U Myntri Kam Pohing ka Sorkar Pdeng uba dei ruh u Myntri ka Tnad iatreilang u Amit Shah mynta ka sngi u la kaweh lama ia ka ‘Run for Unity’ ha nongbah New Delhi ha ka Rashtriya Ekta Diwas - 2025. U Myntri kam pohiing ka sorkar pdeng u la ialam ruh ia ki paidbah ha ka jingbam smai Unity. Ha kane ka sngi, ki Myntri Sorkar Pdeng u Manohar Lal bad u Dr. Mansukh Mandaviya, Lieutenant Governor jong ka Delhi u V. K. Saxena, Myntri Rangbah ka Delhi ka Rekha Gupta, bad u Myntri Khynnah jong ka sorkar pdeng ba dei khmih ia ka Tnad Kam Pohiing, u Bandi Sanjay Kumar, lem bad kiwei kiwei ki kynrem ki lyndan ki la iadonlang.

Ha ka jingai jingkren jong u, u Myntri kam pohiing jong ka sorkar pdeng uba dei ruh u Myntri ka Tnad treilang u Amit Shah u la ong ba mynta ka dei ka sngi kaba kyrpang na ka bynta jong ngi baroh. U la ong ba naduh u snem 2014, manla u snem ha ka 31 tarik Risaw, ngi ju pynlong ia ka ‘Run for Unity’ kum ka jingburom ia u Sardar Patel. U la ong ba mynta ka sngi ka dei ka lyngkhuh sngikha kaba 150 snem jong u Sardar Patel, bad da kaba buh ia kane ha ka jingmut, u Myntri Rangbahduh ka ri u Narendra Modi u la rai ba dei ban rakhe ia ka kum ka sngi kaba kyrpang ha baroh kawei ka ri.

U Amit Shah u la ong ba u Sardar Patel u la don ka bynta kaba kongsan ha ka jingiakhih ban ioh ia ka jinglaitluid jong ka India bad kumjuh ban pynwandur ia ka map ba mynta jong ka ri India kaba laitluid. U la ong ba u Sardar Patel u la iehnoh ïa la ka kam kum u nongïasaid aiñ ban ïasoh bad ka jingïakhun laitluid halor ka jingkhot jong u Mahatma Gandhi. U Shah u la ong ba ki jinglong nongialam jong u Sardar Patel ki la paw shai ha ka por jong ka Bardoli Satyagraha jong u snem 1928, kaba la sdang pyrshah ia ka jingleh bymhok ia ki nongrep. U Shah u la ong ba hapoh ka jingialam jong u Sardar Patel, ki nongrep ki la sdang ia ka jingiakhih jong ki, bad kaei kaba la sdang ha kawei ka shnong rit shen ka la nangkiew sha ka jingiakhih jong ki nongrep ha ka ri baroh kawei, kaba la pynbor ia ki phareng ban pdiang ia ki jingdawa jong ki. U la ong ba dei hadien kane ka jingkhih ba u Mahatma Gandhi u la ai ia u Vallabhbhai Patel ia ka nam “Sardar,” bad naduh kata ka por, la tip ia u kum u Sardar Vallabhbhai Patel.

U Myntri kam pohiing jong ka sorkar pdeng u la ong ba hadien ba la ioh ia ka jinglaitluid, ki phareng ki la phiah ia ka ri sha 562 tylli ki hima, bad baroh ki sngewkhia kumno ka ri kaba la phiah ha kiba bun ki jylla kan long ka ri India kaba iatylli. U la ong ba dei namar ki jingtrei shitom, ka jingkut jingmut bad ka jingtbit pyniaid kam jong u Sardar Patel ba baroh 562 tylli ki hima ki la iatylli ha ka por kaba lyngkot, kaba la pynwandur ia ka map jong ka India kaba mynta bad kaba la buh ia ka nongrim jong ka ri jong ngi. U la bynrap ruh ba ki thaiñ kum ka Kathiawar, Bhopal, Junagadh, Jodhpur, Travancore bad Hyderabad ki la pyrshang da ki rukom bapher bapher ban long lakajong, hynrei ka mon ba jwat jong u Sardar Patel bad ka jingkut jingmut ba skhem ka la wanrah ïa ki baroh ban pynlong kawei ka India kaba ïatylli. U Shah u la ong ba tang kawei ka kam kaba dang sah khlem pat pyndep ka long ka jingpyniasoh pura ia ka Kashmir bad ka India namar ka Article 370, hynrei u Myntri Rangbahduh u Modi u la pyndep ia kata ka kam bym pat dep jong u Sardar Patel — bad mynta, ngi don hakhmat jong ngi ia ka India kaba iatylli shisha.

U Amit Shah u la ong ba ha ka sngi laitluid, katba baroh ki dang bunkam ban pynher ia ka lama jong ka ri, u Sardar Patel u dang peitngor ia ka lieng leh thma jong ki shipai duriaw. U la ong ba ha katei ka por, ka jingkylli mano ban synshar ia ka Lakshadweep ka dei ka mat kaba kongsan bha bad da kaba phah kloi ia ki shipai duriaw shata bad ban pynthikna ba la pynher ia ka lama jong ka ri, u Sardar Patel u la noh synniang shibun ban pynlong ia ka Lakshadweep kum ka bynta ba kongsan jong ka India.

U Myntri kam pohiing jong ka sorkar pdeng uba dei ruh u Myntri ka Tnad treilang, u la ong ba ki sorkar ba la ialam da ki liang pyrshah ha kata ka por kim shym la ai burom ia u Sardar Patel kumba u dei hok ban ioh, bad ka la shim por 41 snem ia u ban ioh ia ka khusnam Bharat Ratna. U la bynrap ba ym shym la tei ïa ka jingkynmaw kaba dei hok ïa ka jingnoh synñiang kaba khraw jong u Sardar Patel. U la ong ba ynda u Narendra Modi u la long u Myntri Rangbah ka Gujarat, u la kut jingmut ban tei ia u mot jingkynmaw uba heh na ka bynta u Sardar Patel ha Kevadia Colony ba ka pyrthei baroh kawei kan iohi. Dei hangta ba la pyrkhat ia ka jingmut jong u Statue of Unity. U Shah u la ong ba ia u maw nongrim jong u Statue of Unity la buh ha ka 31 tarik u Risaw 2013, bad hapoh 57 bnai, la pyndep ia u mot jong u Sardar Patel uba jrong 182 meter — uba ieng mynta kum ka dak jong ka jingiatylli na ka bynta ka ri baroh kawei. U la ong ba u Sardar Patel u dei u nongialam jong ki nongrep bad kumba 25,000 hajar ton ka nar la pyndonkam ha kaba shna ia u mot ba la wanrah na ka jingpynum ia ki tiar jong ki nongrep. Une u mot uba heh, uba la shna da kaba pyndonkam kumba 25,000 ton ka nar, 90,000 kubik meter ka dewbilat bad 1,700 ton ka rnong, haduh mynta, u la khring kumba 2.5 klur ngut ki nongjngoh kai.

U Amit Shah u la ong ba ka lynti ba la pyni da u Sardar Patel na ka bynta ka jingiatylli, ka burom bad ka jingshngain hapoh ri ka dei kajuh ka lynti ha kaba ka India ka iaid shakhmat mynta. U la ong ba mynta ka sngi, ha ka jingdon lang u Myntri Rangbah duh ka ri u Modi, ki bor pulit jong baroh ki jylla bad ki Central Armed Police Force (CAPF) ki pyndon burom ia u Sardar Patel lyngba ka parade kaba heh ha Kevadia. U la bynrap ruh ba ka Tnad kam pohiing ka la shim ïa ka rai ba hadien ka lyngkhuh sngi kha kaba 150 snem yn pynlong ïa ka Unity Parade man la u snem ha kane kajuh ka rukom kaba iphuh iphieng kum ka jingburom ïa u Sardar Patel. U la ong shuh shuh ba mynta u snem, ia ka Run for Unity bad ka jingialang bam smai la rakhe ha ka rukom kaba kyrpang. U Shah u la ong ba la pynlong ia ki prokram ba kyrpang ha kylleng ka ri- naduh Kashmir haduh Kanyakumari bad naduh Dwarka haduh Kamakhya- ban pynsaphriang ia ki jingmut jong u Sardar Patel, khamtam hapdeng ki samla. U la ban jur ba ki samla kiba shim ïa ka jingbam smai ban pynneh pynsah ïa ka jingïatylli bad ka burom jong ka ri kin long ki nongtei ïa ka lawei jong ka India.

***