কেন্দ্ৰীয় গৃহমন্ত্ৰী তথা সমবায় মন্ত্ৰী শ্ৰী অমিত শ্বাহে আজি ৰাষ্ট্ৰীয় একতা দিৱস-২০২৫ উপলক্ষে নতুন দিল্লীত 'একতাৰ বাবে দৌৰ'ৰ শুভাৰম্ভ কৰে। কেন্দ্ৰীয় গৃহমন্ত্ৰী শ্ৰী অমিত শ্বাহেও জনসাধাৰণক একতাৰ প্ৰতিজ্ঞা কৰায়। এই অনুষ্ঠানত কেন্দ্ৰীয় মন্ত্ৰী শ্ৰী মনোহৰ লাল আৰু ড০ মানসুখ মাণ্ডৱিয়া, দিল্লীৰ উপ-ৰাজ্যপাল শ্ৰী ভি. কে. ছাক্সেনা, দিল্লীৰ মুখ্যমন্ত্ৰী শ্ৰীমতী ৰেখা গুপ্তা আৰু গৃহ পৰিক্ৰমা বিভাগৰ কেন্দ্ৰীয় ৰাজ্য মন্ত্ৰী শ্ৰী বন্দী সঞ্জয় কুমাৰৰ লগতে আন বহু গণ্য-মান্য ব্যক্তি উপস্থিত আছিল।

তেওঁৰ ভাষণত কেন্দ্ৰীয় গৃহমন্ত্ৰী তথা সমবায় মন্ত্ৰী শ্ৰী অমিত শ্বাহে কয় যে আজি আমাৰ সকলোৰে বাবে এক বিশেষ দিন। তেওঁ কয় যে ২০১৪ চনৰ পৰা প্ৰতি বছৰে ৩১ অক্টোবৰত আমি চৰ্দাৰ পেটেলৰ সন্মানত 'একতাৰ বাবে দৌৰ' ৰ আয়োজন কৰি আহিছোঁ। তেওঁ কয় যে আজি চৰ্দাৰ পেটেলৰ ১৫০ সংখ্যক জয়ন্তী উদযাপন কৰা হৈছে আৰু এই কথা মনত ৰাখি প্ৰধানমন্ত্ৰী শ্ৰী নৰেন্দ্ৰ মোদীয়ে ইয়াক সমগ্ৰ দেশতে এক বিশেষ অনুষ্ঠান হিচাপে উদযাপন কৰা উচিত বুলি সিদ্ধান্ত লৈছে।

শ্ৰী অমিত শ্বাহে কয় যে চৰ্দাৰ পেটেলে ভাৰতৰ স্বাধীনতা আন্দোলনৰ লগতে স্বাধীন ভাৰতৰ বৰ্তমানৰ মানচিত্ৰ নিৰ্মাণত এক গুৰুত্বপূৰ্ণ ভূমিকা পালন কৰিছিল। তেওঁ উল্লেখ কৰে যে মহাত্মা গান্ধীৰ আহ্বানত স্বাধীনতা সংগ্ৰামত যোগদান কৰিবলৈ চৰ্দাৰ পেটেলে তেওঁৰ ওকালতিৰ পেছা ত্যাগ কৰিছিল। শ্ৰী শ্বাহে কয় যে কৃষকৰ প্ৰতি কৰা অন্যায়ৰ বিৰুদ্ধে আৰম্ভ কৰা ১৯৮২ চনৰ বাৰদোলী সত্যাগ্ৰহৰ সময়ত চৰ্দাৰ পেটেলৰ নেতৃত্বৰ গুণ স্পষ্ট হৈ পৰিছিল। শ্ৰী শ্বাহে কয় যে চৰ্দাৰ পেটেলৰ নেতৃত্বত কৃষকসকলে তেওঁলোকৰ আন্দোলন আৰম্ভ কৰিছিল আৰু এখন সৰু চহৰত যিটো আৰম্ভ হৈছিল সেয়া সোনকালেই দেশজোৰা কৃষক আন্দোলনত পৰিণত হৈছিল, যাৰ ফলত ব্ৰিটিছসকলে তেওঁলোকৰ দাবী মানি ল"বলৈ বাধ্য হৈছিল। তেওঁ কয় যে এই আন্দোলনৰ পিছতে মহাত্মা গান্ধীয়ে বল্লভভাই পেটেলক "চৰ্দাৰ" উপাধি প্ৰদান কৰিছিল আৰু তেতিয়াৰ পৰা তেওঁ চৰ্দাৰ বল্লভভাই পেটেল নামেৰে জনাজাত হৈ পৰিছিল।

কেন্দ্ৰীয় গৃহমন্ত্ৰীগৰাকীয়ে কয় যে স্বাধীনতাৰ পিছত ব্ৰিটিছে দেশখনক ৫৬২ খন ৰজাশাসিত ৰাজ্যত বিভক্ত কৰিছিল আৰু ইমানবোৰ ৰাজ্যত বিভক্ত এখন ৰাষ্ট্ৰ কেনেকৈ এক অখণ্ড ভাৰতত পৰিণত হ"ব পাৰে তাক লৈ সকলোৱে চিন্তিত আছিল। তেওঁ কয় যে চৰ্দাৰ পেটেলৰ অক্লান্ত প্ৰচেষ্টা, সংকল্প আৰু ৰাজনীতিৰ বাবেই ৫৬২ খন ৰজাশাসিত ৰাজ্যই কম সময়ৰ ভিতৰতে একত্ৰিত হৈছিল, ভাৰতৰ বৰ্তমানৰ মানচিত্ৰখন প্ৰস্তুত কৰিছিল আৰু আমাৰ ৰাষ্ট্ৰৰ ভেটি স্থাপন কৰিছিল। তেওঁ লগতে কয় যে কাঠিৱাৰ, ভূপাল, জুনাগড়, যোধপুৰ, ট্ৰাভাঙ্কোৰ আৰু হায়দৰাবাদৰ দৰে অঞ্চলসমূহে পৃথক হৈ থাকিবলৈ বিভিন্ন ধৰণৰ প্ৰচেষ্টা চলাইছিল, কিন্তু চৰ্দাৰ পেটেলৰ লৌহ ইচ্ছাশক্তি আৰু অটল সংকল্পই সকলোকে একত্ৰিত কৰি এখন ঐক্যবদ্ধ ভাৰত গঠন কৰিছিল। শ্ৰী শ্বাহে কয় যে ৩৭০ নং অনুচ্ছেদৰ বাবে ভাৰতৰ সৈতে কাশ্মীৰৰ সম্পূৰ্ণ একত্ৰীকৰণ একমাত্ৰ আধৰুৱা কাম আছিল, কিন্তু প্ৰধানমন্ত্ৰী মোদীয়ে চৰ্দাৰ পেটেলৰ সেই আধৰুৱা কামটো সম্পূৰ্ণ কৰিছিল- আৰু আজি আমাৰ সন্মুখত এখন প্ৰকৃত ঐক্যবদ্ধ ভাৰত আছে।

শ্ৰী অমিত শ্বাহে কয় যে স্বাধীনতাৰ দিনা সকলোৱে ৰাষ্ট্ৰীয় পতাকা উত্তোলনত ব্যস্ত হৈ থকাৰ সময়ত চৰ্দাৰ পেটেলে নৌসেনাৰ যুদ্ধ জাহাজখন নিৰীক্ষণ কৰি আছিল। তেওঁ উল্লেখ কৰিছিল যে সেই সময়ত, লক্ষাদ্বীপক কোনে নিয়ন্ত্ৰণ কৰিব সেই প্ৰশ্নটো এটা গুৰুত্বপূৰ্ণ বিষয় আছিল আৰু তৎক্ষণাত নৌ বাহিনীক তালৈ প্ৰেৰণ কৰি আৰু ত্ৰিৰংগা পতাকা উত্তোলন কৰাটো নিশ্চিত কৰি, চৰ্দাৰ পেটেলে লক্ষাদ্বীপক ভাৰতৰ এক অবিচ্ছেদ্য অংগ কৰাত এক গুৰুত্বপূৰ্ণ অৱদান আগবঢ়াইছিল।

কেন্দ্ৰীয় গৃহমন্ত্ৰী আৰু সমবায় মন্ত্ৰীগৰাকীয়ে কয় যে তেতিয়াৰ বিৰোধী নেতৃত্বাধীন চৰকাৰসমূহে চৰ্দাৰ পেটেলক প্ৰকৃত যোগ্য সন্মান প্ৰদান কৰা নাছিল, আৰু তেওঁক ভাৰতৰত্ন প্ৰদান কৰিবলৈ ৪১ বছৰ সময় লাগিছিল। তেওঁ লগতে কয় যে চৰ্দাৰ পেটেলৰ অপৰিসীম অৱদানৰ যোগ্য কোনো স্মাৰক কেতিয়াও নিৰ্মাণ কৰা হোৱা নাছিল। তেওঁ কয় যে যেতিয়া শ্ৰী নৰেন্দ্ৰ মোদী গুজৰাটৰ মুখ্যমন্ত্ৰী হৈছিল, তেতিয়া তেওঁ কেৱাদিয়া কলনিত চৰ্দাৰ পেটেলৰ বাবে এক বিশাল স্মাৰক নিৰ্মাণ কৰাৰ সংকল্প লৈছিল, যিটো সমগ্ৰ বিশ্বই লক্ষ্য কৰিব। তাতেই ষ্টেচু অব্ ইউনিটীৰ ধাৰণাটোৰ কল্পনা কৰা হৈছিল। শ্ৰী শ্বাহে উল্লেখ কৰে যে ২০১৩ চনৰ ৩১ অক্টোবৰত ষ্টেচু অব ইউনিটিৰ আধাৰশিলা স্থাপন কৰা হৈছিল আৰু ৫৭ মাহৰ ভিতৰত চৰ্দাৰ পেটেলৰ ১৮২ মিটাৰ ওখ প্ৰতিমূৰ্তিটো সম্পূৰ্ণ হৈছিল- যি এতিয়া সমগ্ৰ দেশৰ একতাৰ প্ৰতীক হিচাপে থিয় হৈ আছে। তেওঁ কয় যে চৰ্দাৰ পেটেল এগৰাকী কৃষক নেতা আছিল আৰু মূৰ্তিটো নিৰ্মাণত ব্যৱহৃত প্ৰায় ২৫,০০০ টন লোহা কৃষকৰ সঁজুলি গলাই ব্যৱহাৰ কৰা হৈছিল। প্ৰায় ২৫,০০০ টন লোহা, ৯০,০০০ ঘনমিটাৰ কংক্ৰিট আৰু ১৭০০ টন ব্ৰঞ্জ ব্যৱহাৰ কৰি নিৰ্মাণ কৰা এই বিশাল মূৰ্তিটো এতিয়ালৈকে প্ৰায় ২.৫০ কোটি লোকে দৰ্শন কৰিছে।

শ্ৰী অমিত শ্বাহে কয় যে দেশৰ একতা, অখণ্ডতা আৰু আভ্যন্তৰীণ নিৰাপত্তাৰ বাবে চৰ্দাৰ পেটেলে দেখুওৱা পথটোৱেই আজি ভাৰতৰ অগ্ৰগতিৰ পথ। তেওঁ কয় যে আজি প্ৰধানমন্ত্ৰী মোদীৰ উপস্থিতিত সকলো ৰাজ্যৰ আৰক্ষী বাহিনী আৰু কেন্দ্ৰীয় সশস্ত্ৰ আৰক্ষী বাহিনীয়ে (চি. এ. পি. এফ.) কেৱাদিয়াত এক বিশাল কুচকাৱাজৰ জৰিয়তে চৰ্দাৰ পেটেলক শ্ৰদ্ধাঞ্জলি জ্ঞাপন কৰে। তেওঁ লগতে কয় যে গৃহ মন্ত্ৰালয়ে সিদ্ধান্ত লৈছে যে ১৫০ সংখ্যক জয়ন্তীৰ পিছত প্ৰতি বছৰে চৰ্দাৰ পেটেলৰ প্ৰতি শ্ৰদ্ধাঞ্জলি হিচাপে বিশাল জাকজমকতাৰে একতা পেৰেডৰ আয়োজন কৰা হ'ব। তেওঁ লগতে উল্লেখ কৰে যে এই বছৰ একতাৰ বাবে দৌৰ আৰু সংকল্প গ্ৰহণ অনুষ্ঠানো বিশেষ ধৰণে উদযাপন কৰা হৈছে। শ্ৰী শ্বাহে কয় যে সমগ্ৰ দেশতে- কাশ্মীৰৰ পৰা কন্যাকুমাৰী আৰু দ্বাৰকাৰ পৰা কামাখ্যালৈকে- চৰ্দাৰ পেটেলৰ ধাৰণাসমূহ বিশেষকৈ যুৱক-যুৱতীসকলৰ মাজত প্ৰচাৰ কৰিবলৈ বিশেষ কাৰ্যসূচীৰ আয়োজন কৰা হৈছে। তেওঁ গুৰুত্বসহকাৰে কৰি কয় যে দেশৰ একতা আৰু অখণ্ডতা ৰক্ষাৰ প্ৰতিশ্ৰুতি লোৱা যুৱক-যুৱতীসকল ভাৰতৰ ভৱিষ্যতৰ নিৰ্মাতা হ"ব।

***

RK / RR / PS /KD