Ka thong ‘Make In India’ jong u Myntri Rangbah duh ka la iarap ia ka India ban long ka jaka pdeng jong ka jingshna tiar kylleng ka pyrthei. Ka prokram Make in India hapoh ki shiphew snem jong ka jingsdang ia ka ym tangba ka ialam sha ka jinglah kyrshan dalade, bad kyntiew ia ka jingpynmih tiar hynrei ka plie ruh ia ki lad ioh kam. Ha ka jingsam ia ki jingtip ba iadei bad kane u Myntri Sorkar pdeng ba dei khmih ia ki Tnad Electronics and Information Technology, Railways bad Information & Broadcasting, Ashwini Vaishnaw u la ban jur ia ka jingkylla ha ka kam shna mobile bad tiar elektrik jong ka India ha kine ki shiphew snem ba la leit.

Na ka jingthied nabar ri sha ka jinglah pynbiang dalade: Ka jingkiew ka India ha ka kam shna Mobile

Ka India ka la kiew shaphrang ha ka kam shna mobile bad tiar elektrik bad ka la kiew sha ka kyrdan kaba ar ha ka jingiar ha ka kam shna mobile ha kylleng ka pyrthei. Ha u 2014, ka India ka don tang 2 tylli ki jaka shna mobile hynrei mynta, ka ri ka don palat 300 tylli ki jaka shna mobile, kane ka pyni ia ka jingiar ha kane ka kam ba kongsan.

Ha u 2014-15 tang 26% ki mobile phone kiba la die ha India kidei kiba shna ha India, baroh kidei kiba thied nabar ri. Kum ban shu kdew, mynta, 99.2% baroh ki mobile phone kiba la die ha India kidei kiba shna ha India. Ka dor jong ki mobile phone ba la shna ka la kiew na ka T. 18,900 klur ha u snem mang tyngka 2014 sha ka T. 4,22,000 klur ha u snem mang tyngka 2024.

Palat 325 haduh 330 million ki mobile phone ha ka shi snem kidei kiba la shna ha India bad ha ka average ki don kumba shi billion ki mobile phone ba pyndonkam ha India. Ki mobile phone jong ka India ki la pyndap ia ki iew ha ka ri bad ka la don ka jingkiew kaba heh ha ka jingshalan ia ki mobile phone. Ka jingshalan ia ki mobile phone, ka bym ju don ha u 2014, mynta ka la tam T. 1,29,000 klur.

Ki shiphew snem ka jingplie ki lad ioh kam ha ka jingshna ia ki tiar elektrik

Ka jingiar kane ka kam ka la long ruh ka bynta ba khraw ha ka jingioh kam ioh jam, kaba la plie kumba 12 lak ki lad ioh kam ha kine ki shiphew snem. Kine ki lad ioh kam ym tangba ka la kyntiew ia ka jinglong ka ioh ka kot jong ki longiing ba bun hynrei ka la nohsynniang ruh sha ka imlang sahlang bad ka ioh ka kot jong ka ri.

Ka sienjam ‘Make in India’ ka la long kaba kongsan ban kot sha kine ki mawmer. Ka la iarap ha ka jinglah pynmih ha ka ri ia ki bynta ba kongsan bad ki sub-assembly kum ki charger, ki battery pack, ki mechanic bapher bapher, ki USB cable, bad kiwei kiwei ki bynta kiba jynjar ban shna kum ki Lithium Ion Cell, speaker bad ki microphone, ki display bad ki camera.

Ha ka jingpeit shakhmat, yn pynkhlain ia ka jingphaikhmat ha ka jingpynbha shuh shuh ia ki kam khamtam ha ka jingpynmih ia ki bynta bad ki semiconductor. Kane ka jingkylla kadei shi bynta ka rukom treikam kaba iar ban kyntiew ia ka jinglah kyrshan dalade bad pynlong ia ka India kaba hakhmat ha ka iew mar elektrik ha ka pyrthei.

Ka jingkyntiew ia ka kam: Ka jingkyntiew ia ka kam shna tiar elektrik jong ka India

U Ashwini Vaishnaw u la ong ba ka jingphaikhmat mynta kadei ha ka jingkyntiew ia ka kam, da kaba peit bniah ia ki mar ba bha bad ka jingpynmih semiconductor, ka ban pynthikna ia ka jingkyntiew ia ka kam shna mar elektrik ha ka ri. Kane kan pynkhlain ia ka kyrdan jong ka India kum kaba hakhmat ha ka iew tiar elektrik ha kylleng ka pyrthei.

Hapdeng u snem 1950 bad 1990, ki polisi ba pyrkhing ki la pynsuki ia ka kam shna tiar. Hynrei, ka ‘Make in India’ ka la pynkylla ia kane da kaba pynbha shuh shuh ia ka kam bad kyntiew ia ka jingpynmih ia ki bynta bad ki chip.

Ka jingplie ia ka jaka shna semiconductor ha ka ri ka la long ka bynta ba kongsan jong ka ‘Make in India, ha kaba ka India ka la pyrshang ban kot sha kane ka thong mynta la palat hynriew phew snem. Lyngba ka jingsdang ia ka India Semiconductor Mission bad san tylli ki projek ba kongsan ba la ioh jingmynjur, da kaba sdang bad ka Micron, ki artylli ki projek jong ka Tata Electronics, kawei ka projek jong ka CG Power, bad ka projek ba khatduh jong ka Keynes, ka jaka shna ia ki semiconductor ha ka ri ka ba dang sdang ha India.

Ka Make in India ka saindur ia ka por ba thymmai jong ka ioh ka kot

Naduh ki jinglehkai haduh ki mobile phone, ki tiar iada ri haduh ki kali EV, ka jingpynmih mar ka la kynriah biang sha India. Ka thong ‘Make in India’ jong u Myntri Rangbah duh Narendra Modi kadei ban pynlong ia ka India ka jaka pdeng jong ka jingshna tiar ha kylleng ka pyrthei. Ka prokram Make in India ka kut jingmut ia ka jinglah kyrshan dalade, kyntiew ka jingpynmih tiar, bad plie lad ioh kam, ka ban nohsynniang sha ka ioh ka kot jong ka ri.

*****