ಗಣ್ಯರೇ, ಗೌರವಾನ್ವಿತ ಪ್ರತಿನಿಧಿಗಳೇ ಮತ್ತು ಸಹೋದ್ಯೋಗಿಗಳೇ,

ಈ ಪ್ರತಿಷ್ಠಿತ ವೇದಿಕೆಯಲ್ಲಿ ಭಾರತವನ್ನು ಪ್ರತಿನಿಧಿಸುವುದು ನನಗೆ ಗೌರವದ ವಿಷಯವಾಗಿದೆ.

ಮೂವತ್ತು ವರ್ಷಗಳ ಹಿಂದೆ, ಕೋಪನ್ ಹ್ಯಾಗನ್ ಘೋಷಣೆಯು ಜನರನ್ನು ಅಭಿವೃದ್ಧಿಯ ಕೇಂದ್ರದಲ್ಲಿ ಇರಿಸಿತು, ಬಡತನ ನಿರ್ಮೂಲನೆ, ಪೂರ್ಣ ಉದ್ಯೋಗ, ಯೋಗ್ಯ ಕೆಲಸ ಮತ್ತು ಸಾಮಾಜಿಕ ಸೇರ್ಪಡೆಗೆ ಒತ್ತು ನೀಡಿತು. ಆರ್ಥಿಕ ಬೆಳವಣಿಗೆ ಮತ್ತು ಸಾಮಾಜಿಕ ಪ್ರಗತಿಗೆ ಭಾರತದ ವಿಧಾನವು ಈ ಘೋಷಣೆಗೆ ಅನುಗುಣವಾಗಿದೆ.

ಭಾರತದ ಬೆಳವಣಿಗೆಯ ಕಥೆಯು ಬೃಹತ್ ಪರಿವರ್ತನೆಯ ಕಥೆಯಾಗಿದೆ. ಕಳೆದ 10 ವರ್ಷಗಳಲ್ಲಿ, ನಿರಂತರ ಸುಧಾರಣೆಗಳು, ಕಲ್ಯಾಣ ಕಾರ್ಯಕ್ರಮಗಳ ಸಮನ್ವಯ ಮತ್ತು ಡಿಜಿಟಲ್ ನಾವೀನ್ಯತೆಗಳ ಮೂಲಕ, ಸುಮಾರು 250 ಮಿಲಿಯನ್ ಭಾರತೀಯರನ್ನು ಬಹು ಆಯಾಮದ ಬಡತನದಿಂದ ಹೊರತರಲಾಗಿದೆ.

ಮಾನ್ಯರೇ,

ಭಾರತದ ಪ್ರಯಾಣವು ಅಂತ್ಯೋದಯದ ಆಳವಾದ ತತ್ವದಿಂದ ಮಾರ್ಗದರ್ಶಿಸಲ್ಪಟ್ಟಿದೆ, ಅಂದರೆ ಸಾಲಿನಲ್ಲಿರುವ ಕೊನೆಯ ವ್ಯಕ್ತಿಯನ್ನು ಸಬಲೀಕರಣಗೊಳಿಸುವುದು. ನಮ್ಮ ಪ್ರಗತಿಯು ಜೀವನ ಚಕ್ರ ಆಧಾರಿತ ಚೌಕಟ್ಟಿನ ಪರಿಣಾಮವಾಗಿದೆ, ಅಲ್ಲಿ ಮಗುವಿಗೆ ಆರೋಗ್ಯಕರ ಅಡಿಪಾಯವಿದೆ, ಯುವ ವಯಸ್ಕನಿಗೆ ಶಿಕ್ಷಣ ಮತ್ತು ಜೀವನೋಪಾಯಕ್ಕೆ ಬೆಂಬಲವಿದೆ, ಕೆಲಸಗಾರನಿಗೆ ಯೋಗ್ಯವಾದ ಕೆಲಸವಿದೆ ಮತ್ತು ವೃದ್ಧ ವ್ಯಕ್ತಿಗೆ ವೃದ್ಧಾಪ್ಯದಲ್ಲಿ ಘನತೆ ಮತ್ತು ಆದಾಯ ಭದ್ರತೆಯನ್ನು ಖಾತರಿಪಡಿಸಲಾಗುತ್ತಿದೆ.

ಇಂದು, 118 ಮಿಲಿಯನ್ ಶಾಲಾ ಮಕ್ಕಳು ಪೌಷ್ಟಿಕಾಂಶದ ಮಧ್ಯಾಹ್ನದ ಊಟವನ್ನು ಪಡೆಯುತ್ತಿದ್ದಾರೆ, 800 ಮಿಲಿಯನ್‌ ಗಿಂತಲೂ ಹೆಚ್ಚು ನಾಗರಿಕರಿಗೆ ಆಹಾರ ಭದ್ರತೆಯನ್ನು ಒದಗಿಸಲಾಗಿದೆ. 425 ಮಿಲಿಯನ್ ಭಾರತೀಯರು ಆರೋಗ್ಯ ರಕ್ಷಣೆಯ ವ್ಯಾಪ್ತಿಗೆ ಒಳಪಟ್ಟಿದ್ದಾರೆ ಮತ್ತು ಕಡಿಮೆ ಆದಾಯ ಹೊಂದಿರುವವರಿಗೆ 37 ಮಿಲಿಯನ್‌ ಗಿಂತಲೂ ಹೆಚ್ಚು ಮನೆಗಳನ್ನು ಒದಗಿಸಲಾಗಿದೆ.

2017-18 ಮತ್ತು 2023-24ರ ನಡುವೆ, ನಮ್ಮ ನಿರುದ್ಯೋಗ ದರವು ಶೇ.6 ರಿಂದ ಶೇ.3.2 ಕ್ಕೆ ಇಳಿದಿದೆ ಮತ್ತು ಮಹಿಳಾ ಉದ್ಯೋಗವು ಬಹುತೇಕ ದ್ವಿಗುಣಗೊಂಡಿದೆ. ಲಕ್ಷಾಂತರ ಮಹಿಳೆಯರನ್ನು ಸ್ವಸಹಾಯ ಗುಂಪುಗಳಲ್ಲಿ ಸೇರಿಸಲಾಗಿದೆ. ಈ ಮಹಿಳಾ ನೇತೃತ್ವದ ಸ್ಥಳೀಯ ಸಂಸ್ಥೆಗಳ ಶಕ್ತಿಯನ್ನು ಸಾಲ ವಿತರಣೆಗಳು ಮತ್ತಷ್ಟು ಬಲಪಡಿಸಿವೆ.

ಭಾರತದ ಸಾಮಾಜಿಕ ಭದ್ರತಾ ವ್ಯಾಪ್ತಿಯು 2015ರಲ್ಲಿದ್ದ ಶೇ.19 ರಿಂದ 2025ರಲ್ಲಿ ಶೇ.64.3ಕ್ಕೆ ಹೆಚ್ಚಾಗಿದೆ. ನಮ್ಮ ಪ್ರಯತ್ನಗಳನ್ನು ಗುರುತಿಸಿ, ಅಂತರರಾಷ್ಟ್ರೀಯ ಸಾಮಾಜಿಕ ಭದ್ರತಾ ಸಂಘವು ಈ ವರ್ಷ ಭಾರತಕ್ಕೆ "ಸಾಮಾಜಿಕ ಭದ್ರತೆಯಲ್ಲಿ ಅತ್ಯುತ್ತಮ ಸಾಧನೆಗಾಗಿ ಐ.ಎಸ್.ಎಸ್.ಎ ಪ್ರಶಸ್ತಿ"ಯನ್ನು ನೀಡಿದೆ.

ನಮ್ಮ ಪ್ರಯತ್ನಗಳು ಈ ಕಾರ್ಯಕ್ರಮಗಳ ಸುಗಮ ಅನುಷ್ಠಾನದ ಮೇಲೆ ಕೇಂದ್ರೀಕೃತವಾಗಿವೆ. ಬ್ಯಾಂಕ್ ಖಾತೆಗಳ ಜಾಲ, ಮೊಬೈಲ್ ಇಂಟರ್ನೆಟ್ ಲಭ್ಯತೆ ಮತ್ತು ವಿಶಿಷ್ಟ ನಾಗರಿಕ ಗುರುತಿನ ಚೀಟಿಗಳ ಮೂಲಕ, ನೇರ ಪ್ರಯೋಜನ ವರ್ಗಾವಣೆಯ ಮೂಲಕ ನಾವು ಕೊನೆಯ ಹಂತದವರೆಗೆ ಪರಿಣಾಮಕಾರಿ ವಿತರಣೆಯನ್ನು ಖಚಿತಪಡಿಸಿದ್ದೇವೆ.

ಮಾನ್ಯರೇ,

ಈ ಶೃಂಗಸಭೆಯಲ್ಲಿ ನಾವು ಅಂಗೀಕರಿಸುತ್ತಿರುವ ರಾಜಕೀಯ ಘೋಷಣೆಯು ಜಾಗತಿಕ ಆದ್ಯತೆಗಳಿಗೆ ವಿಶೇಷವಾಗಿ ಮಹಿಳಾ ನೇತೃತ್ವದ ಅಭಿವೃದ್ಧಿ, ಸಾಂಪ್ರದಾಯಿಕ ಔಷಧ ವ್ಯವಸ್ಥೆಗಳು, ಡಿಜಿಟಲ್ ಸಾರ್ವಜನಿಕ ಮೂಲಸೌಕರ್ಯ ಮತ್ತು ಸಹಕಾರಿ ಸಂಸ್ಥೆಗಳನ್ನು ಸಮಗ್ರ ಬೆಳವಣಿಗೆಯ ಎಂಜಿನ್‌ ಗಳಾಗಿ ಗುರುತಿಸುವುದಕ್ಕೆ ಅನುಗುಣವಾಗಿದೆ.

ನಮ್ಮ ಆರ್ಥಿಕ ಬೆಳವಣಿಗೆ ಮತ್ತು ಸಾಮಾಜಿಕ ಅಭಿವೃದ್ಧಿ ಮಾರ್ಗಗಳು ಸುಸ್ಥಿರ ಅಭಿವೃದ್ಧಿ ಗುರಿಗಳು ಮತ್ತು ಹವಾಮಾನ ಬದಲಾವಣೆಯ ಕುರಿತಾದ ನಮ್ಮ ಬದ್ಧತೆಗಳಿಗೆ ಅನುಗುಣವಾಗಿವೆ. ನಾವು 17 ವಿಶ್ವಸಂಸ್ಥೆಯ ಸುಸ್ಥಿರ ಅಭಿವೃದ್ಧಿ ಗುರಿಗಳ ಕಾರ್ಯಸೂಚಿಗೆ ಬದ್ಧರಾಗಿದ್ದೇವೆ.

ಪಾಕಿಸ್ತಾನದ ಅಧ್ಯಕ್ಷರು ನಿನ್ನೆ ಭಾರತದ ಬಗ್ಗೆ ಮಾಡಿದ ಕೆಲವು ಅನಗತ್ಯ ಉಲ್ಲೇಖಗಳಿಗೆ ನಾವು ಬಲವಾದ ಆಕ್ಷೇಪಣೆ ವ್ಯಕ್ತಪಡಿಸುತ್ತೇವೆ.

ಭಾರತದ ವಿರುದ್ಧ ಅಪಪ್ರಚಾರ ಮಾಡುವ ಮೂಲಕ ಸಾಮಾಜಿಕ ಪ್ರಗತಿಯಿಂದ ವಿಶ್ವದ ಗಮನವನ್ನು ಬೇರೆಡೆಗೆ ತಿರುಗಿಸಲು ಇದು ಅಂತರರಾಷ್ಟ್ರೀಯ ವೇದಿಕೆಯ ದುರುಪಯೋಗವಾಗಿದೆ. ನಾವು ಈ ವಿಷಯವನ್ನು ಸ್ಪಷ್ಟಪಡಿಸಲು ಬಯಸುತ್ತೇವೆ.

ಸಿಂಧೂ ಜಲ ಒಪ್ಪಂದಕ್ಕೆ ಸಂಬಂಧಿಸಿದಂತೆ, ಪಾಕಿಸ್ತಾನವು ನಿರಂತರ ಹಗೆತನ ಮತ್ತು ಗಡಿಯಾಚೆಗಿನ ಭಯೋತ್ಪಾದನೆಯ ಮೂಲಕ ಅದರ ಚೈತನ್ಯವನ್ನು ದುರ್ಬಲಗೊಳಿಸಿದೆ. ಭಾರತದ ಕಾನೂನುಬದ್ಧ ಯೋಜನೆಗಳನ್ನು ತಡೆಯಲು ಒಪ್ಪಂದದ ಕಾರ್ಯವಿಧಾನವನ್ನು ಪದೇ ಪದೇ ದುರುಪಯೋಗಪಡಿಸಿಕೊಂಡಿದೆ.

ಭಾರತದ ಕೇಂದ್ರಾಡಳಿತ ಪ್ರದೇಶವಾದ ಜಮ್ಮು ಮತ್ತು ಕಾಶ್ಮೀರಕ್ಕೆ ಸಂಬಂಧಿಸಿದಂತೆ, ಭಾರತದ ಆಂತರಿಕ ವ್ಯವಹಾರಗಳ ಬಗ್ಗೆ ಪ್ರತಿಕ್ರಿಯಿಸಲು ಪಾಕಿಸ್ತಾನಕ್ಕೆ ಯಾವುದೇ ಅರ್ಹತೆ ಇಲ್ಲ. ಭಾರತದ ನಾಗರಿಕರ ವಿರುದ್ಧ ಗಡಿಯಾಚೆಗಿನ ಭಯೋತ್ಪಾದನೆಯ ಕೃತ್ಯಗಳಲ್ಲಿ ಪಾಕಿಸ್ತಾನ ತೊಡಗಿದಾಗ ಇದು ವಿಶೇಷವಾಗಿ ನಿಜವಾಗುತ್ತದೆ.

ಪಾಕಿಸ್ತಾನವು ಅಂತರರಾಷ್ಟ್ರೀಯ ಸಮುದಾಯದ ಕೊಡುಗೆಗಳ ಮೇಲೆ ಅವಲಂಬಿತವಾಗಿರುವುದರಿಂದ ಅಭಿವೃದ್ಧಿಗೆ ಸಂಬಂಧಿಸಿದ ತನ್ನದೇ ಆದ ಗಂಭೀರ ಸವಾಲುಗಳನ್ನು ಆತ್ಮಾವಲೋಕನ ಮಾಡಿಕೊಂಡು ಪರಿಹರಿಸಿಕೊಳ್ಳುವುದು ಒಳ್ಳೆಯದು. ಅದು ಅಂತರರಾಷ್ಟ್ರೀಯ ವೇದಿಕೆಗಳನ್ನು ದುರುಪಯೋಗಪಡಿಸಿಕೊಳ್ಳುವುದನ್ನು ನಿಲ್ಲಿಸಬೇಕು.

ಮಾನ್ಯರೇ,

ನಮ್ಮ ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರ "ಸಬ್ ಕಾ ಸಾಥ್, ಸಬ್ ಕಾ ವಿಕಾಸ್" ಅಂದರೆ "ನಾವೆಲ್ಲರೂ ಒಟ್ಟಾಗಿ, ಎಲ್ಲರಿಗೂ ಅಭಿವೃದ್ಧಿ" ಎಂಬ ಮಂತ್ರದಿಂದ ಪ್ರೇರಿತರಾಗಿರುವ ನಾವು, ಜನರು ನೀತಿಯ ಕೇಂದ್ರಬಿಂದುವಾಗಿದ್ದಾಗ, ನಾವೀನ್ಯತೆಯು ಎಲ್ಲರನ್ನೂ ಒಳಗೊಂಡಾಗ ಮತ್ತು ಅಭಿವೃದ್ಧಿಯು ಹಂಚಿಕೆಯ ಪ್ರಯತ್ನವಾದಾಗ ಸಾಮಾಜಿಕ ಪ್ರಗತಿಯನ್ನು ಸಾಧಿಸಬಹುದು ಎಂದು ನಂಬುತ್ತೇವೆ.

ಈ ವೇದಿಕೆಯು ಪ್ರತಿಯೊಂದು ದೇಶದ ವಿಶಿಷ್ಟ ಸನ್ನಿವೇಶಗಳು, ಆರ್ಥಿಕ ಅಗತ್ಯಗಳು ಮತ್ತು ಸಾಮಾಜಿಕ ಅವಶ್ಯಕತೆಗಳನ್ನು ಗುರುತಿಸುವುದು ಮತ್ತು ಸ್ಪಂದಿಸುವುದು ಸಹ ಮುಖ್ಯವಾಗಿದೆ.

ಭಾರತದ ಅಭಿವೃದ್ಧಿ ಪಥವು ಜಾಗತಿಕ ದಕ್ಷಿಣಕ್ಕೆ ಅನುಕರಣೀಯ ಅಭಿವೃದ್ಧಿ ಮಾದರಿಯನ್ನು ನೀಡುತ್ತದೆ. ಸಾಮಾಜಿಕ ಅಭಿವೃದ್ಧಿಯ ಭವಿಷ್ಯದ ಹಾದಿಯನ್ನು ನಾವು ಒಟ್ಟಾಗಿ ರೂಪಿಸುತ್ತಿರುವಾಗ, ಭಾರತವು ತನ್ನ ಅತ್ಯುತ್ತಮ ಅಭ್ಯಾಸಗಳನ್ನು ಹಂಚಿಕೊಳ್ಳಲು ಮತ್ತು ಜಾಗತಿಕ ಪಾಲುದಾರಿಕೆಗಳನ್ನು ಬಲಪಡಿಸಲು ಎದುರು ನೋಡುತ್ತಿದೆ.

ಜಾಗತಿಕ ನಾಯಕತ್ವವು ಸಾಮಾಜಿಕವಾಗಿ ನ್ಯಾಯಯುತ ಮತ್ತು ಎಲ್ಲರನ್ನೂ ಒಳಗೊಂಡ ಜಗತ್ತನ್ನು ಸೃಷ್ಟಿಸುವ ಬದ್ಧತೆಯನ್ನು ನವೀಕರಿಸಲು ವೇದಿಕೆಯನ್ನು ಒದಗಿಸುವ ಈ ಸಕಾಲಿಕ ಸಮಾವೇಶವನ್ನು ಆಯೋಜಿಸಿದ್ದಕ್ಕಾಗಿ ವಿಶ್ವಸಂಸ್ಥೆ ಮತ್ತು ಕತಾರ್ ಸರ್ಕಾರಕ್ಕೆ ನಾನು ನನ್ನ ಕೃತಜ್ಞತೆಗಳನ್ನು ತಿಳಿಸುತ್ತೇನೆ.

ಧನ್ಯವಾದಗಳು.

*****