কেন্দ্রগী মন্ত্রী মন্দলদা লৈরিবা ঐহাক্কী মরুপ নিতিন গদকরীজী, হরিয়ানাগী মুখ্য মন্ত্রী নায়ব সিংহ সাইনীজী, দিল্লীগী লেফতনেন্ত গভর্নর বিনয় সক্সেনাজী, দিল্লীগী মুখ্য মন্ত্রী রেখা গুপ্তাজী, কেন্দ্রগী কাউন্সিল ওফ মিনিস্তর্সতা লৈরিবা ঐগী মরুপ অজয় তম্তাজী, হর্শ মলহোত্রাজী, দিল্লী অমসুং হরিয়ানগী এম.পি.শিং, মন্ত্রীশিং, অতোপ্পা মীয়ামগী মীহুৎশিং অমসুং ঐগী নুংশিরবা ইচিল ইনাওশিং,

এক্সপ্রেসৱেগী মমিংদি দ্বারকানি, থৌরম অসি পাংথোক্লিবা মফম অসিগী মমিংনা রোহিনি, জন্মাষ্টমীগী নুংঙাইবা অদুগা চান্নরুবা ওইনা ঐহাক্না দ্বারকাদিশকী লমদম অসিদা লাক্লি, ওইরিবা ফীভম অসি শ্রীকৃষ্ণনা মপুং ফাহল্লে।

মরুপশিং,

ওগস্তকী থা অসিদি নীংতম্বা অমসুং রিভোলুসনগী মচুনা মঙাল পীরি। নীংতম্বাগী কুহ্মৈ অসিগী মরক্তা, ঙসি লৈবাক অসিগী কোনুং দিল্লীদা লৈবাক অসিদা চাউখৎ-থৌরাংগী অহোংবা লাক্লি। মতম খরগী মমাংদা, দিল্লীদা দ্বারকা এক্সপ্রেসৱে অমসুং অর্বান এক্সতেন্সন রোদকী কনেক্তিবিতী ফংলে। মসিনা দিল্লী, গুরুগ্রাম অমসুং এন.সি.আর. পুম্নমক্কী মীয়ামগী খুদোংচাবশিং হেনগৎহনগনি। ওফিস অমসুং ফেক্তরীদা চৎপা অমসুং হল্লকপা অসি হেন্না লায়থোক্লগনি অমসুং মীপুম খুদিংমক্কী মতম কনবা ঙম্লগনি। বিজিনেস ক্লাস অমসুং ঐখোয়গী লৌমীশিংনা অখন্নবা কান্নবা ফংগনি। অনৌবা লম্বীশিং অমসুং অনৌবা ইনফ্রাস্ত্রকচরশিং অসিগীদমক দিল্লী-এন.সি.আর.গী মীয়াম পুম্নমকপু ঐনা থাগৎপা ফোংদোকচরি।

মরুপশিং,

নহাল, ওগস্ত ১৫দা, লাল কিলাদগী ঐহাক্না লৈবাক অসিগী শেন্মিৎলোন, লৈবাক অসিগী মশা-মরোমদোম লেপচবা অমসুং লৈবাক অসিগী মশাদা থাজবগী মতাংদা চাউনা থাজবগা লোয়ননা ৱা ঙাংখি। ঙসি ভারতনা করি খল্লি, মাগী মংলানশিং, মাগী ৱারেপশিং অসি মালেম পুম্বনা ঙসি পুম্নমক অসি এক্সপরিয়েন্স তৌরি।

অমসুং মরুপশিং,

মালেমনা ভারতপু য়েংবদা, মাগী চাং ওনবদা, মখোয়গী অহানবা মীৎয়েং অসি ঐখোয়গী কোনুং, ঐখোয়গী দিল্লীদা তাররে। মরম অদুনা, ঐখোয়না দিল্লীবু চাউখৎপগী মোদেল অমা ওইহনগদবনি, মসিদা মীপুম খুদিংমক্না মসি চাউখৎলক্লিবা ভারতকী কোনুংনি হায়না খল্লি।

মরুপশিং,

হৌখিবা চহি ১১ অসিদা, কেন্দ্রদা লৈরিবা ভারতীয় জনতা পার্তী সরকারনা মসিগীদমক্তা তোঙান তোঙানবা থাক্তা লেপ্পা লৈতনা থবক তৌরি। হৌজিক্তি, কনেক্তিবিতী অসি মরু ওইবা ৱাফম অমা ওইরি। দিল্লী-এন.সি.আর.গী কনেক্তিবিতী অসি হৌখিবা দিকেদ অমদা মমাংদা অমুক্তা ওইখিদ্রিবা মওংদা ফগৎলক্লি। মফম অসিদা মোদর্ন অমসুং পাক চাউবা এক্সপ্রেসৱেশিং লৈ। মেত্রো নেৎৱার্ক্কী মতাংদদি, দিল্লী-এন.সি.আর. অসি মালেমদা খ্বাইদগী চাউবা নেৎৱার্ক এরিয়াশিংগী মনুংদা অমনি। মফম অসিদা নমো ভারতগুম্না মোদর্ন রেপিদ রেল সিস্তেম লৈ। হায়বদি, হৌখিবা চহি ১১ অসিদা, দিল্লী-এন.সি.আর.দা চৎথোক-চৎশিন তৌবা অসি মমাংদগী হেন্না লায়থোক্লে।

মরুপশিং,

দিল্লীবু অচৌবা শহর অমা ওইহন্নবা ঐখোয়না পায়খৎলিবা থবক অসি মখা চত্থরি। ঙসি ফাওবদা ঐখোয় পুম্নমক্না মসিগী শাখি ওইরি। দ্বারকা এক্সপ্রেসৱে ওইগেরা নৎত্রগা অর্বান এক্সতেন্সন রোদ ওইগেরা, লম্বী অনিমক অসি য়াম্না ফজনা শাখ্রে। পেরিফরেল এক্সপ্রেসৱেগী মতুংদা, হৌজিক অর্বান এক্সতেন্সন রোদনা দিল্লীবু য়াম্না মতেং পাংগনি।

মরুপশিং,

অর্বান এক্সতেন্সন রোদনা অতোপ্পা ফীচর অমসু লৈ। মসিনা দিল্লীবু অমোৎ-অকাইশিং লৌথোকপদসু মতেং পাংলি। অর্বান এক্সতেন্সন রোদ অসি শাবদা তন লাখ কয়াগী অমোৎ-অকাই শীজিন্নখ্রে। হায়বদি, অমোৎ-অকাইগী চাং হন্থহন্দুনা, মদুগী ৱেস্ত মেতরিএলশিং অদু লম্বী অসি শাবদা শীজিন্নখি অমসুং মসি সাইন্তিফিক ওইবা মওংদা শীজিন্নখি। ভাল্সৱা লেন্দফিল সাইত অসি মনাক নকপদা লৈ। মসি মফম অসিদা লৈরিবা ইমুংশিংগীদমক য়াম্না খুদোংচাদবা অমনি হায়বসি ঐখোয় পুম্নমক্না খঙই। ঐখোয়গী সরকারনা দিল্লীগী মীয়াম্বু অসিগুম্বা খুদোংচাদবশিং অসিদগী কোকহন্নবা হোৎনরি।

মরুপশিং,

রেখা গুপ্তজীগী লুচিং মখাদা দিল্লীগী বিজেপি সরকারনা য়মুনাগী ঈশিং শেংদোক্নবা লেপ্পা লৈতনা হোৎনরিবা অসিদা ঐহাক নুংঙাইবা ফাওই। মতম খরগী মনুংদা য়মুনাগী সিল্ত তন লাখ ১৬ লৌথোকখ্রে হায়না ঐহাক্না খঙবা ফংলে। মসিতা নত্তে, য়াম্না অতেনবা মতমগী মনুংদা দিল্লীদা দেবী ইলেক্ত্রিক বস ৬৫০ চেনবা হৌখ্রে। মসিতা নত্তে, তুংলমচৎতা ইলেক্ত্রিক বসশিংগী মশিং অসি য়াম্না চাউনা হেনগৎতুনা য়ামদ্রবদা লিশিং অনীগী ময়া য়ৌরগনি। মসিনা গ্রীন দিল্লী- ক্লিন দিল্লীগী মন্ত্রবু হেন্না মপাঙ্গল কনখৎহল্লি।

মরুপশিং,

চহি কয়াগী মতুংদা, কোনুং দিল্লীদা বি.জে.পি.গী সরকার শেম্মি। মতম কয়াগী মমাংদগী ঐখোয়না লৈঙাক পায়রমদে অমসুং মমাংগী সরকারশিংনা দিল্লীবু করম্না মাঙ-তাকহনবগে, দিল্লীবু কদায়দা নমশিনখিবগে হায়বদু ঐখোয়না উরে। মতম কুইনদগী ওইরক্লিবা সমস্যাশিং অসিদগী দিল্লীবু লৌথোকপা বিজেপিগী অনৌবা সরকারগীদমক কয়া য়াম্না অরুবা ওইরক্কদগে হায়বদু ঐনা খঙই। অহানবদা, ইনর্জী অসি কোম মেনশিনবদা শীজিন্নগনি অমসুং মদুগী মতুংদা থবক খরদি য়াম্না ৱানা হোৎনরবা মতুংদা উবা ফংলগনি। অদুবু ঐহাক্না থাজবা থম্লি মদুদি দিল্লীদা অদোম্না খল্লিবা তীম অসিনা কন্না হোৎনদুনা দিল্লীবু হৌখিবা চহি তরাগী খুজিং কয়াদগী থেংনরক্লিবা খুদোংচাদবশিং অসিদগী কোকহল্লগনি।

মরুপশিং,

দিল্লী, হরিয়ানা, য়ু.পি. অমসুং রাজস্থানদা মফম খুদিংমক্তা বি.জে.পি.গী সরকার লৈরকপা অসি চান্নরুবনি। মসিনা তাক্লি মদুদি লমদম পুম্বনা বিজেপিদা, ঐখোয় পুম্নমক্তা য়াম্না থৌজাল পীরি। মরম অদুনা, ঐখোয়গী থৌদাংবু খঙলদুনা, ঐখোয়না দিল্লী-এন.সি.আর. চাউখৎহন্নবা থবক তৌরি। অদুম ওইনমক, রাজনিতীগী পার্তী খরদি মীয়ামগী য়াইফ-মঙ্গোল অসি য়ানীংদ্রি। মখোয় অসি মীয়ামগী থাজবা অমসুং তঙাইফদবা ফিভম অনিমক্তগী য়াম্না লাপ্না লৈরি, মখোয় অসি য়াম্না লাপ্না চৎলি। থা খরগী মমাংদা দিল্লী অমসুং হরিয়ানাগী মীয়াম্বু অমগা অমগা খৎননবা, নুংশিদবা পোকহন্নবা, হরিয়ানাগী মীয়াম্না দিল্লীগী ঈশিংদা হু হাপচিল্লি হায়নসু হায়খিবা অদু অদোম্না নীংশিংলমগনি। দিল্লী অমসুং এন.সি.আর. পুম্নমক অসিগুম্বা নেগেতিব পোলিসীদগী নীংতম্লে। হৌজিক ঐখোয়না এন.সি.আর.বু ত্রান্সফোর্ম তৌনবা ৱারেপ লৌদুনা মাংলোমদা চংশিল্লি। অমসুং ঐহাক্না থাজৈ মদুদি ঐখোয়না মসি পাংথোক্কনি।

মরুপশিং,

অফবা লৈঙাকপা হায়বসি বিজেপিগী সরকারশিংগী মশক অদুনি। বি.জে.পি.গী লৈঙাকশিংগীদমক্তদি, মীয়াম অসি খ্বাইদগী মরু ওই। অদোম্না ঐখোয়গী মকোকথোংবা কমান্দরনি, ঐখোয়না মীয়ামগী পুন্সিবু হেন্না লায়থোকহন্নবা লেপ্পা লৈতনা হোৎনরি। মসি ঐখোয়গী পোলিসীশিং, ঐখোয়গী ৱারেপশিংদা উৎলি। মতম অমদা কংগ্রেসনা হরিয়ানাদা লৈঙাক পায়রিঙৈ মতমদা শেল অমত্তা চংদনা এপোইন্তমেন্ত ফংবদা অৱাবা ওইরম্মি। অদুবু হরিয়ানাগী বিজেপি সরকারনা নহারোল কয়াদা মপুং ফানা ত্রান্সপরেন্সী লৈনা সরকারগী থবক পীরি। মসিগী থৌওং অসি নয়াব সিংহ সাইনিজীগী লুচিং মখাদা মখা তানা চত্থরি।

মরুপশিং,

দিল্লীদসু, হান্নগী স্লমদা লৈরম্বা, মশাগী য়ুম লৈরমদবা মীওইশিংনা মশাগী য়ুম ফংলি। ইলেক্ত্রিসিতী, ঈশিং, গ্যাস কনেক্সন লৈতবা মফমশিংদা হায়রিবা খুদোংচাবশিং অসি ফংহল্লে। অমসুং করিগুম্বা ঐহাক্না লৈবাক অসিগী মরমদা হায়রবদি, হৌখিবা চহি ১১ অসিদা, লৈবাক অসিদা লম্বী মশিং য়াম্না শাখ্রে, ঐখোয়গী রেলৱে স্তেসনশিং নৌনা শেমগৎলি। বন্দে ভারতকুম্বা মোদর্ন ত্রেনশিংনা ঐখোয়বু চাউথোকচবা পোকহল্লি। অপীকপা শহরশিংদা এয়রপোর্তশিং শাগৎলি। এন.সি.আর.দা য়েংবীয়ু, এয়রপোর্ত কয়া শাখ্রে। হৌজিক্তি হন্দোন এয়রপোর্ত্তগী শহর কয়াদা ফ্লাইতশিং চৎপা হৌরে। নোইদাগী এয়রপোর্তসু অথুবা মতমদা শাবা লোইরগনি।

মরুপশিং,

মসিনা লৈবাক অসিনা হৌখিবা চহি তরা অসিদা মাগী অরিবা চৎনবীশিং অসি হোংদোকপা মতমদা খক্তনা ওইথোকপা ঙমখি। হৌজিক্তি নোংপোক অমসুং নোংচুপ থংবা পেরিফরেল এক্সপ্রেসৱে লৈরে। দিল্লী-এন.সি.আর.না মসিগী মথৌ তাবা অসি দিকেদ কয়াগী মমাংদগী ফাওদুনা লাক্লি। য়ু.পি.এ. সরকারগী মতমদা, ফাইলশিং অসিগা মরী লৈননা লেংবা হৌখি। অদুবু থবক অসি অদোম্না ঐখোয়দা সেবা তৌবগী খুদোংচাবা পীবদগী হৌখি। কেন্দ্র অমসুং হরিয়ানাদা বি.জে.পি.গী সরকারশিং শেম্বা মতমদা। ঙসিদি হায়রিবা লম্বীশিং অসিনা চাউথোকচবা পোকহল্লি।

মরুপশিং,

চাউখৎ-থৌরাংগী প্রোজেক্তশিংগী মায়কৈদা পুক্নিং চংবা অসি দিল্লী-এন.সি.আর. খক্তদা নত্তনা লৈবাক পুম্বদা ওইখি। অহানবদা, ইনফ্রাস্ত্রকচরগীদমক বজেৎ অসি মমাংদা য়াম্না নেম্না লৈরম্মি, অয়াবা পীরবা প্রোজেক্তশিং অসিসু চহি কয়া লোইশিনখিদে। হৌখিবা চহি ১১ অসিদা ঐখোয়না ইনফ্রাস্ত্রকচরগী বজেৎ অসি শরুক তরুক হেনগৎহনখ্রে। হৌজিক্তি স্কিমশিং অসি অথুবা মতমদা লোইশিনবদা মরুওইবা পীরি। মসিনা মরম ওইদুনা ঙসিদি দ্বারকা এক্সপ্রেসৱেগুম্বা প্রোজেক্তশিং অসি মপুং ফানা লোইশিনখ্রে।

অমসুং ইচিল-ইনাওশিং,

শেল পুম্নমক থাদরকপগা লোয়ননা, ফেসিলিতীশিং শেমগৎপতা নত্তনা, প্রোজেক্তশিং অসিনা থবক কয়া অমসু পুথোক্লি। য়ুম কয়া শাবা মতমদা, শিন্মীদগী হৌদুনা ইঞ্জিনীয়র ফাওবা মীওই লাখ কয়ানা থবক ফংই। শীজিন্নরিবা বিল্দিং মেতরিএলগা মরী লৈনবা ফেক্তরীশিং অমসুং দুকানশিংদা থবক ফংবগী চাং হেনগৎলক্লি। ত্রান্সপোর্ত অমসুং লোজিস্তিক্সতা থবক ফংহল্লি।

মরুপশিং,

মতম শাংনা লৈঙাক পায়দুনা লাক্লিবশিংগী ওইনা খ্বাইদগী চাউবা পান্দমদি মীয়াম্বু লৈঙাকপা ওইরম্মি। ঐখোয়গী খোঙথাং অসিদি সরকারনা মীয়ামগী পুন্সিদা পীরিবা প্রেসর অমসুং ইথিল অনিমক লোইশিন্নবনি। দিল্লীগী মমাংদা ওইখিবা ফিভমগী অতোপ্পা খুদম অমা ঐহাক্না পীজগে। অদোম্না মসি খঙবদা অঙকপা পোক্কনি। দিল্লীদা লৈরিবা ঐখোয়গী স্বচ্ছতা মিত্রশিং, স্বচ্ছতাগী থবকশিংদা শরুক য়ারিবা মরুপশিং, মখোয় পুম্নমক্না দিল্লীদা য়াম্না চাউবা থৌদাং লৌরি। ঐখোয়না হেক হৌগৎপা মতমদা, ঐখোয়না মখোয়দা অহানবদা থাগৎপা ফোংদোক্কদবনি। অদুবু মমাংগী সরকারশিংনা হায়রিবা মীওইশিং অসি মখোয়গী মীনাইশিংনি হায়না লৌনরম্মি। ঐনা হায়রিবসি ঐগী অপীকপা সেনিতেসনগী থবক তৌরিবা ইচিল-ইনাওশিং অদুগীনি। কনস্তিত্যুসনবু মখোয়গী মকোক্তা লৈদুনা শান্নরিবা মীওইশিং অসিনা, মখোয়না কনস্তিত্যুসনবু মতৌ করম্না খোঙ্গোইনবগে, মখোয়না বাবা সাহেবকী ৱাখল্লোনবু মতৌ করম্না নাথৈবগে, ঙসি ঐহাক্না অদোমদা মদুগী অচুম্বা অদু শন্দোক্না তাকচরি। ঐনা হায়গদবা অসি তাবদা নখোয়না অঙকপা পোক্কনি। দিল্লীদা সেনিতেসন ৱার্কর ওইনা থবক তৌরিবা ঐহাক্কী ইচিল-ইনাওশিংগীদমক্তদি, লৈবাক অসিদা, দিল্লীদা মখোয়গীদমক্তা খুদোংথিনিংঙাই ওইবা আইন অমা লৈরি। দিল্লী ম্যুনিসিপাল কোর্পোরেসন এক্ততা করিগুম্বা সেনিতেসন ৱার্কর অমনা পাউ পীবা তৌদনা থবক লাক্ত্রবদি থা অমা জেলদা থম্বগী ৱাফম অমা য়াওরি। অদোম্না ঐঙোন্দা হায়বিয়ু, অদোম ইশামক্না খনবিয়ু, মীওইশিং অসিনা সাফাই কর্মচরীগী মরমদা করি খল্লি। অপীকপা অশোয়বা অমগীদমক অদোম্না মখোয়বু জেলদা থমগদ্রা? ঙসি খুন্নাইগী অচুম্বা ৱায়েলগী মতাংদা ৱা ঙাংলিবা মীওইশিং অসিনা লৈবাক অসিদা অসিগুম্বা কাংলোন অমসুং আইন কয়া অমা ঙাক্না চৎলি। অসিগুম্বা অরানবা আইনশিং থিদোকপা অমসুং মুত্থৎপা অসি মোদীনি। ঐখোয়গী সরকারনা অসিগুম্বা আইন চাম্মরোম মুত্থৎখ্রে অমসুং মসিগী কেম্পেন অসি মখা চত্থরি।

মরুপশিং,

ঐখোয়গীদমক্তদি, রিফোর্ম হায়বসিনা অফবা লৈঙাক্লোন পাকথোক চাউথোকহনবনি। মরম অদুনা, ঐখোয়না রিফোর্মদা লেপ্পা লৈতনা মরুওইবা পীরি। লাক্কদৌরিবা মতম অসিদা, ঐখোয়না অচৌবা রিফোর্ম কয়া অমা পাংথোক্লগনি। মসিনা পুন্সি অমসুং ললোন-ইতিক অনিমক্তা য়াম্না লাইথোকহল্লগনি।

মরুপশিং,

মসিগী মথং-মথং লাকপা অসিদা, জি.এস.তি.দা নেক্স জেনরেসনগী রিফোর্ম অমা পাংথোক্কনি। হন্দক্কী দিৱালী অসিদা, লৈবাক মীয়াম্না জি.এস.তি. রিফোর্মদগী দবল বোনস অমা ফংলগনি। ঐখোয়না মসিগী মপুং ফাবা ফোর্মেৎ অদু রাজ্যশিংদা থাগৎখ্রে। ভারত সরকারগী খোঙথাং অসিদা রাজ্য পুম্নমক্না মতেং পাংগনি হায়না ঐনা আশা তৌই। ঐখোয়না হায়রিবা থৌওং অসি অথুবা মতমদা লোইশিনগনি। মসিনা দিৱালী অসি হেন্না শিংথানিংঙাই ওইহনগনি। ঐখোয়গী হোৎনবা অসি জি.এস.তি.বু হেন্না লায়থোকহনবা অমসুং তেক্স রেৎশিং হোংদোকপা অসিনি। ইমুং খুদিংমক, লায়রবশিং অমসুং ময়াই ওইবা কাংলুপ, অপীকপা অমসুং অচৌবা ওন্তপ্রিন্যুওর খুদিংমক, ত্রেদর অমসুং বিজিনেসমেন খুদিংমক্না মসিগী কান্নবা ফংগনি।

মরুপশিং,

ভারতকী খ্বাইদগী চাউবা শক্তি অসি ঐখোয়গী অরিবা মতমগী কলচর, ঐখোয়গী অরিবা মতমগী হেরিতেজনি। মসিগী কলচরেল হেরিতেজ অসিদা পুন্সিগী ফিলোসোফী অমা, হিংবগী ফিলোসোফী অমা লৈরি অমসুং পুন্সিগী ফিলোসোফী অসিদা ঐখোয়না চক্রধারী মোহন অমসুং চরখাধারী মোহন অনিমক খঙবা ফংলি। মতম মতমগী ওইনা, ঐখোয়না চক্রধারী মোহনদগী হৌরগা চরখাধারী মোহন ফাওবা অনিমক থেংনৈ। চক্রধারী মোহন হায়বসিনা সুদর্শন চক্রগী শক্তি অদু মীয়ামদা খঙহনখিবা, সুদর্শন চক্র পুদুনা লাকপা শ্রী কৃষ্ণবু খংহল্লি। চরখাধারী মোহন হায়বসিনা মহাত্মা গান্ধীবু খংহল্লি, মহাক্না চরখা চীংদুনা মীয়ামদা স্বদেশীগী শক্তি অদু খঙহনখি।

মরুপশিং,

ভারতপু মপাঙ্গল কনখৎহন্নবা ঐখোয়না চক্রধারী মোহনগী থৌনা লৌদুনা মাংলোমদা চংশিনবা তাই অমসুং ভারতপু মশা-মরোমদোম লেপচবা ঙমহন্নবা ঐখোয়না চরখাধারী মোহনগী লম্বীদা চংশিনবা তাই। ঐখোয়না ভোকেল ফোর লোকেলবু ঐখোয়গী পুন্সিগী মন্ত্র ওইহনগদবনি।

মরুপশিং,

মসিগী থবক অসি ঐখোয়গীদমক্তদি অরুবা নত্তে। ঐখোয়না করিগুম্বা ৱাশক অমা লৌরকপা মতমদা, ঐখোয়না মদু পাংথোকই। ঐহাক্না অদোমদা খাদিগী অপীকপা খুদম অমা পীজগে, খাদি অসি মাঙশিল্লকপগী তাঙ্কক য়ৌরক্লে, মদুগী মরমদা হংনবা কনা অমত্তা লৈখিদে, অদোম্না ঐঙোন্দা সেবা তৌবগী খুদোংচাবা পীরকপা মতমদা, ঐহাক্না লৈবাক অসিদা আপিল তৌখি, লৈবাক অসিনা অচেৎপা ফিরেপ লৌখি অমসুং মদুগী মহৈসু উবা ফংখি। খাদি য়োনবা অসি দিকেদ অমদা চাউরাক্না শরুক তরেৎ হেনগৎলে। লৈবাক অসিগী মীয়াম্না ভোকেল ফোর লোকেলগী মন্ত্রগা লোয়ননা খাদি শীজিন্নখ্রে। অসিগুম্না, লৈবাক অসিনা মেদ ইন ইন্দিয়া ফোন্দা থাজবা থম্লি। চহি ১১গী মমাংদা, ঐখোয়না মথৌ তারিবা ফোন্দা অয়াম্বনা ইম্পোর্ত তৌই। ঙসিদি ভারত মচা অয়াম্বনা মেদ ইন ইন্দিয়া ফোন শীজিন্নরি। ঙসিদি ঐখোয়না চহি খুদিংগী মোবাইল ফোন কোতি ৩০-৩৫, কোতি ৩০-৩৫, কোতি ৩০-৩৫ পুথোক্লি অমসুং মদুগী মহুৎতা এক্সপোর্তসু তৌরি।

মরুপশিং,

ঐখোয়গী মেদ ইন ইন্দিয়া, ঐখোয়গী য়ু.পি.আই. ঙসিদি মালেমগী খ্বাইদগী চাউবা রিএল তাইম দিজিতেল পেমেন্ত প্লেৎফোর্ম ওইরে, মালেমগী খ্বাইদগী চাউবা ওইরে। রেলৱে কোচশিং ওইরো নত্রগা ভারত্তা শাবা লোকোমোতিব ওইরো, মখোয়গী দিমান্দ হৌজিক মালেমগী অতোপ্পা লৈবাকশিংদসু হেনগৎলক্লি।

মরুপশিং,

লম্বীগী ইনফ্রাস্ত্রকচর, ইনফ্রাস্ত্রকচরগী মতাংদদি, ভারতনা গতী শক্তি প্লেৎফোর্ম অমা শেমখ্রে, মসিদা দেতাগী লেয়র ১৬০০, লেয়র তরামরি লৈরে অমসুং প্রোজেক্ত অমহেক্তদা করম্বা ফিভমশিং, করম্বা কাংলোনশিং ঙাক্কদৌরি, মসি ৱাইল্দলাইফ ওইগেরা নৎত্রগা ফোরেস্ত ওইগেরা, মসি তুরেল ওইগেরা নৎত্রগা দ্রেন ওইগেরা, হায়রিবা পুম্নমক অসি মিনিৎ খরগী মনুংদা ফংই অমসুং প্রোজেক্তশিং অসি খোঙজেল য়াংনা মাংলোমদা চংশিল্লি। ঙসিদি, গতী শক্তিগী তোঙানবা য়ুনিভর্সিতী অমা শেম্লে অমসুং গতী শক্তি অসি লৈবাক অসিগী চাউখৎপগী য়াম্না শক্তি লৈবা লম্বী অমা ওইরে।

মরুপশিং,

চহি তরাগী মমাংদা, ঐখোয়না শান্নপোৎশিং মপান্দগী পুশিল্লম্মি। অদুবু ঐখোয়না ভারত মচাশিংনা ভোকেল ফোর লোকেল ওইনবা ৱাশক লৌরকপা মতমদা, শান্নপোৎশিং অসি ভারত্তা মশিং য়াম্না শাবা হৌবতা নত্তনা ঙসিদি ঐখোয়না শান্নপোৎশিং মালেমগী লৈবাক ১০০ হেনবদা থাদোকপা হৌরে।

মরুপশিং,

মরম অদুনা, ঐহাক্না অমুক্কা হন্না পুম্নমকপু, লৈবাক মীয়াম পুম্নমকপু, ভারত্তা শাবা পোৎথোকশিংদা থাজবা থমগদবনি হায়না হায়জরি। করিগুম্বা নহাক ভারত মচা অমা ওইরবদি, ভারত্তা শাবা পোৎলমশিং খক্তমক লৈবীয়ু, হৌজিক কুহ্মৈগী মতম অসি লাক্লে। অদোমগী লোকেল প্রদক্তশিংগী নুংঙাইবা অদু অদোমগী ইমুংশিংগা শরুক য়ামিন্নবীয়ু, অদোম্না ৱারেপ লৌবীয়ু, অদোম্না ভারত্তা শাবা, ভারতমচাশিংনা শাবা খুদোল পীবীয়ু।

মরুপশিং,

ঙসি ঐনা ললোন-ইতিক্কী লমদা অমসুং দুকান মপুশিংদা ৱাফম অমা হায়জনীংই। মতম খরগী মমাংদা, অদোম্না মপানদা পুথোকপা পোৎলমশিং য়োল্লম্বা য়াই, মদুদগী অদোম্না হেন্না কান্নবা ফংগনি হায়না খল্লম্বা য়াই। হৌজিক্না অদোম্না তৌখিবা অদুদি তৌখ্রে, অদুবু হৌজিক্তি অদোম্না ভোকেল ফোর লোকেলগী মন্ত্র অসিদা ঐঙোন্দা মতেং পাংবীগদবনি। অদোমগী খোঙথাং অসিনা লৈবাক অসিদা কান্নবা পীবতা নত্তনা অদোমগী ইমুং অমসুং অদোমগী অঙাংশিংদসু কান্নবা পীগনি। অদোম্না য়োল্লকপা পোৎলম খুদিংমক্না লৈবাক অসিগী শিন্মী নৎত্রগা লায়রবশিংগী কান্নবা ফংহল্লগনি। অদোম্না য়োল্লকপা পোৎলম খুদিংমক্কী শেল অসি ভারত্তা লৈগনি অমসুং ভারতকী মীওই খরদা পীগনি। মসিনা হায়রিবদি মসিনা ভারত মচাশিংগী পোৎ লৈবগী শক্তি হেনগৎহনগনি, শেন্মিৎলোনবু মপাঙ্গল কনখৎহনগনি। মরম অদুনা ঐহাক্না অদোমদা হায়জরি মদুদি মপুং ফানা চাউথোকচবা পোকপগা লোয়নন মেদ ইন ইন্দিয়া পোৎলমশিং য়োনবীয়ু।

মরুপশিং,

ঙসিদি দিল্লী অসি ভারতকী মমাংঙৈগা মাগী তুংলমচৎকা পুনশিনবা মশক থোকপা কোনুং অমা ওইরক্লি। নুমিৎ খরনিগী মমাংদা লৈবাক অসিনা অনৌবা সেন্ত্রেল সেক্রেতরিয়েৎ অমা, কর্তব্য ভবন অমা ফংলে। অনৌবা পার্লিয়ামেন্ত অমা শেম্লে। কর্তব্য পথ অসি অনৌবা মওং অমদা ঐখোয়গী মাংদা লৈরে। ভারত মন্দপম অমসুং য়াশোভুমীগুম্বা মোদর্ন কনফরেন্স সেন্তরশিংনা ঙসি দিল্লীগী মগুন হেনগৎহল্লি। মখোয়শিং অসিনা দিল্লীবু বিজিনেস অমসুং ত্রেদকীদমক্তা অচৌবা মফম অমা ওইহল্লি। ঐহাক্না থাজবা থম্লি মদুদি মীওই পুম্নমক্কী শক্তি অমসুং ইথিলগা লোয়ননা ঐখোয়গী দিল্লী অসি মালেমগী খ্বাইদগী ফবা কোনুং অমা ওইহল্লগনি। য়াইফ-পাউজেল অসিগা লোয়ননা, অমুক হন্না, চাউখৎ-থৌরাংগী থবকশিং অসিগীদমক, ঐহাক্না ময়াম পুম্নমকপু, দিল্লী, হরিয়ানা, রাজস্থান, উত্তর প্রদেশ, অমসুং লমদম পুম্নমক চাউখৎনবা ঐহাক্না য়াইফ-পাউজেল পীজরি। ময়াম পুম্নমকপু হন্না-হন্না থাগৎচরি!

***