امور داخلہ اور امدادباہمی کے مرکزی وزیر  جناب امت شاہ نے نیوز ایجنسی اے این آئی کو انٹرویو دیتے ہوئے 130ویں آئینی ترمیمی بل سمیت کئی اہم مسائل پر اپنے خیالات کا اظہار کیا۔ مرکزی وزیر داخلہ نے کہا کہ وزیر اعظم جناب نریندر مودی واضح طور پر مانتے ہیں کہ ملک میں کوئی وزیر، وزیر اعلیٰ یا وزیر اعظم جیل میں رہتے ہوئے حکومت نہیں چلا سکتا۔ 130 ویں آئینی ترمیم میں یہ سہولت فراہم کی گئی ہے کہ اگر وزیر اعظم، وزیر اعلیٰ، حکومت ہند کے وزیر یا ریاستی حکومت کے وزیر کو کسی سنگین الزام میں گرفتار کیا جاتا ہے اور انہیں 30 دن تک ضمانت نہیں ملتی ہے تو انہیں ان کے عہدے سے ہٹا  دیا جائے گا۔ انہوں نے کہا کہ اگر ایسا نہ ہوا تو وہ خود بخود قانونی طور پر عہدے سے فارغ ہو جائیں گے۔ جناب شاہ نے کہا کہ عوام کی منتخب حکومت جو بھی بل یا آئینی ترمیم پارلیمنٹ میں لاتی ہے، اسے ایوان کے سامنے پیش کرنے میں اپوزیشن کی طرف سے کوئی مخالفت نہیں ہونی چاہئے۔

جناب امت شاہ نے کہا کہ انہوں نے خود واضح کیا ہے کہ اس آئینی ترمیم کو دونوں ایوانوں کی مشترکہ پارلیمانی کمیٹی کے حوالے کیا جائے گا۔ انہوں نے کہا کہ اس بل کی منظوری کے لیے دو تہائی اکثریت درکار ہے اور جب اس پر ووٹنگ ہوگی تو تمام جماعتیں اس پر اپنا ووٹ دے سکتی ہیں۔ جناب شاہ نے کہا کہ حکومت کے کسی بل یا آئینی ترمیم کو ایوان میں پیش کرنے کی اجازت نہ دینا اور اپوزیشن کا اس طرح کا رویہ جمہوریت میں مناسب نہیں ہے۔ انہوں نے کہا کہ ملک کی پارلیمنٹ کے دونوں ایوان بحث و مباحثہ کے لیے ہیں نہ کہ شور و غل کے لیے۔ وزیر داخلہ نے کہا کہ بل پیش کرنے کی اجازت نہ دینے کی یہ ذہنیت جمہوری نہیں ہے اور اپوزیشن کو اس کا جواب ملک کے عوام کے سامنے دینا ہوگا۔

امور داخلہ اور امداد باہمی کے مرکزی وزیر  نے کہا کہ یہ بل نہ صرف اپوزیشن کے لیے ہے بلکہ ہمارے وزرائے اعلیٰ کے لیے بھی ہے۔ انہوں نے کہا کہ اپوزیشن یہ کہہ کر عوام کو گمراہ کر رہی ہے کہ حکومت کے لوگوں کے خلاف ایف آئی آر درج نہیں ہوتی۔ انہوں نے کہا کہ 30 دن کے لیے ضمانت کی گنجائش ہے اور اگر جعلی کیس ہو تو ملک کی عدالتیں آنکھیں بند کر کے نہیں بیٹھیں گی۔ جناب شاہ نے کہا کہ ہائی کورٹ اور سپریم کورٹ کو کسی بھی معاملے میں ضمانت دینے کا حق ہے اور اگر ضمانت نہیں دی جاتی ہے تو  استعفیٰ دینا پڑے گا۔ انہوں نے سوال کیا کہ کیا کوئی وزیر اعلیٰ، وزیر اعظم یا وزیر جیل سے حکومت چلا سکتا ہے؟ کیا یہ ملک کی جمہوریت کے لیے اچھا ہے؟ انہوں نے کہا کہ اگر انہیں 30 دن بعد ضمانت مل جاتی ہے تو وہ دوبارہ حلف اٹھا سکتے ہیں۔

مرکزی وزیر داخلہ نے کہا کہ انہیں جیل میں ڈالنے کا انتظام ہماری حکومت نے نہیں کیا، یہ برسوں سے جاری ہے۔ انہوں نے کہا کہ 130 ویں آئینی ترمیم میں سنگین جرم کی تعریف کی گئی ہے کہ جہاں 5 سال سے زائد کی سزا ہو گی وہاں عہدہ چھوڑنا ہو گا۔ یہ ٹھیک نہیں ہے کہ وزراء، وزرائے اعلیٰ یا وزیر اعظم جن پر بدعنوانی کے الزامات ہیں یا 5 سال سے زیادہ کی سزا ہو سکتی ہے وہ جیل سے حکومت چلائیں۔ انہوں نے کہا کہ آج بھی ریپریزنٹیشن آف پیپل ایکٹ آف انڈیا میں یہ شق موجود ہے کہ اگر کسی منتخب نمائندے کو دو سال یا اس سے زیادہ کی سزا سنائی جاتی ہے تو وہ رکن پارلیمنٹ کے عہدے سے ہٹا دیا جائے گا۔ انہوں نے کہا کہ یہ قانون آزادی کے وقت سے ہی اخلاقی بنیادوں پر فیصلہ کرنے کے لیے بنایا گیا ہے۔ جناب شاہ نے کہا کہ بہت سے لوگوں کی رکنیت ختم کر دی گئی تھی اور انہیں بھی فوری طور پر بحال کر دیا گیا تھا۔

جناب امت شاہ نے کہا کہ آزادی کے بعد سے اب تک کئی لیڈروں، وزراء اور وزرائے اعلی نے استعفیٰ دے دیا ہے اور جیل چلے گئے ہیں۔ لیکن اب یہ رجحان شروع ہو گیا ہے کہ جیل جانے کے بعد بھی انہوں نے استعفیٰ نہیں دیا۔ تمل ناڈو کے کچھ وزراء، وزرائے اعلی  اور دہلی کے وزراء نے استعفیٰ نہیں دیا۔ انہوں نے کہا کہ کیا حکومت کے سکریٹری، ڈی جی پی، چیف سکریٹری ان سے حکم لینے جیل جائیں گے؟ جناب شاہ نے کہا کہ اس مسئلہ پر تشویش اور بات چیت ہونی چاہئے۔

امور داخلہ اور امداد باہمی کے مرکزی وزیر  نے کہا کہ وزیر اعظم مودی نے خود کو اس آئینی ترمیم کے تحت رکھا ہے۔ انہوں نے کہا کہ اس وقت کی اہم اپوزیشن جماعت کی وزیر اعظم 39ویں آئینی ترمیم لائی تھیں جس میں انہوں نے صدر اور نائب صدر کے ساتھ ساتھ خود کو قانونی چارہ جوئی سے باہر رکھا تھا۔ جناب  شاہ نے کہا کہ وزیر اعظم نریندر مودی خود اپنے خلاف آئینی ترمیم لائے ہیں کہ اگر وزیر اعظم بھی جیل جاتے ہیں تو انہیں استعفیٰ دینا پڑے گا۔ انہوں نے کہا کہ اس قانون میں عدالت کو کوئی تاخیر نہیں ہوگی کیونکہ عدالت کو فوری مداخلت کرنا ہوگی۔ اس سے جلد فیصلہ آئے گا کیونکہ ہماری عدالتیں بھی قانون کی سنگینی کو سمجھتی ہیں۔

جناب امت شاہ نے کہا کہ وزیر اعظم جناب نریندر مودی جی بہت واضح طور پر مانتے ہیں کہ ملک میں کوئی وزیر، وزیر اعلیٰ یا وزیر اعظم جیل میں رہتے ہوئے حکومت نہیں چلا سکتا۔ انہوں نے کہا کہ جب آئین بنا تو آئین بنانے والوں نے سوچا بھی نہیں ہو گا کہ کوئی وزیر اعلیٰ جیل جائے گا اور پھر بھی وزیر اعلیٰ ہی رہے گا۔ انہوں نے کہا کہ ہمیں اپنی اخلاقی اقدار کو گرنے نہیں دینا چاہیے۔ یہ قانون اخلاقی اقدار کی سطح کو بنیاد دے گا اور اس سے ہماری جمہوریت یقینی طور پر مضبوط ہوگی۔ انہوں نے کہا کہ ہماری عدالتیں حساس ہیں اور جب کوئی اپنا عہدہ کھو دے گا تو یقینی طور پر مقررہ مدت میں ضمانت کا فیصلہ کریں گے۔

مرکزی وزیر داخلہ نے کہا کہ اہم اپوزیشن پارٹی کو انتقام کی بات کرنا مناسب نہیں ہے۔ انہوں نے کہا کہ اپوزیشن کی حکومت کے دوران کم از کم 12 معاملوں میں عدالت کے حکم کے بعد سی بی آئی جانچ ہوئی اور کئی لوگ پھنس گئے۔ انہوں نے کہا کہ جے پی سی بنانے کے فیصلے کے بعد بھی اگر کوئی پارٹی اس کا بائیکاٹ کرتی ہے تو حکومت کے پاس کوئی آپشن نہیں ہے۔ جناب  شاہ نے کہا کہ یہ بل اہم ہے اور تمام پارٹیوں کے ارکان سے مشاورت کے بعد جے پی سی کے سامنے ایک قابل غور رائے آنی چاہئے۔ انہوں نے کہا کہ حکومت اپوزیشن کو اپنا موقف پیش کرنے کا موقع دیتی ہے لیکن اگر اپوزیشن اپنا موقف پیش نہیں کرنا چاہتی تو ملک کے عوام بھی یہ سب دیکھ رہے ہیں۔ وزیر داخلہ نے کہا کہ اگر کوئی بدعنوانی میں ملوث  ہے تو اسے گرفتار کیا جائے گا، جیل جانا پڑے گا اور استعفیٰ بھی دینا پڑے گا۔

جناب امت شاہ نے کہا کہ اپوزیشن کو انہیں اخلاقیات کا سبق نہیں سکھانا چاہئے۔ جناب  شاہ نے کہا کہ جب ان پر الزام لگایا گیا اور سی بی آئی نے انہیں طلب کیا تو انہوں نے اگلے ہی دن استعفیٰ دے دیا۔ مقدمہ چلا اور فیصلہ بھی آیا کہ وہ بالکل بے قصور ہیں۔ انہوں نے کہا کہ اس فیصلے میں کہا گیا ہے کہ یہ مکمل طور پر سیاسی انتقام کا مقدمہ ہے اور اس کیس میں ان کا کوئی دخل نہیں۔ جناب  شاہ نے کہا کہ انہیں شک کی بنیاد پر بری نہیں کیا گیا بلکہ ان کے خلاف مقدمہ خارج کر دیا گیا ہے۔ جناب  شاہ نے کہا کہ انہیں 96ویں دن ضمانت مل گئی لیکن اس کے باوجود انہوں نے دوبارہ حلف نہیں اٹھایا اور وزیر داخلہ نہیں بنے۔ یہی نہیں، انہوں نے اس وقت تک کسی آئینی عہدے کا حلف نہیں اٹھایا جب تک ان کے خلاف تمام الزامات کو مسترد نہیں کر دیا گیا۔

جناب امت شاہ نے کہا کہ اخلاقیات کی سطح کا تعلق انتخابی جیت یا ہار سے نہیں ہے بلکہ یہ ہمیشہ سورج اور چاند کی طرح اپنی جگہ پر مستحکم رہتی ہے۔ انہوں نے کہا کہ ہمارے تمام اتحادی اس قانون سے مکمل طور پر متفق ہیں۔ جناب  شاہ نے کہا کہ یہ صرف حکمراں جماعت نہیں ہے جو یہ فیصلہ کرتی ہے کہ پارلیمنٹ کو کیسے کام کرنا چاہئے۔ اپوزیشن کسی بل یا آئینی ترمیم کے لیے صحت مند ماحول پیدا نہیں کرتی تو ملک کے عوام یہ سب کچھ دیکھ رہے ہیں۔ انہوں نے یقین ظاہر کیا کہ یہ بل منظور ہو جائے گا اور اپوزیشن میں بہت سے لوگ ہوں گے جو اخلاقی بنیادوں پر اس کی حمایت کریں گے۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

 (ش ح –ام، ع د)

U. No.5273