প্রধানমন্ত্রীগী লোইশঙ
প্রধান মন্ত্রী শ্রী নরেন্দ্র মোদীনা মনিপুরগী ইম্ফালদা লুপা করোর ১,২০০ হেনবগী তোঙান তোঙানবা চাউখৎ-থৌরাংগী প্রোজেকশিং শঙ্গাখ্রে
মনিপুর ইমা ভারতকী লুহুপকী তম্ফানি: প্রধান মন্ত্রী
ঐখোয়না মখা তানা মনিপুর তুংকোইবা শান্তি অমসুং চাউখৎপগী লম্বীদা পুরক্কদবনি: প্রধান মন্ত্রী
নেতাজি সুভাসনা মনিপুর অসি ভারতকী নিংতম্বগী থোঙ্গালনি হায়খি, লমদম অসিগী অথৌবা কয়া থোকখি। ঐখোয়গী সরকারনা, মনিপুরগী অসিগুম্বা শক্নাইরবা মীওই খুদিংমক্তগী ইথিল ফংলি, মাঙলোমদা চঙশিল্লি: প্রধান মন্ত্রী
মনিপুরদা শান্তি অমসুং তুংদু-লৈতাবা পুরক্নবা সরকারনা থবক পায়খৎলি: প্রধান মন্ত্রী
ঙসি নেপালদা শ্রীমতি সুসিলা জিনা মরক্কী সরকারগী প্রধান মন্ত্রীগী ফম পায়খিবদা, ভারতমচা করোর ১৪০ গী মহুৎশীন্দুনা ঐনা থাগৎপা ফোঙদোকচরি, মহাক্না নেপালদা শান্তি, তুংদু-লৈতাবা অমসুং নুংঙাই-য়াইফবগী লম্বী য়াৎকনি হায়না ঐনা থাজৈ: প্রধান মন্ত্রী
মনিপুরদা খুদোংচাবা কয়া মরাংকাইনা লৈরি অমসুং চীঙ অমসুং তম্পাক্কী মরক্ত নুংশিনবগী অকনবা থোঙ অমা শানবা ঐখোয়না মখা তানা ৱারি শানবা হেনগৎহনগদবনি: প্রধান মন্ত্রী
Posted On:
13 SEP 2025 5:04PM by PIB Imphal
ঙসি প্রধান মন্ত্রী শ্রী নরেন্দ্র মোদীনা মনিপুরগী ইম্ফালদা লুপা করোর ১,২০০ হেনবগী তোঙান তোঙানবা চাউখৎ-থৌরাংগী প্রোজেকশিং শঙ্গাখ্রে। থৌরম অদুদা ৱা ঙাংবদা প্রধান মন্ত্রীনা হায়খি ঙসি মনিপুরগী চাউখৎ-থৌরাংগীদমক লুপা করোর লিশিং কয়াগী প্রোজেকশিং শঙ্গারে অমসুং হৌদোক্লে। প্রোজেকশিং অসিনা লমদম অসিদা মীয়াম হিংবদা লাইবা হেনগৎহনগনি অমসুং ইনফ্রাষ্ট্রকচর ফগৎহনগনি। মনিপুরগী নহারোলশিংগী অনৌবা থবকশিং ফংনবা খুদোংচাবশিং পীরগনি।
প্রধান মন্ত্রীনা হায়খি ঙসি হৌদোকখিবা প্রোজেকশিংগী মনুংদা লুপা করোর ৩,৬০০ হেনবগী ‘মনিপুর অর্বান রোদস প্রোজেক’ অমসুং লুপা করোর ৫০০ গী ‘মনিপুর ইনফোতেক দিবলপমেন্ত প্রোজেক’ য়াওরি। প্রোজেকশিং অসিনা ইম্ফালদা লম্বীগী ইনফ্রাষ্ট্রকচর ফগৎহনগনি অমসুং মনিপুরগী অফবা তুংলমচত্ত অনৌবা থৌনা হাপকনি। নৌনা হৌদোক্লিবা প্রোজেকশিং অসিগীদমক মহাক্না মনিপুরগী মীয়ামদা য়াইফ পাউজেল পীখি।
প্রধান মন্ত্রীনা হায়খি নিংতম্বা ফংলবা মতুংদা লৈবাক অসিগী নোংচুপ অমসুং খা থংবা শরুকশিং চাউখৎলকখি অমসুং অনিংবশিং থুংনবা মফমশিং ওইরকখি। হায়রিবা লমদমশিং অসিগী নহারোলশিং অনৌবা খুদোংচাবশিং ফংখি। ২১শুবা চহিচা অসি নোংপোক অমসুং অৱাং-নোংপোক্কীনি। মনিপুর চাউখৎনবা ভারত সরকারনা লেপ্তনা হোৎনরি অমসুং মসিগী ফল ওইনা মনিপুর চাউখৎপগী চাং য়াংনা হেনগৎলক্লি। ২০১৪ গী মমাঙদা মনিপুরগী চাউখৎপগী চাং চাদা ১ ওইখি। ঙসিদি মনিপুর হান্নদগী শরুক কয়া হেন্না চাউখৎলে। মনিপুরদা ইনফ্রাষ্ট্রকচর চাউখৎপগী অনৌবা তাঙ্কক অমা হৌরে। মনিপুরদা লম্বী অমসুং নেসনেল হায়ৱে শেমগৎপগী খোঙজেল শরুক কয়া হেনগৎলে। খুঙ্গং খুদিংমক্ত লম্বী-থোঙগী ফিবম ফগৎনবা থবকশিং য়াংনা পায়খৎলি। ইম্ফাল অসি খুদোংচাবা কয়া লৈবা সহর অমনি। ভারতকী চাউখৎলবা সহরশিংগী মনুংদা ইম্ফালসু সহর অমা ওইনবা মহাক্না পান্দম থম্লি অমসুং মসিনা নহারোলশিংগী মঙলানশিং মঙফাওনবা ঙমগনি অমসুং লৈবাক অসিগী চাউখৎপা য়াংখৎহনগনি। পান্দম অসিগী মখাদা, স্মার্দ সিতি মিসনগী মখাদা ইম্ফালদা প্রোজেক কয়া লোইশিনখ্রে। লুপা করোর চা কয়াগী অতোপ্পা প্রোজেকশিং য়াংনা পায়খৎলি।
প্রধান মন্ত্রীনা হায়খি ইম্ফাল নত্ত্রগা মনিপুরগী অতোপ্পা মফমশিং ওইগেরা, ষ্টার্দঅপশিং অমসুং তেক্নোলোজিদা য়ুম্ফম ওইবান উদ্যোগশিংগী অনৌবা খুদোংচাবা কয়া লৈরে। আই.তি স্পিসিএল ইকোনোমিক জোন্না মখা তানা খুদোংচাবশিং পীগনি অমসুং জোন অসিগী অহানবা বিল্দিং শাবা লোইশিনখ্রে। মতম কয়াগী মমাঙদগী অনৌবা সিবিল সেক্রেতরিয়েত বিল্দিং অমা শানবা তকশিন্দুনা লাকপনি। হৌজিক বিল্দিং অসি শাবা লোইরে অমসুং অনৌবা বিল্দিং অসিনা লৈবাক ঙাকপদা ‘নাগরিক দেবোভাবা’ গী ৱাখল্লোনদা অনৌবা থৌনা হাপ্লগনি। কোলকাতা অমসুং দিল্লিদা য়াম্না তোইনা চৎলিবা মনিপুরগী মীওই কয়াগী খুদোংচানবা, সহরশিং অসিদা মনিপুর ভবনশিং শারে। হায়রিবা ভবনশিং অসিনা মনিপুরগী ইচানুপীশিংদা মতেং য়াম্না ওইগনি। অঙাংশিং অশোই-অঙাম থোক্তবা মতমদা, য়ুমদা লৈহৌরিবা মমা-মপাশিং লৈতাগনি।
প্রধান মন্ত্রীনা হায়খি মীয়াম্না মায়োক্নরিবা অৱাবশিং কোকহন্নবা সরকারনা মিকুপ-নাহুম শিংনা থবক পায়খৎলি। মনিপুরগী মফম কয়া ঈশিং ইচাউগা মরী লৈনবা অৱাবা কয়া মায়োক্নে হায়বা খঙলে। মসিগী অৱাবা অসি কোকহন্নবা তোঙান তোঙানবা প্রোজেকশিংদা সরকারনা থবক পায়খৎলি।
প্রধান মন্ত্রীনা হায়খি মনিপুর অসি ইমাশিং অমসুং ইচলশিংনা শেন্মিৎলোন্দা মাঙজিল থাবা রাজ্য অমনি। ইমা কৈথেল অসিনা মসিগী ময়েক লারবা খুদমনি। নুপীশিংগী ফিবম ফগৎহনবা অসিনা ভারত চাউখৎনবা অমসুং অত্মানির্ভর ভারত অমগী পান্দমগীদমক মরুওইবা য়ুম্বী অমনি হায়না খল্লি। মসিগী ইথিল অসি মনিপুরদা ময়েক শেংনা উবা ফংলি। হৌজিক্কী সরকার অসি শেম্লবা মতুংদা, নুপীশিংগীদমক ইমা কৈথেলশিং ফম্বা হৌখি। ঙসি অনৌবা ইমা কৈথেল মরি শঙ্গাবদা মহাক হরাওবা ফাওই অমসুং কৈথেলশিং অসিনা মনিপুরগী নুপীশিংদা চাউনা মতেং পাংগনি।
প্রধান মন্ত্রীনা হায়খি মীওই খুদিংমক্কী পুন্সি হিংবদা লাইহনবা হায়বসি সরকারগী পান্দমনি। লমদম অসিদা পোৎ-চৈ পুরকপদা খুদোংচাদবা কয়া মায়োক্নবা মতমশিং মনিপুরনা থেংনখ্রে। মতম অমদা পোৎ-চৈ খুদিংমক ইচম চম্বা ইমুংশিংনা ফংবা ঙম্বগী ৱাংমদা লৈখি। চহি খর অসিদা, হায়রিবা হান্নগী খুদোংচাদবশিং অদু লাকশিন্নবা ঐখোয়গী সরকারনা মনিপুরগী মতেং পাংলে। শেন তুংশিনবা হেনগৎহনবা অমসুং মীয়ামগী পুন্সি নুংঙাইহনবা ঐখোয়গী সরকারনা পাম্মী। ঐখোয়গী সরকারনা জি.এস.তি মপুংফানা হন্থরে, মসিনা মনিপুরগী মীয়ামদা কান্নবা শরুক অনি ফংলগনি। নুমিৎ খুদিংগী শীজিন্নরিবা পোৎলমশিং হায়বদি-সাপোন, শম্পু, কোক তৈনবা থাউ, ফিরোলশিং অমসুং খোঙউপশিং হৌজিক মমল হোংনা ফংলগনি। সিমেন্ত অমসুং অতোপ্পা য়ুম শাবদা শীজিন্নবা পোৎলমশিংগী মমল হন্থরগনি। হোতেলশিং অমসুং অচা-অথকশিংদা জি.এস.তি হন্থরে। মসিনা গেষ্ট হাওস মপুশিং, তেক্স চেল্লিবশিং অমসুং লম্বী মতাইদা অচা-অথক য়োল্লিবশিংদা কান্নবা পীরগনি অমসুং মসিনা লমদম অসিদা তুরিজম চাউখৎহনবদা মতেং পাংলগনি।
প্রধান মন্ত্রীনা হায়খি মনিপুরগী চহি লিশিং কয়াগী ইনাকখুল্লবা নাৎকী পুক্কৈ অমা লৈরি। লমদম অসিগী নাৎকী মরাশিং য়াম্না লুই অমসুং মপাঙ্গল কল্লি। মনিপুর অসি ইমা ভারতকী লুহুপকী তম্ফানি। মনিপুরগী চাউখৎপগী মমি লেপ্তনা ফগৎহনবা দরকার ওই। মনিপুরদা থোক্লিবা মখল খুদিংমক্কী হিংশা অসি লাইবক থিবনি অমসুং অসিগুম্বা হিংশা অসিনা ঐখোয়গী ইপা-ইপুশিং অমসুং তুংগী মীরোলশিং অনিক্ত অরানবা অমা তৌরে। মনিপুর লেপ্তনা শান্তি অমসুং চাউখৎপগী লম্বীদা চঙশিনবা অসি য়াম্না মরুওই। ভারতকী নিংতম লালহৌ অমসুং লৈবাক অসি ঙাকপদা মনিপুরনা ইথিল পীখি। মনিপুরগী লৈহাওদা ইন্দিয়ান নেসনেল আর্মিনা অহানবা ওইনা ভারতকী ফিরাল চিংখৎখি। নেতাজি সুভাসনা মনিপুর অসি ভারতকী নিংতম্বগী থোঙ্গালনি হায়খি অমসুং লমদম অসিগী থৌনা ফরবা অথৌবশিংগী মফমদা ইকায়খুম্নবা উৎচরি। লমদম অসিগী অথৌবা কয়া থোকখি। সরকারনা পায়খৎপা মরুওইবা থবক অমদা-অন্দমান অমসুং নিকোবর ইথৎশিংদা মাউন্ত হারিয়েত অসি মাউন্ত মনিপুর হায়না মমিং থোল্লে। মসি লৈবাক অসিআন মনিপুরগী নিংতম লান্মীশিংদা পীবা ইকায়খুম্নবা অমনি। ঐখোয়গী সরকারনা, মনিপুরগী অসিগুম্বা শক্নাইরবা মীওই খুদিংমক্তগী ইথিল ফংলি, মাঙলোমদা চঙশিল্লি।
প্রধান মন্ত্রীনা হায়খি মদুদি ঙসি ফাওবা মনিপুরগী ইচানুপাশিং অমসুং ইচানুপীশিং ইমা ভারত ঙাক-শেন্নবগীদমক লৈবাক অসিগী তোঙান তোঙানবা মফমশিংদা থবক তৌরি। ওপরেসন সিন্দুর মনুংদা মালেম্না ভারতকী আর্মদ ফোর্সশিংগী মপাঙ্গল উখ্রে। ভারতকী লান্মীশিংনা পাকিস্তানগী লান্মীদা অকনবা চৈথেং অমা পীখিবা অসিদা অঙকপা পোক্নখি। ভারতনা ওপরেসন অসি মাইপাকপদা মনিপুরগী থৌনা ফরবা ইচানুপাশিং অমসুং ইচানুপীশিংনা মরুওইবা থৌদাং অমা লৌখি। অসিগুম্বা থৌনা ফরবা লান্মী সহিদ দিপক চিংখামগী মফমদা ইকায়খুম্নবা উৎচরি। ওপরেসন সিন্দুর মনুংদা দিপক চিংখাম্না থৱায় কৎখিবা অদু লৈবাক অসিনা মতম পুম্নমক্ত নিংশিংদুনা লৈহৌরগনি।
২০১৪ দা লাকখিবা মহাক্কী মনিপুর খোঙচৎ অমসুং মতম অদুদা মহাক্না পনখিবা ৱাফম অমা নিংশিংলদুনা, প্রধান মন্ত্রীনা হায়খি মনিপুরগী নাৎ য়াওদনা ভারতকী নাৎ মপুংফাদে অমসুং মনিপুরগী শান্নরোয়শিং য়াওদনা ভারতকী শান্নবা মপুংফাদে। লৈবাক্কী ফিরালগী চাউথোকচবা হেনগৎহন্নবা মনিপুরগী নহারোলশিং মখোয় মশামক থম্মোয় শেংনা কৎথোকখি। অদুবু মসিগী শক্তম অসি হিংশাগী অমুবা মমিনা কুপশিনহল্লোইদবনি।
প্রধান মন্ত্রীনা হায়খি ভারত মালেমগী শান্নবগী পৱারহাওস অমা ওইরকপগা লোয়ননা, মনিপুরগী নহারোলশিংগী থৌদাং মখা তানা হেনগৎলক্লি। মরম অদুনা মনিপুরদা লৈবাক অসিগী অহানবা স্পোর্তস য়ুনিভর্সিতি লিংখৎনবা ভারত সরকারনা খনখিবনি। খেলো ইন্দিয়া স্কিম অমসুং ওলেম্পিক পোদিয়ম স্কিমগী মখাদা, মনিপুরগী শান্নরোয় কয়া পুক্নিং থৌগৎলে অমসুং মনিপুরগী নহারোলশিংগীদমক অনৌবা শান্নবগী ইনফ্রাষ্ট্রকচরশিং শেমগৎলে। পোলো য়োকখৎনবা মার্জিং পোলো কমপ্লেক্স শেমগৎলে অমসুং মালেমদা খ্বাইদগী ৱাংবা পোলোগী মীতম থম্লে। লমদম অসিগী ওলেম্পিক শান্নরোয়শিং ইকায়খুম্নবা উৎনবা ওলেম্পিক পার্ক অমা লিংখৎলে। হন্দক সরকারনা নেসনেল স্পোর্তস পোলিসি-খেলো ইন্দিয়া নিতি লাউথোক্লে। মসিনা তুংদা মনিপুরগী নহারোলশিংদা চাউনা কান্নবা পীগনি।
প্রধান মন্ত্রীনা হায়খি মনিপুরদা শান্তি অমসুং তুংদু-লৈতাবা পুরক্নবা ঐখোয়গী সরকারনা থবক পায়খৎলি। মীয়ামগী য়াইফনবা থবক পায়খৎকদবনি অমসুং নমদুনা কেম্পশিংদা লৈরিবশিং মহৌশাগী পুন্সিদা হঞ্জিনহলগদবনি। লাঞ্জেন্নরকপা ইমুংশিংগীদমক অনৌবা য়ুম ৭,০০০ শানবা অয়াবা পীরে। মনিপুরগীদমক কেন্দ্র সরকারনা মাঙজৌননা লুপা করোর ৩,০০০ গী অখন্নবা পেকেজ অমা লাউথোকখ্রে। লাঞ্জেন্নরকপা লনাই মীওইশিংগীদমক অখন্নবা অমা ওইনা লুপা করোর ৫০০ হেন্না কাইথোকখ্রে। হিংশানা শোকহল্লবা মীওইশিং মহৌশাগী পুন্সিদা পুরক্নবা মতেং পাংবা হায়বসি সরকারগী মরুওইবনি। থবক অসিদা নৌবা শারবা মনিপুর পুলিসকী হেদক্বাতরশিংনা মরুওইবা থৌদাং অমা লৌগনি।
প্রধান মন্ত্রীনা হায়খি মনিপুরগী লৈহাওদা নেপালদা লৈরিবা মহাক্কী মরুপশিংদা য়াইফ পাউজেল পীজরি। হিমালয়গী মতম্বাক্ত লৈরিবা নেপাল ভারতনা অচেৎপা অমসুং থাজবা মরুপ অমনি। লৈবাক অনিমক মান্নবা পুৱারি, লাইনিং অমসুং চাউখৎপগী অপুনবা খোঙচৎ অমনা পুনশিল্লি। ঙসি নেপালদা শ্রীমতি সুসিলা জিনা মরক্কী সরকারগী প্রধান মন্ত্রীগী ফম পায়খিবদা, ভারতমচা করোর ১৪০ গী মহুৎশীন্দুনা ঐনা থাগৎপা ফোঙদোকচরি, মহাক্না নেপালদা শান্তি, তুংদু-লৈতাবা অমসুং নুংঙাই-য়াইফবগী লম্বী য়াৎকনি হায়না ঐনা থাজৈ। শ্রীমতি সুসিলা জি নেপালগী অহানবা প্রধান মন্ত্রী ওইনা ৱাশক লৌখিবা অসি নুপীশিংদা শক্তি পীবগী শিংথানিঙাই ওইরবা খুদম অমনি। তুংদু-লৈতাদবা ফিবম অমদা ফাওবা গনতন্ত্রগী গুনশিং ঙাকপগীদমক মহাক্না নেপালগী মীওই খুদিংমক থাগৎপা ফোঙদোকখি।
মহাক্না হায়খি হন্দক নেপালদা ওইরক্লিবা ফিবম অসিদা পুক্নিং কয়া চঙদবা ৱাফম অমা লৈরি। হৌখিবা নুমিৎ ২-৩ অসিদা কৎথোকপা অমসুং অশেংবগী ৱাখল্লোনগা লোয়ননা নেপালদা নহা ওইরিবা নুপা অমসুং নুপীশিংনা লম্বীশিং শেংদোকখি অমসুং মচু তৈখি। সোসিএল মেদিয়াদা শন্দোরকপা মখোয়গী শক্তমশিং মহাকসু উরে। মখোয়গী অফবা ৱাখল্লোনশিং অমসুং অফবা থবকশিং অদুনা ইথিল পীবা খক নত্তনা মসি নেপাল অমুক হিঙ্গৎলকপগী ময়েক লারবা খুদম অমনি। অফবা অমসুং নুংঙাই-য়াইফবা তুংলমচৎ অমগীদমক মহাক্না নেপালদা য়াইফ পাউজেল পীখি।
মনিপুরদা মপান নাইদ্রবা খুদোংচাবা কয়া মরাংকাইনা লৈরি হায়না পল্লদুনা, প্রধান মন্ত্রীনা হায়খি ২১শুবা চহিচাদা, বিকসিত ভারত অমগী অমতা ঙাইরবা পান্দম অমগা লোয়ননা ভারত মাঙলোমদা চঙশিল্লি অমসুং মসিগী পান্দম অসি ফংনবা মনিপুর চাউখৎপা দরকার ওই। চাউখৎপগী লম্বীদা খোঙফম চেৎনা চৎপা হায়বসি অপুনবগী থৌদাংনি। মনিপুরগী তৌবা ঙম্বা ৱাৎপা লৈতে, চীঙ অমসুং তম্পাক্কী মরক্ত নুংশিনবগী অকনবা থোঙ অমা শানবা ঐখোয়না মখা তানা ৱারি শানবা হেনগৎহনগদবনি। ভারত চাউখৎপদা মনিপুরনা মপাঙ্গল কনবা মরুওইবা মফম অমা ওইগনি হায়বগী থাজবা লৈরি। চাউখৎ-থৌরাংগী প্রোজেকশিং অসিগীদমক মহাক্না অমুক হন্না হরাওবা ফোঙদোকখি।
থৌরম অদুদা শরুক য়াখিবা অতোপ্পা শক্নাইরবা মীওইশিংগী মনুংদা মনিপুরগী রাজ্যপাল শ্রী অজব কুমার ভাল্লা য়াওখি।
নুঙগীৱারোল
প্রধান মন্ত্রীনা ইম্ফালদা লুপা কোতি ১,২০০ হেনবগী দিবেলপমেন্ত প্রোজেক্ত কয়া শঙ্গাখ্রে। মখোয়গী মনুংদা মন্ত্রিপুখ্রিদা লৈবা সিবিল সেক্রেতরিয়েৎ, মন্ত্রিপুখ্রিদা লৈবা আই.তি. এস.ই.জেদ বিল্দিং অমসুং অনৌবা পুলিস হেদক্বার্তর, দিল্লী অমসুং কোলকতাদা লৈবা মনিপুর ভবনশিং অমসুং জিলা মরিদা লৈবা নুপীশিং খক্তগী ওইবা ইমা কৈথেলশিং য়াওরি
***
(Release ID: 2166367)
Visitor Counter : 2