প্রধানমন্ত্রীগী লোইশঙ
প্রধান মন্ত্রী শ্রী নরেন্দ্র মোদীনা বিহারগী মুখ্যমন্ত্রী মহিলা রোজগার য়োজনা হৌদোকখ্রে
থা অসিগী অহৌবদা ঐহাক্না জীবিকা নিধি ক্রেদিৎ কোওপরেতিব ফেদরেসন হৌদোক্নবা তাঞ্জা ফংখি, হৌজিক্তি থৌরাং অসিগী মতিক মুখ্যমন্ত্রী মহিলা রোজগার য়োজনাক পুনশিল্লগনি: প্রধান মন্ত্রী
মুখ্যমনত্রী মহিলা রোজগার য়োজনানা কেন্দ্র লৈঙাক্কী লাখপতি দীদী কেম্পেনবুসু মপাঙ্গল হাপ্লি: প্রধান মন্ত্রী
লৈঙাক্না নুপীশিংদা মীৎয়েঙ থম্লগা থৌরাং অমা পায়খৎপা মতমদা, মদুগী কান্নবা খুন্নাইগী অতোপ্পা শরুক্তসু ফংই, উজ্জ্বল য়োজনান কয়া য়াম্না অওনবা পুরকখি হায়বসি ঙসি মালেম পুমবনা উরি: প্রধান মন্ত্রী
স্বস্থ নারী, সশক্ত পরিবার অভিয়ানগী মখাদা হকশেলগী কেম্প লাখ ৪.২৫ হেন্না খুঙ্গং খুঙ্গংদা অমদি ময়োল্লমশিংদা পাঙথোক্তুনা ঈ ৱাৎপা, ব্লদ প্রেসর, দাইবেতিস অমদি কেন্সরনচিংবা অরুবা লায়নাশিংগী তেস্ত তৌরি: প্রধান মন্ত্রী
নুপীশিংনা মাঙদা চঙশিল্লক্লবা মতমদা, খুন্নাই পুম্বা মাঙদা চঙশিল্লকই: প্রধান মন্ত্রী
Posted On:
26 SEP 2025 1:00PM by PIB Imphal
প্রধান মন্ত্রী শ্রী নরেন্দ্র মোদীনা ঙসি ভিদিও কন্ফরেন্সিংগী খুত্থাঙদা বিহারগী মুখ্যমন্ত্রী মহিলা রোজগার য়োজনা হৌদোকখ্রে। থৌরমদুদা তিল্লিবা মীয়ামগী মফমদা ৱা ঙাংলদুনা, প্রধান মন্ত্রীনা নবরাত্রিগী শেংলবা থৌরম পল্লদুনা ময়ামগী মফমদা য়াইফ পাউজেল পীখি। মহাক্না ঙসি মুখ্যমন্ত্রী মহিলা রোজগার য়োজনা হৌদোকপগী থৌরমসিদা বিহারগী নুপীশিংনা হরাও তয়াম্বা মতমসিদা মখোয়গী মরক্তা তিনবদা হরাওবা ফোঙদোকখি। থৌশিল অসিদা নুপী লাখ ৭৫ শরুক য়াখ্রে হায়না শ্রী মোদীনা ফোঙদোকখি। হায়রিবা নুপী লাখ ৭৫ অসিগী মশা মশাগী বেঙ্ক একাউন্ততা অমুক্তদা লুপা ১০,০০০ হৌজিক্তা থাজিনখ্রে হায়না মহাক্না লাউথোকখি।
মসি চত্থরিঙৈদা মহাক্কী মফমদা ৱাখল অনিখক ফাওরকখি হায়না শ্রী মোদীনা হায়খি। অহানবদা, ঙসি অসি বিহারগী নুপী অমদি ইচানুপীশিংগী তশেংনা মশক থোকপা নুমিৎ অমনি হায়না মহাক্না হায়খি। নুপী অমনা থবক তৌবা অমদি মশানা থবক পীজবা মতমদা, মহাক্কী মঙলানগী মশা পাল্লকই অমদি খুন্নাইদা মহাক্কী ইকায়খুম্নবা হেনগৎলকই। অনিশুবদা, প্রধান মন্ত্রীনা লৈঙাক অসিনা জন ধন য়োজনা চহি তরামাথোইগী মমাঙদা হৌদোক্নবা ফিরেপ লৌরমদ্রবদি, নুপী করোর ৩০ না একাউন্ত হাংলমগদ্রগদি, অমদি একাউন্তশিং অদ মোবাইল ফোন অমদি আধারগা লিঙ্ক তৌরমদ্রগদি ঙসি অসিগুম্বা ফন্দশিং উঅসি মখোয়গী একাউন্ততা হকথেংননা ত্রান্সফর তৌবা য়ারম্লোই হায়খি। ইনফ্রাস্ত্রকচর অসি লৈরমদ্রবদি শেল অদু লমখাঙদা মাঙখিদুনা, বেনিফিসরীশিংদা অচৌবা লংজবা অমা ওইরমগনি হায়খি।
মবুং অমনা মহাক্কী মচলনুপী মশা ফনা, নুংঙাই য়াইফনা, অমদি মহাক্কী ইমুং শেল থুম ৱাত্তনা লৈরবা মতমদা অশেংবা নুংঙাইবা হায়বদু ওই হায়না প্রধান মন্ত্রীনা ফোঙদোকখি। মবুং অমনা অসিগুম্বা নুংঙাইবা অসি ফংহন্নবা মহাক্না হেক ঙমবমখৈ হোৎনৈ। ঙসি মবুং অনিই, মহাক মশা অমদি শ্রী নিতিস কুমারনা বিহারগী নুপীশিংগী থৌগল, নুংঙাই য়াইবা অমদি ইকায়খুম্নবা ফংহন্নবগীদমক থবক পায়খৎলি। ঙসিগী থৌরম অসি খোঙফম অসিগী খুদম অমনি হায়না প্রধান মন্ত্রীনা ফোঙদোকখি।
মুখ্রমন্ত্রী মহিলা রোজগার য়োজনা অসি মহাক্কী মফমদা পুখৎলকপা মতমদা মদুগী পান্দম্না মহাকপু পেলহনখি হায়রদুনা, প্রধান মন্ত্রীনা ইমুং খুদিংমক্তা স্কীম অসিগী মখাদা য়ামদ্রবদা নুপী বেনিফিসরী অমমমদি লৈহন্নবা ৱাফম থমখি। অহৌবগী ওইনা লুপা ১০,০০০ গী শেলগী তেংবাংগা লোয়ননা স্কীম অসিনা এন্তরপ্রাইজ অদুনা মায় পাকপগী মখা পোন্না লুপা লাখ ২ ফাওবা ফংহল্লি। শ্রী মোদীনা মীপুম খুদিংদা থৌশিল অসিনা কোনশিল্লিবা পাক চাউবা অসি খন্দুনা য়েংনবা ৱাফম থমখি। বিহারগী নুপীশিংনা হৌজিক্তি গ্রোসরী, কোল লিক, কোস্মেতিক, শান্নপোৎ, অমদি চে-কলম য়োনবা দুকান হাংবা ঙম্লগনি। মখোয়না শা-শন লোইবা নৎত্রগা ঙানু য়েং লোইবসু য়ারগনি। পুম্নমক অসিগী মথৌ তাবা ত্রেনিংসু পীগদৌরি। বিহারদা সেল্ফ-হেল্প গ্রুপ লাখ ১১ রোমগী অকনবা নেতৱর্ক অমা ইচঙ থৌনা মথৌ তৌরি। মসিনা তাকপদি নীংথিনা শেমগৎ শাগৎলবা সিস্তেম অমা লৈরে হায়বনি। “থা অসিগী অহৌবদা ঐহাক্না জীবিকা নিধি ক্রেদিৎ কোওপরেতিব ফেদরেসন হৌদোক্নবা তাঞ্জা ফংখি, হৌজিক্তি থৌরাং অসিগী মতিক মুখ্যমন্ত্রী মহিলা রোজগার য়োজনাক পুনশিন্দুনা স্কীম অসিবু বিহার শিনববা থুংনা হেক হৌবদগী হৌনা ইথিল পীবা ঙমহল্লগনি,” হায়না প্রধান মন্ত্রীনা ফোঙদোকখি।
মুখ্রমন্ত্রী মহিলা রোজগার য়োজনানা কেন্দ্র লৈঙাক্কী লাখপতি দীদী কেম্পেনবু হেন্না মপাঙ্গল কনখৎহল্লে হায়রদুনা, শ্রী মোদীনা কেন্দ্র লৈঙাক্না লৈবাক শিন-থুংনা লাখপতি দীদী করোর ৩ শেমগৎনবা পান্দম অমা থম্লি, অমদি নুপী করোর ২ রোমদি মসি য়ৌবা ঙম্লে হায়খি। মখোয়গী শুবা নোম্বা কনবা মতৌনা খুঙ্গং কয়াদা অওনবা পুরক্লি অমদি খুন্নাইবু শেমদোক্লি। বিহারদসসু, নুপী লাখ কয়া লাখপতি দীদী ওইরে হায়না প্রধান মন্ত্রীনা হায়খি। কেন্দ্র অমদি স্তেত্তা লৈঙাক্না থৌশিল অসি খুমাঙ চাওশিনহল্লিবা অসিনা, বিহারদা লৈবাকসিগী ওইনা মশিং খ্বায়দগী য়াম্না লাখপতি দীদী লৈরক্কদবা নুমিৎ অদু কুইররোই হায়না মহাক্না ফোঙদোকখি।
শ্রী মোদীনা মুদ্রা য়োজনা, দ্রোন দীদী কেম্পেন, বিমা সখি কেম্পেন, অমদি বেঙ্ক দীদী কেম্পেনগুম্বা কেন্দ্র লৈঙাক্কী থৌশিলশিংনা নুপীশিংগী থবক পীনবগী অমদি মশানা মশাবু থবক পীজনবা খুদোংচাবা হেনগৎহল্লি হায়খি। হোৎনরিবশিং অসিগী মরুমদা লৈরিবা অমত্তা ঙায়রবা পান্দমদি নুপীশিংবু খ্বায়দগী য়াম্না খুদোংচাবা ফংহন্দুনা মখোয়গী মঙলান মঙফাওনহনবনি হায়খি।
কেন্দ্র লৈঙাক্কী থৌরাংশিংনা লৈবাক শিন-থুংনা নুপী অমদি ইচানুপীশিংগী অনৌবা সেক্তরশিং পুরক্লি হায়রদুনা, প্রধান মন্ত্রীনা ঙসি মশিতং য়াম্লবা নহা ওইরিবী নুপীশিংনা আর্ম্দ ফোর্স অমদি পুসিলতা য়াওরি, অমদি ফাইতর জেত ফাওবা পাইরি হায়খি। অদুম ওইনমক, মহাক্না বিহারদা ওপোজিসনগী লৈঙাক মখাদা – লেন্তর্নগী লৈঙাক মখাদা লৈরম্বা মতমদু কাউদনবা ৱাফম থমখি। মতমদুদা, বিহারগী নুপীশিংনা আইন লৈতবা অমদি শেঞ্জা থুমজাগী চৈথেং নংলম্মি। বিহারগী মরুওইবা লম্বীশিং কায়রম্মি, থোং মতিক চানা লৈরমদে, অমদি নুপীশিং ইনফ্রাস্ত্রকচর ফত্তবনা মরম ওইরগা অৱাবা মায়োক্নরম্মি। ঈচাও মতমদা, মীরোনবী নুপীশিংনা মতম চানা লায়েংশঙ য়ৌবা ঙমদবগী অমদি মরুওইবা ফীভমদা মতিক চাবা লায়েং ফংদবগী অৱাবা মায়োক্নরম্মি। নুপীশিং অসিবু অসিগুম্বা ফীভম অসিদগী পুথোরকখিবা অসি মহাক্কী লৈঙাক্ননি হায়না প্রধান মন্ত্রীনা ফোঙদোকখি। কেন্দ্র অমদি স্তেত অনিমক্তা মখোয়গী লৈঙাক লাক্লবা মতমদা, বিহারগী লম্বী শেম্বগী খোঙজেল য়াঙ্খৎলকখি। বিহারগী লম্বী-থোং ফগৎহন্নবগী থৌরাং হৌজিক পায়খৎলি, অমদি শেমগৎ শাগৎলিবশিং অসিনা স্তেত অসিগী নুপীশিংগী পুন্সি ফনা নীংথিনা নুংঙাইহল্লগনি হায়না মহাক্না মখা তাখি।
বিহারদা হৌজিক পাঙথোক্লিবা একজিবিসন অমগী মরমদা মহাক্না পাউ তারে হায়রদুনা, শ্রী মোদীনা একজিবিসন অসিনা অরিবা পাউ-চেশিংগী হেদলাইন উত্তুনা বিহারদা ওপোজিসনগী লৈঙাক লৈরিঙৈ মতমদা অকিবগী ফীভম অমা লৈরম্বা মতমবু নীংশিংহল্লি হায়খি। মতমদুদা ইমুং অমত্তা শাফনা লৈরমদে, অমদি নক্সলাইতকী হিংশাগী অকিবশিং য়েংশিনবিনবা লৈরমদে। অদুগুম্বা মতমদুদা নুপীশিংনা খ্বায়দগী চাউবা চৈনা খাঙলম্মি। লায়রবা ইমুংদগী হৌরগা দোক্তর অমসুং IAS ওফিসর ফাওবগী ইমুংশিং অমত্তা ওপোজিসনগী লুচিংবশিনা চত্থবা মীওই মীনৈদগী নান্থোকপা ঙম্লমদে।
শ্রী নিতিস কুমারগী লুচিং মখাদা, বিহারদা রুল ওফ লো হঞ্জিনহল্লকখি, অমদি নুপীশিংনা অওনবা অসিদগী মপুং ওইনা কান্নবা ফংলি হায়রদুনা, শ্রী মোদীনা বিহারগী ইচানুপীশিংনা হৌজিক্তি মখোয়গী ময়ুমদগী অকিবা লৈতনা মপান্দ থোকপা ঙম্লে অমদি নুমিদাং অথেঙবা ফাওবা মনিং তম্না থবক তৌবা ঙম্লে হায়খি। মহাক্না বিহারদা লাকপা মতমদা নুপী পুলিস মশিং য়াম্না মথৌ তৌরম্বা উবদা অপেনবা ফোঙদোকখি। মহাক্না পুম্নমক্কী মফমদা বিহারবু মমাঙথক্কী অমম্বা মতমদা অমুক হন্না হঞ্জিনহল্লক্তনবা ৱাশকপিয়ু হায়খি।
লৈঙাক্না নুপীদা মীৎয়েঙ থম্লবা থৌরাং অমা য়াৎপা মতমদা মদুগী কান্নবা খুন্নাইগী অতোপ্পা শরুক্তসু ফংলিবনি হায়রদুনা, প্রধান মন্ত্রীনা হৌজিক মালেমগী ওইনা শকখঙনরবা উজ্জ্বল য়োজনাবু অসিগুম্বা অওনবা পুরকপগী মপাঙ্গল কল্লবা খুদম অমনি হায়খি। খুঙ্গংগী লমদা গ্যাস কন্নেক্সন অমা লৈববু খুৎনা লাম্বা ফংদবা মঙলান অমগুম লৌনরম্বা মতম অমা লৈরম্মি হায়না মহাক্না হায়খি। শ্রী মোদীনা মখা তানা মতৌ করম্না লায়রবা ইমা, ইচে-ইচলশিং, অমদি ইচানুপীশিংনা মখোয়গী পুন্সি মৈখুনা চুরবা চাকখুমদা লোক খুরগা লৈরম্বা লংগী লায়না মপুং ওইনা নানরম্বা অমদি মীৎ ফাওবা উশিল্লক্তবগী ফীভম লৈরম্মি হায়বা নীংশিংখি। বিহারদা, নুপীশিংগী পুন্সি শিং থিবখক্তদা লোইরম্মি। নোংজুগী মতমদা, শিং মৈ থাবদা চাক্তবা, ঈচাও মতমদা শিং লুপখিবা কয়ানা হেন্না ৱাহনখি। মতম কয়া অমদি অঙাংশিংনা চাকখাও হাংনা তুমখি নৎত্রগা চেঙপাক চারগা পুন্সি লেল্লকখি হায়না মহাক্না ফোঙদোকখি।
অসিগুম্বা অৱা অনাশিং অসি লাইরিক্তা ইবা নত্তে, মসি বিহারগী নুপীশিংনা থেংনদুনা লাক্লবনি হায়না প্রধান মন্ত্রীনা হায়খি। লৈঙাক্না নুপীশিংদা মীৎয়েঙ থম্লবা খুজিল থৌরাং য়াৎলকপা মতমদা, অসিগুম্বা ফীভম অসি হোংবা হৌরকখি। য়ুমথোঙ করোর কয়াদা গ্যাস কন্নেক্সন ফংহনখি। ঙসিদি নুপী করোর কয়ানা গ্যাসস স্তোবদা ইংনা-চিক্না চাক থোংলে, মৈখু চেন্দ্রে, অমদি নীংশা হোনবা নুংঙাইতবা অমদি মীৎ উদবগী ফীভম লৈত্রে। য়ুমদা অঙাংশিংনা নুমিৎ খুদিং চাক অশাবা চাবা ফংলে। উজ্জ্ল গ্যাস কন্নেক্সন্না বিহারগী চাকখুমদা মঙাল পীবখক নত্তনা নুপীশিংগী পুন্সিদা অহোংবসু পুরক্লে হায়না প্রধান মন্ত্রীনা ফোঙদোকখি।
মীয়াম্না থেংনরিবা খুদোংচাদবা খুদিংমক্কী পাম্বৈ পুথোকপনা লৈঙাক্কী থৌদাংনি হায়রদুনা, শ্রী মোদীনা কোবিদ-১৯ লাইচৎকী শিংনবনা থল্লবা মতমদুদা, লৈঙাক অসিনা লেম্বা চেঙ হৱায় পীননবা স্কীম অমা হৌদোকখি। মদুনা পীরিবা চাউরবা মতেঙ অদু উরগা থৌশিল অদু মখা চত্থনবা ফিরেপ লৌখি। ঙসি, পি.এম. গরিব কলয়ান অন্ন য়োজনাগী মখাদা বিহারগী লায়রবা মীওই করোর ৮.৫ না লেম্না চেঙ হৱায় ফংলি। স্কীম অসিনা মীয়ামগী খুদোংচাদবা নীংথিনা কোকহল্লে হায়খি। অতোপ্পা খুদম অমা পল্লদুনা, বিহারগী চাউরবা শরুক অমনা উস্না চেঙ পাম্নৈ হায়খি। মমাঙদা ইমা অমদি ইচে ইচলশিংদা অরৱা চেঙ লৈঙাক্কী রাসনগী খুত্থাঙদা ফংহল্লম্মি, অমদি মদুবু উস্না চেঙগা কৈথেলদা ওন্নরম্মি, মদুদা অরৱা চেঙ কেজি ২০ পুবদা উস্না চেঙ কেজি ১০ খক্তমক ফংলম্মি। লৈঙাক্না ফীভম অসিবু হকচিন্না লৌদুনা, হৌজিক্তি রাসন সিস্তেমগী খুত্থাঙদা হকথেংননা উস্না চেঙ পীবা হৌরে হায়না প্রধান মন্ত্রীনা ফোঙদোকখি।
শ্রী মোদীনা মহৌশানা ভারত্তা লন-থুম অসি, য়ুম, দুকান, নৎত্রগা লমবু ওইরবসু নুপাগী মিংদা পান্নৈ হায়খি। প্রধান মন্ত্রী অৱাস য়োজনা হৌদোকখিবদগী অনৌবা প্রোভিজন অমনা ইমা, ইচে ইচল অমদি ইচানুপীশিংনা য়ুমগী মপু ওইহল্লে। পি্এম্ অৱাস য়ুম লাখ ৫০ হেন্না বিহারদা শাখ্রে, অমদি মখোয় অয়াম্বা নুপীশিংনা য়ুম্বু ওইমিন্নরি হায়রদুনা, প্রধান মন্ত্রীনা নুপীশিংনা হৌজিক্তি মখোয়গী ময়ুমগী য়ুম্বু ওইজরে হায়খি।
নুপীগী হকচাঙ শোকচিল্লকপনা, ইমুং পুম্বা শোকহল্লি হায়রদুনা, শ্রী মোদীনা নুপীশিংনা অনাবা তুমিন্না খাঙদুনা লঅরম্বা ইমুং মনুংগী শেলথুম মখোয়গী লায়েংবদা শোকহন্নিংদনা খাঙজিন্দুনা লৈরম্বা মতম নীংশিংখি। অয়ুস্মান ভারত য়োজনানা ফীভম অসিগী পাম্বৈ পুরক্তুনা বিহারগী নুপী লাখ কয়াদা লুপা লাখ ৫ ফাওবগী লেম্না লায়েংবা ফংহল্লে। প্রধান মন্ত্রী মাত্রু বন্দনা য়োজনাগী মখাদা শেলগী তেংবা মীরোনবী নুপীশিংগী বেঙ্ক একাউন্ততা হকথেংননা ফংহল্লি হায়না প্রধান মন্ত্রীনা ফোঙদোকখি।
মীয়ামগী মরুওইনা নুপীশিংগী হকশেলদা লৈঙাক্না খ্বায়দগী মরুওইবা মীৎয়েঙ থম্লি হায়রদুনা, প্রধান মন্ত্রীনা বিস্বকর্ম জয়ন্তি নুমিৎ সেপ্তেম্বর ১৭, ২০২৫ দা স্বস্থ নারি, শসক্ত পরিবার অভিয়ান কৌবা অচৌবা থৌশিল অমা হৌদোকখ্রে হায়খি। কেম্পেন অসিগী মখাদা, খুঙ্গং অমদি ময়োল্লম শিন-থুংনা হেল্থ কেম্প লাখ ৪.২৫ হেন্না পাঙথোকখ্রে। কেম্পশিং অসিদা এনেমিয়া, ব্লদ প্রেসর, দাইবেতিস, অমদি কেন্সরনচিংবা অরুবা লায়নাশিংগী চাংয়েং তৌরি। নুপী করোর অমা হেনবনা থৌশিল অসিগী খুত্থাঙদা হেল্থ চেক-অপকী খুদোংচাবা ফংখ্রে হায়রদুনা শ্রী মোদীনা বিহারগী নুপী পুম্নমক্না কেম্পশিং অসিদা চত্তুনা মখোয় মশা য়েংথোক্নবা ৱাফম থমখি।
কুমহৈ হরাওগী মতম্নি, নবরাত্রি তৌরি, দিৱালীসু য়ৌরক্কদৌরে, অমদি ছথ পুজাসু কুইদ্রে হায়রদুনা, শ্রী মোদীনা মতম অসিদা নুপীশিংনা কমদৌনা ইমুংগী শেলথুম পানগনি অমদি খরা লেমহৌনবা হোৎনগনি খল্লি হায়বা ৱাফম থমখি। পোৎলম অসি কোকহন্নবা, লৈঙাক অসিনা লৈবাক শিনবা থুংনা সেপ্তেম্বর ২২, ২০২৫ দগী GST রেত হন্থদুনা অচৌবা থৌরাং পায়খৎলে। মসিগী মহৈনা নুমিৎ খুদিং শীজিন্নবা তুথপেস্ত, সাপোন, শেম্পু, ঘী, অমদি চীঞ্জাক্কী পোৎলমশিং, লোয়ননা কুমহৈ হরাও মতমদা শেৎ চানবা ফিরোল অমসুং খোঙউপশিংগী মমল হন্থরে হায়খি। প্রধান মন্ত্রীনা খোঙথাং অসিনা নুপীশিংনা ইমুং মনুংগী শেল থুম শিন লাংবদা অমদি চাকখুম পানবদা চাউনা মতেঙ ওইরগনি হায়খি। নুপীশিংদগী পোৎলুম অসি হন্থহন্দুনা অমদি মখোয়গী মায়থোঙদা কুমহৈ মনুংদা হরাও নুংঙাইবগী মমি তাহনবা হায়বসি কেন্দ্রদা লৈরিবা মখোয়গী লৈঙাক্কী থৌদাংন অমদি মখোয়না মসিবু লুম্না লৌই হায়না মহাক্না মখা তানা ফোঙদোকখি।
বিহারগী নুপীশিংদা অসিগুম্বা খুদোংচাবশিং অসি হেক ফংহনবদা, মখোয়না মখোয়গী থৌনা অমদি হনবা লৈত্রবা মতিংনা অওনবা পুরকই হায়রদুনা, প্রধান মন্ত্রীনা নুপীশিংনা খুমাঙ চাওশিনবনা খুন্নাই পুম্বদা চাওখৎপা পুরকই হায়খি। মহাক্না বিহারগী মীয়ামদা মুখ্যমন্ত্রী মহিলা রোজগার য়োজনা হৌদোকপগী নুংঙাইবা ফোঙদোকপগা লোয়ননা মহাক্কী ৱারোল লোইশিনখি।
বিহারগী মুখ্য মন্ত্রী শ্রী নিতিস কুমার, কেন্দ্র মন্ত্রী শ্রী রাজিব রঞ্জন সিংহসু অতৈ মীথুংশিংগা লোয়ননা থৌরমদুদা শরুক য়াখি।
বেকগ্রাউন্দ:
প্রধান মন্ত্রী শ্রী নরেন্দ্র মোদীনা বিহারগী মুখ্যমন্ত্রী মহিলা রোজগার য়োজনা ঙসি ভিদিও কন্ফরেন্সিংগী খুত্থাঙদা হৌদোকখি। থৌরম অদুদা প্রধান মন্ত্রীনা বিহার শিন থুংনা নুপী লাখ ৭৫ গী একাউন্তশিংদা লুপা ১০,০০০, পুন্না লুপা করোর ৭,৫০০ থাখি।
বিহার লৈঙাক্কী স্কীম অসিনা নুপীশিংবু আত্মনিরভর ওইহন্নবা অমদি নুপীশিংবু মশানা মশাবু থবক পীজব অমসুং হিংনবগী লম্বী পীদুনা মপাঙ্গল হাপ্নবা পান্দম থম্লি। মসিনা স্তেত অসিগী নুপীশিংবু থবক পীজনবা অমদি মশানা পামজবা লমদা হিংনবা লম্বী য়াৎচবা ঙমহন্দুনা শেন্মিৎলোনগী মনিং তম্বা অমদি খুন্নাই মপাঙ্গল কনখৎহন্নবা ইমুং খুদিংদগী নুমী অমমমদা শেলগী মতেঙ পীগনি।
স্কীম অসিগী মখাদা, বেনিফিসরী অমমম্না অহানবগী ওইনা দাইরেক্ত বেনিফিত ত্রান্সফরগী খুত্থাঙদা লুপা ১০,০০০ গী গ্রান্থ ফংহনগনি, অদুগা মতুং তারকপদা লুপা লাখ ২ ফাওবগী শেলগী তেংবাং ফংবা য়াহল্লি। তেংবাং অসি বেনিফিসরীশিংনা লৌউ-শিংউ, শা-শন য়োকপা, খুৎশা হৈবগী লম, ফি তুবা, ফি শাবা, অমদি স্মোল স্কেল এন্তরপ্রাইজ য়াওনা মখোয়গী অপাম্বা লমদা শীজিন্নবা য়াহল্লি।
স্কীম অসি মীয়াম্না থৌদুনা পুবা ওইহন্দুনা, শেলগী তেংবাংগা লোয়ননা সেল্ফ হেল্প গ্রুপশিংগা শম্নবা রিসোর্স পর্সনশিংনা মখোয়না পায়খৎলিবা থবকশিংদা ত্রেনিং পীগনি। মখোয়গী পোত্থোকশিং য়োনবদা ঙাক্লৌ ওইননা, স্তেত অসিদা গ্রামিন-হাত-বজারশিং শেমগৎকদৌরি।
মুখ্যমন্ত্রী মহিলা রোজগার য়োজনা হৌদোকপা অসি স্তেত, দিস্ত্রিক্ত, ব্লোক, ক্লস্তর, অমদি খুঙ্গংগী থাক্তা স্তেত পুম্বগী ওইবা থৌরম পাঙথোক্তুনা নুপী করোর ১ হেনবনা শরুক য়াখি।
***
(Release ID: 2171895)
Visitor Counter : 19
Read this release in:
Odia
,
English
,
Urdu
,
Marathi
,
हिन्दी
,
Assamese
,
Bengali-TR
,
Bengali
,
Punjabi
,
Gujarati
,
Tamil
,
Telugu
,
Kannada
,
Malayalam