U Myntri Rangbahduh ka ri u Narendra Modi u la buh ia u maw nongrim, u la plie paidbah ia ki kam pynroi kiba shongdor kumba T. 6500 klur ha Darrang, Assam mynta ka sngi. Haba ai jingkren sha ki paidbah ha katei ka sngi, u Myntri Rangbahduh u la ai khublei kyrpang ïa ki briew jong ka Darrang bad ïa baroh ki nongshong shnong ka Assam ha kane ka sngi ba kongsan jong ka jingïaid lynti jong ka roi ka par ka jylla Assam.

U Myntri Rangbahduh u la ong ba hadien ka jingjop jong ka Operation Sindoor, u la wan jngoh ia ka Assam ha ka sien kaba nyngkong hynnin ka sngi. U la pynshong nongrim ïa ka jingjop kaba khraw jong ka operation ha ki jingkyrkhu jong ka Maa Kamakhya bad u la pynpaw ïa ka jingsngew ba jylliew jong ka jingpyndap mynsiem haba u la iuhkjat ha kane ka jaka ba kyntang jong ka. U la ai khublei ruh ïa ki briew ha ka sngi rakhe Janmasthami ha Assam. Haba pynkynmaw biang ïa ki kyntien jong u na ki kynroh jong ka Red Fort, u Modi u la ong ba u la wanrah ïa ka jingmut jong ka ‘Sudarshana-Chakra’ ha ka buit ïada jong ka India. U Modi u la ban jur ia ka Mangaldoi kum ka jaka ha kaba ka jingiasoh lang jong ka kolshor, ka jingsarong ia ka histori, bad ka jingkyrmen ia ka lawei ka iawan lang. U la kdew ba kane ka thain ka ieng kum ka dak ba kongsan jong ka jinglong jong ka Assam. Halor kane ka khyndew kaba dap da ka jingai mynsiem bad ka jingshlur, u Myntri Rangbahduh u la ong ba u sngew ba u long uba la kyrkhu ban ioh ia ka lad ban iakynduh bad iakren bad ki briew.

Haba pynkynmaw ba tang khyndiat sngi ba la leit, ka ri ka la rakhe ia ka lyngkhuh sngi kha jong ka Bharat Ratna uba don ka sur ba pawnam u Bhupen Hazarika, u Modi u la iasam ba u la ioh ia ka lad ban iashim bynta ha ka jingialang kaba heh kaba la pynlong kum ka jingburom ia u hynnin ka sngi. U la ong ba ïa ki jingangnud jong kum kine ki khun shynrang ba khraw jong ka Assam bad da ki kpa tymmen jong ngi, mynta la bud ryntih da ka jingsngewrit kaba pura da ka Sorkar pdeng bad ka Sorkar jylla.

U Myntri Rangbahduh u la ban jur ba ka jingpynneh pynsah bad jingkyntiew ïa ka pateng tynrai jong ka Assam, ryngkat bad ka jingkiew stet jong ka, ki dang long ki mat ba kongsan jong ki sorkar jong ki ha ka sorkar pdeng bad sorkar Jylla. U la ong ba lyngba ki jingiatreilang jong ka sorkar bad ki briew jong ka Assam, ka jylla mynta ka la paw ha ka ri bad ha ka pyrthei.

“Ka India mynta ka dei ka ri kaba kiew stet tam ha ka pyrthei, bad ka Assam ka la paw kum kawei na ki jylla kaba kiew stet tam ha ka ri”, la ong u Myntri Rangbahduh. U la pynkynmaw ba ka la don ka por ba ka Assam ka la sahdien ha ka roi ka par bad ka la ïaleh ban ïaid ryngkat bad ka ri baroh kawei. Hynrei mynta, ka Assam ka nang kiew shaphrang da ka jingkiew kaba jan 13 percent. U Modi u la batai ia kane kum ka jingjop kaba khraw bad u la ai burom ia ka jingjop ha ka jingtrei shitom jong ki briew ka jylla Assam bad ki jingtreilang jong ka sorkar pdeng & sorkar jylla. U la pynpaw ka jingkmen ba ki paidbah ka jylla Assam ki dang ïai bteng ban pynkhlaiñ ïa kane ka jingïatreilang. U la ong ba dei na kane ka daw ba u Myntri Rangbah ka Jylla u Himanta Biswa Sarma bad ka kynhun jong u ki ïoh ïa ka jingkyrshan ki paidbah ha man la ka elekshon. U Myntri Rangbahduh u la pynpaw shuh shuh ba wat ha ka elekshon panchayat kaba dang shen, ka Assam ka la ioh ia ka jingjop kaba khraw bad u la ai ruh ïa ki jingkyrkhu kyrdoh.

Da kaba ban jur ba ka sorkar jong ki ka trei da ka jingthmu ban pynlong ïa ka Assam kum ka kor pynroi jong ka roi ka par jong ka ri India, u Myntri Rangbahduh u la ong ba ka prokram mynta ka sngi ka dei ka bynta jong kane ka jingkular hi. “Tang katto katne por ba ladep, la plie paidbah ïa ki projek pynroi kiba shongdor kumba T.6,500 klur naduh kane ka rynsan,” u la ong. U Modi u la pynpaw ba ka sorkar pdeng bad ka sorkar jylla ki kyntiew ïa ka Assam kum kawei na ki jylla ba don jingiasoh bha bad kum ka jaka sumar ba pawnam. “Kine ki projek kin nang pynkhlain shuh shuh ïa ka jingkut jingmut jong ngi,” u la bynrap. U Modi u la ai khublei kyrpang ïa ki baroh na ka bynta ka Darrang Medical College bad Hospital, ka surok bah, bad ka ring road.

“Ka ri baroh kawei ka iaid shakhmat ha ka jingiatylli ban tei ia ka ri India kaba la kiew; na ka bynta ki samla, ka ri India kaba la kiew kam dei tang ka jingangnud hynrei ka dei ruh ka jingkut jingmut bad ka bynta kaba kongsan jong ka thain shatei lammihngi ban pynurlong ia kane ka jingkut jingmut jong ka ri”, la ban jur u Myntri Rangbah duh. U la pyni ba hadien ka jinglaitluid, ki nongbah kiba heh, ki ri kiba heh ha ka ioh ka kot, bad ki jaka karkhana ki la kiew khamtam ha ka thain sepngi bad shathie jong ka ri India, katba ka thain kaba heh bad ka jingbun briew ha ka thain mihngi jong ka ri India ka dang sahdien ha ka roi ka par. U Modi u la pynthikna ba ka sorkar jong ki mynta ka dang trei ban pynkylla ia kane ka jinglong jingman. “Da arphew san snem jong ka spah snem kaba 21 ki la dep iaid, ka bynta kaba bud jong kane ka spah snem ka dei jong ka thaiñ Mihngi bad ka thaiñ Shatei Lammihngi”, la pynbna u Modi, da kaba pynskhem ba ka por ka la dei ba ka Assam bad ka thaiñ Shatei Lammihngi kin ïalam ïa ka khana jong ka roi ka par jong ka India.

“Ka jingpyniasoh kaba stet ka long kaba donkam na ka bynta ka jingroi kaba stet jong kano kano ka thain, dei na kata ka daw ba ka sorkar jong ngi ka la buh jingmut bha ban kyntiew ia ka jingpyniasoh ha ka thain shatei lammihngi”, la ong u Modi. U la ban jur ia ki jingkyntiew ha ka jingpyniasoh lyngba ki surok, rel, bad ki jingdon jingem ba iadei bad ka leit ka wan lyngba ki liengsuin, kumjuh ruh ka jingpyniasoh digital lyngba ka 5G internet bad broadband. Kine ki jingkiew, u la ong, ki la wanrah ka jingsuk kaba khraw ia ki paidbah, ki la pynsuk ia ka jingim, bad ki la pynsuk ia ki kam khaii pateng. U Myntri Rangbahduh u la bynrap ba ka jingkyntiew ia ka jingpyniasoh ka la pynlong ia ka leit ka wan ban kham suk, ka la pyniar ia ka kam jngohkai pyrthei, bad ka la plie ki lad ioh kam ba thymmai bad ki lad kamai kajih na ka bynta ki samla jong ka thain.

Haba pynpaw ba ka Assam ka la ïoh jingmyntoi shibun na ka campaign ban pynïasoh ha ka ri baroh kawei, u Modi u la ai ïa ka nuksa kaba kyrpang, da kaba kdew ba wat hapdeng hynriew phew snem ka jingsynshar jong ka liang pyrshah ha Delhi bad da ki phew snem ka jingsynshar ha Assam, tang lai tylli ki jingkieng la shna halor ka wah Brahmaputra ha ki 60–65 snem. U la pyniapher ia kane bad ka jingtreikam jong ka sorkar jong ki, da kaba kdew ba tang hapoh shiphew snem, la shna hynriew tylli ki jingkieng kiba heh. U la pynbna ia ka jingbuh mawnongrim ia ka jingkieng Kurua–Narengi, ka ban pynduna shibun ia ka por leit jingleit hapdeng ka Guwahati bad ka Darrang sha tang katto katne minit. U Myntri Rangbahduh u la ban jur ba kane ka jingkieng kan tyngkai ia ka por bad ka pisa na ka bynta ki riew paidbah, kan pynlong ia ka leit ka wan kaba jem dor, kan pynduna ia ka por leit jingleit, bad kan pynduna ia ka jingkhapngiah kali.

Haba pynpaw ba kane ka ring road kaba thymmai kan wanrah ki jingmyntoi ba khraw ïa ki briew, u Myntri Rangbahduh u la ong ba ynda la dep, ki kali kiba leit sha Upper Assam kin ym donkam shuh ban rung shapoh sor, kaba pynduna ïa ka jingkhapngiah ha sor. U la pynpaw ba ka ring road kan pyniasoh ia san tylli ki surok bah jong ka ri, ar tylli ki surok bah jong ka jylla, kawei ka kad liengsuin, lai tylli ki steshon rel, bad kawei ka jaka kiew lieng. Kane kan pyni ia ka jingwanrah ia ka lad pyniasoh ba bun rukom kaba nyngkong eh jong ka Assam kaba khlem jingeh. U Modi u la pynskhem ba kane ka dei ka jait jingpynroi kaba la pynpoi da ka Sorkar pdeng & Sorkar jylla.

Da kaba ban jur ba ka sorkar ka pynkhreh ïa ka ri ym tang na ka bynta ki jingdonkam ba mynta hynrei na ka bynta ki jingdonkam ha ki 25 haduh 50 snem ban wan, u Myntri Rangbahduh u la pynkynmaw ïa ka jingpynbna jong u na Red Fort ha kaba ïadei bad ki jingpynkylla ha ka GST ba thymmai bad ïasam ïa ka khubor babha ba kine ki jingpynkylla mynta la pyntreikam. U la pynbna ba sdang hynniew sngi naduh mynta ka sngi, ha ka sngi rakhe Navratri, yn pynduna ia ki dor GST. U Modi u la pynpaw ba kane ka sienjam kan ai jingmyntoi ïa kawei pa kawei ka longïing ha Assam, kaba pynlong ïa kiba bun ki tiar ba pyndonkam man ka sngi ban kham duna dor. U la pyntip ba la pynduna khajna ia ka dewbilat, kaba pynduna ia ka jinglut na ka bynta kito kiba shna iing. Ki dawai kiba rem dor na ka bynta ki jingpang ba shyrkhei kum ka jingpang cancer kin sa nang duna dor, bad ka bai insurance ruh kan sa duna. U la bynrap ruh ba kito kiba thmu ban thied thuk thuk ne kali thymmai kin shem ba ki kham jem dor. U Myntri Rangbahduh u la ong ba ki kompeni kali ki la sdang ban pynbna ia kine ki jingmyntoi. U la ban jur ba ki kmie bad ki para kynthei, ki samla, ki nongrep, bad ki nongdie dukan—baroh ki bynta jong ka imlang sahlang—kin ioh jingmyntoi na kane ka rai. U la bynrap ba kane ka jingpynkylla kan pyndap ia ka jingkmen jong ki paidbah ha ka por lehkmen.

Haba kyntu ïa ki nongshong shnong ban buh ha ka jingmut ïa kawei ka khubor kaba kongsan ha ka por lehkmen, u Myntri Rangbahduh u la ban jur ïa ka jingdonkam ban jied ïa ki mar tynrai, da kaba ong ba ki briew ki dei ban thied ïa ki tiar Made in India, ai sngewbha ïa ki mar Made in India, bad pynthikna ba ki trai dukan ruh kin kyntiew bad die ïa ki mar Made in India. U la kyntu ia baroh ban long kiba kren na ka bynta ki mar ba shna hi hapoh ka ri, da kaba pynskhem ba man la ka jingpyrshang ha kane ka liang kan pynkhlain ia ka ri.

Da kaba ban jur ba ha kine ki snem ba la dep, la don ka jingkiew kaba khraw ha ka liang ka koit ka khiah, u Myntri Rangbahduh u la ong ba mynshuwa, ki hospital ki ju don ha ki nongbah kiba heh, bad ban wad jingsumar hangta bunsien ka long kaba rem dor. Ban weng ia kane, ka sorkar ka la pyniar ia ka rynsan jong ka AIIMS bad ki medical college sha man la ki kyndong kynshrot jong ka ri. Ha Assam kyrpang, la seng ia ki hospital ba kyrpang ban sumar ia ka jingpang cancer. U Modi u la ong ba ha kine ki 11 snem ba la leit noh, ka jingdon jong ki medical college ha India ka la kiew ar shah—kaba ïahap bad ka jingdon ki medical college ba la tei ha ki 60–65 snem naduh ba la ïoh ïa ka jinglaitluid. U la kdew ba ha Assam, ki don tang 6 tylli ki Medical College shwa u snem 2014, bad da kaba pyndep ia ka Darrang Medical College, ka jylla mynta kan sa don 24. U Myntri Rangbah duh u la ban jur ba ka jingseng ia ki Medical College ym tang ba ka kyntiew ia ki jingdon jingem ha ka koit ka khiah hynrei ka plie lad shuh shuh ia ki samla ban long doktor. Namar ka jingduna seat mynshwa, bun ki samla kiba kwah ban long doktor kim shym la lah ban bteng ia kane ka kam. Ha kine ki 11 snem ba la dep, ka jingdon ki medical seat ha ka ri ka la kiew palat ar shah. U Myntri Rangbahduh u la pynbna ruh ia ka thong kaba thymmai: ha ki saw ne san snem ban wan, ka sorkar ka thmu ban bynrap shi lak tylli ki medical seat ba thymmai.

Haba batai ia ka Assam kum ka jaka jong ki riew ieit ri, da kaba ban jur ia ka bynta ba kongsan jong ka ban iada ia ka ri na ka jingrung kyrthep ki bar ri bad ka jinglenlade ha ka por jong ka jingiakhun ban ioh ia ka jinglaitluid, u Myntri Rangbahduh u la pynkynmaw ia ka satyagraha jong ka Patharughat, da kaba kdew ia ka jingjan bad kane ka jingialang bad ruh ka jingsah nam jong ka. Haba ieng ha kane ka jaka ba kyntang jong ki riewshlur, u Modi u la ong ba ka long kaba donkam ban pynpaw pyrthei sa kawei pat ka kam ialeh pyrshah. U la ong ba ka liang pyrshah, na ka bynta ki jingmyntoi saiñ hima sima jong ka, ka pynïahap ïalade bad ki riew shimet bad ki jingmut kiba pyrshah ïa ka India. Haba phai sha ka Operation Sindoor, u la kam ba wat ha kane ka kam ruh, kum kine ki jinglong ki paw shai. U la ong ba ha ka por ba ka liang pyrshah ka don ha ka bor, ka ri ka la mad ïa ki kam lehnoh kiba la saphriang kylleng katba ka liang pyrshah ka la sngap jar. Ha ka jingïapher, u la ong ba mynta, hapoh ka sorkar ba mynta, ki shipai India ki pynlong ïa ki operation kum ka Sindoor, kaba pynduhjait ïa ki nongpynkhreh ia ki kam pyntriem ha kylleng ka Pakistan. U la kynthoh ia ka liang pyrshah namar ba ki iadon bynta bad ki shipai jong ka Pakistan ha ka jaka jong ka India, bad ba ki kyntiew ia ka agenda jong kito kiba iada ia ki lehnoh. U la pynskhem ba ki jingthok jong ka Pakistan ki kylla long ka jingïathuhkhana jong ka liang pyrshah, bad u la kyntu ïa ki paidbah ban long kiba husiar ïa ki seng kiba don ha ka liang pyrshah.

U Myntri Rangbahduh u la ong ba na ka bynta ka liang pyrshah, ka jingmyntoi jong ka vote bank ka kham niewkor ban ia ka jingmyntoi jong ka ri. U la kynnoh ba mynta ka liang pyrshah ka la kylla long ka nongïada ba kongsan jong ki briew ba trei pyrshah ia ka ri bad ki nongwan rung tuh. U la kynnoh ba ha ka por ba ka don ha ka bor synshar, ka liang pyrshah ka la pynshlur ïa ki nongrung beain bad mynta ka ialeh ban pynshong sah junom ïa ki nongrung beain ha India. U Modi u la pynkynmaw ba shisien ka Mangaldoi ka la sakhi ïa ka jingïakhih kaba khraw ban ïada ïa ka jinglong kyrpang jong ka Assam bad ban pyrshah ïa ka jingrung be-aiñ. Hynrei u la pynskhem ba ka sorkar barim kaba la ialam da ka liang pyrshah ka la pynshitom ia ki paidbah namar kane ka jingpyrshah bad ka la pynshitom bein da kaba ailad ia ka jingkyntur pud beain ha ki jaka puta. U la kynnoh ba ka liang pyrshah ka iarap ia ka jingrung beain ha ki jaka niam bad ha ki jaka jong ki nongrep bad ki jaka jong ki jaitbynriew riewlum.

U Myntri Rangbahduh u la pynpaw ba hadien ba la thaw ïa ka sorkar synrop jong ki, ïa kine ki jinglong la pynphai kylla. U la pynpaw ba hapoh ka jingïalam jong u Myntri Rangbah ka Jylla u Himanta Biswa Sarma, da ki lak bigha ki jaka la lah ban pyllait na ki nongwan buhai shnong ha Assam, kynthup ïa ki jingkurup ba kongsan ha ka district Darrang. U Modi u la ong ba ka thaiñ Gorukhuti, kaba la don mynshuwa hapoh ka jingsynshar jong ki nongrung beain ha ka por ba synshar ka liang pyrshah, mynta la shim biang ïa ka. Katei ka jaka ba la iohbiang mynta ka dei ka jaka jong ka Gorukhuti Agricultural Project, ha kaba ki samla jong ka thain ki trei kum ki ‘Krishi Sainiks’ bad ki rep ia ki jingthung kum u tyrso, riewhadem, urad, sesame, bad u pathaw. U Myntri Rangbahduh u la bynrap shuh shuh ba ka jaka kaba la ju sah da ki nongrung beain mynta ka la kylla long ka jaka ba thymmai na ka bynta ka jingkyntiew ia ki kam rep ha Assam.

Da kaba pynskhem ba ka sorkar jong ki kan ym ailad ïa ki nongrung beain ban shim ïa ka jingsynshar halor ki jingdon jingem jong ka ri, u Myntri Rangbahduh u la ong ba ïa ka hok jong ki nongrep, ki samla, bad ki jaitbynriew riewlum jong ka ri India yn ym pynthut ha kano kano ka jinglong jingman. U la pynpaw ka jingsngewkhia halor ki kam runar ba la leh da ki nongrung beain pyrshah ia ki kmie, ki para kynthei, bad ki khun kynthei, da kaba pynbna ba yn nym shah ia kum kine ki kam. U Modi u la maham ïa ki jingthmu kiba dang ïaid shakhmat ban pynkylla ïa ka jingbun briew ha ki thaiñ khappud lyngba ka jingwan rung beain, da kaba batai ïa ka kum ka jingma kaba khraw ïa ka jingshngaiñ jong ka ri. Kamta u la pynbna ia ka jingsdang ia ka Demography Mission ha baroh kawei ka ri. U la pynpaw biang ia ka jingkular jong ki ban iada ia ka ri na ki nongwan rung beain bad ban pynthikna ka jingweng pura ia ki na ka India.

Da kaba ban jur ïa ka jingkitkhlieh jong baroh ban pynneh pynsah ïa ka pateng ba riewspah jong ka Assam bad ban pynsted ïa ka roi ka par jong ka, u Myntri Rangbahduh u la ong ban pynurlong ïa kane, ki jingïatreilang kilong kiba donkam. U la pynkut da kaba pynpaw biang ïa ka jingthmu ban pynkylla ïa ka Assam bad ka thaiñ Shatei Lammihngi sha ka bor kaba wanrah ia ka India kaba la kiew shaphrang.

U Myntri Rangbah ka jylla Assam, u Himanta Biswa Sarma, u Myntri Sorkar Pdeng, u Sarbananda Sonowal ki la iadonlang lem bad kiwei kiwei ki kynrem ki lyndan ha kane ka jingialang.

Ka Nongrim

Ha Darrang, u Myntri Rangbahduh u la buh maw nongrim na ka bynta ki projek ba bun jait. Ki projek ki kynthup ia ka Darrang Medical College & Hospital bad ka GNM School bad ka B.Sc. Nursing College, pynkhlain ia ka jinghikai ha ka liang ka koit ka khiah bad ka jingai jingsumar ha ka thain; ka Guwahati Ring Road Project ka ban kyntiew ia ka jingleit jingwan ha sor, ban pynduna ia ka jingkhapngiah ki kali, bad ban kyntiew ia ka jingpyniasoh hapoh bad sawdong jong ka nongbah; bad ka jingkieng Kuruwa–Narengi halor ka wah Brahmaputra kaba kyntiew ïa ka jingpyniasoh bad kyntiew ïa ka roi ka par ha ka imlang sahlang bad ka ioh ka kot ha ka thaiñ.

*****