നമസ്കാരം!

രാജ്യത്തേയും ലോകത്തേയും ആദരണീയരായ അതിഥികളുമായും നിങ്ങളുടെ പ്രേക്ഷകരുമായും ഈ ഉച്ചകോടിയിലൂടെ  ബന്ധപ്പെടാൻ എനിക്ക് അവസരം നൽകിയതിന് നെറ്റ്‌വർക്ക് 18ന് ഞാൻ എന്റെ നന്ദി അറിയിക്കുന്നു. ഈ വർഷത്തെ ഉച്ചകോടിയെ ഭാരതത്തിന്റെ യുവാക്കളുടെ അഭിലാഷങ്ങളുമായി ബന്ധിപ്പിച്ചതിൽ ഞാൻ സന്തോഷിക്കുന്നു. ഈ വർഷം ആദ്യം, വിവേകാനന്ദ ജയന്തിയിൽ, വികസിത് ഭാരത് യംഗ് ലീഡേഴ്‌സ് ഡയലോഗ് ഇവിടെ ഭാരത് മണ്ഡപത്തിൽ നടന്നു. ആ സമയത്ത്, യുവാക്കളുടെ കണ്ണുകളിൽ സ്വപ്നങ്ങളുടെ തിളക്കം, അവരുടെ ദൃഢനിശ്ചയത്തിന്റെ ശക്തി, ഭാരതത്തെ ഒരു വികസിത രാഷ്ട്രമാക്കാനുള്ള അവരുടെ അഭിനിവേശം എന്നിവ ഞാൻ കണ്ടു. 2047 ഓടെ ഭാരതത്തെ എത്തിക്കാൻ നമ്മൾ ആഗ്രഹിക്കുന്ന ഉയരങ്ങളും നമ്മൾ പിന്തുടരുന്ന റോഡ് മാപ്പും ഓരോ ഘട്ടത്തിലും ചർച്ച ചെയ്യുന്നത് തുടർന്നാൽ, 'അമൃത്' തീർച്ചയായും ഉയർന്നുവരും. ഈ 'അമൃത്' 'അമൃത് കാല'ത്തിന്റെ തലമുറയ്ക്ക് ഊർജ്ജവും ദിശാബോധവും , ഭാരതത്തിന് ​ഗതിവേ​ഗവും നൽകും. ഈ ഉച്ചകോടിയിൽ ഞാൻ നിങ്ങളെ അഭിനന്ദിക്കുകയും എന്റെ ആശംസകൾ അറിയിക്കുകയും ചെയ്യുന്നു.

സുഹൃത്തുക്കളേ,

ഇന്ന്, ലോകത്തിന്റെ കണ്ണുകൾ ഭാരതത്തിലാണ്, ലോകത്തിന്റെ പ്രതീക്ഷകളും ഭാരതത്തിലാണ്. ഏതാനും വർഷങ്ങൾക്കുള്ളിൽ, പതിനൊന്നാമത്തെ വലിയ സമ്പദ്‌വ്യവസ്ഥയിൽ നിന്ന് അഞ്ചാമത്തെ വലിയ സമ്പദ്‌വ്യവസ്ഥയിലേക്ക് നാം ഉയർന്നു. നിരവധി ആഗോള വെല്ലുവിളികൾക്കിടയിലും, ഭാരതം നിന്നില്ല; പകരം, അത് ഇരട്ടി വേഗതയിൽ മുന്നേറി. ഒരു ദശാബ്ദത്തിനുള്ളിൽ, നമ്മുടെ സമ്പദ്‌വ്യവസ്ഥയുടെ വലുപ്പം ഇരട്ടിയാക്കി. ഒരിക്കൽ ഭാരതം പതുക്കെ ഒരുപോലെ നീങ്ങുമെന്ന് കരുതിയവർ ഇപ്പോൾ വേഗതയേറിയതും ഭയരഹിതവുമായ ഒരു ഇന്ത്യയ്ക്ക് സാക്ഷ്യം വഹിക്കുന്നു. ലോകത്തിലെ മൂന്നാമത്തെ വലിയ സമ്പദ്‌വ്യവസ്ഥയായി മാറാനുള്ള പാതയിലാണ് ഭാരതം എന്നതിൽ സംശയമില്ല. ഈ അഭൂതപൂർവമായ വളർച്ചയ്ക്ക് നേതൃത്വം നൽകുന്നത് ആരാണ്? ഭാരതത്തിലെ യുവാക്കളാണ് - അവരുടെ അഭിനിവേശവും അഭിലാഷങ്ങളുമാണ്. യുവ ഭാരതത്തിന്റെ ഈ അഭിനിവേശവും അഭിലാഷങ്ങളും അഭിസംബോധന ചെയ്യുക എന്നതാണ് ഇപ്പോൾ രാജ്യത്തിന്റെ മുൻ‌ഗണന.

സുഹൃത്തുക്കളേ,

ഇന്ന് ഏപ്രിൽ 8 ആണ്, ഒന്നോ രണ്ടോ ദിവസത്തിനുള്ളിൽ, 2025 ലെ ആദ്യത്തെ 100 ദിവസങ്ങൾ പൂർത്തിയാകും - 2025 ലെ 100 ദിവസത്തിലെ ആദ്യ നാഴികക്കല്ല്. ഈ 100 ദിവസങ്ങളിൽ എടുക്കുന്ന തീരുമാനങ്ങൾ യുവാക്കളുടെ അഭിലാഷങ്ങളെയും പ്രതിഫലിപ്പിക്കുന്നതായി നിങ്ങൾക്ക് കാണാൻ കഴിയും.

സുഹൃത്തുക്കളേ,

ഈ 100 ദിവസങ്ങളിൽ, ഞങ്ങൾ തീരുമാനങ്ങൾ എടുക്കുക മാത്രമല്ല - ഭാവിയിലേക്കുള്ള ശക്തമായ അടിത്തറ പാകുകയും ചെയ്തു. നയങ്ങളെ സാധ്യതകളാക്കി ഞങ്ങൾ മാറ്റി. 12 ലക്ഷം രൂപ വരെയുള്ള വരുമാനത്തിന് നികുതി ഒഴിവാക്കുക - ഇത് യുവ പ്രൊഫഷണലുകൾക്കും സംരംഭകർക്കും ഒരു പ്രധാന നേട്ടമായി. 10,000 പുതിയ മെഡിക്കൽ സീറ്റുകളും 6,500 പുതിയ ഐഐടി സീറ്റുകളും - വിദ്യാഭ്യാസമേഖല വികസിപ്പിക്കുകയും നവീകരണം ത്വരിതപ്പെടുത്തുകയും ചെയ്യുന്നു. 50,000 പുതിയ അടൽ ടിങ്കറിംഗ് ലാബുകൾ - രാജ്യത്തിന്റെ എല്ലാ കോണുകളിലും നവീകരണത്തിന്റെ തീപ്പൊരി ജ്വലിപ്പിക്കുന്നു - ഒരു വിളക്കിന് മറ്റ് പലതും പ്രകാശിപ്പിക്കാൻ കഴിയുന്നതുപോലെ. AI നൈപുണ്യ വികസനത്തിനായുള്ള മികവിന്റെ കേന്ദ്രങ്ങൾ യുവാക്കൾക്ക് ഭാവിയിലേക്ക് തയ്യാറെടുക്കാൻ അവസരം നൽകും. 10,000 പുതിയ PM ഗവേഷണ ഫെലോഷിപ്പുകൾ ആശയത്തിൽ നിന്ന് സ്വാധീനത്തിലേക്കുള്ള യാത്ര എളുപ്പമാക്കും. ബഹിരാകാശ മേഖല തുറന്നിട്ടതുപോലെ, ആണവോർജ്ജ മേഖലയും തുറന്നിട്ടിരിക്കുന്നു. നവീകരണത്തിന് ഇപ്പോൾ അതിരുകളല്ല, പിന്തുണ ലഭിക്കും. ആദ്യമായി, ഗിഗ് സമ്പദ്‌വ്യവസ്ഥയുമായി ബന്ധപ്പെട്ട യുവാക്കൾക്ക് സാമൂഹിക സുരക്ഷയുടെ കവചം നൽകും. മുമ്പ് മറ്റുള്ളവർക്ക് അദൃശ്യരായിരുന്നവർ ഇപ്പോൾ നയങ്ങളുടെ കേന്ദ്രബിന്ദുവാണ്, എസ്‌സി, എസ്ടി, വനിതാ സംരംഭകർക്ക് 2 കോടി രൂപയുടെ ടേം ലോണുകൾ വാഗ്ദാനം ചെയ്യും. ഉൾപ്പെടുത്തൽ എന്നത് ഒരു വാഗ്ദാനമല്ല, അതൊരു നയമാണ്. ഈ തീരുമാനങ്ങളെല്ലാം ഭാരതത്തിലെ യുവാക്കൾക്ക് നേരിട്ട് പ്രയോജനപ്പെടും, കാരണം യുവാക്കൾ പുരോഗമിക്കുമ്പോൾ മാത്രമേ ഭാരതം പുരോഗമിക്കുകയുള്ളൂ.

സുഹൃത്തുക്കളേ,

ഈ 100 ദിവസങ്ങളിൽ, ഭാരതം നിർത്തുകയോ, കുനിയുകയോ, മന്ദഗതിയിലാകുകയോ ചെയ്യില്ലെന്ന് ഭാരതം നേടിയ നേട്ടങ്ങൾ കാണിക്കുന്നു. ഈ 100 ദിവസങ്ങളിൽ, സാറ്റലൈറ്റ് ഡോക്കിംഗും അൺഡോക്കിംഗും സാധ്യമാക്കുന്ന ലോകത്തിലെ നാലാമത്തെ രാജ്യമായി ഭാരതം മാറി. സെമി-ക്രയോജനിക് എഞ്ചിൻ ഭാരതം വിജയകരമായി പരീക്ഷിച്ചു. 100 ജിഗാവാട്ട് സൗരോർജ്ജ ശേഷി എന്ന ചരിത്ര നാഴികക്കല്ല് ഭാരതം മറികടന്നു. 1,000 ദശലക്ഷം ടൺ കൽക്കരി ഉൽപ്പാദിപ്പിച്ചുകൊണ്ട് രാജ്യം റെക്കോർഡ് സ്ഥാപിച്ചു. നാഷണൽ ക്രിട്ടിക്കൽ മിനറൽ മിഷൻ ആരംഭിച്ചു, ഈ 100 ദിവസത്തിനുള്ളിൽ, ജീവനക്കാർക്കുള്ള 8-ാം ശമ്പള കമ്മീഷൻ സ്ഥാപിക്കാനുള്ള തീരുമാനവും എടുത്തു. കർഷകർക്കുള്ള വളങ്ങളുടെ സബ്‌സിഡികൾ വർദ്ധിപ്പിക്കാൻ തീരുമാനിച്ചു, അതായത്, ​ഗവൺമെന്റ് കർഷകരുടെ ആശങ്കകൾക്ക് മുൻഗണന നൽകി. ഛത്തീസ്ഗഡിൽ, 3 ലക്ഷത്തിലധികം കുടുംബങ്ങൾ ഒരേസമയം പുതിയ വീടുകളിലേക്ക് താമസം മാറി. സ്വാമിത്വ യോജന പ്രകാരം, 65 ലക്ഷത്തിലധികം പ്രോപ്പർട്ടി കാർഡുകൾ വിതരണം ചെയ്തു. ഇതു മാത്രമല്ല, ലോകത്തിലെ ഏറ്റവും ഉയരം കൂടിയ തുരങ്കങ്ങളിലൊന്നായ സോനാമാർഗ് ടണൽ ഈ 100 ദിവസങ്ങൾക്കുള്ളിൽ രാഷ്ട്രത്തിന് സമർപ്പിച്ചു. ഐഎൻഎസ് സൂറത്ത്, ഐഎൻഎസ് നീലഗിരി, ഐഎൻഎസ് വാഗ്ഷീർ എന്നിവ ചേർത്തതോടെ ഇന്ത്യൻ നാവികസേന കൂടുതൽ ശക്തിപ്പെട്ടു. സായുധ സേനയ്ക്കായി ഇന്ത്യയിൽ നിർമ്മിച്ച ലൈറ്റ് കോംബാറ്റ് ഹെലികോപ്റ്ററുകൾ വാങ്ങുന്നതിന് അംഗീകാരം ലഭിച്ചു. കൂടാതെ, വഖഫ് നിയമത്തിനായുള്ള ഭേദഗതി ബിൽ പാസാക്കിയതോടെ സാമൂഹിക നീതിയിലേക്കുള്ള ഒരു സുപ്രധാന ചുവടുവയ്പ്പ് നടന്നു. ഈ 100 ദിവസങ്ങൾ വെറും 100 തീരുമാനങ്ങളേക്കാൾ അപ്പുറമാണ് - അവ 100 പ്രമേയങ്ങളുടെ പൂർത്തീകരണത്തെ അടയാളപ്പെടുത്തുന്നു!

സുഹൃത്തുക്കളേ,

ഉയരുന്ന ഭാരതത്തിന് പിന്നിലെ യഥാർത്ഥ ഊർജ്ജമാണ് പ്രകടനത്തിന്റെ മന്ത്രം. രണ്ട് ദിവസം മുമ്പ് ഞാൻ രാമേശ്വരത്തായിരുന്നുവെന്ന് നിങ്ങൾക്കെല്ലാവർക്കും അറിയാം. അവിടെ, ചരിത്രപ്രസിദ്ധമായ പാമ്പൻ പാലം ഉദ്ഘാടനം ചെയ്യാൻ എനിക്ക് അവസരം ലഭിച്ചു. ഏകദേശം 125 വർഷങ്ങൾക്ക് മുമ്പ്, ബ്രിട്ടീഷുകാർ അവിടെ ഒരു പാലം പണിതു. ആ പാലം ചരിത്രത്തിന് സാക്ഷ്യം വഹിച്ചു, കൊടുങ്കാറ്റുകളെ അതിജീവിച്ചു, ഒരിക്കൽ ഒരു സുനാമിയും ചുഴലിക്കാറ്റും മൂലം ഗുരുതരമായ നാശനഷ്ടങ്ങൾ സംഭവിച്ചു. വർഷങ്ങളോളം രാജ്യം കാത്തിരുന്നു, പുതിയ പാലം വേണമെന്ന് ആളുകൾ ആവശ്യപ്പെട്ടുകൊണ്ടിരുന്നു, എന്നാൽ മുൻ ​ഗവൺമെന്റുകൾ നിസ്സംഗത പാലിച്ചു. എന്നിരുന്നാലും, നമ്മുടെ ​ഗവൺമെന്റ് അധികാരത്തിൽ വന്നപ്പോൾ, പുതിയ പാമ്പൻ പാലത്തിന്റെ പണി ആരംഭിച്ചു. ഇപ്പോൾ, രാജ്യത്തിന് ആദ്യത്തെ ലംബമായി ഉയർത്താൻ കഴിയുന്ന റെയിൽ-കടൽ പാലം ലഭിച്ചു!

സുഹൃത്തുക്കളേ,

ഒരു രാജ്യം പദ്ധതികൾ വൈകിപ്പിച്ചുകൊണ്ട് പുരോഗമിക്കുന്നില്ല; പ്രകടനത്തിലൂടെയും വേഗത്തിലുള്ള നിർവ്വഹണത്തിലൂടെയും മുന്നോട്ട് നീങ്ങുന്നു. കാലതാമസം വികസനത്തിന്റെ ശത്രുവാണ്, ഈ ശത്രുവിനെ പരാജയപ്പെടുത്താൻ ഞങ്ങൾ ദൃഢനിശ്ചയം ചെയ്തിട്ടുണ്ട്. കൂടുതൽ ഉദാഹരണങ്ങൾ ഞാൻ നിങ്ങൾക്ക് നൽകട്ടെ. അസമിലെ ബോഗിബീൽ പാലം എടുക്കുക - 1997 ൽ നമ്മുടെ മുൻ പ്രധാനമന്ത്രി ദേവഗൗഡ ജി അതിന്റെ തറക്കല്ലിട്ടു. വാജ്‌പേയി ജി അധികാരത്തിൽ വന്നപ്പോൾ അദ്ദേഹം നിർമ്മാണ പ്രവർത്തനങ്ങൾക്ക് തുടക്കം കുറിച്ചു. വാജ്‌പേയി ജിയുടെ ​ഗവൺമെന്റ് തിരഞ്ഞെടുപ്പിൽ പരാജയപ്പെടുകയും കോൺഗ്രസ് ചുമതലയേൽക്കുകയും ചെയ്തപ്പോൾ പദ്ധതി സ്തംഭിച്ചു. അരുണാചലിലെയും അസമിലെയും ലക്ഷക്കണക്കിന് ആളുകൾ ഈ കാലതാമസം മൂലം കഷ്ടപ്പെട്ടു, പക്ഷേ അന്നത്തെ ​ഗവൺമെന്റ് നിസ്സംഗത പാലിച്ചു. 2014 ൽ, നിങ്ങൾ ഞങ്ങൾക്ക് സേവനം ചെയ്യാൻ അവസരം നൽകിയപ്പോൾ, ഞങ്ങൾ പദ്ധതി പുനരാരംഭിച്ചു, വെറും നാല് വർഷത്തിനുള്ളിൽ, 2018 ൽ പാലം പൂർത്തിയായി. സമാനമായ ഒരു ഉദാഹരണമാണ് കേരളത്തിലെ കൊല്ലം ബൈപാസ് റോഡ് പദ്ധതി. 1972 മുതൽ ഇത് സ്തംഭിച്ചിരുന്നു - സങ്കൽപ്പിക്കുക, 50 വർഷം! അത് എൽഡിഎഫായാലും യുഡിഎഫായാലും, അരനൂറ്റാണ്ടായി ഒരു ​ഗവൺമെന്റും അതിൽ പ്രവർത്തിച്ചില്ല. എന്നാൽ ഞങ്ങൾ അധികാരത്തിൽ വന്ന്, അഞ്ച് വർഷത്തിനുള്ളിൽ ഞങ്ങൾ അത് പൂർത്തിയാക്കി.

സുഹൃത്തുക്കളേ,

നവി മുംബൈ വിമാനത്താവളത്തെക്കുറിച്ചുള്ള ചർച്ചകൾ 1997 ൽ തന്നെ ആരംഭിച്ചു, 2007 ൽ അത് അംഗീകരിക്കപ്പെട്ടു. എന്നിരുന്നാലും, കോൺഗ്രസ് ​ഗവൺമെന്റ് അതിൽ ഒരു നടപടിയും സ്വീകരിച്ചില്ല. ഞങ്ങളുടെ ​ഗവൺമെന്റ്  അധികാരത്തിൽ വന്നപ്പോൾ, ഞങ്ങൾ ഈ പദ്ധതി ത്വരിതപ്പെടുത്തി, ഇപ്പോൾ നവി മുംബൈ വിമാനത്താവളത്തിൽ നിന്ന് വാണിജ്യ വിമാനങ്ങൾ സർവീസ് ആരംഭിക്കുന്ന ദിവസം വിദൂരമല്ല.

സുഹൃത്തുക്കളേ,

ഞാൻ പങ്കിടുന്ന നേട്ടങ്ങളുടെ പട്ടികയിൽ പുതിയ പാർലമെന്റ് മന്ദിരവും ഭാരത് മണ്ഡപവും ഉൾപ്പെടുന്നു.

സുഹൃത്തുക്കളേ,

ഏപ്രിൽ 8 മറ്റൊരു കാരണത്താൽ വലിയ പ്രാധാന്യമുള്ളതാണ് - ഈ ദിനം മുദ്ര യോജനയുടെ 10 വാർഷികം ആഘോഷിക്കുന്നു. മുൻകാലങ്ങളിൽ, ഗ്യാരണ്ടർ ഇല്ലാതെ ഒരു ബാങ്ക് അക്കൗണ്ട് തുറക്കുന്നത് പോലും അസാധ്യമായിരുന്നു എന്ന കഥകൾ ഇവിടെ ഇരിക്കുന്ന പല യുവാക്കളും അവരുടെ മാതാപിതാക്കളിൽ നിന്ന്  കേട്ടിട്ടുണ്ടാകും. ആളുകൾക്ക് ഗ്യാരണ്ടി, ആരുടെയെങ്കിലും ശുപാർശ എന്നിവ ആവശ്യമായിരുന്നു, ബാങ്ക് വായ്പ ലഭിക്കുന്നത് ഒരു ശരാശരി കുടുംബത്തിന് ഒരു സ്വപ്നമായിരുന്നു. ദരിദ്ര കുടുംബങ്ങൾ, എസ്‌സി/എസ്ടി, ഒബിസി സമൂഹങ്ങൾ, ഭൂരഹിത തൊഴിലാളികൾ, ഈടായി ഒന്നും നൽകാൻ തയ്യാറില്ലാത്തതും എന്നാൽ കഠിനാധ്വാനം ചെയ്യാൻ തയ്യാറുള്ളതുമായ സ്ത്രീകളുടെ കാര്യമോ? അവരുടെ സ്വപ്നങ്ങൾക്ക് വിലയുണ്ടായിരുന്നില്ലേ? അവരുടെ അഭിലാഷങ്ങൾക്ക് കുറവുണ്ടായിരുന്നോ? 
അവരുടെ കഠിനാധ്വാനത്തിന് ഒരു വിലയുമില്ലായിരുന്നോ? നമ്മുടെ മുദ്ര യോജന ഈ അഭിലാഷങ്ങളെ അഭിസംബോധന ചെയ്യുകയും യുവാക്കൾക്ക് ഒരു പുതിയ പാത നൽകുകയും ചെയ്തു. കഴിഞ്ഞ 10 വർഷത്തിനുള്ളിൽ, മുദ്ര പദ്ധതി പ്രകാരം 52 കോടി വായ്പകൾ വിതരണം ചെയ്തിട്ടുണ്ട് - യാതൊരു ഈടും കൂടാതെ! ഇത് സ്കെയിലിനെക്കുറിച്ചല്ല, വേഗതയെക്കുറിച്ചും കൂടിയാണ്. ഒരു ട്രാഫിക് ലൈറ്റ് ചുവപ്പിൽ നിന്ന് പച്ചയിലേക്ക് മാറുമ്പോഴേക്കും, 100 മുദ്ര വായ്പകൾ അംഗീകരിക്കപ്പെടും. നിങ്ങൾ പല്ല് തേയ്ക്കുമ്പോഴേക്കും, 200 മുദ്ര വായ്പകൾ അനുവദിക്കപ്പെടും. റേഡിയോയിൽ ഒരു പാട്ട് കേൾക്കുമ്പോഴേക്ക്, 400 മുദ്ര വായ്പകൾ അനുവദിക്കപ്പെടും. ഇക്കാലത്ത്, തൽക്ഷണ ഡെലിവറി ആപ്പുകൾ ജനപ്രിയമാണ് - ശരി, നിങ്ങളുടെ ഭക്ഷണ വിതരണം എത്താൻ എടുക്കുന്ന സമയത്ത്, 1,000 മുദ്ര വായ്പകൾ അനുവദിക്കപ്പെടും. ഒരു OTT പ്ലാറ്റ്‌ഫോമിൽ ഒരു എപ്പിസോഡ് കാണുന്നത് പൂർത്തിയാക്കുമ്പോഴേക്കും, മുദ്ര വഴി 5,000 ചെറുകിട ബിസിനസുകൾ നിർമ്മിക്കപ്പെടുന്നു.

സുഹൃത്തുക്കളേ,

മുദ്ര യോജന ഗ്യാരണ്ടികൾ ആവശ്യപ്പെട്ടില്ല - അത് ആളുകളിൽ വിശ്വാസം അർപ്പിച്ചു. മുദ്ര വഴി സ്വന്തമായി ബിസിനസ്സ് ആരംഭിക്കുന്നതിനോ സ്വയം തൊഴിൽ ചെയ്യുന്നതിനോ വേണ്ടി 11 കോടി ആളുകൾക്ക് ആദ്യമായി വായ്പ ലഭിച്ചുവെന്ന് അറിയുമ്പോൾ നിങ്ങൾക്ക് സന്തോഷമുണ്ടാകും. ഈ 11 കോടി വ്യക്തികൾ ഇപ്പോൾ ആദ്യമായി സംരംഭകരാണ്! മറ്റൊരു വിധത്തിൽ പറഞ്ഞാൽ, 10 വർഷത്തിനുള്ളിൽ 11 കോടി പുതിയ സ്വപ്നങ്ങൾ പറന്നുയർന്നു. മുദ്രയിലൂടെ ഗ്രാമങ്ങളിലും ചെറുപട്ടണങ്ങളിലും  എത്ര പണം എത്തിയെന്ന് നിങ്ങൾക്കറിയാമോ? ഇത് ഏകദേശം 33 ലക്ഷം കോടി രൂപ - 33 ലക്ഷം കോടി രൂപ! അത് പല രാജ്യങ്ങളുടെയും ജിഡിപി പോലുമല്ല. ഇത് മൈക്രോഫിനാൻസ് മാത്രമല്ല - ഇത് അടിത്തട്ടിലെ ഒരു വലിയ പരിവർത്തനമാണ്!

സുഹൃത്തുക്കളേ,

ഇതുപോലെയുള്ള ഒരു ഉദാഹരണമാണ് ആസ്പിരേഷണൽ ഡിസ്ട്രിക്റ്റ്സ് ആൻഡ് ആസ്പിരേഷണൽ ബ്ലോക്ക്സ് പ്രോഗ്രാം. മുൻ ​ഗവൺമെന്റുകൾ 100-ലധികം ജില്ലകളെ പിന്നാക്ക ജില്ലകളായി മുദ്രകുത്തി അവയെ സ്വന്തമായി പോരാടാൻ വിട്ടു. ഈ ജില്ലകളിൽ പലതും വടക്കുകിഴക്കൻ, ഗോത്ര മേഖലകളിലായിരുന്നു. ​ഗവൺമെന്റ് അവരുടെ ഏറ്റവും മികച്ച പ്രതിഭകളെ ഈ ജില്ലകളിലേക്ക് അയയ്ക്കണമായിരുന്നു, പകരം, ശിക്ഷാ സ്ഥലംമാറ്റമായി ഉദ്യോഗസ്ഥരെ അവിടെ നിയമിച്ചു. "പിന്നാക്കക്കാരെ പിന്നോട്ട് തന്നെ തുടരാൻ അനുവദിക്കുക" എന്ന പഴയ മനോഭാവമായിരുന്നു അത്. ഞങ്ങൾ ഈ സമീപനം മാറ്റി ഈ പ്രദേശങ്ങളെ ആസ്പിരേഷണൽ ജില്ലകളായി പ്രഖ്യാപിച്ചു. മികച്ച ഭരണത്തിൽ ഞങ്ങൾ ശ്രദ്ധ കേന്ദ്രീകരിച്ചു, ദൗത്യ മോഡിൽ ഞങ്ങളുടെ മുൻനിര പദ്ധതികൾ നടപ്പിലാക്കി. ഒന്നിലധികം മാനദണ്ഡങ്ങൾ അടിസ്ഥാനമാക്കി ഈ ജില്ലകളുടെ വളർച്ച ഞങ്ങൾ നിരീക്ഷിച്ചു. ഇന്ന്, ഈ ആസ്പിരേഷണൽ ജില്ലകളിൽ പലതും സംസ്ഥാന ശരാശരിയെ മറികടന്നു, ചിലത് വികസനത്തിൽ ദേശീയ ശരാശരിയെ മറികടന്നു. ഈ പരിവർത്തനത്തിന്റെ ഏറ്റവും വലിയ ഗുണഭോക്താക്കൾ ഈ ജില്ലകളിലെ യുവാക്കളാണ്. ഇപ്പോൾ, അവിടത്തെ യുവാക്കൾ ആത്മവിശ്വാസത്തോടെ പറയുന്നു, "നമുക്കും വിജയം കൈവരിക്കാൻ കഴിയും. നമുക്കും മുന്നോട്ട് പോകാം." ഇന്ന്, നിരവധി പ്രശസ്ത ആഗോള സ്ഥാപനങ്ങളും ജേണലുകളും ആസ്പിരേഷണൽ ഡിസ്ട്രിക്റ്റ്സ് പ്രോഗ്രാമിനെ അംഗീകരിക്കുകയും പ്രശംസിക്കുകയും ചെയ്തിട്ടുണ്ട്. ഈ വിജയത്തിൽ നിന്ന് പ്രചോദനം ഉൾക്കൊണ്ട്, ഞങ്ങൾ ഇപ്പോൾ 500 അഭിലാഷ ബ്ലോക്കുകളിൽ പ്രവർത്തിക്കുന്നു. വളർച്ച അഭിലാഷങ്ങളാൽ നയിക്കപ്പെടുമ്പോൾ, അത് ഉൾക്കൊള്ളുന്നതും സുസ്ഥിരവുമാകും.

സുഹൃത്തുക്കളേ,

ഏതൊരു രാഷ്ട്രവും വേഗത്തിൽ വളരണമെങ്കിൽ, സമാധാനം, സ്ഥിരത, സുരക്ഷിതത്വബോധം എന്നിവ ഉണ്ടായിരിക്കേണ്ടത് അത്യാവശ്യമാണ്. ഗുരുദേവ് ​​രവീന്ദ്രനാഥ ടാഗോർ വിഭാവനം ചെയ്തത് चित्त जेथा भयशून्यो, उच्च जेथा शिर  അതായത്, "മനസ്സ് ഭയമില്ലാത്തതും തല ഉയർത്തിപ്പിടിച്ചതുമായിടത്ത്" എന്നാണ്. എന്നാൽ പതിറ്റാണ്ടുകളായി, ഭാരതം ഭയത്തിന്റെയും ഭീകരതയുടെയും അക്രമത്തിന്റെയും വളർച്ചയ്ക്ക് സാക്ഷ്യം വഹിച്ചു. നമ്മുടെ രാജ്യത്തെ യുവാക്കളാണ് ഏറ്റവും കൂടുതൽ ദുരിതമനുഭവിച്ചത്. അക്രമം, വിഘടനവാദം, ഭീകരത എന്നിവയാൽ യുവജീവിതങ്ങൾ വിഴുങ്ങി. ജമ്മു & കശ്മീരിൽ, നിരവധി പതിറ്റാണ്ടുകളായി യുവാക്കളുടെ മുഴുവൻ തലമുറകളും ബോംബുകളുടെയും തോക്കുകളുടെയും കല്ലെറിയലിന്റെയും കാലചക്രത്തിൽ നഷ്ടപ്പെട്ടു. എന്നിരുന്നാലും, പതിറ്റാണ്ടുകളായി ഭരിച്ച ​ഗവൺമെന്റുകൾക്ക് ഇത് അവസാനിപ്പിക്കാൻ ധൈര്യമില്ലായിരുന്നു. എന്നാൽ നമ്മുടെ ​ഗവൺമെന്റിന്റെ ശക്തമായ രാഷ്ട്രീയ ഇച്ഛാശക്തിയും സംവേദനക്ഷമതയുള്ള സമീപനവും വഴി, സ്ഥിതിഗതികൾ അവിടെ മാറി. ഇന്ന് ജമ്മു & കാശ്മീരിലെ യുവാക്കൾ വികസനത്തെ സ്വീകരിച്ചിരിക്കുന്നു. 

സുഹൃത്തുക്കളേ,

നക്സലിസത്തിന്റെ പ്രശ്നം നോക്കൂ—ഒരു ഘട്ടത്തിൽ, രാജ്യത്തെ 125-ലധികം ജില്ലകൾ അക്രമത്തിലും ഭീകരതയിലും മുങ്ങിപ്പോയി. 125 ജില്ലകൾ! നക്സലിസം ആരംഭിച്ച പ്രദേശങ്ങളിൽ, ​ഗവൺമെന്റിന്റെ സാന്നിധ്യം പ്രായോഗികമായി അവസാനിച്ചു. ഈ നക്സലിസം കാരണം ധാരാളം യുവാക്കൾ കഷ്ടപ്പെട്ടു. ഈ യുവാക്കളെ മുഖ്യധാരയിലേക്ക് തിരികെ കൊണ്ടുവരാൻ ഞങ്ങൾ ഗൗരവമായ ശ്രമങ്ങൾ നടത്തി. കഴിഞ്ഞ 10 വർഷത്തിനിടെ, 8,000-ത്തിലധികം നക്സലൈറ്റുകൾ കീഴടങ്ങുകയും അക്രമം ഉപേക്ഷിക്കുകയും ചെയ്തു. നക്സൽ ബാധിത ജില്ലകളുടെ എണ്ണം ഇപ്പോൾ 20-ൽ താഴെയായി കുറഞ്ഞു. അതുപോലെ, വടക്കുകിഴക്കൻ മേഖലയിൽ, പതിറ്റാണ്ടുകളായി വിഘടനവാദത്തിന്റെയും അക്രമത്തിന്റെയും അനന്തമായ കാലചക്രം ഉണ്ടായിരുന്നു. എന്നാൽ കഴിഞ്ഞ 10 വർഷത്തിനുള്ളിൽ, നമ്മുടെ ​ഗവൺമെന്റ് 10 പ്രധാന സമാധാന കരാറുകളിൽ വിജയകരമായി ഒപ്പുവച്ചു. ഈ കാലയളവിൽ, 10,000-ത്തിലധികം യുവാക്കൾ ആയുധം താഴെവെച്ച് വികസനത്തിന്റെ മുഖ്യധാരയിൽ ചേർന്നു. ആയിരക്കണക്കിന് ആളുകൾ ആയുധങ്ങൾ ഉപേക്ഷിച്ചു എന്നതല്ല യഥാർത്ഥ വിജയം - ആയിരക്കണക്കിന് യുവജീവിതങ്ങൾ, അവരുടെ വർത്തമാനവും ഭാവിയും, രക്ഷിക്കപ്പെട്ടു എന്നതാണ് യഥാർത്ഥ വിജയം.

സുഹൃത്തുക്കളേ,

ദശകങ്ങളായി, നമ്മുടെ രാജ്യത്ത് ദേശീയ വെല്ലുവിളികളെ അഭിസംബോധന ചെയ്യുന്നതിനുപകരം അവയെ രാഷ്ട്രീയ പരവതാനിക്ക് കീഴിൽ തൂത്തുവാരുന്ന ഒരു പ്രവണത ഉണ്ടായിരുന്നു. എന്നാൽ ഇപ്പോൾ, ഈ പ്രശ്‌നങ്ങളെ നേരിട്ട് നേരിടേണ്ട സമയം അതിക്രമിച്ചിരിക്കുന്നു. 21-ാം നൂറ്റാണ്ടിലെ തലമുറകൾ 20-ാം നൂറ്റാണ്ടിലെ രാഷ്ട്രീയ തെറ്റുകളുടെ ഭാരം വഹിക്കാൻ നമുക്ക് അനുവദിക്കാനാവില്ല. ഭാരതത്തിന്റെ വളർച്ചയിലെ ഏറ്റവും വലിയ തടസ്സങ്ങളിലൊന്ന് പ്രീണന രാഷ്ട്രീയമായിരുന്നു. അടുത്തിടെ, വഖഫ് നിയമങ്ങൾ പാർലമെന്റിൽ ഭേദഗതി ചെയ്യപ്പെട്ടു, അത് നിങ്ങളുടെ നെറ്റ്‌വർക്കുകളിലും വ്യാപകമായി ചർച്ച ചെയ്യപ്പെട്ടു. വഖഫ് നിയമങ്ങളെക്കുറിച്ചുള്ള ചർച്ച പ്രീണന രാഷ്ട്രീയത്തിൽ വേരൂന്നിയതാണ്. എന്നാൽ ഈ രാഷ്ട്രീയ പ്രീണനം പുതിയതല്ല - നമ്മുടെ സ്വാതന്ത്ര്യസമരകാലത്ത് തന്നെ അത് വിതച്ചതാണ്. ചിന്തിക്കുക - ഭാരതത്തിന് മുമ്പോ, അടുത്തോ, ശേഷമോ പല രാജ്യങ്ങളും സ്വാതന്ത്ര്യം നേടി. എന്നാൽ സ്വാതന്ത്ര്യത്തിനുള്ള ഒരു വ്യവസ്ഥയായി അവരിൽ എത്ര പേർക്ക് വിഭജനം അംഗീകരിക്കേണ്ടിവന്നു? സ്വാതന്ത്ര്യസമയത്ത് എത്ര രാജ്യങ്ങൾ വിഭജിക്കപ്പെട്ടു? എന്തുകൊണ്ടാണ് ഭാരതം മാത്രമായത്? കാരണം അക്കാലത്ത്, അധികാരമോഹം ദേശീയ താൽപ്പര്യത്തിന് മുകളിലായിരുന്നു. പ്രത്യേക രാഷ്ട്രം എന്ന ആശയം സാധാരണ മുസ്ലീം കുടുംബങ്ങളുടെതായിരുന്നില്ല - അത് പ്രചരിപ്പിച്ചത് ഒരുപിടി തീവ്രവാദികളാണ്. അധികാരത്തിനായുള്ള ഏക അവകാശികളായി സ്വയം സ്ഥാപിക്കുന്നതിനായി ചില കോൺഗ്രസ് നേതാക്കൾ ഈ ആശയം വളർത്തിയെടുത്തു.

സുഹൃത്തുക്കളേ,

ഈ പ്രീണന രാഷ്ട്രീയത്തിൽ, കോൺഗ്രസ് അധികാരം നേടി, ചില തീവ്ര നേതാക്കൾ ശക്തിയും സമ്പത്തും നേടി, എന്നാൽ യഥാർത്ഥ ചോദ്യം ഇതാണ് - സാധാരണ മുസ്ലീങ്ങൾക്ക് എന്താണ് ലഭിച്ചത്? ദരിദ്രരായ പസ്മാന്ദ (പാർശ്വവൽക്കരിക്കപ്പെട്ട) മുസ്ലീങ്ങൾക്ക് എന്താണ് ലഭിച്ചത്? അവർക്ക് അവഗണന ലഭിച്ചു. അവർക്ക് വിദ്യാഭ്യാസം ലഭിച്ചില്ല. തൊഴിലില്ലായ്മ അവരെ ബാധിച്ചു. മുസ്ലീം സ്ത്രീകൾക്ക് എന്താണ് ലഭിച്ചത്? ഷാ ബാനോ കേസിലെന്നപോലെ, തീവ്രവാദത്തിന്റെ ബലിപീഠത്തിൽ അവരുടെ ഭരണഘടനാപരമായ അവകാശങ്ങൾ ബലിയർപ്പിക്കപ്പെട്ടതുപോലെ അവർ അനീതിക്ക് വിധേയരായി. അവരോട് നിശബ്ദത പാലിക്കാൻ പറഞ്ഞു, ചോദ്യങ്ങൾ ചോദിക്കരുതെന്ന് സമ്മർദ്ദം ചെലുത്തി. അതേസമയം, റാഡിക്കലുകൾക്ക് സ്ത്രീകളുടെ അവകാശങ്ങൾ അടിച്ചമർത്താനുള്ള സൗജന്യ ലൈസൻസ് നൽകി.

സുഹൃത്തുക്കളേ,

പ്രീണന രാഷ്ട്രീയം ഭാരതത്തിലെ സാമൂഹിക നീതിയുടെ അടിസ്ഥാന തത്വത്തിന് പൂർണ്ണമായും വിരുദ്ധമാണ്. എന്നാൽ കോൺഗ്രസ് അതിനെ വോട്ട് ബാങ്ക് രാഷ്ട്രീയത്തിനുള്ള ഒരു ഉപകരണമാക്കി മാറ്റി. 2013 ലെ വഖഫ് നിയമ ഭേദഗതി തീവ്രവാദികളെയും ഭൂമാഫിയകളെയും പ്രീതിപ്പെടുത്താനുള്ള ശ്രമമല്ലാതെ മറ്റൊന്നുമല്ല. ഭരണഘടനയ്ക്ക് മുകളിലാണെന്ന് തോന്നിപ്പിക്കുന്ന രീതിയിലാണ് നിയമം രൂപപ്പെടുത്തിയത്. ഭരണഘടന നീതിയുടെ വാതിലുകൾ തുറക്കാൻ ഉദ്ദേശിച്ചുള്ളതായിരുന്നു, എന്നാൽ ഈ വഖഫ് നിയമം ആ വഴികളെ തന്നെ ചുരുക്കി. അതിന്റെ അനന്തരഫലങ്ങൾ എന്തായിരുന്നു? തീവ്രവാദികളും ഭൂമാഫിയകളും ധൈര്യപ്പെട്ടു. കേരളത്തിൽ, ക്രിസ്ത്യൻ ഗ്രാമീണരുടെ ഭൂമിയിൽ വഖഫ് അവകാശവാദങ്ങൾ ഉന്നയിക്കപ്പെട്ടു. ഹരിയാനയിൽ, ഗുരുദ്വാര ഭൂമികൾ തർക്കങ്ങളിലേക്ക് വലിച്ചിഴക്കപ്പെട്ടു. കർണാടകയിൽ, കർഷകരുടെ ഭൂമി വഖഫ് അവകാശവാദങ്ങൾക്ക് കീഴിൽ കൊണ്ടുവന്നു. പല സംസ്ഥാനങ്ങളിലും, മുഴുവൻ ഗ്രാമങ്ങളും ആയിരക്കണക്കിന് ഹെക്ടർ ഭൂമിയും എൻ‌ഒ‌സികളിലും നിയമപരമായ പ്രശ്‌നങ്ങളിലും കുടുങ്ങി. അത് ക്ഷേത്രങ്ങളോ പള്ളികളോ ഗുരുദ്വാരകളോ കൃഷിയിടങ്ങളോ ​ഗവൺമെന്റ് ഭൂമികളോ ആകട്ടെ, ആളുകൾക്ക് സ്വന്തം സ്വത്തിന്റെ സുരക്ഷയിലുള്ള വിശ്വാസം നഷ്ടപ്പെട്ടു. സ്വന്തം ഉടമസ്ഥാവകാശം തെളിയിക്കുന്നതിനുള്ള രേഖകൾക്കായുള്ള ഭ്രാന്തമായ അന്വേഷണത്തിലേക്ക് ഭൂവുടമകളെ തള്ളിവിടാൻ ഒരു നോട്ടീസ് മാത്രം മതിയായിരുന്നു. നീതി നടപ്പാക്കേണ്ട ഒരു നിയമം ഒടുവിൽ ഭയം പരത്തി - ഇത് എങ്ങനെയുള്ള നിയമമായിരുന്നു?

സുഹൃത്തുക്കളേ,

മുസ്ലീം സമൂഹം ഉൾപ്പെടെ എല്ലാ സമുദായങ്ങളുടെയും താൽപ്പര്യങ്ങൾ സംരക്ഷിക്കുന്ന ഒരു ശ്രദ്ധേയമായ നിയമം പാസാക്കിയതിന് രാജ്യത്തിന്റെ പാർലമെന്റിനെ ഞാൻ അഭിനന്ദിക്കുന്നു. ദരിദ്രരുടെയും പസ്മാണ്ട മുസ്ലീങ്ങളുടെയും സ്ത്രീകളുടെയും കുട്ടികളുടെയും അവകാശങ്ങൾ സംരക്ഷിക്കുന്നതിനൊപ്പം വഖഫിന്റെ യഥാർത്ഥ ആത്മാവിന്റെ സംരക്ഷണം ഉറപ്പാക്കുന്നതിനൊപ്പം ഈ നിയമം ഇപ്പോൾ സഹായിക്കും. വഖഫ് ബില്ലിനെക്കുറിച്ചുള്ള ചർച്ച കഴിഞ്ഞ 75 വർഷത്തിനിടയിൽ നമ്മുടെ പാർലമെന്ററി ചരിത്രത്തിലെ രണ്ടാമത്തെ ഏറ്റവും ദൈർഘ്യമേറിയ ചർച്ചയായിരുന്നു. ഇരുസഭകളിലുമായി 16 മണിക്കൂർ ബിൽ ചർച്ച ചെയ്യപ്പെട്ടു, സംയുക്ത പാർലമെന്ററി കമ്മിറ്റി (ജെപിസി) 38 മീറ്റിംഗുകൾ നടത്തി, 128 മണിക്കൂർ ചർച്ചകളിൽ പങ്കെടുത്തു, രാജ്യത്തുടനീളമുള്ള ആളുകളിൽ നിന്ന് ഏകദേശം ഒരു കോടി ഓൺലൈൻ നിർദ്ദേശങ്ങൾ സ്വീകരിച്ചു. ഇന്ന്, ഭാരതത്തിലെ ജനാധിപത്യം പാർലമെന്റിന്റെ നാല് ചുവരുകളിൽ ഒതുങ്ങുന്നില്ല എന്നാണ് ഇത് കാണിക്കുന്നത്. പൊതുജനപങ്കാളിത്തം നമ്മുടെ ജനാധിപത്യത്തെ കൂടുതൽ ശക്തമാക്കുന്നു.

സുഹൃത്തുക്കളേ,

ഇന്ന്, ലോകം സാങ്കേതികവിദ്യയിലേക്കും AIയിലേക്കും അതിവേഗം നീങ്ങുകയാണ്. അതുകൊണ്ടാണ് നമ്മുടെ മൃദുലമായ വശങ്ങളിൽ - കല, സംഗീതം, സംസ്കാരം, സർഗ്ഗാത്മകത എന്നിവയിൽ - ശ്രദ്ധ കേന്ദ്രീകരിക്കേണ്ടത് മുമ്പത്തേക്കാളും പ്രധാനമായിരിക്കുന്നത്, കാരണം നമ്മൾ റോബോട്ടുകളെ തയ്യാറാക്കാൻ ആഗ്രഹിക്കുന്നില്ല, മനുഷ്യരെ തയ്യാറാക്കാൻ ആഗ്രഹിക്കുന്നു. സാങ്കേതികവിദ്യ പുരോഗമിക്കുമ്പോൾ, സർഗ്ഗാത്മകതയിലൂടെ മനുഷ്യത്വവും സംവേദനക്ഷമതയും വർദ്ധിപ്പിക്കണമെന്ന് നാം ഉറപ്പാക്കണം. വിനോദം ഇതിനകം ലോകത്തിലെ ഏറ്റവും വലിയ വ്യവസായങ്ങളിൽ ഒന്നാണ്, ഭാവിയിൽ അത് വികസിച്ചുകൊണ്ടിരിക്കും. ഈ കാലഘട്ടത്തിൽ, കലയെയും സംസ്കാരത്തെയും ആഘോഷിക്കുന്നതിനും പ്രോത്സാഹിപ്പിക്കുന്നതിനുമായി ഞങ്ങൾ WAVES - വേൾഡ് ഓഡിയോ-വിഷ്വൽ ആൻഡ് എന്റർടൈൻമെന്റ് സമ്മിറ്റ് - ആരംഭിച്ചു. രാഹുൽ സംസാരിച്ചപ്പോൾ WAVES എന്ന പദം നിങ്ങൾ ഇന്ന് പലതവണ കേട്ടിരിക്കാം, പക്ഷേ ഈ സംരംഭം 2014 ൽ ആരംഭിച്ചതല്ല; പുതിയ രൂപങ്ങളും നൂതനാശയങ്ങളും ഉപയോഗിച്ച് ഇത് ഓരോ ദശകത്തിലും പരിണമിക്കുന്നു. ഇന്ന്, ഞാൻ WAVES - വേൾഡ് ഓഡിയോ-വിഷ്വൽ ആൻഡ് എന്റർടൈൻമെന്റ് സമ്മിറ്റിനെക്കുറിച്ചാണ് സംസാരിക്കുന്നത്. ഈ പ്ലാറ്റ്ഫോം സൃഷ്ടിക്കപ്പെട്ടു. അടുത്ത മാസം, മുംബൈ WAVES ന്റെ ഒരു മഹത്തായ പതിപ്പിന് ആതിഥേയത്വം വഹിക്കും, ഇത് ഒരു പതിവ് ആഗോള ഇവന്റായി മാറും. നിങ്ങൾക്കെല്ലാവർക്കും അറിയാവുന്നതുപോലെ, സിനിമകൾ, പോഡ്‌കാസ്റ്റുകൾ, ഗെയിമിംഗ്, സംഗീതം, AR, VR എന്നിവ ഭാരതത്തിൽ ഒരു ഊർജ്ജസ്വലവും സൃഷ്ടിപരവുമായ വ്യവസായമാണ്. "ഇന്ത്യയിൽ സൃഷ്ടിക്കുക" എന്ന മന്ത്രത്തോടെ, ഞങ്ങൾ ഈ വ്യവസായത്തെ അടുത്ത ഘട്ടത്തിലേക്ക് കൊണ്ടുപോകുന്നു. ഉള്ളടക്കം സൃഷ്ടിക്കാനും ആഗോളതലത്തിലേക്ക് പോകാനും WAVES ഇന്ത്യൻ കലാകാരന്മാരെ പ്രോത്സാഹിപ്പിക്കും. "ഇന്ത്യയിൽ സൃഷ്ടിക്കുക" ലോകമെമ്പാടുമുള്ള കലാകാരന്മാരെ ഭാരതത്തിലേക്ക് ക്ഷണിക്കുകയും ചെയ്യും. WAVES ന്റെ ഈ പ്ലാറ്റ്‌ഫോമിനെ ജനപ്രിയമാക്കാൻ ഞാൻ Network18 നോട് അഭ്യർത്ഥിക്കുന്നു. സൃഷ്ടിപരമായ മേഖലകളിൽ ഏർപ്പെട്ടിരിക്കുന്ന നിരവധി യുവാക്കളുണ്ട്. അവരിൽ ചിലരെ കാണാനുള്ള അവസരവും എനിക്ക് ലഭിച്ചു. ഈ പ്രസ്ഥാനത്തിന്റെ ഭാഗമാകാൻ ഞാൻ അവരെ പ്രോത്സാഹിപ്പിക്കുകയും ചെയ്യുന്നു. WAVES എല്ലാ വീട്ടിലും എല്ലാ ഹൃദയത്തിലും എത്തട്ടെ! നിങ്ങൾ ഇത് സാധ്യമാക്കുമെന്ന് എനിക്ക് ഉറപ്പുണ്ട്.

സുഹൃത്തുക്കളേ,

ഈ ഉച്ചകോടിയിലൂടെ, Network18 നമ്മുടെ രാജ്യത്തെ യുവാക്കളുടെ സർഗ്ഗാത്മകത, ദർശനം, ദൃഢനിശ്ചയം എന്നിവ മികച്ച രീതിയിൽ പ്രദർശിപ്പിച്ചു. ദേശീയ പ്രശ്‌നങ്ങളെക്കുറിച്ച് ചിന്തിക്കാനും പരിഹാരങ്ങൾ നിർദ്ദേശിക്കാനും അവരെ പ്രോത്സാഹിപ്പിച്ചുകൊണ്ട് നിങ്ങൾ യുവമനസ്സുകളെ എങ്ങനെ ഉൾപ്പെടുത്തി എന്നത് അഭിനന്ദനീയമാണ്.  നിങ്ങൾ അവരെ കേൾവിക്കാരായി മാത്രമല്ല, പരിവർത്തനത്തിൽ പങ്കാളികളാക്കി എന്നതാണ് ഏറ്റവും പ്രധാനപ്പെട്ട നേട്ടം. ഇപ്പോൾ, രാജ്യത്തുടനീളമുള്ള സർവകലാശാലകളോടും കോളേജുകളോടും ഗവേഷണ സ്ഥാപനങ്ങളോടും ഈ ഉച്ചകോടിയുടെ ഇടപെടൽ മുന്നോട്ട് കൊണ്ടുപോകാൻ ഞാൻ അഭ്യർത്ഥിക്കുന്നു. ഉയർന്നുവന്ന ഉൾക്കാഴ്ചകളും നിർദ്ദേശങ്ങളും രേഖപ്പെടുത്തുകയും പഠിക്കുകയും നയരൂപീകരണത്തിനായി അവതരിപ്പിക്കുകയും വേണം. അപ്പോൾ മാത്രമേ ഈ ഉച്ചകോടി ഒരു സംഭവം മാത്രമായി തുടരില്ല, മറിച്ച് സ്വാധീനശക്തിയായി മാറുകയുള്ളൂ. വികസിത രാഷ്ട്രമാകാനുള്ള ഭാരതത്തിന്റെ ദൃഢനിശ്ചയത്തിന് പിന്നിലെ യഥാർത്ഥ ഊർജ്ജം നിങ്ങളുടെ ഉത്സാഹം, ആശയങ്ങൾ, പങ്കാളിത്തം എന്നിവയാണ്. ഈ പരിപാടിയിൽ പങ്കെടുത്ത എല്ലാവർക്കും, പ്രത്യേകിച്ച് നമ്മുടെ യുവ പങ്കാളികൾക്ക്, എന്റെ ഹൃദയംഗമമായ അഭിനന്ദനങ്ങൾ ഒരിക്കൽ കൂടി അറിയിക്കുന്നു.

വളരെ നന്ദി!

-SK-