Mumbai, 30 Nailar, 2025 – Ka Waves Film Bazaar, ka iew phlim ba heh tam ha South Asia bad ka bynta kaba kongsan jong ka jingai jingtip ka India shaphang ki kam shna phlim sha kylleng ka pyrthei, ka la sdang ia ka jingkhot na ka bynta ka iew shna prokram lang jong ka ha ka bynta kaba 19. Kane ka prokram kan long naduh ka 20 haduh 24 tarik u Naiwieng, 2025, ha ka Marriott Resort, Goa.

Ia kaba ju pynlong lang bad ka International Film Festival of India (IFFI), ia ka Film Bazaar la pynkylla sha ka Waves Film Bazaar kum ka jing thmu ba kham iar ban kyntiew ia ka India kum ka jaka pdeng ha ka pyrthei na ka bynta ki prokram, ka jingsaindur bad ka jingiatreilang ban pynmih prokram. Ka Waves Film Bazaar ka la pynskhem ialade kum ka rynsan kaba pawnam kaba pyniasoh ia ki kam shna phlim jong ka India bad South Asia bad ki briew ba shemphang na kylleng ka pyrthei. Ha une u snem ba la dep, ka la khring palat 1,800 ngut ki nongiashim bynta na palat 40 tylli ki ri kaba pyni ia ka jingkongsan bad ka jingkiew ka kyrdan jong ka ha ka kam shna phlim.

Ka Iew pynmih phlim lang, ka bynta ba kongsan jong ka Waves Phlim Bazaar, ka khot sngewbha ia ki jingai jingmut na ka bynta ki projek Feature bad Documentary. Naduh ba la sdang ia ka ha u snem 2007, kane ka rynsan ka la ai ki lad ki lynti kiba la buh kyrpang na ka bynta ki nongshna phlim ban ioh ia ka jingkyrshan ha ka liang ka jingsaindur bad ka pisa tyngka. Ka iew ka ialeh ban pyniatylli ia ki nongtrei ha ka kam shna phlim na kylleng ka pyrthei, da kaba kyntiew ia ki jingiatreilang hapdeng ki briew na ki ri bapher bapher bad ki jingpynmih phlim lyngba ka jingiatreilang.

Katto katne tylli ki phlim ba la ïoh jingïaroh, kynthup ïa ka “The Lunchbox”, “Dum Lagake Haisha”, Newton, Schirkoa: : In Lies We Trust, Girls Will Be Girls, and In the Belly of a Tiger, ki dei kiba la paw namar ka Waves Film Bazaar, kaba pynpaw ïa ka jingktah jong ka ha ka kam shna phlim ha ka pyrthei.

Ki jingai pisa na ka bynta ka iew shna phlim lang 2025:

Ia ka bynta 2025, ka Waves Film Bazaar kan ai jingiarap pisa haduh $20,000 sha ki lai tylli ki projek kiba jop na ka Iew pynmih phlim lang, ban sam kumne harum.

1st Prize: Co-Production Market Feature – $10,000

2nd Prize: Co-Production Market Feature – $5,000

Special Cash Grant: Co-Production Market Documentary – $5,000

Ia kaba la sdang ha u snem 2024, ka sienjam ban ai jingïarap pisa ka thmu ban pyndap ïa ka jingïapher hapdeng ka jingthmu ban saindur bad ka jingpynmih prokram da kaba ai jingïarap pisa kaba kongsan na ka bynta ban kyntiew ia ki kam. Ha ka bynta ba la dep, ka phlim Kurinji (The Disappearing Flower) ba la direct da u Payal Sethi, ka la ioh ia ka khusnam kaba nyngkong. Ia ka khusnam kaba ar la ioh ia ka phlim Kothiyan - Fishers of Men kaba la direct da u Sanju Surendran bad kaba la pynmih da u Pramod Sankar, katba ka phlim All Ten Heads of Ravana kaba la direct da u Pranjal Dua bad kaba la pynmih da u Bich-Quan Tran ka la ioh ia ka khusnam kaba lai.

Ki tarik ban ai ki jingtyrwa:

Yn pdiang ia ki jingtyrwa ia ki projek phlim Feature haduh ka 7 tarik u Nailur, 2025, katba ia ki jingai jingmut ïa ki projek Documentary yn pdiang haduh ka 13 tarik u Nailur 2025. Ki nongshna phlim ba shah jied kin ïoh ïa ki lad kiba kordor ban ïatreilang bad ki nongpynmih, ki nongsam phlim, ki nongdie, bad ki nongbei tyngka ban pynskhem ïa ka jingïatreilang bad ki nongpynmih phlim lang.

Kiwei kiwei ki prokram ha ka Waves Film Bazaar:

Ha ryngkat ka iew pynmih phlim lang, ka Waves Film Bazaar kan don ki Market Screening, ka Viewing Room — ka thup ki dur khih kaba pyni kumba 200 tylli ki phlim na India bad South Asia ba thymmai bad ki bym pat ju iohi – ha ryngkat kiwei kiwei ki prokram kiba iadei bad kane ka kam kum ka Work-In-Progress Lab, Knowledge Series, Producer’s Workshop, Country Pavilions, bad Market Stalls. Kine kin pynskhem ia ka jingkut jingmut jong ka Waves Film Bazaar ban kyntiew ia ka sap, wanrah ia ka jingiakren hapdeng kito kiba don bynta ha kane ka kam, bad kyntiew ia ka kam shna phlim jong ka South Asian.

Ban ioh jingtip shuh shuh bad ban ai jingtyrwa, leit ha ka films.wavesbazaar.com

***