মহামান্য, ‘ইউৰোপীয় আয়োগ’ৰ সভানেত্ৰী মহোদয়া

‘ইউৰোপীয় আয়োগ’-ৰ আয়ুক্তমণ্ডলী,

প্ৰতিনিধিসকল,

সংবাদ মাধ্যমৰ বন্ধুসকল,

নমস্কাৰ!

‘ইউৰোপীয় আয়োগ’-ৰ সভানেত্ৰী আৰু আয়ুক্তমণ্ডলীৰ এই ভাৰত ভ্ৰমণ নিতান্তই অভূতপূৰ্ব।

এয়া কেৱল ‘ইউৰোপীয় আয়োগ’ৰ প্ৰথম ভাৰত ভ্ৰমণেই নহয়, যিকোনো এখন দেশৰ সৈতে ‘ইউৰোপীয় আয়োগ’ৰ এনে ধৰণৰ এয়াই প্ৰথম ব্যাপক ব্যস্ততা। তদুপৰি, এই ভ্ৰমণ হৈছে নতুন আয়োগৰ শেহতীয়া কাৰ্যকালৰ প্ৰথম ভ্ৰমণসমূহৰ অন্যতম। এই ঐতিহাসিক অনুষ্ঠানত মই ‘ইউৰোপীয় আয়োগ’ৰ সভানেত্ৰী আৰু আয়ুক্তমণ্ডলীক ভাৰতলৈ উষ্ম আদৰণি জনাইছোঁ।

বন্ধুসকল,

ভাৰত আৰু ‘ইউৰোপীয় ইউনিয়ন’ৰ মাজত এই দুই দশক  ধৰি চলি থকা কৌশলগত অংশীদাৰিত্ব হৈছে  প্ৰাকৃতিক আৰু জৈৱিক। ইয়াৰ মূল ভাগ বিশ্বাস, গণতান্ত্ৰিক মূল্যবোধৰ ক্ষেত্ৰত এক সহভাগী আস্থা, আৰু সমৃদ্ধি আৰু অংশীদাৰী প্ৰগতিৰ প্ৰতি পাৰস্পৰিক প্ৰতিশ্ৰুতিবদ্ধতাৰ ওপৰত প্ৰতিষ্ঠিত।

এই ভাৱনাৰে আমি কালিৰে পৰা আজিৰ ভিতৰত বিভিন্ন খণ্ডৰ প্ৰায় ২০ খন মন্ত্ৰী পৰ্যায়ৰ বৈঠক অনুষ্ঠিত কৰিছোঁ। বিভিন্ন আঞ্চলিক আৰু গোলকীয় বিষয়ত আন্তৰিক আৰু অৰ্থপূৰ্ণ আলোচনা অনুষ্ঠিত হৈছে। আমাৰ অংশীদাৰিত্ব উন্নত আৰু ত্বৰান্বিত কৰিবলৈ বহুতো গুৰুত্বপূৰ্ণ সিদ্ধান্ত লোৱা হৈছে।

আমি বাণিজ্য, প্ৰযুক্তি, বিনিয়োগ, উদ্ভাৱন, সেউজ বিকাশ, নিৰাপত্তা, দক্ষতা আৰু গতিশীলতাৰ ক্ষেত্ৰত সহযোগিতাৰ বাবে এক আঁচনি প্ৰস্তুত কৰিছোঁ। আমি আমাৰ দলসমূহক এই বছৰৰ শেহৰ ফালে পাৰস্পৰিক ভাৱে লাভজনক ‘দ্বিপাক্ষিক মুক্ত বাণিজ্য চুক্তি’ সম্পাদন কৰিবলৈ নিৰ্দেশ দিছোঁ।

বন্ধুসকল,

বিনিয়োগৰ পৰিকাঠামো শক্তিশালী কৰাৰ বাবে, ‘বিনিয়োগ সুৰক্ষা আৰু জিআই চুক্তি’ৰ ক্ষেত্ৰত আগবাঢ়ি যোৱাৰ বিষয়েও আলোচনা হৈছে। প্ৰযুক্তি আৰু উদ্ভাৱনৰ ক্ষেত্ৰত এক বিশ্বস্ত আৰু সুৰক্ষিত মূল্য শৃংখলা হৈছে আমাৰ উমৈহতীয়া প্ৰাথমিকতা।

আমি অৰ্ধপৰিবাহী, এআই, উচ্চ প্ৰদৰ্শন কম্পিউটিং আৰু ৬জি-ৰ ক্ষেত্ৰত সহযোগিতা বৃদ্ধিৰ প্ৰসংগতো সন্মত হৈছোঁ। আমি ‘মহাকাশ সম্পৰ্কীয় আলোচনা’ আৰম্ভ কৰাৰ সিদ্ধান্ত লৈছোঁ।

বন্ধুসকল,

পৰিস্থিতি বিজ্ঞান আৰু অৰ্থনীতিৰ মাজত এক সন্তুলন হৈছে আমাৰ অংশীদাৰী প্ৰতিশ্ৰুতি, আৰু এই দিশত আমাৰ সহযোগিতা শক্তিশালী হৈছে। আমি এখন ‘সেউজ হাইড্ৰজেন ফ'ৰাম’ আৰু ‘অফশ্বৰ বায়ু শক্তি ব্যৱসায় সন্মিলন’ অনুষ্ঠিত কৰাৰ সিদ্ধান্ত লৈছোঁ। ‘ইভি বেটাৰি’, ‘সামুদ্ৰিক প্লাষ্টিক’ আৰু ‘সেউজীয়া হাইড্ৰজেন’ সন্দৰ্ভত যুটীয়া গৱেষণা কৰা হ'ব। আমি বহনক্ষম নগৰ উন্নয়নৰ ক্ষেত্ৰত আমাৰ যুটীয়া পৰিকল্পনাও আগবঢ়াম।

সংযোগৰ ক্ষেত্ৰত, ‘ভাৰত-মধ্য প্ৰাচ্য-ইউৰোপ অৰ্থনৈতিক কৰিডৰ’ বা "আইএমইইচি"ক আগুৱাই নিয়াৰ বাবে দৃঢ় পদক্ষেপ লোৱা হ'ব। মই দৃঢ়ভাৱে বিশ্বাস কৰোঁ যে "আইএমইইচি"য়ে এক ‘ইঞ্জিন’ হিচাপে কাম কৰিব যি অনাগত দিনবোৰত গোলকীয় বাণিজ্য, বহনক্ষম বিকাশ আৰু সমৃদ্ধিৰ গতি বৃদ্ধি কৰিব।

বন্ধুসকল,

প্ৰতিৰক্ষা আৰু নিৰাপত্তা সম্পৰ্কীয় বিষয়ত আমাৰ বৰ্ধিত সহযোগিতা আমাৰ পাৰস্পৰিক বিশ্বাসৰ প্ৰতীক। আমি চাইবাৰ নিৰাপত্তা, সামুদ্ৰিক সুৰক্ষা আৰু সন্ত্ৰাসবাদ বিৰোধী ক্ষেত্ৰত আমাৰ সহযোগিতা আগবঢ়াই নিম।

ভাৰত-প্ৰশান্ত মহাসাগৰীয় অঞ্চলত শান্তি, নিৰাপত্তা, স্থিৰতা আৰু সমৃদ্ধিৰ গুৰুত্বত দুয়োপক্ষই একমত। আমি ‘ইউৰোপীয় ইউনিয়ন’ৰ "ভাৰত প্ৰশান্ত মহাসাগৰ উদ্যোগ"ত যোগদানৰ সিদ্ধান্তক স্বাগতম জনাইছোঁ। আমি ভাৰত-প্ৰশান্ত মহাসাগৰীয় অঞ্চল আৰু আফ্ৰিকাত বহনক্ষম আৰু সামগ্ৰিক উন্নয়নৰ বাবে ত্ৰিকোণীয়া উন্নয়ন প্ৰকল্পত একেলগে কাম কৰিম।

বন্ধুসকল,

জনসাধাৰণৰ মাজৰ পাৰস্পৰিক সংযোগ হৈছে আমাৰ সম্পৰ্কৰ আটাইতকৈ শক্তিশালী সম্পদ। আজি আমি আমাৰ মাজত শিক্ষা, গৱেষণা আৰু উদ্যোগৰ অংশীদাৰিত্ব বৃদ্ধিৰ বাবে এক নতুন চুক্তিত উপনীত হৈছো। মই বিশ্বাস কৰোঁ যে ভাৰতৰ যুৱ প্ৰতিভা আৰু ইউৰোপৰ উদ্ভাৱনে একেলগে সীমাহীন সম্ভাৱনা সৃষ্টি কৰিব পাৰিব।

আমি ‘ইউৰোপীয় ইউনিয়ন’ৰ নতুন ভিছা প্ৰণালীক স্বাগতম জনাইছোঁ। ই ভাৰতৰ প্ৰতিভাশালী যুৱক-যুৱতীসকলৰ সামৰ্থ্যক উন্নত গতিশীলতা প্ৰদান কৰিব।

আজি আমি ২০২৫ চনৰ পিছতো ‘ভাৰত-ইউৰোপীয় ইউনিয়নৰ অংশীদাৰিত্ব’ৰ বাবে এক সাহসী আৰু উচ্চাকাংক্ষী পথ-পৰিকল্পনা প্ৰস্তুত কৰাৰ সিদ্ধান্ত লৈছোঁ। ইয়াক পৰৱৰ্তী ‘ভাৰত-ইউৰোপীয় ইউনিয়ন সন্মিলন’ৰ সময়ত আৰম্ভ কৰা হ'ব।

মহামান্যা,

আপোনাৰ ভাৰত ভ্ৰমণে আমাৰ অংশীদাৰিত্বক নতুন গতি, শক্তি আৰু উৎসাহ প্ৰদান কৰিছে। এই যাত্ৰা হৈছে আটাইতকৈ ডাঙৰ অনুঘটক, যিয়ে আমাৰ উচ্চাকাংক্ষাক কাৰ্যলৈ ৰূপান্তৰ কৰিব।

পৰৱৰ্তী ‘ভাৰত-ইউৰোপীয় ইউনিয়ন সন্মিলন’ৰ বাবে ভাৰতলৈ আকৌ অহাৰ সময়ত আপোনাক আদৰণি জনাবলৈ মই আগ্ৰহেৰে অপেক্ষা কৰিম।

বহুত বহুত ধন্যবাদ।

******

MJPS/ST/SKS/KB