مرکزی کابینہ کی طرف سے منظور شدہ  روزگار سے منسلک ترغیبات ( ای ایل آئی)  اسکیم  یکم اگست 2025 سے ’’پردھان منتری وکست بھارت روزگار یوجنا  ( پی ایم – وی بی آر وائی) ‘‘ کے طور پر نافذ ہوگی۔ یہ نام وکست بھارت پہل قدمی کے لیے اسکیم کے مجموعی مقاصد کے مطابق ہے اور ملک میں جامع اور پائیدار روزگار کے مواقع پیدا کرنے کے لیے حکومت کے عزم کی عکاسی کرتا ہے۔

قبل ازیں، وزیر اعظم جناب نریندر مودی کی زیر صدارت مرکزی کابینہ نے اس اسکیم کو منظوری دی تھی۔ 99,446 کروڑ روپے کی لاگت کے ساتھ، پی ایم – وی بی آر وائی  کا مقصد 2 سال کی مدت میں ملک میں 3.5 کروڑ سے زیادہ ملازمتوں کے مواقع پیدا کرنا ہے۔ ان میں سے 1.92 کروڑ استفادہ کنندگان پہلی بار ورک فورس میں شامل ہوں گے۔ اسکیم کے فوائد  یکم اگست 2025 سے 31 جولائی 2027 کے درمیان پیدا ہونے والی ملازمتوں پر لاگو ہوں گے۔

اس اسکیم کا مقصد آجروں کو روزگار کے نئے مواقع پیدا کرنے کی ترغیب دینا ہے، جس کا مقصد مینوفیکچرنگ سیکٹر پر خصوصی توجہ کے ساتھ مختلف شعبوں میں روزگار کے نئے مواقع فراہم کرنا ہے۔ روزگار کی قیادت میں ترقی کے ذریعے اقتصادی ترقی کو آگے بڑھانے کے لیے یہ ہندوستان کی حکمت عملی کا ایک کلیدی جزو ہے۔

اسکیم کے دو حصے ہیں، حصہ  اے پہلی بار ملازمت کرنے والوں پر اور حصہ  بی آجروں پر مرکوز ہے:

حصہ  اے : پہلی بار ملازمین کے لیے مراعات:

پہلی بار ای پی ایف او کے ساتھ رجسٹرڈ ملازمین پر توجہ مرکوز کرتے ہوئے، یہ حصہ ایک ماہ کی ای پی ایف تنخواہ، زیادہ سے زیادہ 15,000 روپے تک، دو قسطوں میں فراہم کرے گا۔ ایک لاکھ روپے تک کی تنخواہ والے ملازمین اہل ہوں گے۔ پہلی قسط 6 ماہ کی سروس کے بعد اور دوسری 12 ماہ کی سروس کے بعد اور مالیاتی خواندگی پروگرام مکمل کرنے کے بعد ادا کی جائے گی۔ بچت کی عادت کی حوصلہ افزائی کے لیے، ترغیبی رقم کا ایک حصہ ایک سیونگ انسٹرومنٹ یا ڈپازٹ اکاؤنٹ میں ایک مقررہ مدت کے لیے رکھا جائے گا اور ملازم اسے بعد میں نکال سکتا ہے۔

حصہ  بی : آجروں کے لیے مدد:

یہ حصہ مینوفیکچرنگ سیکٹر پر خصوصی توجہ کے ساتھ تمام شعبوں میں اضافی روزگار پیدا کرنے کا احاطہ کرے گا۔ آجروں کو ایک لاکھ روپے تک کی تنخواہ والے ملازمین کے لیے مراعات ملے گی۔ حکومت کم از کم چھ ماہ تک مسلسل ملازمت کے ساتھ ہر اضافی ملازم کے لیے دو سال کے لیے آجروں کو ماہانہ 3,000 روپے تک کی مراعات بھی فراہم کرے گی۔ مینوفیکچرنگ سیکٹر کے لیے مراعات کو تیسرے اور چوتھے سال تک بڑھایا جائے گا۔

ای پی ایف او کے ساتھ رجسٹرڈ اداروں کو کم از کم دو اضافی ملازمین (50 سے کم ملازمین والے آجروں کے لیے) یا پانچ اضافی ملازمین (50 یا اس سے زیادہ ملازمین والے آجروں کے لیے) کم از کم چھ ماہ تک لگاتار ملازمت کرنے کی ضرورت ہوگی۔

ترغیب کا ڈھانچہ اس طرح ہو گا:

*10,000 روپے تک ای پی ایف تنخواہ والے ملازمین کو تناسب کے حساب سے ترغیبی فائدہ  ملے گا۔

ترغیبی ادائیگی کا طریقہ کار:

اسکیم کے حصہ ’ اے ‘کے تحت پہلی بار آنے والے ملازمین کو تمام ادائیگیاں آدھار برج پیمنٹ سسٹم ( اے بی پی ایس) کا استعمال کرتے ہوئے منافع کی براہ راست منتقلی (ڈی بی ٹی) کے ذریعے کی جائیں گی۔ حصہ ’ بی‘ کے تحت آجروں کو ادائیگی براہ راست ان کے پین سے منسلک کھاتوں میں ادا کی جائے گی۔

**************

ش ح ۔ ش ب۔ م الف

U. No. 3296