Hapoh ka jingialam jong u Myntri Rangbah duh, Narendra Modi, haba pyntreikam ia ka polisi ka bym ai lad ia u drok, ha u 2024, baroh ki kynhun jong ka ain ha kylleng ka ri, kynthup ka Narcotics Control Bureau (NCB), ki la ioh kurup ia ki jingdih pynbuaid ba shongdor kumba T. 25,330 klur, kaba palat 55% ka jingbun haba ianujor bad u drok ba shongdor T. 16,100 klur ba ioh kurup ha u 2023. Kane ka jingjop kadei ka dak jong ka rukom treikam 'Bottom to Top' bad 'Top to Bottom' ba la sdang hapoh ka jingialam jong u Myntri Rangbah duh Modi bad ka jingialam jong u Myntri Kam Pohiing jong ka sorkar pdeng, Amit Shah. Ka sorkar Modi ka iaid shaphrang sha ka rukom treikam ba kynthup baroh kawei ka sorkar ban pynlong ia ka India kaba lait na u drok.

Ha u 2024, ka jingioh kurup ia ki drok kiba kham buh jingma bad ba kham kyrni, cocaine, bad ki dawai ba pyndonkam kum ki jingdih pynbuaid ka la kiew bha, kiba kham rem dor shuh shuh.

Ha u 2024, ka jingdon u ATS (Amphetamine-Type Stimulants) kum Methamphetamine ka la long palat arshah na ka 34 quintal ha u 2023 sha ka 80 quintal ha u 2024. Kumjuh ruh ka jingdon u cocaine ba la ioh kurup ruh ka la kiew na ka 292 kilo ha u 2023 sha ka 1426 kilo ha u 2024. Ka jingdon u Mephedrone ba la ioh kurup ka la kiew na ka 688 kilo ha u 2023 haba ianujor bad 3391 kilo ha u 2024. Kumjuh ruh, ka jingdon u Hashish ba la ioh kurup ka la kiew na ka 34 Quintal ha u 2023 sha ka 61 Quintal ha u 2024. Ka jingdon ki dawai ba la pyndonkam bha kum ki jingdih pynbuaid ka la kiew na ka 1.84 klur sha ka 4.69 klur tylli (ki dawai kuli).

Ki jingkhynra ba kongsan ba la pynlong da ka Narcotics Control Bureau (NCB) ha ka jingiatreilang bad ki kynhun bapher bapher ha u 2024.

Rymphang 2024: Ka NCB bad ka Special Cell jong ka Delhi Police ki la pynduh ia ka rynsan khaii druk hapdeng ki ri bad la kem lai ngut ki briew bad kurup 50 kilo ka dawai ba shna jingdih pynbuaid- Pseudoephedrine. Ka kynhun jong ka NCD bad Delhi Police ki la pynduh ia ka rynsan katkum ka jingioh jingtip na ki bor pyniaid kam na Australia bad New Zealand.

Rymphang 2024: Ka jingkhynra lang ba la ai kyrteng 'Sagar Manthan-1', la pynlong da ka NCB, Navy bad ATS Gujarat Police, la ioh kurup ia u drok ba 3300 kilo (3110 kilo Charas/Hashish, 158.3 Kilo crystalline powder Meth bad 24.6 Kilo u Heroin) na Indian Ocean.  Kane ka dei ka rekod ha ka jingbun ka jingkurup ia u Charas/Hashish ha ka jaka duriaw jong ka ri. La kem ia san ngut ki briew nabar ri ha kaba iadei bad kane.

Lber 2024: Ka NCB ka la kem ia u Jaffer Sadiq, u briew ba kongsan ha ka rynsan shalan beain ia u drok ha u bnai Rymphang 2024. U Jaffer Sadiq u la lait phet bad rieh naduh ka 15 tarik Rymphang, 2024 haba ka NCB ka la kurup 50.070 kilo u Pseudoephedrine na kudam jong kawei ka kompani bad kem ia lai ngut ki nongiarap jong u Jaffer Sadiq ha kaba iadei bad kane ka jingjia.

Iaiong 2024: Ha ka jingkhynra lang ka NCB, ATS jong ka Gujarat Police bad ka Indian Coast Guard, la ioh kem ia kawei ka lieng nabar ri kaba kit kumba 86 kilo u Heroin bad la kem 14 ngut ki briew kiba dei na Pakistan. La ioh kurup ia u drok ba shongdor T. 602 klur ha kane ka jingkhynra.

Risaw 2024: Ka NCB ka la pynlong ia ka jingkhynra ha kawei ka karkhana ha ka thain Kasna Industrial jong ka distrik Gautam Budh Nagar bad la lap kumba 95 kilo u Methamphetamine ba la pynum bad ba dang tylli. La lap ruh ia ki chemical kum Acetone, Sodium Hydroxide, Methylene Chloride, Premium grade Ethanol, Toluene, Red phosphorus, Ethyl Acetate bad kiwei kiwei bad ka kor ba wanrah nabar ri ban shna ia kine.

Naiwieng 2024: Ha ka jingjop ha ka jingiakhun pyrshah ia ki kynhun shalan drok ba treikam ha India bad khamtam ha ka thain Delhi NCR, ka Narcotics Control Bureau ka la lap kawei na ki jingkurup ba heh tam ia u Cocaine ha Delhi. Hadien ba la peit ia ki jingioh jingtip ha kine ki jingjia, bad lyngba ka jingpyndonkam ia ka jingioh jingtip bad ka teknoloji, ka NCB ka la poi sha ka tyllong jong ki mar beain bad 82.53 kilo u Cocaine ba la ioh kurup na ka thain Janakpuri bad Nangloi jong ka nongbah Delhi.

Naiwieng 2024: Ha ka jingkhynra lang ba la tip kum ka 'Sagar Manthan-4', ka NCB, Indian Navy bad ATS Gujarat Police ki la lap ia ka kynhun shalan drok hapdeng ki ri bad kurup kumba 700 kilo u mar beain Meth ha Gujarat.

*****