U Myntri Rangbah Duh ka India, Narendra Modi u la iakynduh ia u Xi Jinping, President ka People’s Republic of China, ha ka jaka ba pynlong ia ka Summit jong ki nongialam jong ka Shanghai Cooperation Organization (SCO) ha Tianjin ha ka 31 tarik u Nailar 2025.

Baroh arngut ki nongïalam ki la pdiang ïa ka jingïaid lynti kaba bha bad ka jingïaid shaphrang kaba stet ha ka jingïadei hapdeng ki artylli ki ri naduh ka jingïakynduh ba khatduh jong ki ha Kazan ha u bnai Risaw 2024. Ki la pynskhem biang ba ki ar tylli ki ri ki dei ki paralok ha ka roi ka par ym ki nongïaleh pyrshah, bad ba ki jingïapher jingmut jong ki kim dei ban kylla long ki jingïakynad. Ka jingiadei bad jingiatreilang kaba skhem hapdeng ka India bad ka China bad ki 2.8 billion ngut ki briew jong ki ha ka nongrim jong ka jingburom markylliang, ka jingsngewtynnat markylliang bad ka jingsngewrit markylliang ka long kaba donkam na ka bynta ka roi ka par bad ka jingkiew shaphrang jong ki ar tylli ki ri, kumjuh ruh na ka bynta ka pyrthei bad ka Asia kaba iarap ia ki jinglong jong ki spah snem kaba 21.

U Myntri Rangbahduh u la kdew sha ka jingdonkam jong ka jingiasuk ha ki jaka khappud na ka bynta ban bteng ban kyntiew ia ka jingiadei hapdeng ki artylli ki ri. Ki arngut ki nongïalam ki la kdew da ka jingsngewkmen ïa ka jingpynkut ia ka jingiatyngkhuh ha u snem ba la dep bad ka jingpynneh ïa ka jingiasuk ha ki jaka khappud naduh kata ka por. Ki la pynpaw ia ka jingkular na ka bynta ka jingpynbeit kaba hok, kaba don jingmut, bad kaba lah ban pdiang lang ia u pud u sam kaba mih na ka jingpeit jong ka kam sain pyrthei bad ka jingiadei jong ki bad ki jingmyntoi ba neh jong ki ar liang ki jaitbynriew. Ki la ithuh ia ki rai kiba kongsan ba la shim da ki arngut ki Special Representative ha ki jingiakren jong ki ha kaba sdang ha une u bnai, bad ki la mynjur ban kyrshan shuh shuh ia ki jingpyrshang jong ki.

Ki arngut ki nongialam ki la kdew ia ka jingdonkam ban pynkhlain ia ka jingiadei para briew lyngba ki jingpynher liengsuin kiba iaid beit iaid ryntih bad ka jingpynsuk ban ioh ia ki visa, da kaba tei halor ka jingsdang biang ia ka Kailash Manasarovar Yatra bad ki visa na ka bynta ki nongjngohkai. Halor ka jingiadei ha ka ioh ka kot bad ka khaii pateng, ki la ithuh ia ka bynta jong ki artylli ki ri jong ki ban pynskhem ia ka khaii pateng ha ka pyrthei. Ki la pynpaw ia ka jingdonkam ban iaid shakhmat na ka liang ka kam sain pyrthei bad ka lynti treikam ban pyniar ia ka jingiadei ha ka khaii pateng bad ka jingbei tyngka hapdeng ki arliang mamla bad ban pynbeit ia ka jingduna ha ka khaii pateng.

U Myntri Rangbahduh u la kdew ba ka India bad ka China baroh ar ki bud ia ka jingsynshar shimet, bad ia ka jingiadei jong ki ym dei ban peit lyngba ka jingpeit jong kiwei kiwei ki ri. Ki arngut ki nongïalam ki la pdiang ba ka long kaba donkam ban pynïar ïa ka jingïasngewthuh jingmut halor ki mat bad ki jingeh jong ki arliang mamla, ka thaiñ, bad ka pyrthei, kum ki kam lehnoh bad ka khaii pateng kaba hok ha ki rynsan ba bun jait.

U Myntri Rangbahduh u la pynpaw ka jingkyrshan ïa ka jinglong President jong ka China ia ka SCO bad ka Summit ha Tianjin. U la khot ruh ia u President Xi sha ka BRICS Summit kaba ka India kan pynlong ha u snem 2026. U President Xi u la ai khublei ia u Myntri Rangbah duh ka ri halor kane ka jingkhot bad tyrwa ruh ia ka jingkyrshan jong ka China ia ka BRICS Presidency jong ka India.

U Myntri Rangbahduh u la ïakynduh ruh bad u Cai Qi uba dei u dkhot jong ka Standing Committee jong ka Politburo jong ka Seng Komunist jong ka China. U Myntri Rangbahduh u la batai ia u Cai shaphang ka jingthmu jong u na ka bynta ka jingïadei hapdeng ki arliang mamla bad u la pan ia ka jingkyrshan na u ban pynurlong ïa ka jingthmu jong ki arngut ki nongïalam. U Cai u la pynpaw biang ia ka jingkwah jong ka China ban pyniar ia ka jingiakren hapdeng ki arliang mamla bad ban pynbha shuh shuh ia ka jingiadei katkum ka jingiasngewthuh jingmut kaba la mynjur lang hapdeng ki arngut ki nongialam.