La iohi ia ki san snem ban wan kum ka kabu kaba kyrpang ban pynurlong ia ka ‘Sabka Vikas’, la ong ka Myntri sorkar pdeng ba dei khmih ia ka Tnad kam Pla Tyngka, Nirmala Sitharaman ha ka jingwanrah ia ka Mang Tyngka 2025-26 jong ka sorkar pdeng ha iing dorbar thawain Parliament mynta ka sngi. Ha ka jingkren jong ka halor ka mang tyngka, ka Myntri sorkar pdeng ka la ban jur halor ka jingkiew shaphrang kaba ryntih ha baroh ki thain.

Ka Myntri ka la ban jur ba ka ioh ka kot jong ngi kadei kaba kiew sted napdeng baroh ka ioh ka kot ha kylleng ka pyrthei. Ka lynti jong ka roi ka par jong ngi ha ki 10 snem ba la leit bad ki jingpynkylla kiba kongsan ki la khring ia ki ri kylleng ka pyrthei. Ka jingngeit skhem ha ka bor jong ka India bad ki lad ba ka don ka la kiew ha kane ka samoi, la bynrap ka Myntri.

Ka Mang Tyngka 2025-26 ka pyni ia ki sienjam jong ka sorkar ban pynsted ia ka jingkiew shaphrang, ban don ka roi ka par kaba kynthup ia baroh, ka jingwnrah ia ki jingbei tyngka na ki kynhun shimet, kyntiew ia ki longiing, bad kyntiew ka bor pynlut pisa ki briew jong ka India ba pdeng ka jingioh.

Lyngba ka jingithuh ia ka kam rep, MSME, jingbei tyngka, bad ka kam shalan tiar kum ki saw tylli ki kor ba kongsan ha ka jingiaid lynti sha ka roi ka par, ka Myntri ka la ban ba kane ka mang tyngka ka thmu ban sdang ia ki jingpynkylla ha hynriew tylli ki bynta. Ha ki san snem ban wan, ki bynta jong ka khajna, ka kam bording, ka kam pynroi ia ki jaka sor, kam tih mar poh khyndew, kam ba iadei bad ka pisa bad ki jingpynkylla ia ki kyndon kan pyniar ia ki lad ban kiew shaphrang bad ka bor ialeh ha ka pyrthei. Ka Myntri kam pla tyngka ka la ong ba ha ka jingiaid lynti sha ka roi ka par, “Ki jingpynkylla jong ngi’ kidei ka bor; ha kaba ka ‘Jingai bynta ia baroh’ ka dei kaba ialam lynti, bad ka ‘Viksit Bharat’ kadei ka jaka pynkut.

Ka jingphaikhmat sha ka Garib, ki samla, Annadata bad Nari ha ka jingkren jong ka halor ka Mang tyngka 2025-26, ka Myntri sorkar pdeng ka la ban jur halor ki sienjam ba la tyrwa na ka bynta ka roi ka par kaba saphriang ha shiphew tylli ki bynta. Kine kilong, ka jingpynshlur ia ka jingkiew shaphrang ka kam rep bad ka jingseisoh; ka jingtei ia ka jingseisoh ki jaka nongkyndong; ka jingialam ia baroh sha ka lynti jong ka jingkiew shaphrang; ka jingkyntiew ia ki kam shna tiar bad kyntiew ia ka Make in India; ka jingkyrshan ia ki MSME, roi ka par na ka jingioh kam; ka jingbei tyngka ha ki briew, ka ioh ka kot bad ka jingsaindur thymmai, ka jingioh ka bording kaba shngain; ka jingkyntiew ia ka kam shalan tiar; bad kyntiew ia ka jingsaindur thymmai.   

Ka Myntri Sorkar pdeng ka la ong ba ka ‘Viksit Bharat’ ka kynthup ka jinglait na ka jingduk, shispah per cent ka pule puthi kaba bha ha ki skul, ka jingioh ia ki lad jingsumar ba bha, ba jem dor bad kaba pura; shispah per cent ki nongtrei kiba la tbit ki ioh kam, hynniew phew per cent ki longkmie ki don bynta ha ki kam ka ioh ka kot; bad ki nongrep ki pynbiang bam kylleng ka pyrthei.’

***