U Myntri Kam pohiing ka sorkar pdeng uba dei ruh u Myntri ka Tnad treilang u Amit Shah u la ai jingkren ha ka jingialang plie jong ka Vibrant Villages Programme (VVP) kaba ar sngi kum u kongsan. Ïa kane ka workshop la pynlong da ka Border Management Division, Tnad kam pohiing (MHA) ha New Delhi. Ha kane ka sngi, u Myntri kam pohiing ka sorkar pdeng u Amit Shah u la pyllait paidbah ruh ia ka logo jong ka Vibrant Villages Program. U Myntri Khynnah ka Tnad kam pohiing jong ka sorkar pdeng u Bandi Sanjay Kumar, u Home Secretary, Director of Intelligence Bureau (IB), Border Management Secretary, ki Chief Secretary jong ki jylla khappud kiba kynthup ha ka bynta ba nyngkong bad ba ar jong ka VVP, ki Director General jong ki kynhun shipai pahara kiba iada ia ka thain khappud, bad ki District Magistrate jong ki distrik bapher bapher, lem bad bun kiwei de ki kynrem ki lyndan ki la iadonlang.

Ha ka jingai jingkren jong u, u Myntri kam pohiing ka sorkar pdeng u Amit Shah u la ong ba ka Vibrant Villages Programme ka long halor lai tylli ki mat ba kongsan: ban khanglad ïa ka jingwan buhai shnong na ki shnong khappud, ban pynthikna ba uwei pa uwei u nongshong shnong jong ki shnong khappud un ïoh ïa ki jingmyntoi shispah na ka shispah na ki skhim sorkar pdeng bad sorkar jylla, bad ban kyntiew ïa ki shnong kiba hap hapoh ka VVP sha ki tiar kiba khlaiñ ban pynkhlain ka jingiada ia ka thain khappud bad ka jingshngain jong ka ri. U la ong ruh ba haba u Myntri Rangbahduh ka ri u Narendra Modi u la wanrah ïa ka jingmut jong ka Vibrant Villages Programme, la shim ïa ka rai ba yn pyntreikam ïa ka katkum ka bynta. Ym tang ba man la ka shnong khappud kan ioh ia ki jingdonkam baroh, hynrei man la u nongshong shnong uba sah ha kine ki shnong khappud un ioh ia baroh ki skhim jong ka sorkar India bad ki sorkar jylla ban kyntiew ia ka jingim jong ki briew kiba sah ha kine ki jaka. Nalor kata, yn pynroi ia kine ki shnong kum ki atiar kiba khlain na ka bynta ka jingshngain jong ka ri bad ki pud jong ka. Shuh shuh u la ong ba u Myntri Rangbahduh ka ri u Narendra Modi, da kaba buh ia ka shnong kaba khatduh jong ka ri kum ka shnong kaba nyngkong, ka la pynkylla ia ka jingpeit jong ngi ia ki shnong khappud.

U Amit Shah u la ong ba ki shnong kiba la ithuh kloi hapoh ka Vibrant Villages Programme ha ki khyndiat snem kin sa paw ba ki long ki atiar kiba kongsan bha ha ka jingshngain jong ka ri jong ngi bad ki khappud jong ka. U la ong lyngba kane ka prokram, la shim ia ki sienjam ban kyntiew ïa ki jingdon jingem, ban pynneh pynsah bad kyntiew ïa ka kolshor, ban pynmih ki lad ioh kam lyngba ki kam jngohkai pyrthei, bad ban pynlong ïa ka jingim ha ki shnong kiba iar ha baroh ki liang, da ka jingthmu ban kyntiew ïa ki jingtei kiba bun jait bad kiba bun ki bynta.

U Myntri kam pohiing jong ka sorkar pdeng bad u Myntri ka Tnad treilang u la ong ba ka dei ka kamram jong ki chief Secretary jong ki sorkar jylla, ki District Collector jong ki shnong kiba kynthup ha ka VVP, bad baroh ki Central Armed Police Force (CAPF) ba kim dei ban sahkut ha tang ka VVP bad ban pyrkhat ia kiei ki sienjam ba lah ban shim palat ia ka prokram ban pynurlong ia ki jingthmu jong ka. U la ban jur ban pynurlong ïa ki thong jong ka VVP, ka long kaba donkam ïa baroh ki tnad jong ka Sorkar India bad ki sorkar jylla ban ïatreilang ban pynkylla ïa kine ki shnong khappud sha ki atiar kiba donkam shisha na ka bynta ka jingïada.

U Amit Shah u la ong ban pynurlong ïa ka jingthmu jong ka Vibrant Villages Programme, ka long kaba donkam ban pynurlong 100 percent ïa ki skhim sorkar, ban kyntiew ïa ki jingdonkam jong ki paidbah na ka bynta ka kam jngohkai pyrthei, bad ban pynshlur ïa ki jaka treikam ba ïatreilang ban thaw ïa ki lad ïoh kam ïoh jam. U la ong ba lada ia ki sienjam kum ki homestay yn pyniar sha ki shnong khappud bad ki tnad jngohkai pyrthei jong ka jylla ki pynbeit bha na ka bynta ki booking, man la ka longiing ha kine ki shnong khappud kan ioh kam ioh jam. U Shah u la ban jur ba ki Tnad pynroi jaka nongkyndong jong ki jylla ki dei ban trei ban wanrah ia ka burom jong kine ki shnong, ha kaba ki District Collector ki don ka bynta kaba kongsan ha kane ka jingpyrshang. U la ong ba lada ki shnong ki don lut ki jingdonkam bad ki lad kamai, ki nongshong shnong kin ym kwah ban mih na la ki jong ki shnong. U Myntri kam pohiing u la ong shuh shuh ba ki samla District Collector ki dei ban pynthikna ba, wat hapdeng ki jingeh ha ka jaka, ki nongshong shnong kim dei ban iehnoh ia ki shnong jong ki, la iada na ka jingkynriah ki briew na ki shnong, bad ka jingbun briew ha ki shnong ruh ka nang kiew.

U Myntri kam pohiing jong ka sorkar pdeng u la ong ba hadien ba la pyntreikam ia ka Vibrant Villages Programme ha Arunachal Pradesh, ka jingbun briew ha kiba bun ki shnong khappud ka la nang kiew. Kane ka long ka khubor na ka bynta baroh ki shnong khappud jong ka ri jong ngi ba kane ka jinglong jong ka jingwan buhai shnong sha kine ki shnong ka iaid sha ka lynti kaba dei.

U Myntri kam pohiing u Amit Shah u la ong ba ha ka sngi rakhe ia ka sngi laitluid, u Myntri Rangbahduh ka ri u Narendra Modi u la kren na ki kynroh jong ka Red Fort ba ka jingkylla ha ka jingbun briew ka dei ka mat kaba sngewkhia. U la ong ba ki collector jong ki district kiba kynthup ha ka Vibrant Villages Programme ki donkam ban pynbeit ia kane ka kam da ka jingshimkhia bad ka jingpeit bniah. Ka jingkylla ha ka jingbun briew ha ki jaka khappud ka ktah beit ia ka jingshngain jong ka ri bad ki khappud jong ka. U Myntri kam pohiing u la ong ba ym dei ban shim ba kane ka jia namar ka jinglong ka jaka; hynrei, ka dang jia kum shi bynta jong ka jingthmu. U la bynrap ruh ba ki Chief Secretary jong ki jylla bad ki CAPF ruh ki donkam ban phaikhmat bha halor kane ka kam.

U Amit Shah u la ong ba na ka bynta ban pynpoi lut ia ki skhim sorkar, ki district collector ki dei ban pyrkhat la ki lah ne em ban iatreilang bad ki Central Armed Police Force (CAPF). U la ong ba ki CAPF ki lah ban ai jingiarap ha ka liang ka koit ka khiah, ka kam ialehkai, bad ka pule puthi. U Shah u la ong ba ha Arunachal Pradesh, ka ITBP ka la jop ha ka jingpyrshang ban thied ia ki marbam ba donkam man ka sngi kum ka dud, ki jhur, ki pylleng, bad ki khaw na ki Vibrant Village. U la ban jur ia ka jingdonkam ban pyntreikam ia kane ka jingpyrshang ha man la ki shnong khappud. U Shah u la ong ruh ba ki shipai kiba don ha ki thain khappud ki dei ban shim ïa ka jingkitkhlieh ban plie ki lad ioh kam ha ki Vibrant Village da ka jingïatreilang bad ka Tnad kam pohiing bad ka Tnad kam iada ri jong ka sorkar pdeng.

U Myntri kam pohiing jong ka sorkar pdeng uba dei ruh u Myntri ka Tnad treilang, u Amit Shah u la ong ba ka dei ka kamram jong ki Central Armed Police Force (CAPF) bad ki district collector ban seng ia ki dairy cooperative ban pyndap ia ki jingdonkam dud jong ki CAPF bad ki shipai beit beit na ki shnong ki thaw. Kane kan iarap ha ka jingplie lad ioh kam. U Shah u la ong ba ia kane ka jingpyrshang dei ban pynwandur kum ka nuksa kaba bha bad ban pyntreikam ha man la ki Vibrant Village, ha kaba kaTnad kam pohiing, baroh ki CAPF, ki shipai lyngba ka Tnad iada ri, bad ki district collector kin shim ia ka lyngkor. U la bynrap ba ka jingpynmih lad ioh kam kan tehlakam ia ka jingwan buhai shnong.

U Amit Shah u la ong ba ki shnong khappud ki dei ban don ki lad ki lynti na ka bynta ki telecommunication, ka jingpyniasoh surok, ka pule puthi, ka koit ka khiah, bad ka umbam umdih kaba khuid. U la ban jur ba ka Vibrant Villages Programme (VVP) kam dei ban neh tang kum ka prokram jong ka sorkar hynrei ka dei ban long ka nongrim jong ka jingsynshar. U Myntri kam pohiing u la ong ba ia ka jingthmu jong ka prokram lah ban pynurlong tang ynda ka la rung ha ka rukom synshar. U la ai jingmut ba hapoh ka VVP, dei ban pyrkhat ruh ia ki lad ki lynti kum ka jingshna ia ki pung ba thymmai hapoh ka MGNREGA, ka jingpynheh ia ki khlaw, bad ka jingtei ia ki jingdon jingem kiba neh .

U Myntri kam pohiing jong ka sorkar pdeng u la ong ba ha ka Vibrant Villages Program-1, ki jingpyrshang ki long tang ha ka prokram hi, hynrei ha ka Vibrant Villages Program-2, ka donkam ban pynkylla ia ka rukom treikam. U la kyntu ia ki collector jong ki distrik khappud ban shim ia ka sienjam kaba biang ban weng ia ki jingkyntur pud beain, da kaba ong ba kine ki jingkyntur pud ki dei shi bynta jong ka jingthmu ba la don lypa. U la ban jur ba dei ban weng noh ia baroh ki jingrung beain hapoh ka jingjngai kaba ym duna ia ka 30 kilomitar na khappud. U Shah u la pynpaw ba ka Gujarat ka la leh ïa ka kam kaba dei ban ai jingïaroh ha kane ka bynta, da kaba pynkhuid ïa bun ki jaka ba shah kyntur pud ha ki khappud duriaw bad ki jaka khappud.

****