U Myntri Rangbah duh ka ri u Narendra Modi u la plie, buh maw nongrim bad aiti sha ka ri ia ki kam pynroi ba bun jait kiba shongdor T.26,000 klur ha Bikaner, Rajasthan mynta ka sngi. Haba kren ha katei ka sngi, u la pdiang sngewbha ia ki briew kiba bun kiba wan iashim bynta ha katei ka jingialang, da kaba ai khublei ia ka jingiashim bynta kaba kongsan jong ki briew na ki 18 tylli ki jylla bad ki jaka synrop kiba la iasoh lyngba ka lad online. U la pynpaw ia ka jingdon jong ki katto katne ngut ki Lat, ki myntri rangbah, ki Lieutenant Governor, bad kiwei kiwei ki nongmihkhmat paidbah. U Myntri Rangbah u la ai khublei ia baroh ki kynrem ki lyndan bad ki nongshong shnong kiba dei na kylleng ka ri.

U Modi u la ong ba u la poi sha kane ka jingïalang hadien ba u la duwai ban ioh ïa ki jingkyrkhu na ka Karni Mata, da kaba ban jur ba kine ki jingkyrkhu ki pynskhem shuh shuh ïa ka jingkut jingmut jong ka ri ban tei ïa ka India kaba la kiew shaphrang. Haba kdew ïa ka jingplie bad jingbuh mawnongrim ïa ki projek pynroi kiba shongdor T. 26,000 klur, u la pynpaw ïa ka jingdonkam jong ki ha kaba kyntiew ïa ka roi ka par jong ka ri. U la ai khublei ia ki nongshong shnong na ka bynta kine ki sienjam kiba wanrah ia ka jingkylla.

Haba pynpaw ia ka jingkylla kaba dang iaid shakhmat jong ki jingdon jingem jong ka ri India, da kaba pynksan ia ka jingangnud jong ka ri ban pynkylla thymmai, u Myntri Rangbahduh u la kdew sha ka jingkiew stet ki surok, ki kad liengsuin, ki lynti rel, bad ki steshon rel ha kine ki 11 snem ba la dep. “Ka India mynta ka bei tyngka hynriew shah ha ka jingpynroi ia ki jingtei haba ianujor bad ki snem ba la dep, bad namar kane ka pyrthei baroh kawei ka la phai sha ka India”, la ong u Myntri Rangbahduh, da kaba kdew ia ki projek pynroi kiba pawnam ha kylleng ka ri, kum ka jingkieng Chenab kaba phylla ha ka thain shatei lam mihngi, ka Sela Tunnel ha Arunachal Pradesh bad ka jingkieng Bogibeel ha Assam ha ka thin mihngi. Ha ka thain sepngi jong ka India, u la kdew ia ka Atal Setu ha Mumbai, katba ha ka thain shathie, u la kdew ia ka jingkieng Pamban, kaba nyngkong eh na kine ki jait jingkieng ha ka ri India.

Da kaba ban jur halor ka jingpyrshang ba iai bteng jong ka India ban pynthymmai ia ka lynti rel jong ka, u Modi u kdew ia ki rel Vande Bharat, Amrit Bharat, bad Namo Bharat kum ki dak jong ka jingsted bad jingkiew shaphrang ba thymmai jong ka ri. U la ong ba haduh 70 tylli ki lynti mynta ki pyniaid ia ki rel Vande Bharat, kaba wanrah ia ka jingpyniasoh rel kaba mynta sha ki jaka ba jngai. U la kdew shuh shuh ïa ki jingkiew kiba kongsan ha ki jingtei ha kine ki 11 snem ba la dep, kynthup ïa ka jingtei da ki spah tylli ki jingkieng halor bad ki jingkieng shapoh surok, bad kumjuh ruh ka jingpynbiang palat 34,000 kilomitar ïa ki lynti rel thymmai. U la ong ba la pynduh noh ïa ki jaka bym don satia ki briew ba peit ha kaba ki rel ki kylla ia ka lynti jong ki ha ki lynti rel kiba heh kaba kyntiew ïa ka jingshngaiñ. U Modi u la pynpaw ruh ïa ka jingpynroi stet jong ki lynti kit mar ba kyrpang ban pynsuk ïa ka jingkit mar bad ka jingtei kaba dang ïaid shakhmat jong ka projek rel kaba sted tam ba nyngkong eh jong ka India. Nalor kine ki seinjam, la pynlong ia ka jingpynthymmai ia palat 1,300 tylli ki steshon rel khnang ban kyntiew ia ka jingsuk jong ki nongleit nongwan.

U Myntri Rangbah u la ban jur ba ia ki steshon rel kiba la pynthymmai mynta la ai kyrteng kum ki steshon Amrit Bharat bad ba palat 100 tylli kum kine ki steshon la dep ban shna. U laong ba ki nongpyndonkam social media ki la sakhi ïa ka jingkylla kaba phylla jong kine ki steshon, kiba long kum ki jaka pyni ïa ka jingsaindur bad ka histori jong ka thaiñ. U la kdew ia ki nuksa ba kongsan, kynthup ia ka steshon Mandalgarh jong ka Rajasthan, kaba pyni ia ka jingkhraw jong ki riti dustur jong ki Rajput, bad ka steshon Thawe jong ka Bihar, kaba pyni ia ka jinglong kyntang jong ka Maa Thawewali ryngkat bad ki jingdro jong u Madhubani. Ka steshon rel Orchha ha Madhya Pradesh ka pyni ia ka jinglong kyntang jong u Trai Ram, katba ka jingshna ia ka steshon Srirangam ka ioh mynsiem na ka jaka mane jong u Sri Ranganatha Swamy. Ka steshon Dakor jong ka Gujarat ka ai burom ïa u Ranchhodrai ji, ka steshon Tiruvannamalai ka bud ïa ki nongrim shna ïing Dravidian, bad ka steshon Begumpet ka pynpaw ïa ka jinglong jingman jong ka jingtei jong ka hima Kakatiya. U Myntri Rangbahduh u la ban jur ba kine ki Amrit Bharat Station kim pynneh pynsah tang ïa ka pateng jong ka India kaba la rim da ki hajar snem hynrei ki long ruh kum ki nong wanrah ïa ka jingroi jong ka kam jngohkai pyrthei ha kylleng ki jylla, kaba thaw ïa ki lad kamai thymmai na ka bynta ki samla. U la kyntu ia ki paidbah ba ki dei ban peit ia ka jingkhuid jingsuba jong ki steshon namar ki dei ki trai ba shisha jong kine ki jingtei.

Da kaba ban jur ba ka jingbei tyngka jong ka sorkar ha ki jingtei kam dei tang ba ka wanrah ïa ka roi ka par hynrei ka thaw ruh ïa ki lad kamai bad kyntiew ïa ki kam khaii, u Modi u la ban jur ba ki hajar klur ba la pynlut ki ai jingmyntoi beit beit ïa ki nongtrei, ki nongdie dukan, ki nongtrei karkhana, bad kito kiba don bynta ha ki kam kit mar kum ki trok bad ki tempo. U la kdew ba ynda la dep ia ki projek pynroi, ki jingmyntoi ki nang bun. Ki nongrep ki lah ban kit ia ki mar rep jong ki sha ki iew ki hat ha ka dor kaba jem, kaba pynduna ia ka jingpynlut jong ki. Ki surok kiba la pynbha bha bad ki lynti rel kiba la pynheh ki khring ia ki karkhana thymmai bad ki kyntiew shibun ia ka kam jngohkai pyrthei. U la ong ba ka jingpynlut ha ki jingtei ha kaba kut ka ai jingmyntoi ïa man la ka longïing, ha kaba ki samla ki ïoh jingmyntoi bha na ki lad kamai kiba dang mih.

U Modi u la kdew sha ki jingmyntoi kiba khraw ba ka Rajasthan ka ioh na ka jingpynroi ia ki jingtei kiba dang iaid shakhmat. U la ong ba ki surok kiba bha ki dei kiba dang shna ha kylleng ki shnong bad wat ha ki jaka khappud ruh. Ha kine ki 11 snem ba la dep, la pynlut kumba T. 70,000 klur tang ha ki jingtei surok ha Rajasthan. U la ong ba ka sorkar pdeng ka thmu ban pynlut haduh T. 10,000 klur ha ka jingpynroi ïa ka lynti rel ha ka jylla mynta u snem, kaba pyni ia ka jingkiew kaba 15 shah haba ïanujor bad ki jinglong jingman shwa u snem 2014. U la kren shaphang ka jingpynbna ïa ka rel thymmai kaba pynïasoh ïa ka Bikaner sha Mumbai, kaba pynbha shuh shuh ïa ka jingïadei. Nalor kata, u la kdew sha ka jingsdang bad jingbuh mawnongrim ïa ki projek bapher bapher na ka bynta ka koit ka khiah, ka um, bad ka bording ha ki thaiñ bapher bapher. Kine ki sienjam ki thmu ban pynsted ia ka roi ka par jong ki jaka sor bad jaka nongkyndong jong ka Rajasthan, da kaba pynthikna ba ki samla kin shem ia ki lad ki lynti kiba don jingkyrmen hapoh la ki jong ki nongbah bad ki shnong.

Ha kaba iadei bad ka jingkiew stet jong ki karkhana ha Rajasthan hapoh ka sorkar pdeng bad ka sorkar jylla, u Myntri Rangbahduh u la ong ba ka jingsynshar jong u Myntri Rangbah ka Jylla Bhajanlal Sharma ka la wanrah ïa ki polisi karkhana ba thymmai ha ki bynta bapher bapher, ki ban ai jingmyntoi ïa ki thaiñ kum ka Bikaner. U la ban jur ba ka Bikaneri Bhujia bad ka Bikaneri Rasgullas ki la kiew bha ha ka jingpaw jong ki ha ka pyrthei, kaba nang pynkhlain shuh shuh ïa ka kam shna jingbam jong ka jylla. U Myntri Rangbahduh u la ong ba ka projek pynkhuid umphniang jong ka Rajasthan ka dei kaba la jan pyndep, kaba kyntiew ïa ka jylla kum ka jaka ba kongsan na ka bynta ki kam pynmih umphniang. U la pynpaw ruh ïa ka jingkordor jong ka surok kaba 6 lane na Amritsar sha Jamnagar, kaba ïaid lyngba ka Shri Ganganagar, Hanumangarh, Bikaner, Jodhpur, Barmer, bad Jalore. Nalor kata, u la ong ba la jan pyndep ïa ka surok bah Delhi sha Mumbai ha Rajasthan, da kaba ong ba kine ki projek pynïasoh kin kyntiew ïa ka jingroi jong ki karkhana jong ka jylla sha ki kyrdan kiba thymmai.

U Modi u la kdew sha ka jingkiew sted jong ka PM Surya Ghar Muft Bijli Yojana ha Rajasthan, da kaba ong ba palat 40,000 ngut ki briew ha ka jylla ki la dep ban ioh jingmyntoi na kane ka sienjam, kaba la pynduh ia ka bai bording jong ki bad ai lad ia ki ban kamai lyngba ka bor solar. U la kren shaphang ka jingplie bad jingbuh mawnongrim ïa ki katto katne ki projek kiba ïadei bad ka bording, da kaba ong ba kine ki sienjam kin nang kyntiew shuh shuh ïa ka jingpynbiang bording jong ka Rajasthan. U la ban jur ba ka jingpynmih bording kaba nang kiew ha ka jylla ka don ka bynta kaba kongsan ban pynsted ia ka jingroi jong ki karkhana.

Haba pynpaw ïa ka jingkordor jong ka khyndew ka shyiap jong ka Rajasthan ha ka histori, u Modi u la pynkynmaw ïa ki jingpyrshang jong u Maharaja Ganga Singh ha kaba pynkylla ïa ki jaka ri khlaw sha ki jaka ba sboh. U la pynpaw ia ka jingdonkam ba kongsan jong ka um na ka bynta ka thain bad ka bynta jong ka ha kaba kyntiew ia ka roi ka par jong ki jaka kum ka Bikaner, Ganganagar, Hanumangarh, bad ka thain sepngi jong ka Rajasthan. U la ong ba ka sorkar ka dang trei shitom ban pyndep ïa ki projek ai um katba ha kajuh ka por ka dang pyntreikam ïa ki jingthmu ban pynïasoh ïa ki wah. U la pynpaw ïa ka jingktah jong ka Parvati-Kalisindh-Chambal Link Project, ka ban ai jingmyntoi ïa ki distrik kiba bun ha kylleng ka Rajasthan, ban wanrah ia ka jingseisoh ba kham bha ha ka rep ka riang na ka bynta ki nongrep bad ban kyntiew ïa ka jinglong jingman jong ka thaiñ.

Da kaba ban jur halor ka mynsiem ba shlur jong ka Rajasthan, u la ong ba ym don kaei kaei kaba kham khraw ban ia ka ri bad ki briew jong ka, u Myntri Rangbahduh u la pynrem ia ka jingshah thombor jong ki lehnoh ha ka 22 tarik Iaiong, ha kaba ki lehnoh ki thmu ia ki jingim jong ki briew kiba lui lui bad ki la thew ia ki briew kiba iapher bad ka jingngeit jong ki. U la kynthoh ba katba ki kuli ki dang her ha Pahalgam, ki la pynmong ia ka jingsngew jong ki 140 klur ngut ki nong India, kaba la pynïatylli ïa ka ri ha ka jingkut jingmut pyrshah ïa ki kam lehnoh. U la pynpaw ia ka jingsngew kaba kut jingmut jong ki shipai India, da kaba ong ba la ai ia ki ia ka jinglaitluid kaba pura ban treikam. U la ong ba ha ka jingtreikam ba la pyndep da kaba pyrkhat janai bha, ki lai tylli ki kynhun ki la ïatreilang ban pynpulom ïa ki lad jingïada jong ka Pakistan, bad namar kaene, ka Pakistan ka la hap ban pyndem. U la pynpaw ba kum ka jingpynrem ïa ka jingshah thombor ha ka 22 tarik u Iaiong, ka India ka la siat biang hapoh 22 minit, da kaba pynjulor ïa ki khyndai tylli ki jaka rieh tngen jong ki lehnoh. “Kane ka jingleh ka la pyni ia ka jingkhlain jong ka ri, kaba pynshisha ba haba ka sindoor kaba kyntang ka kylla long ka bor iakhun, ka jingseisoh ka long kaba thikna”, la ong u Myntri Rangbahduh. U la kdew ruh ia kawei ka jingiakhun kaba kongsan— san snem mynshwa, hadien ka jinghiar thma liengsuin ha Balakot, ka jingialang paidbah kaba nyngkong eh jong u ka la long ha Rajasthan. Kumjuh ruh hadien ka Operation Sindoor kaba dang shen, ka jingïalang kaba nyngkong jong u ka long biang ha Rajasthan, ha Bikaner, kaba pynskhem biang ïa ka jingshlur bad jingieid ri kaba la skhem bha ha ka ri.

U Modi u la pynkynmaw ia ka jingkren jong u ha Churu, da kaba pynskhem biang ia ka jingaiti jong u ia ka ri: "To smai da kane ka khyndew, ngan ym ailad ia ka ri ban hap, ngan ym ailad ia ka ri ban dem khrup." U la pynbna na Rajasthan ba kito kiba la pyrshang ban pyndam noh ia ka sindoor kaba kyntang ki la pulom lut, bad kito kiba la pyntuid ia ka snam jong ka India mynta ki la ioh ia ka jubab kaba khlain. U Myntri Rangbahduh u la ong ba kito kiba sngew ba ka India kan sngap jar mynta ki hap ban rieh, katba kito kiba sngew sarong ia ki tiar ialeh jong ki mynta ki thiah hapoh ki thliew. Da kaba ong ba ka Operation Sindoor kam dei ka jingleh ban siew kylliang, hynrei ka dei ka rukom bishar hok kaba thymmai, u la ong ba kam dei tang ka jingpynpaw ia ka jingbitar hynrei ka jingpyni ia ka bor bad jingkut jingmut bym lah pynkhih jong ka India. U la ong ba ka ri ka la shim ia ka lad kaba shlur, da kaba siat beit bad tyngeh ia ki nongshun. “Ka jingpynkhyllem ïa ki lehnoh kam dei tang ka buit treikam hynrei ka dei ka nongrim, kane ka dei ka India, kane ka dei ka India kaba thymmai”, la ban jur u Modi.

Haba batai ia ki lai tylli ki nongrim ba kongsan ba la wanrah lyngba ka Operation Sindoor ha ka jingiakhun jong ka India pyrshah ia ki kam lehnoh, u Myntri Rangbahduh u la batai shaphang ka nongrim ba nyngkong - kano kano ka jingshah thombor jong ki lehnoh ia ka India yn iakynduh da ka jubab kaba khlain, ryngkat bad ka por, ka rukom, bad ki kyndon ba la buh tang da ki shipai jong ka India. Kaba ar, u la ong ba ka India kan ym shah pyntieng ha ki jingbyrngem nuclear. Kaba lai, u la ban jur ba ka India kan ym pynïapher shuh hapdeng ki nongpynïaid jong ki lehnoh bad ki sorkar kiba kyrshan ïa ki, da kaba kyntait ïa ka jingpynïapher jong ka Pakistan hapdeng ki kynhun iada ri bad ki lehnoh. Da kaba kdew sha ki sienjam ba dang ïaid shakhmat ha ka pyrthei ban pynpaw pyrthei ïa ka bynta jong ka Pakistan ha kaba pynroi ïa ki kam lehnoh, hynriew tylli ki kynhun bapher bapher, kiba kynthup ïa ki nongïalam na ki seng saiñ pyrthei bapher bapher bad ki riew shemphang ha ka liang ka polisi bar ri, ki dang trei shitom ban pyni ïa ka dur ba shisha jong ka Pakistan sha ka pyrthei, u la bynrap.

U Modi u la ong ba ka Pakistan kam lah satia ban jop ha ka jingïakhun bad ka India, da kaba pynkynmaw ïa ki jingrem jong ka bunsien ha ki jingïaleh ba la dep. U la ban jur ba, haba ka khlem lah ban jop ha ki thma, ka Pakistan ka la pyndonkam slem bha ïa ki kam lehnoh kum ka atiar pyrshah ïa ka India, da kaba pyndonkam ïa ki kam thombor bad kyntiew ia ka kam pyntriem. U la pynbna ba ka Pakistan ka la khein poh ia ka jingkut jingmut jong ka India, da kaba pynpaw ba hapoh ka jingialam jong u, ka ri ka ieng skhem bad kam ju kylla. “Kano kano ka jingshah thombor jong ki lehnoh ïa ka India kan wanrah ïa ki jingma kiba khraw, ha kaba ka Pakistan kan siew ïa ka dor kaba heh bha—ba ka ban kit da ki shipai jong ka bad ka ïoh ka kot jong ka”, la ong u Modi.

U Myntri Rangbahduh u la pynpaw ba ynda la poi ha Bikaner, u la hiar ha ka kad liengsuiñ jong ka Nal, kaba ka Pakistan ka la pyrshang ban thombor hynrei kam shym la lah ban pynjulor eiei. U la pynpaw ba sha shiliang u pud u sam, ka jaka buh liengsuiñ jong ka Pakistan ha Rahim Yar Khan ka la hap ban khang noh la katto katne sngi namar ki jingther ba thikna jong ka India, kaba la ktah jur ïa ki jingtreikam jong ka. U Myntri Rangbahduh u la pynbna da kaba skhem ba kan ym don ka jingkhaii ne ka jingiakren bad ka Pakistan. U la ong ba kino kino ki jingiakren kin dei tang halor ha ka Kashmir kaba la bat da ka Pakistan. U la maham ba lada ka Pakistan ka dang bteng ban kyrshan ia ki lehnoh, kan sa iakynduh ia ka jingduhnong ha ka ioh ka kot. U la pynpaw biang ba ka India kan ym ailad ïa ka Pakistan ban ïoh ïa ka um bad ba ka jingïalehkai bad ka snam jong ka India kan wanrah ia ka jinglutksan kaba heh. “Kane ka jingkut jingmut ka dei ka jingkular jong ka India, kaba ym don kano kano ka bor ha ka pyrthei kaba lah ban pynkhih”, u la ban jur.

“Baroh ar ka jingshngain bad ka roi ka par ki long kiba donkam bha na ka bynta ban tei ia ka India kaba la kiew shaphrang”, la ban jur u Modi, da kaba bynrap ba kane ka jingthmu lah ban urlong tang ynda la pynkhlain ia man la ki bynta jong ka ri. U la pynpaw ba kane ka jingïalang ka long kum ka nuksa jong ka jingpyni ïa ka roi ka par kaba stet jong ka India. Haba pynkut ia ka jingkren jong u, u la ai khublei na ka ri jong ka jingshlur sha baroh kiba la don lang.

Ha kane ka sngi la ia donlang u Lat ka jylla u Haribhau Kisanrao Bagade, u Myntri Rangbah ka Rajasthan, u Bhajanlal Sharma, ki myntri ka sorkar pdeng u Ashwini Vaishnaw, u Arjun Ram Meghwal bad kiwei pat ki riew pawkhmat.

Ka Nongrim

Katkum ka jingkular jong u ban pynbha bad kyntiew beit ïa ki lad pynroi rel ha ka ri, u Myntri Rangbahduh u la plie ïa ki 103 tylli ki steshon Amrit ba la pynbha thymmai ha ki 86 tylli ki district ha kylleng ki 18 tylli ki Jylla bad Union Territory jong ka ri India ha ka jinglut kaba palat T.1,100 klur. Palat 1,300 tylli ki steshon ki dang pynbha thymmai da ki jingdonkam ba mynta, ba la shna khnang ban pyni ia kin rukom tei jingtei jong ka thain bad ban pynbiang ia ki jingdonkam jong ki nongleit nongwan hapoh ka skhim steshon Amrit Bharat. Ka steshon rel Deshnoke, kaba shakri ia ki nongleit jingleit bad ki nongjngohkai pyrthei kiba wan jngoh ia ka Temple Karni Mata nalor kiwei pat, la pynshong nongrim da ka jingshna ia ka temple bad ka phang pdeng jong ki arch bad column. Ka steshon rel Begumpet ha Telangana ka dei kaba la pynshong nongrim ha ka jingtei jong ka hima Kakatiya. Ha ka steshon Thawe ha Bihar la pyndonkam ia ki jingdro dur bapher bapher ha ki kynroh bad ki jingdro dur kiba pyni ia ka Maa Thawewali, kawei na ki 52 tylli ki Shakti Peetha bad kiba pyni ia ki jingdro jong ka Madhubani. Ka steshon Dakor ha Gujarat la pynshong nongrim ha u Ranchhodrai Ji Maharaj. Ia ki steshon Amrit ba la pynbha biang ha kylleng ka ri India bad ki pynïasoh lang ïa ki jingtei ba mynta bad ka kolshor, ki jingdonkam jong ki nongleit nongwan kynthup ïa kito na ka bynta ki briew ba don jing duna ha ki dkhot met bad ki rukom treikam kiba lah ban pynneh pynsah ban kyntiew ïa ka jingsuk ha ka leit ka wan.

Ka Indian Railway ka dang iaid sha ka jingpyndonkam bording 100% ha ka rynsan jong ka, kaba pynlong ia ka jingtreikam jong ki rel kaba kham sted bad ka bym ktah ia ka mariang. Ha kane ka nongrim, u Myntri Rangbahduh u la buh ïa u mawnongrim ia ka jingpynkylla sha ka jingpyndonkam da ka bording elektrik ha ka lynti rel Churu-Sadulpur (58 km) bad pynkyntang sha ka Jaidbynriew Suratgarh-Phalodi (336 km); Phulera-Degana (109 km); Udaipur-Himmatnagar (210 km); Pynpoi bording ia ka lynti rel Phalodi-Jaisalmer (157 km) bad Samdari-Barmer (129 km).

Ha ka jingkyntiew kaba khraw ia ki jingtei surok ha ka jylla, u Myntri Rangbahduh u la buh ia u mawnongrim ban shna ia ki 3 tylli ki Vehicle Underpass, ban pyniar bad pynkhlain ia ki surok bah jong ka Ri. Un aiti ruh ia 7 tylli ki projek surok ha Rajasthan. Ki projek surok, kiba shongdor palat T.4850 klur, kin pynsuk ia ka leit ka wan bad ka jingkit ia ki mar. Ki surok bah ki poi haduh u pud u sam jong ka Indo-Pak, kaba kyntiew ia ka bor pahara bad pynkhlain ia ki jingtei na ka bynta ka kam iada ri jong ka India.

Haba pynïaid shakhmat ïa ka jingpynpyniang bording ia baroh bad ka jingpyndonkam ia ki jait bording ba khuid, u Myntri Rangbahduh u la buh ïa u maw nongrim jong ki projek bording ba kynthup ïa ki projek solar ha Bikaner bad Nawa ha Didwana Kuchaman, bad ki Transmission System ban pynkynriah ïa ka bording Part B Power Grid Sirohi Transmission Ltd bad ka Part E Transmission Power Project Solar Grid Mewar Trsnsmission Ltd. Un plie paidbah ruh ia ki projek bording ba kynthup ia ka projek solar ha Bikaner, Transmission system for Evacuation of Power Grid Neemuch bad na ka Bikaner Complex , ka jingkyntiew ia ka lad pynpoi bording ha Fatehgarh-II Power Station ka ban ai ia ka bording kaba khuid bad ban pynduna ia ka jingmih jong ka carbon.

U Myntri Rangbahduh u la buh ruh ia u maw nongrim, u la plie bad aiti ia 25 tylli ki projek sorkar jylla kiba kongsan ha kylleng ka Rajasthan ban kyntiew ia ki jingtei, ka jingpyniasoh, ka jingpynbiang bording, ki jingshakri ha ka koit ka khiah, bad ka jingpynbiang um ha ka jylla. Kine ki kynthup ia ka jingbuh maw nongrim bad ka jingaiti sha ka ri ia ki projek ban pynbha bad maramot ia 12 tylli ki surok bah jong ka Jylla kiba don palat 750 km kaba shongdor palat T. 3,240 klur; ka jingpynheh shuh shuh hapoh ka prokram ka kynthup ia ka jingpynheh shuh shuh sa 900 km ki surok bah ba thymmai. U Myntri Rangbah u la plie ia ki projek bording ha Bikaner bad ha Udaipur. U la plie ruh ia ki Nursing College ha Rajsamand, Pratapgarh, Bhilwara, Dholpur ki ban don ka bynta kaba kongsan ban kyntiew ia ki jingtei na ka bynta ka koit ka khiah ha ka jylla. U la buh ruh ia u maw nongrim bad aiti sha ka ri ia ki projek pynbiang um bapher bapher ha ka thain kynthup ia ka projek pynpoi um ha ki jaka nongkyndong bad ka projek ban pynduna ia ka jingpang Fluorosis ha Jhunjhunu distrik, ka jingpynbeit thymmai ia ki skhim pynpoi um ha ki jaka sor ha 7 tylli ki nongbah jong ka Pali distrik hapoh ka AMRUT 2.0, bad kiwei kiwei.