande Mataram kaba pura bad ha ka 15 tarik u Nailar 1947, haba ka ri ka la ioh ia ka jinglaitluid, ha ka por 6:30 mynstep, halor ka jingkyrpad jong u Sardar Patel, u Pandit Omkarnath Thakur u la rwai ia ka Vande Mataram ha ka All India Radio da ka sur kaba sngewthiang jong u kaba la pynkhih ia baroh kawei ka ri. U la ong ba ha ka 24 tarik u Kyllalyngkot 1950, ha ka jingialang ba khatduh jong ka Constituent Assembly, la pynbna ia ka Vande Mataram kum ka Jingrwai jong ka Ri, da kaba ai burom mar katjuh ia ka jingrwai National Anthem.

U Amit Shah u la ong ba ka jingkiar ban iakren shaphang ka Vande Mataram kam dei kaba thymmai. Ha u snem 1925, ha ka jubili ksiar jong ka Vande Mataram, lada u nongialam jong ka seng sain pyrthei ba kongsan ha kata ka por um shym la phiah ia ka ‘Vande Mataram’ bad sdang ia ka jingpynsngewbha, ka jingphiah ia ka ri kan ym shym la jia. U la ong ba ha u mawmer ba 50 jong ka, ka Vande Mataram ka la long kaba rit, bad nangta la sdang ka kam pynsngewbha, kaba hadien ka la pynlong ia ka jingphiah ia ka ri. U Shah u la ong ba lada ym shym la phiah ia ka Vande Mataram ha ki ar bynta hapoh ka polisi pynsngewbha, ka ri kan nym la phiah. U la ong ba ha ka snem ba 100 jong ka Vande Mataram, baroh kiba ong Vande Mataram ki la shah set phatok ha u Myntri Rangbahduh ha katei ka por. U la ong ba ha katei ka por, la pynjari ia ka Emergency ha ka ri, bad da ki lak ngut ki dkhot ka liang pyrshah, ki nongtrei ha ka imlang sahlang, bad ki dkhot jong ki seng trei mon sngewbha ki la shah set phatok. U Myntri kam pohiing u la ong ba ha ka por Emergency ki ophis jong ki kotkhubor ki la shah khang khyrdep khlem kano kano ka daw. Wat ia ka sur jong u Kishore Kumar ruh ym shym la shah ban pynsawa ha ka All India Radio, bad ia ki jingrwai duet la pynsawa tang da ka sur jong ka Lata Ji. Ynda ka Vande Mataram u la dap 100 snem, la pynlong mraw ia ka ri baroh kawei. U Shah u la ong ba ka seng pyrshah, kaba ki jingialang jong ka, ki ju sdang da kaba u Gurudev Tagore u rwai ia ka Vande Mataram, haba la iakren ia katei kajuh ka Vande Mataram ha Lok Sabbha, ki dkhot jong ka longiing ba pawnam, kiba iadei bad katei ka seng, kim don satia. U la bynrap ruh ba ka jingbym burom ïa ka Vande Mataram ka la shong tynrai ha ka snam jong ki nongïalam jong ka seng pyrshah ba kongsan naduh ka por jong ka jingïaleh laitluid bad ka dang ïai bteng haduh kine ki sngi.

U Myntri kam pohiing u la iathuh ba uwei u nongialam jong ka seng ba kongsan jong ka liangpyrshah u la pynpaw ha Lok Sabha ba kam donkam ban iakren ia ka Vande Mataram mynta. Ka jingrwai kaba u Mahatma Gandhi u la ong ka don ka jingiadei bad ka mynsiem kaba khuid tam jong ka ri, bad kaba u Bipin Chandra Pal u khot ka jingpynpaw lang ia ka jingngeit ha ka ri bad ka kamram jong ka ri ha Rashtradharma, ka la shah phiah ruh ha ka seng pyrshah hi. U la ong ba la tem ia ka Vande Mataram ha kiwei kiwei ki ri ban pynkhlaiñ ïa ka jingiakhun jong ngi na ka bynta ka jinglaitluid. U Shah u la ong ba ha ka por jong ka jingsynshar phareng, wat ha ka Berlin Olympic jong ka snem 1936 ruh, ka kynhun ialehkai hockey jong ngi ka la rwai ia ka Vande Mataram da ka jingsngew ba jylliew, bad ngi la ioh ia ka takma ksiar.

U Myntri kam pohiing u la ong ba ia ka nongrim hi jong ka seng jong ki la buh halor ka nongrim jong ka jingiatylli ha ka kolshor. U la ong ba la thaw ia ka seng jong ki khnang ba ka ri kan nym iaid katkum ka kolshor jong ki ri Sepngi, hynrei kan iaid katkum la ka jong ka kolshor tynrai bad ki jingngeit ba kongsan.

U Amit Shah u la ong ba la buh jingtip ba la pynsangeh ia ka jingrwai ia ka Vande Mataram ha kane ka Parliament. U la ong ba ha u snem 1992, u MP Ram Naik u la rah ia kane ka mat lyngba ka jingiakren kaba lyngkot, da kaba dawa ba dei ban rwai biang ia ka Vande Mataram ha Parliament. Ha kata ka por, u Lal Krishna Advani uba long u Nongïalam ka Liang Pyrshah, u la kren tyngeh ïa u Lamphang ka Lok Sabha ba dei ban rwai ïa ka Vande Mataram ha kane ka ïingdorbar kaba khraw, namar ba la pdiang da ka Constituent Assembly. Dei tang hangta, da ka jingiamynjur lang, ka Lok Sabha ka la sdang biang ia ka jingrwai ia ka Vande Mataram ha u snem 1992.

U Myntri kam pohiing uba dei ruh u Myntri ka Tnad treilang u la ong ba ha ka por ba ki sdang ban rwai ia ka Vande Mataram, bun ki dkhot jong ka seng pyrshah ki la ong ha katei ka por ruh ba kin nym rwai ia ka Vande Mataram. U Myntri kam pohiing u la ong ba u la iohi ba, shwa ban sdang ka jingrwai ia ka Vande Mataram, ki don ki dkhot kiba shong hapoh ka iing dorbar kiba ieng bad mih noh tang mar ia sdang ka jingrwai. U Shah u la bynrap ruh ba ym don uwei ruh u dkhot jong ka seng jong ki u bym ieng ha ka por ba rwai ia ka Vande Mataram.

U Amit Shah da pyntip ba ha ka lyngkhuh sngi iap kaba 130 jong u Bankim Chandra Chattopadhyay, ka sorkar ka la pynmih ia ka Postal Stamp lyngba ka tnat post, bad ha ka jingdap 75 snem ka jingioh jinglaitluid ka ri ka sorkar ka la sdang ia ka Har Ghar Tiranga. Ha katei ka por u Myntri Rangbahduh ka ri u Narendra Modi u la kyntu ia ki paidbah ba kim dei ban klet ban ong Vande Mataram haba pynher ia ka lama jong ka ri.

U Myntri kam pohiing jong ka sorkar pdeng u la ong ba ka sorkar India ruh ka la rai ban rakhe ia ka jingdap 150 snem jong ka Vande Mataram ha ka rukom kaba donburom. U la ong ba ha ka 1 tarik Risaw 2025, ka kynhun Myntri ka la mynjur ia ka rai ba ha baroh shi lynter une u snem ban wan yn rakhe kum ka jingburom ia ka Vande Mataram. Ha ka 24 tarik u Risaw 2025, la pyndep ia ka jingpynkhreh ia ki prokram hapoh bad shabar ka ri. U Shah u la ïathuh ruh ba ha ka 7 tarik Naiwieng 2025, u Myntri Rangbahduh ka ri u Modi u la plie paidbah ïa kane ka kam ha New Delhi da kaba buh syntiew na ka bynta ka Bharat Mata. Ia ka bynta ba nyngkong jong ka la pyndep ha u Naiwieng; ka bynta kaba ar kan long ha u Kyllalyngkot 2026, ka bynta kaba lai ha u Nailar 2026, bad ka bynta kaba saw ha u Naiwieng 2026. U la bynrap ba la pynmih ruh ïa ka postage stamp ba buh jingkynmaw bad ka pisa tyngka.

U Amit Shah u la ong ba ïa ka jingpyni kolshor kaba kyrpang “Vande Mataram – Naad Ekam Roop Anekam” la thaw da ki 75 ngut ki nongtem, bad kum ka jubab ïa ka jingkhot jong ka Sorkar India, ki briew ha kylleng ka ri ki la rwai lang ïa ka Vande Mataram ha ka 7 tarik u Naiwieng. U la pyntip ba la shna ia ka documentary kum ka dak jong ka jingdap 150 snem ka Vande Mataram. Yn pyni ruh ia ki prokram halor ka Vande Mataram sha ki paidbah ha man la ki distrik bad ki tehsil. Shuh shuh, ia kane ka jingpyni yn phah da ki lad digital sha ki klur ngut ki briew.

U Myntri kam pohiing ka sorkar pdeng u la ong u ba ka sorkar ka rai ban pynlong ia ki program ba kyrpang ha ka All India Radio, Doordarshan, ki FM Radio Channel. U la ïathuh ba ka Press Information Bureau (PIB) kan pynlong ïa ki jingïakren bad ki jingïalang ha ki nongbah Tier-2 bad Tier-3. Yn pynlong ia ki jingialang kolshor kiba pynshong nongrim ha ka Vande Mataram ha baroh ki Embassy jong ka Ri India. Ki jingïakhih thung dieng ki dang ïaid shakhmat hapoh ka Vande Mataram: Khublei ïa ka Mei Pyrthei. Yn pyni ruh ia ki jingdro ba pyni ia ka jingieid ri bad ki jingdro ia ka histori jong ka Vande Mataram ha ki surok bah. Yn pynbna paidbah lyngba ki jingpyni LED ha ki jaka ieng rel bad ki kad liengsuin. Nalor kata, la sdang ban trei ban pynmih 25 tylli ki phlim lyngkot kiba pynshong nongrim halor ka Vande Mataram bad ka jingim jong u Bankim Chandra Chattopadhyay.

U Shah u la ong ba ka Sorkar ka la rai ban pynlong ia ki prokram kyrpang ha ka All India Radio, Doordarshan, bad FM Radio Channel. U la ïathuh ba ka Press Information Bureau (PIB) kan pynlong ïa ki jingïakren bad ki jingïalang ha ki nongbah Tier-2 bad Tier-3. Yn pynlong ia ki jingialang pyni kolshor kiba pynshong nongrim ha ka Vande Mataram ha baroh ki Embassy jong ka Ri India. Ki jingthung dieng ki dang ïaid shakhmat hapoh ka Vande Mataram: Salute to Mother Earth. Yn pyni ruh ia ki jingdro ba pyni ia ka jingieit ri bad ki jingdro ia ka histori jong ka Vande Mataram ha ki surok bah. Yn ai jingtip ia ki paidbah lyngba ki jingpyni LED ha ki jaka ieng rel bad ki kad liengsuin. Nalor kata, la sdang ban trei ban pynmih 25 tylli ki phlim lyngkot kiba pynshong nongrim ha ka Vande Mataram bad ka jingim jong u Bankim Chandra Chattopadhyay.

U Amit Shah u la ong ba haba ka ri ka la pyndep ïa ki 75 snem ka jinglaitluid, wat hapdeng ka por COVID, la rakhe ïa ka ‘Azadi Ka Amrit Mahotsav’ haduh ar snem pura ha man ki shnong ha kylleng ka ri. Lyngba ka Amrit Mahotsav, ngi la pyntip ia ki samla jong kane ka ri ia ka jingiathuhkhana baroh kawei jong ka jingialeh ban ioh jinglaitluid naduh ka snem 1857 haduh 1947. U la ong ba la ithuh ia kiba bun ki riewshlur bym pat ju pawnam kiba don bynta ha ka jingialeh ban ioh jinglaitluid—kiba ym shym la thoh wat ha ka histori ia ki kyrteng jong ki, la wad ia ki, la wad bniah ia ki jingjia, la tei ia ki mot kum ka jingai burom ia ki, la pynlong ia ki prokram ha kylleng ka ri bad la shim ia ki sienjam ban wanrah biang ia ka jingieid ri kaba khlain. U la bynrap ruh ba ha ka sien kaba nyngkong hadien ba la ïoh ïa ka jinglaitluid, la pynlong ïa kum kine ki prokram.

U Myntri kam pohiing jong ka sorkar pdeng uba dei ruh u Myntri ka Tnad treilang u la ong ba ha kine ki 75 snem naduh ba la ioh ia ka jinglaitluid man la ka sorkar kaba wan ha ka bor ka la ialam ia ka ri shakhmat. U la ong ba ngi la pynskhem shibun ia ka synshar paidbah jong ngi, bad mynta ki tynrai jong ka synshar paidbah jong ngi ki la long kiba khlain haduh katta katta. U Shah u la ong ba u Myntri Rangbahduh ka ri u Narendra Modi u la ai kyrteng ia ka por naduh ka snem kaba 75 haduh ka snem kaba 100 jong ka jinglaitluid kum ka ‘Amrit Kaal’. U Myntri Rangbahduh u la wanrah ia ka jingkut jingmut hakhmat ki samla ka ri: ba ngin khein ia kane ka por naduh ka ‘Azadi Ka Amrit Mahotsav’ haduh ka jingdap shispah snem jong ka jinglaitluid kum ka bynta jong ki jingiakhun. Haba la rakhe ia ka jingdap shispah snem jong ka jinglaitluid, ka ri jong ngi kan ieng nyngkong ha ka pyrthei ha man la ki liang. U la ban jur ba kane kam dei tang ka jingkut jingmut jong u myntri rangbahduh Modi ne kano kano ka seng sain pyrthei. Don ki briew kiba lah ban kyntait ia ka kum ka jingkren politik, hynrei ha ka jingshisha ka dei ka jingkut jingmut lang jong ki 140 klur ngut ki briew jong ka India, bad la thikna ba kan sa urlong. U Myntri kam pohiing u la ong shuh shuh ba ka long kaba kyrpang ba ka snem kaba 150 jong ka Vande Mataram ka la poi thik ha ka por ba ngi dang rakhe ia ka Amrit Kaal. Lyngba une u maw mer, ngin sa pynmeh biang sa shisien ia ka ding jong ka jingieid ri ha kylleng ka India.

U Amit Shah u la ong ba ka Vande Mataram kan don beit ka jingiahap. Ka jingdonkam ia ka ha ka por ba la thaw ia ka ka long kaba kumjuh mynta. U la ong ba ha katei ka por, ka Vande Mataram ka la long ka bor kaba khraw ban pynlaitluid ia ka ri, katba ha kane ka Amrit Kaal, ka Vande Mataram ka long ka jingpyrta ban pynlong ia ka India kaba la kiew shaphrang bad kaba khraw.

U Myntri kam pohiing ka sorkar pdeng u la ong ba ka dei ka jingkitkhlieh lang jong uwei pa uwei u dkhot jong kane ka iing dorbar ban wanrah biang sa shisien ia ka mynsiem jong ka Vande Mataram ha ka dohnud jong uwei pa uwei u khynnah, ban pynrung skhem ia ka jingrwai Vande Mataram ha ka jingmut jingpyrkhat jong uwei pa uwei u samla, bad ban ai mynsiem ia uwei pa uwei u samla ban aiti ia ka jingim jong ki sha ka lynti kaba la wanrah da ka Vande Mataram. U la ong ba ka jingpyrta jong ka Vande Mataram ka dei ban long ka bor ban thaw ia ka India kaba ki nongialeh laitluid jong ngi ki la thrang ban ioh.

****