প্রধান মন্ত্রী শ্রী নরেন্দ্র মোদীনা ঙসি রাজস্থানগী বীকানেরদা লুপা করোর ২৬,০০০গী চাউখৎ-থৌরাংগী প্রোজেক্ত কয়ামরুম শঙ্গাখ্রে, উরেপ-উয়ুং তমখ্রে অমসুং লৈবাক মীয়ামদা কত্থোকখ্রে। থৌরম অদুদা ৱা ঙাংলদুনা মহাক্না থৌরম অদুদা শরুক য়াখিবা মীওইশিং অদু তরাম্না ওকখি। রাজ্য অমসুং য়ুনিয়ন তেরিতোরী ১৮গী মীওইশিংনা ওনলাইনদা শরুক য়াখিবগীদমক মহাক্না থাগৎপা ফোংদোকখি। মহাক্না গবর্নর, চীফ মিনিস্তর, লেফতনেন্ত গবর্নর অমসুং অতোপ্পা মীয়ামগী মীহুৎ কয়া শরুক য়াখিবা অদু পনখি। প্রধান মন্ত্রীনা লৈবাক শিনবা থুংবদগী কন্নেক্ত তৌরিবা ইকাই খুম্নরবা মীওইশিং অমসুং নাগরিক পুম্নমক্তা মহাক্কী য়াইফ পাউজেল পীখি।

শ্রী মোদীনা হায়খি মদুদি মহাক্না কর্নী মাতাগী য়াইফ-মঙ্গোল লৌরবা মতুংদা থৌরম অদুদা লাকখি। য়াইফ-পাউজেলশিং অসিনা চাউখৎলবা ভারত অমা শেমগৎনবা লৈবাক অসিগী ৱারেপ অদু হেন্না মপাঙ্গল কনখৎহল্লি হায়না মহাক্না ফোংদোকখি। লুপা করোর ২৬,০০০গী দিবেলপমেন্ত প্রোজেক্তশিং শঙ্গাবা অমসুং উরেপ উয়ুং তম্বগী থৌরম অদু পল্লদুনা মহাক্না লৈবাক অসিগী চাউখৎ-থৌরাংগী খোঙজেলদা মখোয় অসি মরুওইনা লৌরি হায়না ফোংদোকখি। অহোংবা পুরক্নবা থৌরাংশিং অসিগীদমক মহাক্না নাগরিকশিংদা নুংঙাইবা ফোংদোকখি।

ভারতকী ইনফ্রাস্ত্রকচরদা হৌজিক ফাওবদা ওইরক্লিবা অহোংবা অদু পল্লদুনা, মোদর্নাইজেসনগীদমক লৈবাক্কী অচেৎপা ফিরেপ অদু পনখি। হৌখিবা চহি ১১ অসিদা লম্বী, এয়রপোর্ত, রেলৱেজ অমসুং রেলৱে স্তেসনশিংদা খোঙজেল য়াংনা খুমাং চাউশিল্লকপা অদু প্রধান মন্ত্রীনা পনখি। প্রধান মন্ত্রীনা হায়খি, "ভারতনা হৌখিবা চহিশিংগা য়েংনবদা ইনফ্রাস্ত্রকচর দিবেলপমেন্তদা হৌজিক শরুক তরুক হেন্না ইনভেস্ত তৌরি। মসিগী খুমাং চাউশিল্লকপনা মালেমগী মীয়ামগী পুক্নিং চিংশিল্লি।" লৈবাক অসিগী শিনবা থুংবগী ইনফ্রাস্ত্রকচরগী প্রোজেক্তশিং, অৱাংথংবা লমদমদা লৈরিবা চেনাব ব্রিজ, অরুনাচল প্রদেশকী সেলা তনেল অমসুং নোংপোক লমদমদা অসামগী বোগিবিল ব্রিজগী মতাংদা মহাক্না পনখি। নোংচুপ থংবা ভারত্তা মহাক্না মুম্বাইদা লৈবা অতল সেতুগী মতাংদা পনখি। অদুগা খা থংবা ভারত্তা লৈবা পাম্বন ব্রিজকী মতাংদা পনখি।

রেলৱেজ নেৎৱার্ক মোদর্নাইজ তৌনবা ভারতনা লেপ্পা লৈতনা হোৎনরি হায়না পল্লদুনা শ্রী মোদীনা লৈবাক অসিগী অনৌবা খোঙজেল অমসুং খুমাং চাউশিল্লকপগী খুদম ওইনা ভন্দে ভারত, অমৃত ভারত অমসুং নমো ভারত ত্রেনশিং হৌদোকখিবগী ৱাফম থমখি। মহাক্না হায়খি মদুদি হৌজিক্তি ভন্দে ভারত ত্রেনশিংনা রুত ৭০ রোমদা ওপরেৎ তৌরি। মসিনা অরাপ্পা মফমশিংদা মোদর্ন রেল কনেক্তিবিতী পুরক্লি। হৌখিবা চহি ১১ অসিদা লম্বীগী ওভরব্রিজ অমসুং আন্দরব্রিজ চা কয়া শাবগা লোয়ননা কিলোমীতর ৩৪,০০০গী মথক্তা অনৌবা রেলৱে ত্রেকশিং শেম্বা য়াওনা ইনফ্রাস্ত্রকচরদা চাউনা খুমাং চাউশিল্লকপগী ৱাফমসু মহাক্না পনখি। ব্রোদ গেজ লাইনশিংদা অনমেন লেবেল ক্রোসিংশিং লৌথোক্তুনা সেফতী হেনগৎহনখ্রে হায়না মহাক্না পনখি। শ্রী মোদীনা কার্গো ত্রান্সপোর্তেসনবু স্ত্রীমলাইন তৌনবা দেদিকেতেদ ফ্রাইৎ কোরিদোরশিং খোঙজেল য়াংনা শেমগৎপা অমসুং ভারতকী অহানবা বুল্লেত ত্রেন প্রোজেক্ত শেমগৎপগী থবক চত্থরিবা অসিগী মতাংদসু পনখি। মসিগী খোঙথাং অসিগা লোয়ননা, পেসেঞ্জর এক্সপরিয়েন্স ফগৎহন্নবা রেলৱে স্তেসন ১৩০০ হেন্না মোদর্নাইজেসন তৌরি।

মোদর্নাইজ তৌরবা রেলৱে স্তেসনশিং অসি অমৃত ভারত স্তেসন হায়না মিংথোনখ্রে অমসুং অসিগুম্বা স্তেসন ১০০ হেন্না শাবা লোইরে হায়না প্রধান মন্ত্রীনা অকনবা ৱাফম থমখি। মহাক্না হায়খি মদুদি সোসিএল মীদিয়া শিজিন্নরিবশিংনা লোকেল আর্ত অমসুং হিস্তরীগী শক্তম উৎলিবা স্তেসনশিং অসিগী মশক থোকপা অহোংবা অদু উবা ফংলে। মহাক্না রাজস্থানগী মন্দলগর স্তেসন, রাজপুতকী চৎনবীগী মগুন অদু উৎলিবা অমসুং বিহারগী থাও স্তেসন, মধুবানী আর্তৱার্ক্কা লোয়ননা মা থাৱেৱালিগী অশেংবা মফম অদু উৎলিবা য়াওনা মশক থোকপা খুদমশিং পনখি। মধ্য প্রদেশকী ওর্চ্ছা রেলৱে স্তেসন অসি ভগবান রামগী লাইগী মগুন অদু উৎলি, অদুগা শ্রীরঙ্গম স্তেসনগী দিজাইননা শ্রী রঙ্গনাথ স্বামী মন্দিরদগী ইথিল লৌরি। গুজরাতকী দাকোর স্তেসন অসিনা রনছোদ্রাইজীবু ইকায় খুম্নবা উৎলি, তিরুবনমালাই স্তেসন অসিনা দ্রাভিদিয়ন আর্কিতেকচরগী প্রিন্সিপলশিং ঙাক্না চৎলি, অমসুং বেগুমপেৎ স্তেসন অসিনা কাকাথিয়া দাইনাস্তীগী আর্কিতেকচরগী লিগেসীবু মশক তাক্লি। প্রধান মন্ত্রীনা হায়খি মদুদি অমৃত ভারত স্তেসনশিং অসিনা চহি লিশিং কয়াগী ভারতকী হেরিতেজ অসি ঙাক-শেন্দুনা থম্বতা নত্তনা রাজ্যশিংদা তুরিজম চাউখৎহন্নবা কেতালাইজর অমা ওইনা থবক তৌরি। মসিনা নহারোলশিংদা থবক ফংহন্নবা অনৌবা খুদোংচাবশিং ফংহল্লি। স্তেসনশিং অসি লুনান্না থম্নবা অমসুং শাফবা ওইহন্নবা মহাক্না মীয়ামদা হায়খি মরমদি মখোয় অসি ইনফ্রাস্ত্রকচর অসিগী অশেংবা মপুশিংনি।

ইনফ্রাস্ত্রকচরদা সরকারনা থাদরিবা শেনফম অসিনা চাউখৎপা পুরকপতা নত্তনা থবক ফংহন্নবা অমসুং ললোন-ইতিক্কী থবকশিং হেনগৎহন্নবা হোৎনরি হায়না পল্লদুনা শ্রী মোদীনা হায়খি মদুদি লুপা করোর লিশিং কয়া থাদবনা শিন্মীশিং, দুকানশিং, ফেক্টরীশিংদা থবক তৌরিবা মীওইশিং অমসুং ত্রক অমসুং তেম্পো ওপরেতরশিংগুম্বা ত্রান্সপোর্ত সেক্তরদা থবক তৌরিবা মীওইশিংদা হকথেংননা কান্নবা ফংহল্লি। ইনফ্রাস্ত্রকচর প্রোজেক্তশিং অসি লোইশিল্লকপগা লোয়ননা কান্নবা কয়া ফংলগনি হায়না মহাক্না ফোংদোকখি। লৌমীশিংনা মখোয়গী মহৈ-মরোংশিং কৈথেলশিংদা মমল হন্থনা পুথোক-পুশিন তৌবা ঙম্মী, মসিনা মাং-তাকপগী চাং হন্থহল্লি। ফজনা শেমগৎলবা লম্বীশিং অমসুং পাকথোক চাউথোক্লবা রেলৱে নেৎৱার্কশিংনা অনৌবা ইন্দস্ত্রীশিং শাগৎলি অমসুং তুরিজমবু চাউনা হেনগৎহল্লি। ইনফ্রাস্ত্রকচরদা শেল থাদবনা য়ুমথোং খুদিংমক্তা কান্নবা পীরি হায়না মহাক্না ফোংদোকখি। অনৌবা শেন্মিৎলোনগী খুদোংচাবশিং অসিদগী নহাশিংনা খ্বাইদগী কান্নবা ফংগনি।

শ্রী মোদীনা রাজস্থান্না হৌজিক চত্থরিবা ইনফ্রাস্ত্রকচর দিবেলপমেন্তদগী কান্নবা কয়া ফংলিবা অদু পনখি। মহাক্না হায়খি মদুদি খুঙ্গংশিংদা অমসুং ঙমখৈগী মফমশিংদা ফাওবা অৱাংবা থাক্কী লম্বীশিং শেমগৎলি। হৌখিবা চহি ১১দা, রাজস্থানগী লম্বীগী ইনফ্রাস্ত্রকচর খক্তদা চাউরাক্না লুপা করোর ৭০,০০০ ইনভেস্ত তৌখ্রে। মহাক্না হায়খি মদুদি কেন্দ্র সরকারনা চহি অসিদা রাজ্য অসিদা রেলৱেজ দিবেলপমেন্তকীদমক লুপা করোর ১০,০০০ রোম চাদিং তৌনবা শেম-শারি। মসি ২০১৪গী মমাংগী থাকশিংগা চাংদম্নবদা শরুক ১৫ হেনগৎলকপা ওইখি। কনেক্তিবিতী হেন্না ফগৎহন্দুনা বিকানরবু মুম্বাইগা শম্নগদবা অনৌবা ত্রেন অমা লমথাবগী মতাংদা মহাক্না ৱাফম থমখি। মসিগী মথক্তা, মহাক্না মফম কয়াদা তোঙান তোঙানবা হকশেল, ঈশিং অমসুং ইলেক্ত্রিসিতীগী প্রোজেক্ত কয়া হৌদোকপা অমসুং উরেপ উয়ুং তম্বগী থৌরমদী পুক্নিং চিংশিনখি। মসিগী খোঙথাংশিং অসিনা রাজস্থানগী শহর অমসুং খুঙ্গংগী লম অনিমক্কী চাউখৎপা য়াংখৎহন্নবা পান্দম থম্লি। মসিনা নহাশিংনা মখোয়গী শহর অমসুং তাউনশিংদা অফবা খুদোংচাবশিং ফংহনগনি।

কেন্দ্র অমসুং রাজ্য সরকারশিংগী মখাদা রাজস্থানদা ইন্দস্ত্রীএল দিবেলপমেন্ত খোঙজেল য়াংনা পায়খৎলিবা অদু পল্লদুনা প্রধান মন্ত্রীনা হায়খি মদুদি মুখ্য মন্ত্রী শ্রী ভজনলাল শর্মগী লৈঙাক্না সেক্তর কয়াদা অনৌবা ইন্দস্ত্রীএল পোলিসীশিং হৌদোকখ্রে। মসিনা বীকানেরগুম্বা মফমশিংদা কান্নবা ফংহল্লগনি। বীকানেরী ভুজিয়া অমসুং বীকানেরী রসগুল্লাসনা মালেমগী থাক্তা মখোয়গী শকখঙবা হেনগৎহল্লগনি, মসিনা রাজ্য অসিগী ফুদ প্রোসেসিং ইন্দস্ত্রীবু হেন্না মপাঙ্গল কনখৎহল্লগনি হায়না মহাক্না অকনবা ৱাফম থমখি। প্রধান মন্ত্রীনা হায়খি মদুদি রাজস্থানগী রিফাইনরী প্রোজেক্ত অসি অরোইবা তাঙ্কক য়ৌরে। মসিনা রাজ্য অসি পেত্রোলিয়মদা য়ুম্ফম ওইবা ইন্দস্ত্রীশিংগী মরুওইবা মফম অমা ওইহল্লগনি। শ্রী গঙ্গানগর, হনুমনগর, বীকানের, জোধপুর, বারমর অমসুং জলোর ফাওদুনা অমৃতসরদগী জামনগর ফাওবা সিক্স-লেন ইকোনোমিক কোরিদোরগী মরুওইবা অদুসু মহাক্না ফোংদোকখি। মসিগী মথক্তা, রাজস্থানদা দিল্লী-মুম্বাই এক্সপ্রেসৱে লোইশিল্লকপগী মতাংদা মহাক্না পনখি। মহাক্না হায়খি মদুদি কনেক্তিবিতী প্রোজেক্তশিং অসিনা রাজ্য অসিগী ইন্দস্ত্রীএল গ্রোথ অসি অনৌবা অৱাংবা থাক্তা পুখৎকনি।

শ্রী মোদীনা রাজস্থানদা পি.এম. সুর্য় ঘর মুফত বিজলী য়োজনাগী খোঙজেল য়াংনা খুমাং চাউশিল্লকপগী মতাংদা পনখি। রাজ্য অসিগী মীওই ৪০,০০০ হেনবনা থৌরাং অসিগী কান্নবা ফংখ্রে, মসিনা মখোয়গী ইলেক্ত্রিসিতী বিলশিং কোকহল্লে অমসুং মখোয়দা সোলর পাৱরগী খুত্থাংদা শেন্থোক লৈহন্নবগী খুদোংচাবা ফংহল্লে হায়না মহাক্না পনখি। মহাক্না পাৱরগা মরী লৈনবা প্রোজেক্ত কয়া শঙ্গাবা অমসুং উরেপ উয়ুং তম্বগী থৌরমদা ৱা ঙাংখি। থৌরমশিং অসিনা রাজস্থানগী ইলেক্ত্রিসিতী সপ্লাই হেন্না হেনগৎহল্লগনি হায়না মহাক্না ফোংদোকখি। মহাক্না হায়খি মদুদি রাজ্য অসিদা হেনগৎলক্লিবা পাৱর জেনরেসন অসিনা ইন্দস্ত্রীএল গ্রোথ হেনগৎহনবদা মরুওইবা থৌদাং অমা লৌরি।

রাজস্থানগী লমদম অসিগী পুৱারী ওইরবা মরুওইবা অদু পল্লদুনা শ্রী মোদীনা মহারাজা গঙ্গা সিংহনা মরুভুমিগী লমদম অসি লৈহাও লৈবা লমদম ওইহন্নবা হোৎনখিবা অদু নীংশিংখি। লমদম অসিগী ওইনা ঈশিংগী মরুওইবা অমসুং বীকানের, শ্রী গঙ্গানগর, হনুমানগর অমসুং নোংচুপ থংবা রাজস্থানগুম্বা মফমশিংগী চাউখৎ থৌরাংদা ঈশিংগী থৌদাং অদু মহাক্না পনখি। মহাক্না হায়খি মদুদি সরকারনা ইরিগেসন প্রোজেক্তশিং মপুং ফাহন্নবগীদমক থবক পায়খৎলি অমসুং মসিগা লোয়ননা তুরেলশিং শম্নহন্নবা থৌরাংশিং পায়খৎলি। পার্বতী-কালিসিন্ধ-চম্বল লিংক প্রোজেক্তনা রাজস্থানগী জিলা কয়াদা কান্নবা ফংহল্লগনি, লৌমীশিংগীদমক হেন্না ফবা লৌউ-শিংউগী ওইথোকপা লৈহল্লগনি অমসুং লমদম অসিগী সস্তেনেবিলিতী হেনগৎহল্লগনি হায়না মহাক্না ফোংদোকখি।

রাজস্থানগী অচেৎপা ৱাখল্লোন অদুদা অকনবা ৱাফম থম্লদুনা লৈবাক অমসুং মাগী মীয়ামদগী হেন্না চাউবা করিগুম্বা অমত্তা লৈতে হায়না পল্লদুনা, প্রধান মন্ত্রীনা এপ্রিল ২২দা পাংথোকখিবা তেরোরিস্ত এতেক অদু য়ানিংদবা ফোংদোকখি। পহলগামদা বুলেৎশিং কাপথরকখিবা মতমদা, মখোয়না ভারত মচা করোর ১৪০গী থম্মোয়বু শোকহনখি অমসুং তেরোরিজমগী মায়োক্তা লৈবাক অসিবু অমত্তা ওইনা পুনশিনখি হায়না মহাক্না ফোংদোকখি। মহাক্না ভারতকী লান্মীশিংনা অকনবা মওংদা পাউখুম পীরকখিবা অদু পনখি। মখোয়দা অপুনবা ওপরেস্নেল ফ্রীদম পীখি হায়না মহাক্না ফোংদোকখি। মহাক্না পনখি মদুদি অকনবা মওংদা পাংথোকপা ওপরেসন অমদা, ফোর্স অহুম অসিনা পাকিস্তানগী দিফেন্সশিং থুগাইদুনা মখোয়বু চংজনবা ফীভম অমদা লৈহনখি। মহাক্না হায়খি মদুদি এপ্রিল ২২গী এতেক অদুগী পাউখুম ওইনা, ভারতনা মিনিত ২২গী মনুংদা তেরোরিস্তশিংগী মরুওইবা মফম মাপন থুগাইখি। প্রধান মন্ত্রীনা হায়খি, "মসিগী থৌওং অসিনা লৈবাক অসিগী শক্তি উৎলি, মসিনা উৎলি মদুদি করিগুম্বা অশেংবা সিন্দুর অসি মৈগী শক্তি ওইরকপা তারবদি, মসিগী মহৈ অসি তশেংনা শাথিবা ওইগনি।" চহি মঙাগী মমাংদা, বালাকোৎ এয়র স্ত্রাইক্কী মতুংদা, মহাক্কী অহানবা মীয়ামগী রেলী অসি রাজস্থানদা পাংথোকখিবা অসি মশক থোকপা থৌদোক অমনি হায়না মহাক্না পনখি। মতৌ অসুম্না, হন্দক পাংথোকখিবা ওপরেসন সিন্দুরগী মতুং তারকপদা, মহাক্কী অহানবা রেলী অসি রাজস্থানগী বীকানেরদা অমুক হন্না পাংথোকখ্রে।

শ্রী মোদীনা চুরুদা মহাক্কী ৱারোল অদু নীংশিংখি অমসুং লৈবাক অসিগীদমক মহাক্কী অচেৎপা ফিরেপ অদু অমুক হন্না ফোংদোকখি: "লৈবাক অসি পন্দুনা ৱাশকচরি, ঐহাক্না লৈবাক অসিবু মাইথিবা নংহল্লোই, ঐহাক্না লৈবাক অসিবু চংজবা তৌহল্লোই।" মহাক্না রাজস্থানদগী হায়খি মদুদি অশেংবা সিন্দুর মুত্থৎনবা হোৎনবা মীওইশিং অদু উফুন তাহনখি, অমসুং ভারতকী ঈখেং তাহনখিবা মীওইশিং অদুনা হৌজিক মপুং ফানা মহৈ ফংলি। প্রধান মন্ত্রীনা হায়খি মদুদি ভারতনা তুমিন্না লৈগনি হায়না খল্লম্বা মীওইশিং অদু হৌজিক লোৎতুনা লৈরে, অদুগা মখোয়গী খুৎলাইশিং অদুগী মতাংদা চাউথোকচবা ফোংদোকখিবা মীওইশিং অদু হৌজিক অকাই অতোইগী মখাদা ফুমজিন্দুনা লৈরে। ওপরেসন সিন্দুর অসি লমন খুম্বগী থৌওং অমা নত্তে, অদুবু মসি অচুম্বা ৱায়েলগী অনৌবা মওং অমনি হায়না মহাক্না ফোংদোকখি। মসি থৌনা ফুদোকপা খক্তা নত্তে অদুবু মসিনা ভারতকী লেংদ্রবা শক্তি অমসুং থৌনাগী মশক অমা উৎলি হায়না মহাক্না হায়খি। মহাক্না হায়খি মদুদি লৈবাক অসিনা শিংথানীংঙাই ওইরবা থৌওং অমা শীজিন্নরি, মসিনা য়েক্নববু হকথেংননা অমসুং অকনবা মওংদা লান্দারক্লি। “তেরোরিজম মুত্থৎপা অসি স্ত্রেতেজী খক্তা নত্তে অদুবু মসি ৱাখল্লোন অমনি, মসি ভারতনি, মসি অনৌবা ভারতনি,” হায়না শ্রী মোদীনা অকনবা ৱাফম থমখি।

তেরোরিজমগা লান্থেংনবদা ওপরেসন সিন্দুরগী খুত্থাংদা মরুওইবা প্রিন্সিপল অহুম থম্লদুনা, প্রধান মন্ত্রীনা অহানবা প্রিন্সিপল অসি - ভারতকী মায়োক্তা তেরোরিস্ত এতেক অমা হেক্তবু মতম, পাম্বৈ, অমসুং ভারতকী আর্মদ ফোর্সশিংনা খক্তনা লেপচবা তর্মশিংগা লোয়ননা দেসিসিব ওইবা পাউখুম অমা পীরগনি। অনিশুবদা, মহাক্না হায়খি মদুদি ন্যুক্লিয়রগী থ্রেদশিংনা ভারতপু অকিবা পোকহল্লরোই। অহুমশুবদা, মহাক্না হায়খি মদুদি ভারতনা তেরোরিস্ত মাস্তরমাইন্দশিং অমসুং মখোয়বু মতেং পাংলিবা সরকারশিংগী মরক্তা খেন্নবা থম্লোই, স্তেৎ অমসুং নন-স্তেৎ এক্তরশিংগী মরক্তা পাকিস্তাননা থম্মিবা খেন্নবা অদু রিজেক্ত তৌগনি। তেরোরিজম শৌগৎপদা পাকিস্তানগী থৌদাং অদু এক্সপোজ তৌনবা মালেমগী ওইনা চত্থরিবা থবকশিং অদু পল্লদুনা মহাক্না হায়খি, তোঙান তোঙানবা পোলিতিকেল পার্তীশিংগী লুচিংবশিং অমসুং ফোরেন পোলিসী এক্সপর্তশিং য়াওবা তোঙান তোঙানবা গ্রুপ তরেৎনা পাকিস্তানগী অশেংবা মশক মালেমদা উৎনবা থবক পায়খৎলি।

শ্রী মোদীনা হায়খি মদুদি পাকিস্তাননা ভারতকা হকথেংননা থেংনবদা কৈদৌঙৈদসু মায় পাকপা ঙম্লোই। মমাংগী লানফমশিংদা হন্না হন্না মায় পাকখিদবশিং অদু মহাক্না নৌহৌনা নীংশিংখি। মহাক্না পুক্নিং চিংশিনখি মদুদি, পাক-শন্না লান থেংনবদা মায় পাকপা ঙমদনা, পাকিস্তাননা মতম শাংনা তেরোরিজমবু ভারতকী মায়োক্তা খুৎলাই অমা ওইনা শীজিন্নদুনা হিংসাগী থৌওং শীজিন্নদুনা অমসুং অকিবগী ফীভম অমা শেমদুনা লাক্লি। মহাক্না হায়খি মদুদি পাকিস্তান্না ভারতকী ৱারেপ অদু অন্দরএস্তিমেৎ তৌখি। মহাক্না হায়খি মদুদি মহাক্কী লুচিং মখাদা লৈবাক অসি মপাঙ্গল কন্না অমসুং ফিরেপ চেৎনা লেপ্পী। শ্রী মোদীনা হায়খি, "ভারত্তা তেরোরিস্তশিংনা লান্দারকপা খুদিংগী শাথীবা মহৈ অমা ফংগনি, মসিগীদমক পাকিস্তাননা চাউনা চৈথেং অমা শোয়দনা ফংগনি।"

প্রধান মন্ত্রীনা হায়খি মদুদি বীকানেরদা থুংলবা মতুংদা, মহাক্না নাল এয়রপোর্ত্তা থুংখি, মদু পাকিস্তাননা তার্গেৎ তৌদুনা লান্দারক্নবা হোৎনরম্মি অদুবু মাং-তাকহনবদা মায় পাকখিদে। ঙমখৈগী ৱাংমদা লৈবা পাকিস্তানগী রহিম য়ার খান এয়রবেজ অসি ভারতকী প্রিসাইজ মিলিতরী স্ত্রাইকনা মরম ওইদুনা নুমিৎ কয়ামরুমগী ওইনা থিংজিনখিবা অদু মহাক্না ফোংদোকখি, মসিনা মসিগী ওপরেসনশিংদা অকায়বা পীখি। প্রধান মন্ত্রীনা পাকিস্তানগা লোয়ননা ললোন-ইতিক নৎত্রগা তোক অমত্তা তৌরোই হায়না অকনবা ৱাফম থমখি। মহাক্না হায়খি মদুদি ৱারী অমা হেক্তা শাবনা পাকিস্তান-ওক্যুপাইদ কাশ্মীরগী মতাংদা ৱারোইশিন পুরকপা ঙমলোই। করিগুম্বা পাকিস্তান্না তেরোরিস্তশিং মখা তানা এক্সপোর্ত তৌরক্লবদি, মসিনা শেন্মিৎলোন মাংহল্লগনি হায়না মহাক্না চেকশিনৱা থমখি। ভারতনা পাকিস্তানবু মাগী ফংফম থোকপা ঈশিংগী শরুক অদু এক্সেস তৌহল্লোই অমসুং ভারতকী ঈখেং তাহন্নবনা চাউনা চৈথেং নংগনি হায়না মহাক্না অমুক হন্না ফোংদোকখি। মহাক্না হায়খি, "মসিগী ৱারেপ অসি ভারতকী অচেৎপা ফিরেপনি, মালেমগী শক্তি অমত্তনা থিংজিনবা ঙম্লোই।"

শ্রী মোদীনা হায়খি মদুদি চাউখৎলবা ভারত অমা শেমগৎপদা সেক্যুরিতী অমসুং নুংঙাই-য়াইফবা অনিমক তঙাইফদে। মহাক্না হায়খি মদুদি লৈবাক অসিগী মফম খুদিংমক মপাঙ্গল কনখৎহন্দুনা মসিগী মঙলান অসি মংফাওনহনবা ঙমগনি। মহাক্না হায়খি মদুদি থৌরম অসিনা ভারতকী তংদু লৈতাবা অমসুং খোঙজেল য়াংনা চাউখৎপগী খুদম অমনি। মহাক্কী ৱারোল লোইশিল্লদুনা মহাক্না মফম অসিদা লৈরিবা মীপুম খুদিংমক্তা লৈবাক অসিগী থৌনা ফরবা মীওইশিংগী মফমদগী নুংঙাইবা ফোংদোকখি।

থৌরম অদুদা রাজস্থানগী গবর্নর শ্রী হরিবৌ কিসানরাও বাগদে, রাজস্থানগী মুখ্য মন্ত্রী শ্রী ভজনলাল শর্মা, কেন্দ্রগী মন্ত্রীশিং শ্রী অশ্বিনী বৈষ্ণব, শ্রী অর্জুন রাম মেঘৱাল অমসুং অতোপ্পা মশক নাইবা মীওইশিংসু শরুক য়াখি।

বেকগ্রাউন্দ

লৈবাক অসিদা রেলগী ইনফ্রাস্ত্রকচর লেপ্তনা ফগৎহন্নবা অমসুং হেনগৎহন্নবা মহাক্কী অচেৎপা ফিরেপ অদুগী মতুং ইন্না, প্রধান মন্ত্রীনা ভারতকী রাজ্য অমসুং য়ুনিয়ন তেরিতোরী ১৮গী জিলা ৮৬দা লুপা করোর ১,১০০ হেনবগী শেনফম চংনা নৌহৌনা শেমগৎখিবা অমৃত স্তেসন ১০৩ শঙ্গাখ্রে। অমৃত ভারত স্তেসন স্কিমগী মখাদা রিজনেল আর্কিতেকচর মশক তাক্নবা অমসুং পেসেঞ্জরগী খুদোংচাবশিং হেনগৎহন্নবা দিজাইন তৌদুনা স্তেসন ১,৩০০ হেন্না মোদর্ন ফেসিলিতীশিংগা লোয়ননা নৌনা শেমগৎলি। দেশনোক রেলৱে স্তেসন অসি, কার্নি মাতা লাইশঙদা লাকপা তীর্থ চৎপা মীওইশিং অমসুং তুরিস্তশিংগী শেবা তৌরি। মসি লাইশঙগী আর্কিতেকচর অমসুং আর্ক অমসুং কলমগী থিমদগী ইথিল ফংলি। তেলঙ্গনাগী বেগমপেৎ রেলৱে স্তেসন অসি ককাতিয়া সমরাজ্যগী আর্কিতেকচরদগী ইথিল ফংখি। বিহারদা লৈবা থাৱে স্তেসন অসিদা মা থাৱেৱালি, শক্তি পীথ ৫২গী মনুংদা অমা ওইরিবা অমসুং মধুবানী পেন্তিংশিং উৎলিবা ম্যুরেল মখল কয়া অমসুং আর্ত ৱার্কশিং য়াওরি। গুজরাতকী দাকোর স্তেসন অসি রঞ্চোদ্রাই জি মহারাজনা ইথিল পীবনি। ভারত শিনবা থুংনা নৌনা শেমগৎলবা অমৃত স্তেসনশিং অসি চৎনবীগী হেরিতেজ, দিব্যাংজন য়াওনা পেসেঞ্জর-সেন্ত্রিক ফেসিলিতীশিং অমসুং ত্রেবেল এক্সপরিয়েন্স হেনগৎহন্নবা সস্তেনেবল ওইবা থৌওংশিংগা লোয়ননা মোদর্ন ইনফ্রাস্ত্রকচর পুনশিল্লি।

ইন্দিয়ন রেলৱেজনা রেলৱেজ ওপরেসনশিংবু হেন্না ইফিসিএন্ত অমসুং এনভাইরনমেন্ত ফ্রেন্দলী ওইহন্দুনা মাগী নেৎৱার্ক্কী ১০০% ইলেক্ত্রিফিকেসন তৌনবগী মায়কৈদা চংশিল্লি। মসিগী পরিং মখাদা প্রধান মন্ত্রীনা চুরু-সাদুলপুর রেল লাইন (কিলোমীতর ৫৮) গী উরেপ উয়ুং তমখ্রে অমসুং সুরতগর-ফালোদি (কিলোমীতর ৩৩৬); ফুলেরা-দেগানা (কিলোমীতর ১০৯), উদাইপুর-হিম্মতনগর (কিলোমীতর ২১০), ফালোদি- জয়সালমর (কিলোমীতর ১৫৭) অমসুং সামদারী-বরমর (কিলোমীতর ১২৯) রেল লাইন ইলেক্ত্রিফিকেসন তৌরিবা অসি লৈবাক মীয়ামদা কত্থোকখ্রে।

রাজ্য অসিদা লম্বীগী ইনফ্রাস্ত্রকচরদা অচৌবা ইনোৎ অমা পীরদুনা, প্রধান মন্ত্রীনা ভেহিকল আন্দরপাস অহুম শাবা, নেস্নেল হায়ৱেশিং পাকথোক চাউথোকহনবা অমসুং মপাঙ্গল কনখৎহন্নবা উরেপ উয়ুং তমখ্রে। প্রধান মন্ত্রীনা রাজস্থানদা লম্বীগী প্রোজেক্ত তরেৎসু জাতিদা কত্থোকখ্রে। লুপা করোর ৪৮৫০ হেনবগী লম্বীগী প্রোজেক্তশিং অসিনা পোৎ-চৈ পুথোক পুশিন তৌবা অমসুং মীওইশিং চৎথোক চৎশিন তৌবদা হেন্না খুদোংচাহল্লগনি। হায়ৱেশিং অসি ইন্দো-পাকিস্তান বোর্দর ফাওবা শাংদোক্লি, মসিনা সেক্যুরিতী ফোর্সশিংগী এক্সেসিবিলিতী হেনগৎহল্লি অমসুং ভারতকী দিফেন্স ইনফ্রাস্ত্রকচর মপাঙ্গল কনখৎহল্লি।

পুম্নমক্কীদমক ইলেক্ত্রিসিতী অমসুং গ্রীন অমসুং ক্লিন ইনর্জীগী মঙলান মখা তানা হেনগৎহন্দুনা, প্রধান মন্ত্রীনা বীকানের অমসুং দিদ্ৱানা কুচমনগী নৱাদা সোলর প্রোজেক্তশিং, অমসুং পৱারগ্রীদ সিরোহী ত্রান্সমিসন লিমিতেদকী পার্ত বি অমসুং পৱারগ্রীদ মেৱর ত্রান্সমিসন লিমিতেদকী পার্ত ইগী পৱার ত্রান্সমিসন সিস্তেমশিং য়াওনা পাৱর প্রোজেক্তশিংগী উরেপ উয়ুং তমখ্রে। মহাক্না বীকানেরদা সোলর প্রোজেক্ত, পৱারগ্রীদ নিমুচ অমসুং বীকানের কমপ্লেক্সতগী পৱারগ্রীদ ইভাক্যুএসন তৌনবগী ত্রান্সমিসন সিস্তেম, ক্লিন ইনর্জী ফংহল্লগদবা অমসুং কার্বোন থাদোকপা হন্থহল্লগদবা ফতেহগর- II পাৱর স্তেসনদা ত্রান্সফোর্মেশন কেপাসিতী হেনগৎহনবা য়াওনা পাৱর প্রোজেক্তশিংসু শঙ্গাখ্রে।

প্রধান মন্ত্রীনা রাজস্থানগী ইনফ্রাস্ত্রকচর, কন্নেক্তিবিতী, পাৱর সপ্লাই, হেল্থ সর্ভিস অমসুং ঈশিং ফংহন্নবা রাজ্য সরকারগী মরুওইবা প্রোজেক্ত ২৫ উরেপ উয়ুং তমখ্রে, শঙ্গাখ্রে অমসুং কত্থোকখ্রে। মসিগী মনুংদা লুপা করোর ৩,২৪০ হেনবগী অপুনবা কিলোমিতর ৭৪০ হেন্না শাংবা স্তেত হায়ৱে ১২গী অপগ্রেদেসন অমসুং মেন্তেন তৌবগী প্রোজেক্তশিংগী উরেপ উয়ুং তম্বা অমসুং জাতিদা কত্থোকপগী থৌরমশিং য়াওরি; প্রোগ্রাম অসিগী মখাদা মখা তানা পাকথোক চাউথোকহনবদা অহেনবা কিলোমিতর ৯০০গী অনৌবা হায়ৱেশিং য়াওরি। প্রধান মন্ত্রীনা বীকানের অমসুং উদয়পুরদা পাৱর প্রোজেক্তশিং শঙ্গাখ্রে। মহাক্না রাজসমন্দ, প্রতাপগর, ভিলৱারা, ধোলপুরদা নর্সিং কোলেজশিংসু শঙ্গাখ্রে, মসিনা রাজ্য অসিদা হকশেলগী ইনফ্রাস্ত্রকচর হেনগৎহনবদা মরুওইবা থৌদাং লৌগনি। মহাক্না লমদম অসিদা রুরেল ৱাতর সপ্লাই অমসুং ঝুনঝুনু জিলাদা ফ্লুরোসিস মিতিগেসন প্রোজেক্ত, অমরধ ২.০গী মখাদা পালী জিলাগী শহর 7দা অর্বান ৱাতর সপ্লাই স্কিমশিং শেমদোক-শাদোকপা য়াওনা ঈশিংগী ইনফ্রাস্ত্রকচরগী প্রোজেক্ত কয়াগী উরেপ উয়ুংসু তমখ্রে অমসুং লৈবাক মীয়ামদা কত্থোকখ্রে।

****