प्रधानमन्त्री श्री नरेन्द्र मोदीले 31 अगस्त 2025 मा तियानजिनमा भएको शङ्घाई सहयोग सङ्गठन (एससीओ) का नेताहरूको शिखर सम्मेलनको अवसरमा चीन जनवादी गणतन्त्रका राष्ट्रपति श्री सी जिनपिङसँग भेट गरेका छन्।

दुवै नेताहरूले अक्टोबर 2024 मा कजानमा भएको आफ्नो पछिल्लो बैठकपछि द्विपक्षीय सम्बन्धमा सकारात्मक गति र निरन्तर प्रगतिलाई स्वागत जनाए। उनीहरूले दुई देशहरू प्रतिद्वन्द्वी नभएर विकास साझेदार हुन् र उनीहरूका मतभेद विवादहरूमा परिणत नहुने कुरालाई पुन: पुष्टि गरे। भारत र चीन तथा उनीहरूका 2.8 अरब जनताबीच आपसी सम्मान, पारस्परिक हित र पारस्परिक संवेदनशीलताको आधारमा एक स्थिर सम्बन्ध र सहयोग दुई देशको वृद्धि र विकासका साथ-साथै 21औँ शताब्दीको प्रवृत्ति अनुरूप एक बहुध्रुवीय विश्व र बहुध्रुवीय एशियाको लागि आवश्यक छ।

प्रधानमन्त्रीले द्विपक्षीय सम्बन्धको निरन्तर विकासको लागि सीमावर्ती क्षेत्रहरूमा शान्ति र सौहार्दको महत्त्वलाई रेखाङ्कित गरे। दुवै नेताले पछिल्लो वर्ष सफल सैन्य वापसी र त्यसपछिबाट सीमावर्ती क्षेत्रहरूमा शान्ति र सौहार्द कायम भएकोमा सन्तुष्टि व्यक्त गरे। उनीहरूले आफ्नो समग्र द्विपक्षीय सम्बन्ध र दुई देशका जनताको दीर्घकालीन हितको को राजनीतिक परिप्रेक्ष्यमा सीमा प्रश्नको निष्पक्ष, उचित र पारस्परिक रूपमा स्वीकार्य समाधानको लागि प्रतिबद्धता व्यक्त गरे। उनीहरूले यस महिनाको शुरुमा दुई विशेष प्रतिनिधिहरूले आफ्नो वार्तामा लिएका महत्त्वपूर्ण निर्णयहरूको सराहना गरे तथा उनीहरूको प्रयासलाई अझ समर्थन गर्न सहमति व्यक्त गरे।

दुई नेताहरूले कैलाश मानसरोवर यात्रा र पर्यटक भिसाको बहालीको आधारमा सोझै उडान र भिसा सुविधाको माध्यमद्वारा मानिसहरू बीचको सम्बन्धलाई मजबुत बनाउने आवश्यकतामाथि ध्यान केन्द्रित गरे। आर्थिक र व्यापारिक सम्बन्धको सन्दर्भमा, उनीहरूले विश्व व्यापारलाई स्थिर बनाउन आफ्ना दुई अर्थतन्त्रको भूमिकालाई मान्यता दिए। उनीहरूले द्विपक्षीय व्यापार र निवेश सम्बन्धलाई विस्तार गर्न र व्यापार घाटालाई कम गर्नका लागि एक राजनीतिक र रणनीतिक दिशाबाट अगाडि बढ्ने आवश्यकतामाथि जोड दिए।

प्रधानमन्त्रीले भने अनुसार भारत र चीन दुवैले रणनीतिक स्वायत्तता चाहन्छन् र उनीहरूको सम्बन्धलाई कुनै तेस्रो देशको दृष्टिबाट हेर्नु हुँदैन। दुई नेताहरूले द्विपक्षीय, क्षेत्रीय र वैश्विक मुद्दा र चुनौतीहरू जस्तै आतङ्कवाद र बहुपक्षीय मञ्चहरूमा निष्पक्ष व्यापारमाथि साझा आधारलाई विस्तारित गर्न आवश्यक ठाने।

प्रधानमन्त्रीले शङ्घाई सहयोग सङ्गठन (एससीओ) को चीनको अध्यक्षता र तियानजिनमा हुने शिखर सम्मेलनको लागि समर्थन व्यक्त गरे। उनले राष्ट्रपति सीलाई ब्रिक्स शिखर सम्मेलनमा आमन्त्रित पनि गरे, जसको आयोजन भारतले 206 मा गर्नेछ। राष्ट्रपति सीले निमन्त्रणाको लागि प्रधानमन्त्रीलाई धन्यवाद दिए तथा भारतको ब्रिक्स अध्यक्षताको लागि चीनको समर्थनको प्रस्ताव राखे।

प्रधानमन्त्रीले चिनियाँ कम्युनिष्ट पार्टीको पोलित ब्युरोको स्थायी समितिका सदस्य श्री काई कीसँग पनि बैठक गरे। प्रधानमन्त्रीले श्री काईसँग द्विपक्षीय सम्बन्धको लागि आफ्नो दृष्टिकोण साझा गरे तथा र दुई नेताहरूको दृष्टिकोणलाई साकार पार्नका लागि उनको समर्थन मागे। श्री काईले दुई नेताहरू बीच भएको सहमति अनुरूप द्विपक्षीय आदान-प्रदान विस्तार गर्ने र सम्बन्धलाई अझ सुधार गर्ने चिनियाँ पक्षको इच्छा दोहोऱ्याए।

********

एमजेपीएस/एसआर