রাস্ত্রপতিগী লোইশঙ
azadi ka amrit mahotsav

৭৯শুবা নীংতম নুমিৎকী মাঙওইননা ইকায়খুম্নরবা ভারতকী রাস্ত্রপতি শ্রীমতি দ্রৌপদি মুরমুনা লৈবাক্কী মফমদা পীবা ৱারোল

Posted On: 14 AUG 2025 7:40PM by PIB Imphal

ঐগী নুংশিজরবা লৈবাক মীয়াম,

নীংতম নুমিৎকী মাঙওইননা ঐহাক্না ময়াম পুম্নমক্কী মফমদা নুংঙাইবা ফোঙদোকচরি। নীংতম নুমিৎ অমদি গনতন্ত্র নুমিৎপু ঐখোয় পুম্নমক্না হরাও তয়াম্না পাঙথোকপা অসিমক চাওথোকচনিংঙাই ওইবা ৱাফম অমনি। নুমিৎশিং অসি ঐখোয়গী ইফমদা ভারত মচা অমা ওইনা চাউথোকচবা পোক্নবগী নীংশিংহনবা নুমিৎশিংনি।

ওগস্ত তরামঙা অসি ঐখোয় পুম্নমক্কী পুক্নিং ৱাখলদা হক্তুনা লৈখ্রবা তাং অমনি। লোইলম লৈঙাক্কী শাংলবা মতমদা, ভারত মচা মীরোল কয়ানা নীংতম্বা নুমিৎকী মঙলান মঙখি। নুপা অমদি নুপী, অহল অমদি নহা খাক্তনা, লৈবাক্কী মফম পুম্নমক্তগী মীওইশিংনা মীরম লৈঙাক্কী চুপ্লিবু হুন্দোকখিবা পামখি। মখোয়না হৌখিবা ইহৌনা অচৌবা থাজবগী ইথিল অমা পীদুনা নীংতম্লবা মতুংদসু ঐখোয়বু খুমাঙ চাওশিলহন্নবা খোঙহৌ হাপ্লি। ঐখোয়না হয়েং মচু অহুমগী ফিরালগী মফমদা সলামি কৎপা মতমদা, ঐখোয়না চহি ৭৮ গী মমাঙদা ওগস্ত ১৫ দা ভারতনা নীংতম্বা ফংহনখৎবা নীংতম লান্মী পুম্নমক্না কত্থোকখিবশিংদুগী মফমদসু শ্রদ্ধাঞ্জলি কৎকদৌরিবনি।

ঐখোয়গী নীংতম্বা অমুক হঞ্জিল্লবা মতুংদা, ঐখোয়না য়ুনিভর্সেল এদল্ত ফ্রেন্সাইজ পাঙথোক্তুনা মীয়ামগী লৈঙাক অমসু ওইখি। অতোপ্পা ৱাহৈদা হায়রগনা, ভারতকী মীয়াম ঐখোয়না ঐখোয়গী লাইবক লেপচনবা মতিকপু, অদোপ্পা মীয়ামগী লৈঙাকশিংদা মীখলদা শরুক য়াবদা অথিংবা পীরম্বা নুপা-নুপী, লাইনিং অমদি অতৈ হীরমশিংগী অথিংবা থমদনা, ঐখোয় খুদিংমক্কী খুত্তা হাপখি। শিংনবা কয়া থেংনজরবসু, ভারতকী মীয়াম্না মায় পাক্না মীয়ামগী লৈঙাক্তা খোঙ থাংজিল্লকখি। খোঙ থাংজিল্লকখিবা অদু ঐখোয়গী অরিবা মতমদগী লৈরক্লবা মীয়ামগী লৈঙাক্কী ৱাখল্লোন অদুগী মহৌশানা তাজরকপা মমি অমা ওইখি। ভারত্তা মালেমগী খ্বায়দগী অরিবা মীয়ামগী লৈঙাক লৈখি। মসিমক্না লমদম অসিবু দিমোক্রেসীগী মমা অমা ওইনা শকখঙনখি। ঐখোয়না সংবিধান চৎনহনখিবা মতমদা, মসিনা মীয়ামগী লৈঙাক্কী কাঙলোন পীখি। ঐখোয়না মীয়ামগী লৈঙাকপু মপাঙ্গল কনখৎহনগদবা দিমোক্রেতিক ইন্সতিত্যুসনশিং শেমগৎখি। ঐখোয়না ঐখোয়গী সংবিধান অমদি মীয়ামগী লৈঙাকপু পুম্নমক্কী মথক্তা থমদুনা লুনা লৌখি।

ঐখোয়না মাঙলমচত্তা হঙ্গৎনা য়েংবা মতমদা, ঐখোয়না লৈবাক অসিবু খায়দোকখিবনা পীখিবা চৈনাবু কাউরোইদবনি। ঙসি ঐখোয়না বিভাজন বিভিসিকা স্মৃতি দিবস পাঙথোক্লি। পার্তিসন্না মরম ওইরগা তমথিরবা হিংশাগী থৌদোকশিং থেংনখি অমদি মীওই মিলিয়ন কয়া ময়ুম হোংহনবা তাখি। ঙসি ঐখোয়না পুৱারীগী অশোয়বা অদুদা অৱাবা নংখ্রবশিংগী মফমদা শ্রদ্ধাঞ্জলি কৎচরি।

নুংশিরবা ইরৈবাক মীয়াম,

ঐখোয়গী সংবিধান্দা ঐখোয়গী দিমোক্রেসীবু ঙাক্লিবা য়ুম্বী মরী ওইনা ৱাখল্লোন মরি য়াওরি। মখোয়শিংদুদি – অচুম্বা ৱায়েল, নীং তম্বা, থোং মান্নবা, অমদি মরুপ মপাং ওইবা হায়বসিনি। মখোয় অসি ঐখোয়না নীংতম লালহৌ মতমদা নৌহৌননা থেংনখিবা খুন্দা লৈতাবগী পরমশিংদুনি। মখোয়গী নুংদা, ঐনা থাজবদি, মীওইবগী ইকায়খুম্নবা হায়বা ইহুল অসিনি। মীওইবা খুদিংমক চপ মান্নৈ, অমদি মীপুম খুদিংমক ইকায়খুম্নবগা লোয়ননা লোয়নবিগদবনি। মীপুম খুদিংমক চপ মান্নবা অনা লায়েং অমদি মহৈ মশিং ফংগদবনি। মীপুম খুদিংমক খুদোংচাবা চপ মান্ননা ফংগদবনি। মহৌশানা খুদোংচাদবা মায়োক্নদুনা লৈরিবা মীওইশিংদা তেংবাংগী খুৎ শম্বিগদবনি।

হায়রিবা ৱাখল্লোনশিং অসি মাঙদা থম্লগা, ঐখোয়না ১৯৪৭ দা অনৌবা খোঙচৎ অমা হৌরকখি। মপান লৈবাক্কী লৈঙাক মতম শাংনা লৈরম্লবা মতুংদা, ভারত নীংতম্বা মতমদা য়াম্না ফীভম চাদনা লায়রবা লৈবাক অমা ওইরম্মি। অদুবু মদুদগী চহি ৭৮ গী মতুংদা, ঐখোয়না হীরম পুম্নমক্তা শিংথানিংঙাই ওইনা খুমাঙ চাওশিল্লে। ভারত মরোমদোম লেপচবা ঙম্বা লৈবাক অমা ওইরক্নবগী লম্বীদা চঙশিল্লি অমদি চাউনা থাজবা অমগা লোয়ননা মাঙদা চঙশিল্লি।

শেন্মিৎলোনগী লমদা, ঐখোয়না ফংবা ঙম্লিবশিং লায়না খঙবা য়াবা ঙাক্তনি। হৌখৎবা শেনবা চহিদা চাদা ৬.৫ গী GDP গ্রোথ রেত ফংদুনা, ভারতনা মালেমগী অচৌবা শেন্মিৎলোনশিংগী মনুংদা খ্বায়দগী খোঙজেল য়াঙনা চেনখৎলক্লিবা লৈবাকশিংগী মরক্তা অমা ওইরি। মালেমগী শেন্মিৎলোনগী ফীভম শোকপা মতমদসু, ইরমদমসিদা লৈরিবা দিমান্দ হেনগৎলকখি। ইনফ্লেসন লাকশিন্দুনা থম্লি। মপান্দা থাদোকপগী চাং হেনগৎলক্লি। মরুওইবা ইন্দিকেতর পুম্নমক্না শেন্মিৎলোন অসি মশা ফনা লৈরি হায়বা উৎলি। মসি চেকশিন্না মওং চুম্না পুরকখিবা রিফোর্ম অমদি ঐখোয়গী শিন্মী অমদি লৌমীশিংনা কন্না হোৎনদুনা অমদি পুক্নিং লুপ্না হোৎনখিবশিং অদুনা পুরকখৎবা শিংথানিংঙাই ওইরবা ইকনমিক মেনেজমেন্ত অদুনা ওইহল্লকপনি।

অফবা লৈঙাক্লোনগী খুত্থাঙদা য়াম্লবা মীওই কয়া লায়রবগী খয়াৎনুংদগী পুথোরকখ্রে। লৈঙাক অসিনা লায়রবশিংগী য়াইফ থৌরাং কয়া পায়খৎলি অমদি লায়রবগী পনখৈগী মথক্তা লানখৎলকখ্রবা অদুবু খুদোংচাদবদি মায়োক্নরিবশিংগীসু পনখৈ অদুগী মখাদা অমুক হন্না কুমথখিদনবা য়াইফ থৌরাং কয়াসু পায়খৎলি। ৱাফম অসিমক খুন্নাইগী থৌগলদা শেল চৎপা হেনগৎলক্লিবা অসিদা মমি তারি। শেন্থোক মান্নদবগী চাং হন্থরক্লি। লম লমগী মরক্তা লৈরম্বা খেন্নবসু মাঙশিল্লক্লি। মমাঙদা শেন্মিৎলোনগী লমদা নীংথিনা লিৎখৎপা ঙমদে হায়না খঙনরম্বা স্তেত অমদি রিজনশিং হৌজিক্তি মখোয়গী অশেংবা মতিং ফুদোরক্লি অমদি মাঙজিল থাবশিংগা মান্ননা চেনখৎলক্লি।

ঐখোয়গী বিজিনেস লুচিংবশিং, অপীকপা অমদি মেদিয়ম ইন্দস্ত্রীশিং অমদি ত্রেদরশিংনা মতম পুম্বদা তৌবা ঙমগনি হায়বা মওং মতৌ উৎলি; মখোয়দা মথৌ তারম্লিবদি লন-থুম শেমগৎপগী লমবীদা লৈরম্বা খোঙলৌ পল্লৌবশিং লৌথোকপদুনি। ৱাফম অসিমক হৌখৎবা দেকেদ অসিদা ইনফ্রাস্ত্রকচর শেমগৎলকপা অসিদা উবা ফংলি। ঐখোয়না ভারতমালা পরিয়োজনাগী মখাদা নেস্নেল হায়ৱেগী নেতৱর্ক পাকথোক চাউথোকহল্লে অমদি মপাঙ্গল কনখৎহল্লে। রেলৱেজসু ইনোভেত তৌদুনা, খ্বায়দগী নৌবা তেক্নোলোজীশিং য়াওরবা অনৌবা মখলগী ত্রেন অমদি কোচশিং হৌদোক্লি। কাস্মির তম্পাক্তা রেল লিঙ্ক শঙ্গাখিবা অসি চাউনা মায় পাকপা অমনি। তম্পাক অসিদা রেল কন্নেক্তিবিতী পুরকপনা লমদম অদুদা লল্লোন ইতিক অমদি লম কোয়বগী লমদা ইনোৎ হাপকনি, অমদি অনৌবা শেন্মিৎলোনগী খুদোংচাবশিং পুরক্কনি। কাস্মিরদা পায়খৎলিবা ইঞ্জিনিয়রিংগী অঙকপা থৌওং অসি লৈবাক অসিগী পুৱারী ওইরবা পন্দোল অমনি।

লৈবাক অসি খোঙলৈ থুনা অর্বানাইজেসন লাক্লি। অসুম্না, লৈঙাক অসিনা ময়োল্লমশিংগী ফীভম ফগৎহনবদা অখন্নবা মীৎয়েঙ থম্লি। অর্বান ত্রান্সপোর্তকী মরুওইবা লমশিংদা মীৎয়েঙ থমদুনা, লৈঙাক অসিনা মেত্রো রেল ফেসিলিতী পাকথোক চাউথোকহল্লি। মেত্রো রেল সর্ভিস লৈবা ময়োল্লম মশিং দেকেদ অসিদা শরুক কয়া হেনগৎলক্লে। অতল মিসন ফোর রিজুবিনেসন এন্দ অর্বান ত্রান্সফোর্মেসন, নৎত্রগা AMRUT না য়ুমথোঙ মশিং হেন্না হেন্না শোয়দবা ঈশিংগী সপ্লাই ফংবা তোতি অমদি সিৱরেজ কন্নেক্সন ফংহল্লি।

লৈঙাক অসিনা পুন্সিগী চঙদ্রবা য়াদ্রবা মচাকশিংবু লৈবাক মীয়ামগী ফংফম থোকপা মঙম অমা ওইনা লৌরি। জল জীবন মিসন্না খুঙ্গংগী য়ুমথোঙশিংদা তোতিগী ঈশিং ফংহনবদা খুমাঙ চাওশিল্লি।

অনা লায়েংগী লমদসু, ঐখোয়না মালেমগী ওইনা অসিগুম্বা মখলগী খ্বায়দগী চাউবা হেল্থকেয়র স্কীম অমা ওইরিবা অয়ুস্মান ভারতনচিংবা মখল মখা কয়াগী থৌশিলশিংগা লোয়ননা চাউনা অওনবা পুরক্লি। স্কীম অসিনা মীওই করোর ৫৫ হেনবদা তেংবাং পীদুনা লাক্লি। লৈঙাক অসিনা মসিগী কান্নবা অসি শেন্থোক্কী ৱাফম থিদনা চহি ৭০ অমদি মথক্তা লৈবা অহলশিংদা ফংহল্লে। খুদোংচাবা ফংবদা লৈরম্বা থোং মান্নদবশিং লৌথোকখিবগা লোয়ননা, লায়রবা অমদি লৱর মিদ্দল ক্লাসকী মীওইশিংনসু খ্বায়দগী ফবা হেল্থ-কেয়র ফেসিলিতীশিংগী কান্নবা ফংলি।

ঙসিগী দিজিতেল এজ অসিদা, ইনফোর্মেসন তেক্নোলোজীনা ভারত্তা খ্বায়দগী অঙকপা ফংনা খুমাঙ চাওশিল্লক্লিবা লম অমা ওইরি হায়বদা হায়মনবা থোক্লোই। খুঙ্গং অয়াম্বনা 4G মোবাইল কন্নেক্তিবিতী ফংলে, অমদি লেমহৌরিবা লিশিং খরসু অথুবা মতমদা কোনশিল্লগনি। মসিনা দিজিতেল পেমেন্ত তেক্নোলোজী পাক শন্না শীজিন্নবা ঙমহন্দুনা তেল্লবা মতমদা হীরম অসিদা ভারতনা মালেমগী লুচিংবা অমা ওইরে। মসিনা দাইরেক্ত বেনিফিত ত্রান্সফর য়াহন্দুনা য়াইফ-থৌরাংগী কান্নবশিং অশোয় অঙাম য়াওদনা অমদি মরক্তা মাঙহন্দনা ফংফম থোকপা বেনিফিসরীশিংদা য়ৌহল্লি। মালেমগী দিজিতেল ত্রাঞ্জেক্সনগী অপুনবা মশিংগী তঙ্খায় হেনবদি ভারত্তা ওইরি। ফীভমশিং অসিনা মশক মচু থোকপা দিজিতেল ইকনমী অমা শেমদুনা মখোয়না লৈবাক্কী GDP দা লৌরিবা থৌদাং চহি চহিগী ওইনা হেনগৎলক্লি।

আর্তিফিসিএল ইন্তলিজেন্সনা তেক্নোলোজীগী খুমাঙ চাওশিনবগী মথঙগী তাঙ্কক্নি অমদি মসিনা ঐখোয়গী পুন্সিদা চঙখ্রে। লৈঙাক অসিনা লৈবাক অসিগী AI কেপেবিলিতী মপাঙ্গল কনখৎহন্নবা ইন্দিয়া-AI মিসন হৌদোকখ্রে। মসিনা ভারতকী অকক্নবা মথৌ তাবশিংগী পাউখুম পীবা ঙম্বা AI মোদেলশিং শেমগৎপদা মতেং পাংলি। ঐখোয়না ২০৪৭ ফাওবদা গ্লোবেল-AI-হব ওইনবা হোৎনবগা লোয়ননা, ঐখোয়না তেক্নোলোজী অসিদা খুমাঙ চাওশিল্লিবা অসিবু মীচম মীয়ামগীদমক খ্বায়দগী ফবা মওংদা শীজিন্ননবা, লৈঙাক্লোন ফগৎহন্দুনা মখোয়গী পুন্সি মহিং ফগৎহন্নবা মীৎয়েঙ থম্লি।

মীচম মীয়ামগী পুন্সি মহিং ফগৎহন্নবা ইজ ওফ দুইং বিজিনেস অমদি ইজ ওফ লিভিংগী ফীভম ফগৎহনবদা চপ মান্নবা মীৎয়েঙ থম্লি। চাওখৎপা হায়বসি চিদাইদা লৈরিবা মীওইশিংদা মতেঙ পীরবা অমদি মখোয়গীদমক অনৌবা খুদোংচাবশিং ফংহল্লবা মতমদা পান্দম ফংবা ওইগদৌরিবনি। মসিগী মথক্তা, ঐখোয়না চঙশিনবা য়াবা হীরম খুদিংমক্তা ঐখোয়না ইরোমদোম লেপচনবা মতিং হেনগৎহল্লি। মসিনা ইশাদা থাজবা হেনগৎহল্লি অমদি বিক্সিত ভারত ওইরক্নবগী খোঙচত্তা ঐখোয়গী খোঙজেল য়াঙ্খৎহল্লি।

হৌখিবা চয়োলদা, ওগস্ত ৭ তা, ঐখোয়গী ফিশাবীশিং অমদি মখোয়গী পোত্থোকশিংবু ইকায়খুম্নদুনা লৈবাক অসিনা ‘নেস্নেল হেন্দলুম নুমিৎ’ পাঙথোকখি। ২০১৫ দগী হৌনা, ঐখোয়না নুমিৎ অসিবু ১৯০৫ দা নীংতম লালহৌগী মতমদা হৌদোকখিবা স্বদেসী ইহৌবু নীংশিংদুনা পাঙথোক্তুনা লাক্লি। স্বদেসীগী ৱাখল্লোনবু, ভারতকী ফিশা লোনশা তৌবা অমদি খুৎহৈবশিংনা মখোয়গী চাংদম্নিংঙাই লৈত্রবা হৈথোই শিংথোইবনা অমদি মখোয়গী হুমাংমলনা শাজবা পোৎলমশিং য়োকখৎনবগীদমক মহাত্মা গান্ধীনা মপাঙ্গল হাপখি। স্বদেসীগী ৱাখল্লোন্না মেক-ইন-ইন্দিয়া থৌশিল অমদি আত্মনিরভর ভারত অভিয়ান্নচিংবা ঐখোয়গী লৈবাক্কী থৌরাংশিংবু পুক্নিং থৌগত্তুনা লাক্লি। ঐখোয় ভারতকী পোত্থোকশিং লৈনবা অমদি শীজিন্ননবা ফিরেপ লৌমিন্নসি।

নুংশিরবা লৈবাক মীয়াম,

সোসিএল সেক্তর ইনিসিএতিবশিংনা ঙাক্লৌ পীদুনা পুরক্লিবা মায়কৈ শুনা শেন্মিৎলোন চাওখৎলক্লিবা অসিনা ভারতপু ২০৪৭ ফাওবদা চাওখৎপা লৈবাক অমা ওইনবগী লম্বীদা পুরক্লে। অমৃৎ কাল মতমদা লৈবাক অসিনা মাঙদা চঙশিনবগা লোয়ননা, ঐখোয় পুম্নমক্না ঐখোয়গী ঙমজবী থাদুনা থৌদাং য়াবা ঐহাক্না উবা ফংই। চিদাইদা মতম কুইনা লৈরক্লবা নহা, নুপী অমদি ফুরুপশিং হায়রিবা খুন্নাইগী কাঙলুপ অহুম অসিনা লম্বী অসিদা ঐখোয়বু লমজিংগনি হায়না ঐনা থাজৈ।

ঐখোয়গী নহাশিংনা হৌজিক্তী মখোয়গী মঙওান মঙফাওনহন্নবা চপ চারবা মফম ফংলে। নেস্নেল এজুকেসন পোলিসীনা চাউনা অওনবা পুরক্তুনা, মহৈ তম্ববু মমল লৈহল্লে, অমদি হৈ-শিংববু চৎনবীগা শম্নহল্লে। থবক পীবগী খুদোংচাবশিং হেনগৎলক্লি। ওন্ত্রপ্রিন্যুর ওইনিংবগী অপাম্বা লৈবশিংগী ওইনা, লৈঙাক অসিনা খ্বায়দগী চুনবা ফীভম শেম্লে। নহাশিংগী ৱাখল লৌশিংনা শাহৌ ওইদুনা, ঐখোয়গী স্পেস প্রোগ্রাম হান্না পানরুদবা চাংদা পাকথোক চাউথোরক্লি। সুভান্সু সুক্লাগী ইন্তর্নেস্নেল স্পেস স্তেসন্দা চৎখিবা স্পেসকী খোঙচৎনা মীরোল অমবু হেন্না চাউবা মঙলান মঙহন্নবা ইহুল হাপ্লে হায়না ঐনা থাজৈ। মসিনা ভারতকী পায়খৎকদৌরিবা স্পেস ফ্লাইত প্রোগ্রাম ‘গগনয়ান’ দা চাউনা মতেং ওইগনি। অনৌবা থাজবনা ইফুৎ ওইদুনা, ঐখোয়গী নহাশিংনা শান্ন-খোৎনবগী লমদা অনৌবা মমি থম্লি। খুদম ওইনা শত্রঞ্জকী লমদা ভারতকী নহাশিংনা মমাঙদা ওইখিদ্রিবা মওংদা খুদুম চনশিল্লক্লি। ঐখোয়না, নেস্নেল স্পোর্তস পোলিসী ২০২৫ দা য়াওরিবা মীৎয়েঙগী মখাদা ভারতপু মালেমগী স্পোর্তিং পৱার-হাউস অমা ওইনা শেমগৎনবা অওনবা কয়া পুরকপা মাঙজৌননা উরি।

ঐখোয়গী ইচানুপীশিংনা ঐখোয়গী চাওথোকচফম্নিং। মখোয়না দিফেন্স অমসুং সিক্যূরিতী য়াওনা হীরম খুদিংদা পলশিং নমখায়রি। শান্ন-খোৎনবনা মীথোয় মীহেনবা, মপাঙ্গল হাপ্পা অমদি মতিংগী মরুওইবা ইন্দিকেতরশিংগী মরক্তা য়াওরি। ভারত্তগী চহি তরামাপল শুরবী নুপীমচা অমগা চহি কুন্থ্রানিপাল শুরবী নুপী অমগনা FIDE ৱুমেন্স ৱর্ল্দ কপ ফোর চেস চেম্পিয়নসিপকী ফাইনেলিস্ত ওইরি। মসিনা ঐখোয়গী নুপী মীরোলশিংদা লৈরিবা হনবা নাইদবা অমদি মালেমগা চাংদম্নবা য়াবা মীথোয় মীহেনবগী মতিং উৎলি। থবক পীবদা লৈরম্বা অহোবসু হন্থরক্লি। ‘নারী শক্তি বন্দন অধিনিয়ম’না নুপীগী মপাঙ্গল হাপ্পা হায়বা ৱাফমবু খোল্লাউ অমখক্তা নত্তনা অশেঙবা ৱাফম অমা ওইহল্লে।

সিদ্যুল কাস্ত, সিদ্যুল ত্রাইব, বেকৱার্দ ক্লাসেস অমদি অতৈ ফুরুপশিং হায়রিবা ঐখোয়গী খুন্নাইগী অচৌবা শরুক অমা ওইরিবা মীওইশিং অসিনা শোত্থৌরবা হায়বা মমিং অসি থাদোক্লক্লি। লৈঙাক অসিনা মখোয়গী মফমদা মখোয়গী খুন্নাইগী অমদি শেন্মিৎলোনগী অপাম্বশিং থৌশিল কয়া পায়খত্তুনা ফংহন্নবা মতেঙ পাংলি।

ভারতনা মাগী অশেংবা মতিং ফুদোক্নবা মায়কৈদা খোঙজেল য়াঙনা চঙশিল্লি। ঐখোয়গী রিফোর্ম অমদি খুজিল থৌরাংশিংনা মতিং লৈবা ফম্পাক অমা শেমগৎপগা লোয়ননা, ঐখোয় খুদিংমক্না ঐখোয় পুম্নমক্কী নুংঙাই য়াইফবা পুরক্নবগী ইচঙ থৌনা থৌদাং য়াবা তরং তরংবা তুংলমচৎ অমা ঐহাক্না উবা ফংই।

ঐখোয়না লেপ্পা লৈতনা অফবা লৈঙাক্লোন, অমদি শেঞ্জা থুমজাগী মায়োক্তা য়াশিন্নবা অমত্তা তৌদনা তুংগী লমবীদা খোঙ থাংজিল্লি। মতাংসিদা মহাত্মা গান্ধীনা হায়বিরম্বা মরুওইবা ৱাফম অমা নীংশিংহল্লি। মহাক্না হায়খিবা ৱাফম ঐ থমজগে:

“শেঞ্জা থুমজা অমদি হিপোক্রিসী দিমোক্রেসীদগী তঙায় ফদনা থোক্ত্রবা য়াদ্রবা মচাক ওইহল্লোইদবনি।”

ঐখোয় গান্ধীজীগী ফিদম ফংনবা অমদি শেঞ্জা থুমজা মরু ফংনা মুত্থৎনবা ৱাশকমিন্নসি।

নুংশিরবা লৈবাক মীয়াম,

চহি অসিদা ঐখোয়না তেরোরিজমগী তমথিবা মশক মায়োক্নবা তাখি। কাস্মিরদা শুতিগী কোয়বা চৎচবা মরাল লৈজদ্রবা মীয়ামবু হাৎপা পাঙদবা অমদি মীওইবগী লীচৎ নত্তবা থৌওংনি। ভারতনা খোঙফম চেৎনা অমদি অকনবা মওংদা পাউখুম পীখি। ওপরেসন সিন্দুরনা ঐখোয়গী লান্মীশিং লৈবাক ঙাকপগী লমদা থোরকপা অমা হেক্তা থেংননবা শেম শাদুনা লৈ হায়বা উৎখ্রে। ময়েক শেংবা লাল্লোং অমদি তেক্নিকেলগী ওইবা মতিংগা লোয়ননা, মখোয়না ঙমখৈগী ৱাংমদা লৈবা তেরোরিস্ত মকোলশিং থুগাইখি। ওপরেসন সিন্দুর পুৱারীগী লামায়দা মীওইবা খুন্নাইনা তেরোরিজমগী মায়োক্তা থেংনখিবা লানগী খুদম অমা ওইনা লৈহৌরগনি হায়না ঐনা থাজৈ।

মদুগী পাউখুমদা, খ্বায়দগী মশক থোকপা ৱাফম অমদি ঐখোয়দা লৈখিবা অমত্তা ওইবগী খোঙফমদুনি, মদুনা ঐখোয়বু খাইবুং তাহনবা পাম্বশিংগী মায়োক্তা পীবা খ্বায়দগী চুনবা পাউখুমসু ওইখি। ঐখোয়গী অমত্তা ওইবা শক্তম অসি ভারতকী খোঙফম শুগাইনা তাক্নবগীদমক তোঙান তোঙানবা লৈবাকশিংদা চৎখিবা মেম্বর ওফ পার্লিয়ামেন্তকী মল্তি-পার্তী দেলিগেসন্দসু উবা ফংখি। মালেম অসিনা, ঐখোয়না হান্না হৌবদি তৌরোই, অদুবু ঐখোয়গী মীয়াম ঙাক্নবা খুৎ হন্বদদি নীংহন্নবা তৌরোই হায়বা ভারতকী খোঙফমবু খঙখি।

ওপরেসন সিন্দুর দিফেন্স সেন্তরদা আত্মনিরভর ভারত মিসনগী চাংয়েং অমসু ওইখি। মদুদা ফংখিবা মহৈনা ঐখোয় অচুম্বা লম্বীদা চঙশিল্লি হায়বা তাকখি। ঐখোয়গী ইন্দিজিনস মেনুফেকচরিং ঐখোয়গী ঙাকশেলগী মথৌ তাবা কয়া অমা ফংহনবদা মশানা ঙমজবা থাক য়ৌহন্দুনা মরুওইবা তাঙ্কক অমদা য়ৌবা ঙম্লে। হায়রিবশিং অসি ভারতকী দিফেন্সকী পুৱারী অমদি নীং তম্বদা ফংবা ঙমখিবা শিংথানিংঙাই ওইবা মায় পাকপশিংনি।

নুংশিরবা লৈবাক মীয়াম,

ঐনা তাঞ্জা অসি লৌজরগা ময়াম পুম্নমক্কী মফমদা অকোয়বগী ফীভম ঙাক্নবা অদোম্না তৌবা য়াবশিং তৌনবা ৱাফম থমজরি। অইং-অশাগী খল হোংলকপনা পুরক্লিবা শিংনবশিং থেংননবা, ঐখোয়সু হোংবা তাই। ঐখোয়না ঐখোয়গী হৈনবী অমদি মালেমদা য়েংলিবা মীৎয়েঙ হোংদোকপা তাই। ঐখোয়না ঐখোয়গী লম, তুরেল, চীংজাও, অমদি শা-উচেক, উপাল-ৱাপালশিংগা লৈনরিবা মরী হোংদোকপা তাই। ঐখোয় পুম্নম্না থৌদাং য়াদুনা, ঐখোয়না পুন্সি কয়ানা মহৌশাগী ওইবা মচত্তা নুংঙাই য়াইফনা লৈহৌগদবা মালেম অমা থম্লমসি।

নুংশিরবা লৈবাক মীয়াম,

ঐগী পুক্নিংদা মরু ওইনা ঐখোয়গী ঙমখৈ ঙাক্লিবা লান্মীশিং, অমদি পুলিস অমদি সেন্ত্রেল আর্ম্দ পুলিস ফোর্সশিং থাগোন্নদুনা থম্লি। ঐহাক্না জুদিসিয়রী অমদি সিভিল সর্ভিসকী মেম্বরশিংগী মফমদা য়াইফ-পাউজেল পীজরি। মপান লমদা মিসন্দা লৈখিবা ভারতকী ওফিসিএলশিং অমদি মপান লৈবাকশিংদা লৈখিবা ভারত মচাশিংগী মফমদা ঐহাক্না নীংতম নুমিৎকী য়াইফ পাউজেল পীজরি।

ঐনা অমুক্কা হন্না নীংতম নুমিৎকী য়াইফ-পাউজেল পীজরি।

ময়ামবু থাগৎচরি।

জয় হিন্দা!

জয় ভারত!

*****


(Release ID: 2156625)