সংহাই কোওপরেসন ওর্গনাইজেসন (এস সি ও) গী লুচিংবশিংগী মীফমগী নাকলদা তিয়াঞ্জিন্দা ওগষ্ট ৩১,২০২৫ দা প্রধান মন্ত্রী শ্রী নরেন্দ্র মোদীনা চাইনাগী রাষ্ট্রপতি সি জিনপিংগা উনখ্রে।

ওক্তোবর ২০২৪ দা কজান্দা মখোয় উনখিবা অদুদগী লৈবাক অনিগী মরীশিং লেপ্তনা ফগৎলকপা অমসুং ফিবম ওইরকপদা লুচিংবা অনিমক্না তরাম্না ওকখ্রে। লৈবাক অনি চাউখৎপগী মরুপশিংনি অমসুং য়েক্নবশিং নত্তে অমসুং মখোয়গী ৱাখল্লোন মান্দবশিংনা ৱাথোকশিং ওইহল্লোইদবনি হায়না মখোয়না অমুক হন্না ফোঙদোকখি। অমনা অমবু ইকায়খুম্নবা, অনিমক কান্নবা অমসুং অনিমক ৱাখল তাবদা য়ুম্ফম ওইদুনা ভারত অমসুং চাইনা অমসুং মখোয়গী মীওই বিল্লিয়ন ২.৮ গী মরক্ত তংদু লৈতাবা মরী লৈনবা অমসুং মতেং পাংনবা অসি লৈবাক অনি চাউখৎনবা দরকার ওই অমসুং মালেম অমসুং এসিয়ানা ২১শুবা চহিচাগী ওইরক্লিবশিং অসিগী কান্নবা ফংগনি।

লৈবাক অনিগী মরীশিং মখা তানা চাউখৎনবা ঙমখৈগী শরুকশিংদা শান্তি থম্বা মরুওই হায়না প্রধান মন্ত্রীনা ফোঙদোকখি। হৌখিবা চহিদা মাইপাক্না উংখৎনবা হন্থহনখিবা অমসুং মতম অদুদগী হৌনা ঙমখৈগী শরুকশিংদা শান্তি পুরকখিবা অদু লুচিংবশিংনা ফোঙদোকখি। লৈবাক অনিগী রাজনিতিগী মীৎয়েং অমসুং লৈবাক অনিগী মীয়াম মরক্ত মতম শাংনা লৈরক্লবা পামজবশিংদগী ঙমখৈগী মতাংদা অচুম্বা, মরম চাবা অমসুং নাকল অনিমক্না য়াবা ৱারোইশিন পুরক্নবা মখোয়না থাজবা ফোঙদোকখি। চহি অসিগী অঙনবা শরুক্ত অখন্নবা মীহুৎ অনিগী ৱারি শানবদা লৌখিবা মরুওইবা ৱারেপশিং মখোয়না খঙখি অমসুং মখোয়গী থবকশিং মখা তানা শৌগৎপা হায়না য়ানখ্রে।

দাইরেক্ত ফ্লাইতশিং অমসুং ভিসাগী থবকশিংগী খুৎথাংদা মীগা মীগা লৈনবা মরীশিং ফগৎহনবগী দরকার ওইবা, কাইলাস মনসারোভর যাত্রা অমুক হৌবা অমসুং তুরিষ্ট ভিসাগী মতাংদা লুচিংবা অনিনা খন্নখ্রে। শেন-থুম অমসুং ললোন-ইতিক্কী মরীশিংগী মতাংদা, মালেমগী ললোন-ইতিক ফজনা পাংথোক্নবা মখোয়গী ইকোনোমি অনিনা লৌরিবা থৌদাং মখোয়না খঙলে। লৈবাক অনিগী ললোন-ইতিক অমসুং শেন থাদবগী মরীশিং পাকথোক-চাউথোক্নবা অমসুং ত্রেদ দিফিসিত হন্থহন্নবা রাজনিতি অমসুং মরুওইবা মাইকৈ অমদা চঙশিনবগী দরকার ওইবা মখোয়না ফোঙদোকখি।

প্রধান মন্ত্রীনা হায়খি মদুদি ভারত অমসুং চাইনা ষ্ট্রাতেজিক ওতোনোমি চৎনরি অমসুং অহুমসুবা লৈবাক অমগী লেন্সকী খুৎথাংদা মখোয়গী মরীশিং য়েংলোইদবনি। লৈবাক অনিগী, লমদম লমদমগী অমসুং মালেমগী ৱাথোকশিং অমসুং শিংনবশিং, তেরোরিজম অমসুং মালেমগী ওইনা নিয়ম চুম্বা ললোন-ইতিক্কী মতাংদা য়ানবা হেনগৎহনবগী দরকার ওইবা অদু মখোয়না ফোঙদোকখি।

চাইনানা এস.সি.ওগী প্রসিদেন্ত ওইবা অমসুং তিয়াঞ্জিন্দা মীফম পাংথোকপদা প্রধান মন্ত্রীনা শৌগৎপা ফোঙদোকখি। ২০২৬ দা ভারত্ত পাংথোক্কদৌরিবা ব্রিক্স মীফমদা শরুক য়ানবা মহাক্না রাষ্ট্রপতি সিদা চেপাউ পীখি। চেপাউ পীরকপগীদমক রাষ্ট্রপতি সিনা প্রধান মন্ত্রী থাগৎপা ফোঙদোকখি অমসুং ভারতনা ব্রিক্সকী প্রসিদেন্দ ওইবদা চাইনানা শৌগৎপা ফোঙদোকখি।

প্রধান মন্ত্রীনা কম্মুনিষ্ট পার্তি ওফ চাইনাগী পোলিতব্যুরোগী ষ্টেন্দিং কম্মিতিগী মেম্বর, সাই কি উনখি। লৈবাক অনিগী মরীশিংগী মতাংদা সাই কিগী মীৎয়েং প্রধান মন্ত্রীদা থমখি অমসুং লুচিংবা অনিগী পান্দমশিং থবক ওইনা পাংথোক্নবা মহাক্কী মতেং নিখি। লৈবাক অনি চৎথোক-চৎশিন হেনগৎহন্নবা অমসুং লুচিংবা অনি য়ানখিবগা লোয়ননা মখা তানা মরীশিং ফগৎনবা চাইনাগী মাইকৈদগী অপাম্বা সাইনা ফোঙদোকখি।

***