ଆପଣମାନଙ୍କୁ ସମସ୍ତଙ୍କୁ ଶୁଭେଚ୍ଛା!

ଆଜି, ନବରାତ୍ରିର ଏହି ପବିତ୍ର ଦିନରେ, ମୁଁ ବିହାରର ମହିଳା ଶକ୍ତି ସହିତ ସେମାନଙ୍କ ଖୁସିରେ ସାମିଲ ହେବାର ସୁଯୋଗ ପାଇଛି। ମୁଁ ଏଠାରେ ସ୍କ୍ରିନକୁ ଦେଖୁଥିଲି, ଲକ୍ଷ ଲକ୍ଷ ମହିଳା ଏବଂ ଭଉଣୀମାନଙ୍କୁ ଦେଖିଲି । ନବରାତ୍ରିର ଏହି ପବିତ୍ର ପର୍ବରେ ଆପଣଙ୍କର ଆଶୀର୍ବାଦ ଆମ ସମସ୍ତଙ୍କ ପାଇଁ ଏକ ମହାନ ଶକ୍ତି। ମୁଁ ଆଜି ଆପଣଙ୍କୁ ହୃଦୟର ସହିତ କୃତଜ୍ଞତା ଜଣାଉଛି ଏବଂ ଆଜିଠାରୁ "ମୁଖ୍ୟମନ୍ତ୍ରୀ ମହିଳା ନିଯୁକ୍ତି ଯୋଜନା" ଆରମ୍ଭ ହେଉଛି। ମୋତେ କୁହାଯାଇଛି ଯେ ଏପର୍ଯ୍ୟନ୍ତ ୭୫ ଲକ୍ଷ ଭଉଣୀ ଏହି ଯୋଜନାରେ ସାମିଲ ହୋଇଛନ୍ତି। ଏବେ ସମସ୍ତ ୭୫ ଲକ୍ଷ ଭଉଣୀଙ୍କ ବ୍ୟାଙ୍କ ଆକାଉଣ୍ଟକୁ ଏକକାଳୀନ ୧୦ ହଜାର ଟଙ୍କା ପଠାଯାଇଛି।

ବନ୍ଧୁଗଣ,

ଏହି ପ୍ରକ୍ରିୟା ଚାଲିଥିବା ସମୟରେ ମୁଁ ବସି ଦୁଇଟି କଥା ଚିନ୍ତା କରୁଥିଲି। ପ୍ରଥମତଃ, ନୀତିଶ କୁମାରଙ୍କ ସରକାରଙ୍କ ଦ୍ୱାରା ନିଆଯାଇଥିବା ଏହି ପଦକ୍ଷେପ ବିହାରର ଭଉଣୀ ଏବଂ ଝିଅମାନଙ୍କ ପାଇଁ କେତେ ଗୁରୁତ୍ୱପୂର୍ଣ୍ଣ । ଯେତେବେଳେ ଜଣେ ଭଉଣୀ କିମ୍ବା ଝିଅ ଚାକିରି କରନ୍ତି କିମ୍ବା ସ୍ୱରୋଜଗାର କରନ୍ତି, ସେମାନଙ୍କର ସ୍ୱପ୍ନ ନୂତନ ଡେଣା ପାଏ ଏବଂ ସମାଜରେ ସେମାନଙ୍କର ସମ୍ମାନ ବୃଦ୍ଧି ପାଏ। ମୋ ମନରେ ଦ୍ୱିତୀୟ ଚିନ୍ତାଧାରା ଆସିଲା ଯେ ଯଦି ଆମେ ୧୧ ବର୍ଷ ପୂର୍ବେ ଜନଧନ ଯୋଜନାର ପ୍ରତିଶ୍ରୁତି ନେଇ ନ ଥାଆନ୍ତୁ, ଯେତେବେଳେ ଆପଣ ମୋତେ ଆପଣଙ୍କର ପ୍ରଧାନମନ୍ତ୍ରୀ ସେବକ ଭାବରେ ସେବା କରିବା ପାଇଁ ନିଯୁକ୍ତ କରିଥିଲେ। ଯଦି ଦେଶ ଜନଧନ ଯୋଜନାରେ ଭଉଣୀ ଏବଂ ଝିଅମାନଙ୍କ ପାଇଁ ୩୦ କୋଟିରୁ ଅଧିକ ଆକାଉଣ୍ଟ ଖୋଲି ନଥାନ୍ତା, ଯଦି ଏହି ବ୍ୟାଙ୍କ ଆକାଉଣ୍ଟଗୁଡ଼ିକୁ ଆପଣଙ୍କ ମୋବାଇଲ୍ ଫୋନ୍ ଏବଂ ଆଧାର ସହିତ ଲିଙ୍କ୍ କରାଯାଇ ନଥାନ୍ତା, ତେବେ କ'ଣ ଆମେ ଆଜି ଆପଣଙ୍କ ବ୍ୟାଙ୍କ ଆକାଉଣ୍ଟକୁ ସିଧାସଳଖ ଏତେ ଟଙ୍କା ପଠାଇ ପାରିଥାନ୍ତେ? ଏହା ଅସମ୍ଭବ ହୋଇଥାନ୍ତା। ଏବଂ ଜଣେ ପ୍ରଧାନମନ୍ତ୍ରୀ ପୂର୍ବରୁ କହିଥିଲେ ଯେ, ଲୁଟ୍ ବିଷୟରେ ଏହି ବର୍ତ୍ତମାନର ଆଲୋଚନା ବିଷୟରେ, ସେ ସେତେବେଳେ ପଞ୍ଚାୟତଠାରୁ ସଂସଦ ପର୍ଯ୍ୟନ୍ତ ସବୁଠି ଶାସନ କରୁଥିଲେ। ଆଉ ସେମାନେ କହୁଥିଲେ ଯେ ଯଦି ତୁମେ ଦିଲ୍ଲୀରୁ ଗୋଟିଏ ଟଙ୍କା ପଠାଅ, ତେବେ ତୁମ ପାଖରେ କେବଳ ୧୫ ପଇସା ପହଞ୍ଚିବ ଏବଂ ଅନ୍ୟ କେହି ୮୫ ପଇସା ନେଇଯିବ। ଆଜି ପଠାଯାଉଥିବା ୧୦ ହଜାର ଟଙ୍କା ତୁମ ଆକାଉଣ୍ଟରେ ଜମା କରାଯିବ, କେହି ଗୋଟିଏ ଟଙ୍କା ମଧ୍ୟ ଚୋରି କରିପାରିବେ ନାହିଁ। ଏହି ଟଙ୍କା ମଝି ରାସ୍ତାରେ ଚୋରି ହେବା ତୁମ ପ୍ରତି ଏକ ଘୋର ଅନ୍ୟାୟ।

ବନ୍ଧୁଗଣ,

ଜଣେ ଭାଇ ଖୁସି ଅନୁଭବ କରେ ଯେତେବେଳେ ତାଙ୍କ ଭଉଣୀ ସୁସ୍ଥ, ଖୁସି ଥାଏ, ଏବଂ ତାଙ୍କ ପରିବାର ଆର୍ଥିକ ଦୃଷ୍ଟିରୁ ସଶକ୍ତ ଥାଏ। ଏଥିପାଇଁ ଭାଇ ଯାହା କରିପାରେ ତାହା କରେ। ସେ ଏହା ସୁନିଶ୍ଚିତ କରିବା ପାଇଁ ଯାହା ସମ୍ଭବ ତାହା କରନ୍ତି। ଆଜି, ଆପଣଙ୍କର ଦୁଇ ଭାଇ, ନରେନ୍ଦ୍ର ଏବଂ ନୀତିଶ ଜୀ ଆପଣଙ୍କର ସେବା, ସମୃଦ୍ଧି ଏବଂ ସ୍ୱାଭିମାନ ପାଇଁ ଏକତ୍ର ଅକ୍ଲାନ୍ତ ପରିଶ୍ରମ କରୁଛନ୍ତି। ଆଜିର କାର୍ଯ୍ୟକ୍ରମ ଏହାର ଏକ ଉଦାହରଣ।

ମାଆ-ଭଉଣୀମାନେ,

ଯେତେବେଳେ ମୋତେ ଏହି ଯୋଜନା ବିଷୟରେ କୁହାଗଲା, ମୁଁ ଏହାର ଦୃଷ୍ଟିକୋଣ ଦ୍ୱାରା ଗଭୀର ଭାବରେ ପ୍ରଭାବିତ ହୋଇଗଲି। ପ୍ରତ୍ୟେକ ପରିବାରରୁ ଜଣେ ମହିଳା ନିଶ୍ଚିତ ଭାବରେ ଏହି ଯୋଜନାର ଲାଭ ପାଇବେ। ପ୍ରାରମ୍ଭିକ ୧୦ ହଜାର ଟଙ୍କା ପରେ, ଯଦି ସେହି ମହିଳା ଏହି ୧୦ ହଜାର ଟଙ୍କାକୁ ସଠିକ ଭାବରେ ବ୍ୟବହାର କରନ୍ତି, କିଛି ନିଯୁକ୍ତି ସୃଷ୍ଟି କରନ୍ତି, ନିଜ ଗୋଡ଼ରେ ଠିଆ ହେବା ପାଇଁ ଏକ ବ୍ୟବସାୟ ଆରମ୍ଭ କରନ୍ତି ଏବଂ ଯଦି ଏହା ସଫଳ ହୁଏ ତେବେ ତାଙ୍କୁ ୨ ଲକ୍ଷ ଟଙ୍କା ପର୍ଯ୍ୟନ୍ତ ଅତିରିକ୍ତ ଆର୍ଥିକ ସହାୟତା ଦିଆଯାଇପାରିବ। କଳ୍ପନା କରନ୍ତୁ ଏହା ଆପଣଙ୍କ ପାଇଁ କେତେ ଗୁରୁତ୍ୱପୂର୍ଣ୍ଣ ସଫଳତା । କର୍ପୋରେଟ୍ ଜଗତରେ ଏହାକୁ ସିଡ୍ ମନି କୁହାଯାଏ। ଏହି ଯୋଜନା ସାହାଯ୍ୟରେ ବିହାରର ମୋର ଭଉଣୀମାନେ ଗ୍ରୋସରୀ, ବାସନକୁସନ, ପ୍ରସାଧନ ସାମଗ୍ରୀ, ଖେଳଣା, ଷ୍ଟେସନାରୀ ଇତ୍ୟାଦି ବିଭିନ୍ନ ଛୋଟ ଦୋକାନ ଖୋଲି ନିଜର ବ୍ୟବସାୟ କରିପାରିବେ। ସେମାନେ ଗାଈ, କୁକୁଡ଼ା, ମାଛ ଓ ଛେଳି ପାଳନ ଆଦି କରିପାରିବେ। ସେମାନେ ଏପରି ଅନେକ ବୃତ୍ତିରେ ଆଗକୁ ବଢ଼ିପାରିବେ। ଏବଂ ଏସବୁ ପାଇଁ ତାଲିମ ଆବଶ୍ୟକ।ଏବେ ଆପଣ ଭାବୁଥିବେ ଯେ ଆପଣ ଟଙ୍କା ପାଇଛନ୍ତି, କିନ୍ତୁ ଆପଣ ପ୍ରକୃତରେ ଏହା କିପରି କରିବେ? ତେଣୁ, ମୁଁ ଆପଣଙ୍କୁ ଆଶ୍ୱାସନା ଦେଉଛି, ଆପଣଙ୍କୁ କେବଳ ଟଙ୍କା ଦିଆଯିବ ନାହିଁ, ଏଥିପାଇଁ ଆପଣଙ୍କୁ ତାଲିମ ମଧ୍ୟ ଦିଆଯିବ, ଆପଣଙ୍କୁ କାମ କରିବା ଶିଖାଯିବ। ବିହାରରେ ଜୀବିକା ସ୍ୱୟଂ ସହାୟକ ଗୋଷ୍ଠୀର ଏକ ଉତ୍କୃଷ୍ଟ ବ୍ୟବସ୍ଥା ପୂର୍ବରୁ ରହିଛି। ଏଠାରେ ପ୍ରାୟ ୧୧ ଲକ୍ଷ ସ୍ୱୟଂ ସହାୟକ ଗୋଷ୍ଠୀ କାମ କରୁଛନ୍ତି ଅର୍ଥାତ୍ ଏକ ସୁପ୍ରତିଷ୍ଠିତ ବ୍ୟବସ୍ଥା ପୂର୍ବରୁ କାର୍ଯ୍ୟକାରୀ ହୋଇସାରିଛି। ଏହି ମାସର ଆରମ୍ଭରେ ମୋତେ ଜୀବିକା ନିଧି କ୍ରେଡିଟ୍ କୋଅପରେଟିଭ୍ ୟୁନିଅନ୍ ଆରମ୍ଭ କରିବାର ସୁଯୋଗ ମିଳିଥିଲା। ଏବେ ଏହି ବ୍ୟବସ୍ଥାର ଶକ୍ତି ମୁଖ୍ୟମନ୍ତ୍ରୀ ମହିଳା ରୋଜଗାର ଯୋଜନା ସହିତ ଯୋଡାଯିବ। ଅର୍ଥାତ୍ ଏହାର ଶୁଭାରମ୍ଭ ସହିତ ଏହି ଯୋଜନା ବିହାରର ପ୍ରତ୍ୟେକ କୋଣରେ ଏବଂ ପ୍ରତ୍ୟେକ ପରିବାରରେ ପ୍ରଭାବଶାଳୀ ହେବାକୁ ଯାଉଛି।

ବନ୍ଧୁଗଣ,

ମୁଖ୍ୟମନ୍ତ୍ରୀ ମହିଳା ନିଯୁକ୍ତି ଯୋଜନା କେନ୍ଦ୍ର ସରକାରଙ୍କ ଲଖପତି ଦିଦି ଅଭିଯାନକୁ ମଧ୍ୟ ନୂତନ ଶକ୍ତି ଦେଇଛି। କେନ୍ଦ୍ର ସରକାର ଦେଶରେ ୩ କୋଟି ଲଖପତି ଦିଦି ସୃଷ୍ଟି କରିବାର ଲକ୍ଷ୍ୟ ରଖିଛନ୍ତି। ଏପର୍ଯ୍ୟନ୍ତ ୨ କୋଟିରୁ ଅଧିକ ଭଉଣୀ ଲଖପତି ଦିଦି ହୋଇସାରିଛନ୍ତି। ବର୍ତମାନ ମୁଁ ଗ୍ରାମାଞ୍ଚଳର ମହିଳାଙ୍କ କଥା କହୁଛି। ସେମାନଙ୍କ କଠିନ ପରିଶ୍ରମ ଗାଁ, ସମାଜ ଏବଂ ପରିବାରର ସ୍ଥିତିକୁ ପରିବର୍ତ୍ତନ କରିଛି। ବିହାରର ଲକ୍ଷ ଲକ୍ଷ ମହିଳା ମଧ୍ୟ ଲଖପତି ଦିଦି ହୋଇଛନ୍ତି।

ବିହାରର ଡବଲ ଇଞ୍ଜିନ ସରକାର ଏହି ଯୋଜନାକୁ ଯେଉଁଭଳି ଭାବରେ ଆଗକୁ ବଢ଼ାଉଛି, ମୁଁ ଦୃଢ଼ ଭାବରେ ବିଶ୍ୱାସ କରେ ଯେ ସେହି ଦିନ ଦୂର ନୁହେଁ ଯେତେବେଳେ ଦେଶରେ ସର୍ବାଧିକ ସଂଖ୍ୟକ ଲଖପତି ଦିଦି ସମଗ୍ର ଦେଶରେ ଯେକୌଣସି ସ୍ଥାନରେ ମିଳିପାରିବେ। ଆଜି ମୁଁ ଅନୁଭବ କରୁଛି ଯେ, ସବୁଠାରୁ ଅଧିକ ଲଖପତି ଦିଦି ମୋ ନିଜ ବିହାରରେ ହିଁ ଥିବେ।

ମାଆ-ଭଉଣୀମାନେ,

କେନ୍ଦ୍ର ସରକାରଙ୍କ ମୁଦ୍ରା ଯୋଜନା, ଡ୍ରୋନ୍ ଦିଦି ଅଭିଯାନ, ବୀମା ସଖୀ ଅଭିଯାନ, ଏବଂ ବ୍ୟାଙ୍କ ଦିଦି ଅଭିଯାନ ମଧ୍ୟ ଆପଣଙ୍କ ପାଇଁ ନିଯୁକ୍ତି ଏବଂ ସ୍ୱରୋଜଗାର ସୁଯୋଗ ବୃଦ୍ଧି କରୁଛନ୍ତି। ଆମର ଲକ୍ଷ୍ୟ କେବଳ ଗୋଟିଏ ଏବଂ ଆଜି ଆମେ କେବଳ ଗୋଟିଏ ଲକ୍ଷ୍ୟ ନେଇ ଆଗକୁ ବଢ଼ୁଛୁ – ଆପଣଙ୍କ ସ୍ୱପ୍ନ ପୂରଣ କରିବା, ଆପଣଙ୍କ ପରିବାରର ସ୍ୱପ୍ନ ପୂରଣ କରିବା ପାଇଁ ସର୍ବାଧିକ ସୁଯୋଗ ପ୍ରଦାନ କରିବା , ଆପଣଙ୍କ ପିଲାମାନଙ୍କ ପାଇଁ ସର୍ବାଧିକ ସୁଯୋଗ ପାଇବା ଉଚିତ।

ବନ୍ଧୁଗଣ,

ଆଜି କେନ୍ଦ୍ର ଏବଂ ରାଜ୍ୟ ସରକାରଙ୍କ ପ୍ରୟାସ ଯୋଗୁଁ ଆମର ଭଉଣୀ ଏବଂ ଝିଅମାନଙ୍କ ପାଇଁ ନୂତନ କ୍ଷେତ୍ର ଖୋଲିବାରେ ଲାଗିଛି। ଆଜି ଆମର ଝିଅମାନେ ବହୁ ସଂଖ୍ୟାରେ ସେନା ଏବଂ ପୋଲିସରେ ଯୋଗ ଦେଉଛନ୍ତି। ଯାହା ପ୍ରତ୍ୟେକ ମହିଳାଙ୍କ ପାଇଁ ଗର୍ବର ବିଷୟ, ଆଜି ଆମର ଝିଅମାନେ ଯୁଦ୍ଧ ବିମାନ ଉଡ଼ାଉଛନ୍ତି।

କିନ୍ତୁ ବନ୍ଧୁଗଣ,

ଆମକୁ ସେହି ଦିନଗୁଡ଼ିକୁ ଭୁଲିବା ଉଚିତ୍ ନୁହେଁ ଯେତେବେଳେ ବିହାରରେ RJD ସରକାର ଥିଲା, ସେଠାରେ ଲଣ୍ଠନର ଶାସନ ଥିଲା। ସେହି ସମୟରେ ବିହାରର ମା' ଏବଂ ଭଉଣୀମାନେ ଏଠାକାର ମହିଳାମାନେ ଅରାଜକତା ଏବଂ ଦୁର୍ନୀତିର ସବୁଠାରୁ ଅଧିକ ଶିକାର ହୋଇଥିଲେ। ସେହି ଦିନ ଯେତେବେଳେ ବିହାରର ପ୍ରମୁଖ ରାସ୍ତାଗୁଡ଼ିକ ନଷ୍ଟ ହୋଇ ଯାଇଥିଲା, କୌଣସି ପୋଲ ନଥିଲା, ତେବେ କିଏ ସବୁଠାରୁ ଅଧିକ କଷ୍ଟ ଭୋଗୁଥିଲା। ଯେତେବେଳେ ଏପରି ଅସୁବିଧା ଆସେ, ଆମେ ସମସ୍ତେ ଜାଣୁ ଯେ, ଏହି ସମସ୍ତ ଅସୁବିଧାର ପ୍ରଥମେ ଶିକାର ହେଉଥିବା ବ୍ୟକ୍ତି ହେଉଛନ୍ତି ଆମର ମା' ଏବଂ ଭଉଣୀମାନେ। ଆପଣ ଜାଣନ୍ତି ଯେ ବନ୍ୟା ସମୟରେ ଏହି ପରିସ୍ଥିତି କିପରି ଖରାପ ହୋଇଥିଲା। ଗର୍ଭବତୀ ମହିଳାମାନେ ସମୟ ମଧ୍ୟରେ ଡାକ୍ତରଖାନା ପହଞ୍ଚି ପାରିନଥିଲେ। ଗୁରୁତର ଅବସ୍ଥା ହେଲେ ସେମାନେ ଉପଯୁକ୍ତ ଚିକିତ୍ସା ପାଇପାରିଲେ ନାହିଁ। ଏହି କଷ୍ଟକର ପରିସ୍ଥିତିରୁ ଆପଣମାନଙ୍କୁ ଦୂର କରିବାରେ ସାହାଯ୍ୟ କରିବା ପାଇଁ ଆମ ସରକାର ଦିନରାତି ପରିଶ୍ରମ କରିଛି। ଆମେ ଚାହୁଁଛୁ ଯେ ଆପଣମାନେ ଏହି ସମସ୍ୟାରୁ ବାହାରି ଆସନ୍ତୁ ଏବଂ ଅନେକ ପରିମାଣରେ ଆମେ ଆଜି ଏହା କରିପାରିଛୁ। ଡବଲ-ଇଞ୍ଜିନ ସରକାର କ୍ଷମତାକୁ ଆସିବା ପରେ, ଆପଣମାନେ ବିହାରରେ ରାସ୍ତା ନିର୍ମାଣ ହେବା ଆରମ୍ଭ ହୋଇଥିବା ଦେଖିଛନ୍ତି। ଆଜି ମଧ୍ୟ ଆମେ ବିହାରରେ ସଂଯୋଗୀକରଣକୁ ଉନ୍ନତ କରିବାରେ ଲାଗିଛୁ, ଯାହା ଫଳରେ ବିହାରର ମହିଳାମାନେ ବହୁତ ସୁବିଧା ପାଇବା ଆରମ୍ଭ କରିଛନ୍ତି।

ମାଆ-ଭଉଣୀମାନେ,

ଆଜିକାଲି ବିହାରରେ ଏକ ପ୍ରଦର୍ଶନୀ ଆୟୋଜନ କରାଯାଉଛି ଏବଂ ମୁଁ ନିଶ୍ଚିତ ଭାବରେ ସେହି ୩୦ ବର୍ଷରୁ କମ୍ ବୟସର ମାଆ-ଭଉଣୀମାନଙ୍କୁ କହିବି ଯେ ସେମାନେ ଏହି ପ୍ରଦର୍ଶନୀକୁ ପରିଦର୍ଶନ କରିବା ଉଚିତ। ମୋତେ କୁହାଯାଇଛି ଏହି ପ୍ରଦର୍ଶନୀରେ ପୁରୁଣା ଖବରକାଗଜର ମୁଖ୍ୟ ଖବର ପ୍ରଦର୍ଶିତ ହେଉଛି। ଯେତେବେଳେ ଆମେ ସେଗୁଡ଼ିକୁ ପଢ଼ିବୁ, ୩୦ ବର୍ଷରୁ କମ୍ ବୟସର ଲୋକମାନେ ହୁଏତ ଅନୁଭବ ମଧ୍ୟ କରିପାରିବେନାହିଁ ନାହିଁ ଯେ ପରିସ୍ଥିତି କେତେ ଖରାପ ଥିଲା। ଏବଂ ଯେତେବେଳେ ବୟସ୍କ ଲୋକମାନେ ଏହା ପଢ଼ିବେ, ସେମାନେ ମଧ୍ୟ ଏହା ଅନୁଭବ କରିବେ। ମନେ ପକାଇବେ ଯେ ଆରଜେଡି ଶାସନ ସମୟରେ ବିହାରରେ କି ପ୍ରକାରର ଭୟ ଥିଲା, କୌଣସି ଘର ସୁରକ୍ଷିତ ନଥିଲା। ନକ୍ସଲବାଦୀ ହିଂସାର ଆତଙ୍କ ବ୍ୟାପକ ଥିଲା। ଏବଂ ମହିଳାମାନଙ୍କୁ ସବୁଠାରୁ ଅଧିକ ଯନ୍ତ୍ରଣା ସହିବାକୁ ପଡୁଥିଲା। ଗରିବଙ୍କଠାରୁ ଡାକ୍ତର ଏବଂ ଆଇଏଏସ ପରିବାର ପର୍ଯ୍ୟନ୍ତ, ଆରଜେଡି ନେତାଙ୍କ ଅତ୍ୟାଚାରରୁ କେହି ବାଦ ପଡ଼ି ନଥିଲେ।

ବନ୍ଧୁଗଣ,

ଆଜି, ଯେତେବେଳେ ନୀତିଶ ଜୀଙ୍କ ନେତୃତ୍ୱରେ ଆଇନର ଶାସନ ଫେରି ଆସିଛି ମୋର ମା, ଭଉଣୀ, ଝିଅ ଏବଂ ମହିଳାମାନେ ସବୁଠାରୁ ବଡ଼ ଆଶ୍ୱସ୍ତି ଅନୁଭବ କରିଛନ୍ତି। ଆଜି ବିହାରର ଝିଅମାନେ ବିନା ଭୟରେ ହୋଇ ଘରୁ ବାହାରକୁ ଯାଉଛନ୍ତି। ମୁଁ କେବଳ ଚାରି ଭଉଣୀଙ୍କ କଥା ଶୁଣୁଥିଲି। ଭଉଣୀ ରଞ୍ଜିତା, ଭଉଣୀ ରୀତା, ନୁରଜାହାନ ବାନୁ ଏବଂ ଆମର ପୁତୁଲ ଦେବୀ ଯେଉଁଭଳି ଆତ୍ମବିଶ୍ୱାସର ସହିତ କଥା ହୋଇଥିଲେ। ନୀତିଶ କୁମାରଙ୍କ ସରକାର ପୂର୍ବରୁ ଏହା କଳ୍ପନା କରାଯାଇ ନ ଥିଲା। ବିଳମ୍ବିତ ରାତିରେ ମଧ୍ୟ ସେମାନଙ୍କ ପାଇଁ କୌଣସି ସ୍ଥାନରେ କାମ କରିବା ସମ୍ଭବ ନଥିଲା। ମୁଁ ଯେତେବେଳେ ବି ବିହାର ଆସେ ଏତେ ସଂଖ୍ୟାରେ ମହିଳା ପୋଲିସ କର୍ମଚାରୀ ନିୟୋଜିତ ହୋଇଥିବା ଦେଖି ମୁଁ ଗଭୀର ସନ୍ତୋଷ ଅନୁଭବ କରେ। ତେଣୁ, ଆଜି ଆମ ସମସ୍ତଙ୍କୁ ଏକତ୍ର ପ୍ରତିଜ୍ଞା ନେବାକୁ ପଡିବ ଯେ ଆମେ ବିହାରକୁ ଆଉ କେବେ ସେହି ଅନ୍ଧାରରେ ଯିବାକୁ ଦେବୁ ନାହିଁ, ମାଆ ଏବଂ ଭଉଣୀମାନେ, ଦୟାକରି ମୋର ଏହି କଥାଗୁଡ଼ିକ ଲେଖି ରଖନ୍ତୁ, ଏହା ହିଁ ଆମର ପିଲାମାନଙ୍କୁ ବିନାଶରୁ ରକ୍ଷା କରିବାର ଏକମାତ୍ର ଉପାୟ।

ମାଆ-ଭଉଣୀମାନେ,

ଯେତେବେଳେ ଏକ ସରକାର ମହିଳାମାନଙ୍କୁ କେନ୍ଦ୍ରରେ ରଖି ନୀତି ପ୍ରସ୍ତୁତ କରେ, ସେତେବେଳେ ସମାଜର ପ୍ରତ୍ୟେକ ବର୍ଗ, ସମଗ୍ର ପରିବାରକୁ ଏହାର ଲାଭ ମିଳିଥାଏ । ଉଦାହରଣ ସ୍ୱରୂପ ଆଜି ସମଗ୍ର ବିଶ୍ୱ ଦେଖୁଛି ଯେ ଉଜ୍ଜ୍ୱଳା ଯୋଜନା ଯୋଗୁଁ କେତେ ବଡ଼ ପରିବର୍ତ୍ତନ ଆସିଛି। ଗୋଟିଏ ସମୟ ଥିଲା ଯେତେବେଳେ ଗାଁରେ ଗ୍ୟାସ ସଂଯୋଗ ପାଇବା ଏକ ବଡ଼ ସ୍ୱପ୍ନ ଥିଲା, ସହରଗୁଡ଼ିକରେ ମଧ୍ୟ ସମାନ ପରିସ୍ଥିତି ଥିଲା। ମୋର ଗରିବ ମା', ଭଉଣୀ ଏବଂ ଝିଅମାନେ ରୋଷେଇ ଘରେ କାଶି ଜୀବନ ବିତାଉଥିଲେ। ଫୁସଫୁସ ରୋଗ ସାଧାରଣ ଥିଲା, ଏପରିକି ଦୃଷ୍ଟିଶକ୍ତି ହରାଇବାକୁ ମଧ୍ୟ ପଡ଼ିଥିଲା। କିଛି ବିଦ୍ୱାନ କୁହନ୍ତି ଯେ ଯେଉଁ ମା' ଏବଂ ଭଉଣୀମାନେ ଦୀର୍ଘ ସମୟ ଧରି ଚୁଲିର ଧୂଆଁରେ ରୁହନ୍ତି, ସେମାନେ ଦିନକୁ ୪୦୦ ସିଗାରେଟ୍ ସମାନ ଧୂଆଁ ନିଶ୍ୱାସ ନିଅନ୍ତି। ଏବେ କୁହନ୍ତୁ ଯଦି କର୍କଟ ରୋଗ ନ ହୁଏ ତେବେ କ'ଣ ହେବ?

ଏସବୁକୁ ରକ୍ଷା କରିବା ପାଇଁ, ଆମେ ଉଜ୍ଜ୍ୱଳା ଯୋଜନା ଆଣିଲୁ ଏବଂ ପ୍ରତ୍ୟେକ ଘରକୁ ଗ୍ୟାସ ସିଲିଣ୍ଡର ପହଞ୍ଚାଇଲୁ। ବିହାରରେ, ଆମର ଭଉଣୀମାନଙ୍କ ଜୀବନ କାଠ ବୋହିବାରେ ବିତିଯାଉଥିଲା। ଏବଂ ସମସ୍ୟା ମଧ୍ୟ କମ୍ ନଥିଲା, ଯଦି ବର୍ଷା ହୁଏ ତେବେ ଓଦା କାଠ ଜଳିବ ନାହିଁ, ଯଦି ବନ୍ୟା ହୁଏ ତେବେ କାଠ ବୁଡ଼ିଯିବ। କେତେଥର ଘରର ପିଲାମାନେ ଭୋକିଲା ଶୋଇପଡ଼ନ୍ତି, କିମ୍ବା ଭୁଜା ଖାଇ ରାତି ବିତାଇ ଦିଅନ୍ତି।

ବନ୍ଧୁଗଣ,

ଏହି ଯନ୍ତ୍ରଣା କୌଣସି ପୁସ୍ତକରେ ଲେଖାଯାଇ ନାହିଁ, ଏହି ଯନ୍ତ୍ରଣା ଆମର ବିହାରର ଭଉଣୀମାନେ ଅନୁଭବ କରିଛନ୍ତି। ମୋର ପ୍ରତ୍ୟେକ ଭଉଣୀ ଏହି ଅଗ୍ନିପରୀକ୍ଷା ଦେଇ ଗତି କରିଛନ୍ତି। କିନ୍ତୁ ଯେତେବେଳେ NDA ସରକାର କେନ୍ଦ୍ରରେ ଭଉଣୀମାନଙ୍କୁ ନେଇ ଚିନ୍ତା କରିବା ଏବଂ ଯୋଜନା ପ୍ରସ୍ତୁତ କରିବା ଆରମ୍ଭ କଲେ ଚିତ୍ର ବଦଳିବା ଆରମ୍ଭ ହେଲା। ଏକକାଳୀନ କୋଟି କୋଟି ଘରେ ଗ୍ୟାସ ସଂଯୋଗ ପହଞ୍ଚିଲା। ଆଜି କୋଟି କୋଟି ଭଉଣୀ ଶାନ୍ତିରେ ଗ୍ୟାସ ଚୁଲାରେ ଖାଦ୍ୟ ରାନ୍ଧୁଛନ୍ତି। ସେମାନଙ୍କୁ ଧୂଆଁରୁ ମୁକ୍ତି, ଫୁସଫୁସ ଏବଂ ଆଖି ରୋଗରୁ ମୁକ୍ତି ମିଳିଛି। ଏବେ ଘରେ ପିଲାମାନଙ୍କୁ ପ୍ରତିଦିନ ଗରମ ଖାଦ୍ୟ ଖାଇବାକୁ ମିଳୁଛି । ଉଜ୍ଜ୍ୱଳା ଗ୍ୟାସ ସଂଯୋଗ କେବଳ ବିହାରର ରୋଷେଇ ଘର ନୁହେଁ ବରଂ ମହିଳାଙ୍କ ଜୀବନକୁ ମଧ୍ୟ ଉଜ୍ଜ୍ୱଳ କରିଛି।

ମାଆ-ଭଉଣୀମାନେ,

ଆପଣଙ୍କ ସମସ୍ତ ସମସ୍ୟାର ସମାଧାନ କରିବା ଆମର ଦାୟିତ୍ୱ। କରୋନାଭାଇରସ୍ ମହାମାରୀ ସମୟରେ ମାଗଣା ଶସ୍ୟ ଯୋଜନା ଆରମ୍ଭ କରିଥିଲୁ। କାରଣ ମୋର ଗୋଟିଏ ଲକ୍ଷ୍ୟ ଥିଲା, କୌଣସି ପିଲା ରାତିରେ ଭୋକିଲା ନ ଶୋଇବ। କିନ୍ତୁ ଏହି ଯୋଜନା ଆପଣଙ୍କୁ ଏତେ ସାହାଯ୍ୟ କରିଛି ଯେ ଆମେ ଏହାକୁ ଜାରି ରଖିବାକୁ ନିଷ୍ପତ୍ତି ନେଇଛୁ। ପ୍ରଧାନମନ୍ତ୍ରୀ ଗରିବ କଲ୍ୟାଣ ଯୋଜନା ଆଜି ମଧ୍ୟ କାର୍ଯ୍ୟକ୍ଷମ ଅଛି। ଏହି ଯୋଜନା ଯୋଗୁଁ ବିହାରର ସାଢ଼େ ଆଠ କୋଟିରୁ ଅଧିକ ଅସହାୟ ଲୋକ ମାଗଣା ରାସନ୍ ପାଉଛନ୍ତି। ଏହି ଯୋଜନା ଆପଣଙ୍କର ଚିନ୍ତାକୁ ବହୁତ ଦୂର କରିଛି। ମୁଁ ଆଉ ଏକ ଉଦାହରଣ ଦେଉଛି। ବିହାରର ଏକ ବଡ଼ ଅଞ୍ଚଳରେ ଉସୁନା ଚାଉଳ ପସନ୍ଦ କରାଯାଏ। ତଥାପି ପୂର୍ବରୁ ଆମର ମା' ଏବଂ ଭଉଣୀମାନଙ୍କୁ ସରକାରୀ ରାସନ୍ ଭାବରେ ଅରୁଆ ଚାଉଳ ଦିଆଯାଉଥିଲା। ବାଧ୍ୟବାଧକତା ଯୋଗୁଁ ମା' ଏବଂ ଭଉଣୀମାନେ ବଜାରରେ ସମାନ ଅରୁଆ ଚାଉଳ ଦେଉଥିଲେ ଏବଂ ବଦଳରେ ଉସୁନା ଚାଉଳ ନେଉଥିଲେ। କିନ୍ତୁ ସମସ୍ୟାଟି ଥିଲା ଯେ ୨୦ କିଲୋଗ୍ରାମ ଅରୁଆ ଚାଉଳ ବଦଳରେ ସେମାନେ କେବଳ ୧୦ କିଲୋଗ୍ରାମ ଉସୁନା ଚାଉଳ ପାଉଥିଲେ। ଆମେ ଏହି ପ୍ରସଙ୍ଗକୁ ମଧ୍ୟ ଗମ୍ଭୀରତାର ସହିତ ବିଚାର କରିଥିଲୁ। ଏବେ ସରକାର ରାସନରେ ଉସୁନା ଚାଉଳ ମଧ୍ୟ ଦେବା ଆରମ୍ଭ କରିଛନ୍ତି।

ମୋର ମାଆ ଏବଂ ଭଉଣୀମାନେ,

ଆମ ଦେଶରେ ମହିଳାମାନଙ୍କ ନାମରେ ସମ୍ପତ୍ତି ରଖିବାର କୌଣସି ପରମ୍ପରା ନାହିଁ। ପୁରୁଷଙ୍କ ନାମରେ ଘର, ପୁରୁଷଙ୍କ ନାମରେ ଦୋକାନ, ପୁରୁଷଙ୍କ ନାମରେ ଜମି, ପୁରୁଷଙ୍କ ନାମରେ ଗାଡ଼ି, ପୁରୁଷଙ୍କ ନାମରେ ସ୍କୁଟର - ସବୁକିଛି ପୁରୁଷଙ୍କ ନାମରେ ଥିଲା। କିନ୍ତୁ ଯେତେବେଳେ ମୁଁ ପ୍ରଧାନମନ୍ତ୍ରୀ ଆବାସ ଯୋଜନା ଆରମ୍ଭ କଲି ମୁଁ ଏକ ନିୟମ କରିଦେଲି ଯେ ମୋର ମା, ଭଉଣୀ ଏବଂ ଝିଅମାନେ ମଧ୍ୟ ପ୍ରଧାନମନ୍ତ୍ରୀ ଆବାସ ଯୋଜନା ଘରର ମାଲିକ ହେବେ। ଆଜି ବିହାରରେ ୫୦ ଲକ୍ଷରୁ ଅଧିକ ପ୍ରଧାନମନ୍ତ୍ରୀ ଆବାସ ନିର୍ମାଣ ହୋଇଛି। ସେମାନଙ୍କ ମଧ୍ୟରୁ ଅଧିକାଂଶ ମହିଳାଙ୍କ ମାଲିକାନା। ଆପଣମାନେ ଆପଣଙ୍କ ଘରର ପ୍ରକୃତ ମାଲିକ।

ବନ୍ଧୁଗଣ,

ଆମେ ସମସ୍ତେ ଜାଣୁ ଯେ ଯେତେବେଳେ ଜଣେ ଭଉଣୀର ସ୍ୱାସ୍ଥ୍ୟ ଖରାପ ହୁଏ, ଏହା ସମଗ୍ର ପରିବାରକୁ ପ୍ରଭାବିତ କରେ। ଗୋଟିଏ ସମୟ ଥିଲା ଯେତେବେଳେ ମହିଳାମାନେ ପରିବାରକୁ ଏହା ପ୍ରକାଶ ନକରି ରୋଗ ସହ୍ୟ କରୁଥିଲେ। ସେମାନଙ୍କର ପରିସ୍ଥିତି ଯେତେ କଷ୍ଟକର ହେଉ, ଜ୍ୱର ହେଉ, ପେଟ ଯନ୍ତ୍ରଣା ହେଉ, ସେମାନେ କାମ ଜାରି ରଖିଥିଲେ। କାହିଁକି? କାରଣ ସେମାନେ ଚାହୁଁ ନଥିଲେ ଯେ ପରିବାରର ଟଙ୍କା ସେମାନଙ୍କ ଚିକିତ୍ସାରେ ଖର୍ଚ୍ଚ ହେଉ। ଏହା ସେମାନଙ୍କ ପିଲା ଏବଂ ପରିବାରକୁ ବୋଝ କରିବ ନାହିଁ, ତେଣୁ ମା ଏବଂ ଭଉଣୀମାନେ ସହ୍ୟ କରିଥିଲେ। ଆପଣଙ୍କ ପୁଅ ଆୟୁଷ୍ମାନ ଭାରତ ଯୋଜନା ମାଧ୍ୟମରେ ଆପଣଙ୍କ ଏହି ଚିନ୍ତାର ସମାଧାନ କରିଛି। ଆଜି ବିହାରର ଲକ୍ଷ ଲକ୍ଷ ମହିଳା ୫ ଲକ୍ଷ ଟଙ୍କା ପର୍ଯ୍ୟନ୍ତ ମାଗଣା ଚିକିତ୍ସା ପାଉଛନ୍ତି। ଗର୍ଭବତୀ ମହିଳାଙ୍କ ପାଇଁ ଚାଲିଥିବା ମାତୃ ବନ୍ଦନା ଯୋଜନାରେ ଟଙ୍କା ମଧ୍ୟ ସିଧାସଳଖ ସେମାନଙ୍କ ଆକାଉଣ୍ଟକୁ ଯାଉଛି। ଯାହାଦ୍ୱାରା ୯ ମାସର ସେହି ସମୟ ମଧ୍ୟରେ ସେମାନେ ପର୍ଯ୍ୟାପ୍ତ ପୁଷ୍ଟିକର ଖାଦ୍ୟ ପାଆନ୍ତି, ସେମାନଙ୍କ ଗର୍ଭରେ ବଢ଼ୁଥିବା ଶିଶୁର ସୁସ୍ଥତା ସୁନିଶ୍ଚିତ କରନ୍ତି ଏବଂ ପ୍ରସବ ସମୟରେ କୌଣସି ସମସ୍ୟା ନହେବ, ମା କିମ୍ବା ପିଲାର ଜୀବନ ରକ୍ଷା ହେବ।

ମୋର ମାଆ ଏବଂ ଭଉଣୀମାନେ,

ଆପଣଙ୍କ ସ୍ୱାସ୍ଥ୍ୟ ଆମର ପ୍ରାଥମିକତା। ଆମେ ସେପ୍ଟେମ୍ବର ୧୭ ତାରିଖ, ବିଶ୍ୱକର୍ମା ଜୟନ୍ତୀରୁ ମହିଳାମାନଙ୍କ ସ୍ୱାସ୍ଥ୍ୟ ପରୀକ୍ଷା ପାଇଁ ଏକ ପ୍ରମୁଖ ଅଭିଯାନ ଆରମ୍ଭ କରିଛୁ। ଏହାକୁ "ସ୍ୱସ୍ଥ ନାରୀ, ସଶକ୍ତ ପରିବାର ଅଭିଯାନ" କୁହାଯାଏ। ଏହି ଅଭିଯାନର ୪.୨୫ ଲକ୍ଷରୁ ଅଧିକ ସ୍ୱାସ୍ଥ୍ୟ ଶିବିର ଗାଁ ଏବଂ ସହରରେ ଆୟୋଜନ କରାଯାଉଛି। ରକ୍ତହୀନତା, ରକ୍ତଚାପ, ମଧୁମେହ ଏବଂ କର୍କଟ ଭଳି ଗମ୍ଭୀର ରୋଗର ସ୍କ୍ରିନିଂ କରାଯାଉଛି। ବର୍ତ୍ତମାନ ପର୍ଯ୍ୟନ୍ତ ଏହି ଅଭିଯାନରେ ଯୋଗ ଦେଇ ୧ କୋଟିରୁ ଅଧିକ ମହିଳା ମାଗଣାରେ ନିଜର ପରୀକ୍ଷା କରାଇଛନ୍ତି। ଆଜି ମୁଁ ବିହାରର ସମସ୍ତ ମହିଳାଙ୍କୁ ଅନୁରୋଧ କରିବି ଯେ ସେମାନେ ନିଶ୍ଚିତ ଭାବରେ ଏହି ଶିବିରଗୁଡ଼ିକୁ ଯାଇ ନିଜର ପରୀକ୍ଷା କରନ୍ତୁ। କିଛି ଲୋକ ଭୁଲ ଧାରଣାରେ ଅଛନ୍ତି ଯେ ପରୀକ୍ଷା କରିବା ଉଚିତ୍ ନୁହେଁ। ରୋଗ ଚିହ୍ନଟ କରିବା କ୍ଷତିକାରକ ନୁହେଁ, ଲାଭଦାୟକ। ତେଣୁ, ପରୀକ୍ଷା କରାଯିବା ଉଚିତ।

ବନ୍ଧୁଗଣ,

ପର୍ବପର୍ବାଣୀ ଆରମ୍ଭ ହୋଇଛି, ନବରାତ୍ରି ଚାଲିଛି। ଦୀପାବଳି ଆସୁଛି, ଏବଂ ଛଟ ପୂଜା ମଧ୍ୟ ବହୁତ ଦୂରରେ ନାହିଁ। ଆମର ଭଉଣୀମାନେ କିପରି ସେମାନଙ୍କର ଘର ଖର୍ଚ୍ଚ ପରିଚାଳନା କରିବେ ଏବଂ ଟଙ୍କା କିପରି ସଞ୍ଚୟ କରିବେ ସେ ବିଷୟରେ ନିରନ୍ତର ଚିନ୍ତା କରୁଛନ୍ତି। ଏହି ଚିନ୍ତାକୁ ଦୂର କରିବା ପାଇଁ, NDA ସରକାର ଏକ ବଡ ପଦକ୍ଷେପ ନେଇଛନ୍ତି। ନବରାତ୍ରିର ପ୍ରଥମ ଦିନ ଅର୍ଥାତ୍ ସେପ୍ଟେମ୍ବର ୨୨ରୁ ସାରା ଦେଶରେ GST ହାର ହ୍ରାସ କରାଯାଇଛି। ଏବେ ଟୁଥପେଷ୍ଟ, ସାବୁନ, ସାମ୍ପୁ, ଘିଅ ଏବଂ ଖାଦ୍ୟ ସାମଗ୍ରୀ ପରି ସମସ୍ତ ନିତ୍ୟ ବ୍ୟବହାର୍ଯ୍ୟ ସାମଗ୍ରୀ ପୂର୍ବ ଅପେକ୍ଷା ଶସ୍ତାରେ ଉପଲବ୍ଧ ହେବ। ପିଲାମାନଙ୍କ ପାଠପଢ଼ା ପାଇଁ ଷ୍ଟେସନାରୀ, ପର୍ବପର୍ବାଣୀ ସମୟରେ ପିନ୍ଧିବା ପାଇଁ ପୋଷାକ ଏବଂ ଜୋତାର ମୂଲ୍ୟ ମଧ୍ୟ ହ୍ରାସ ପାଇଛି। ଏହା ପରିବାର ଏବଂ ରୋଷେଇ ଘର ବଜେଟ୍ ପରିଚାଳନା କରୁଥିବା ମହିଳାମାନଙ୍କ ପାଇଁ ଏକ ବଡ଼ ଆଶ୍ୱସ୍ତି। ଡବଲ ଇଞ୍ଜିନ୍ ସରକାର ଭଉଣୀମାନଙ୍କ ବୋଝ ହାଲୁକା କରିବା ଏବଂ ସେମାନଙ୍କ ମୁହଁରେ ପର୍ବର ଆନନ୍ଦ ଆଣିବାକୁ ନିଜର ଦାୟିତ୍ୱ ବୋଲି ଭାବୁଛନ୍ତି।

ବନ୍ଧୁଗଣ,

ଯେତେବେଳେ ବି ବିହାରର ମହିଳାମାନଙ୍କୁ ସୁଯୋଗ ମିଳିଛି, ସେମାନେ ନିଜର ସାହସ ଏବଂ ଦୃଢ଼ ସଂକଳ୍ପ ସହିତ ଗୁରୁତ୍ୱପୂର୍ଣ୍ଣ ପରିବର୍ତ୍ତନ ଆଣିଛନ୍ତି। ଆପଣମାନେ ପ୍ରମାଣ କରିଛନ୍ତି ଯେ ଯେତେବେଳେ ମହିଳାମାନେ ପ୍ରଗତି କରନ୍ତି, ସମଗ୍ର ସମାଜ ପ୍ରଗତି କରେ। ପୁଣିଥରେ ମୁଖ୍ୟମନ୍ତ୍ରୀ ମହିଳା ରୋଜଗାର ଯୋଜନା ପାଇଁ ମୁଁ ବିହାରର ଲୋକମାନଙ୍କୁ ଅଭିନନ୍ଦନ ଜଣାଉଛି। ଆପଣମାନଙ୍କୁ ସମସ୍ତଙ୍କୁ ମୋର ଅନେକ ଅନେକ ଶୁଭକାମନା। ଆପଣଙ୍କୁ ବହୁତ ବହୁତ ଧନ୍ୟବାଦ।

SWS