ധനകാര്യ മന്ത്രാലയം
2024-25ലെ സാമ്പത്തിക സർവേയുടെ പ്രധാന ഭാഗങ്ങൾ
Posted On:
31 JAN 2025 2:20PM by PIB Thiruvananthpuram
2025 സാമ്പത്തിക വർഷത്തിൽ (ആദ്യ മുൻകൂർ കണക്കെടുപ്പ്) ഇന്ത്യയുടെ യഥാർഥ ജിഡിപിയും ജിവിഎ വളർച്ചയും 6.4 ശതമാനമായി കണക്കാക്കപ്പെടുന്നു
2026 സാമ്പത്തിക വർഷത്തിൽ യഥാർഥ ജിഡിപി വളർച്ച 6.3 ശതമാനം മുതൽ 6.8 ശതമാനം വരെ
താഴേത്തട്ടുമുതലുള്ള ഘടനാപരമായ പരിഷ്കാരങ്ങളുടെയും നിയന്ത്രണങ്ങൾ നീക്കലിന്റെയും സ്വാധീനം ഇടത്തരം വളർച്ചാസാധ്യതയും ആഗോള മത്സരക്ഷമതയും വർധിപ്പിക്കുന്നു
ഭൗമ-സാമ്പത്തിക വിഘടനം (ജിഇഎഫ്) ആഗോളവൽക്കരണത്തിനു ബദലാകുന്നു; ഇത് ആസന്നമായ സാമ്പത്തിക യാഥാർഥ്യങ്ങളിലേക്കും പുനഃക്രമീകരണങ്ങളിലേക്കും നയിക്കുന്നു
ഇന്ത്യയുടെ മിറ്റിൽസ്റ്റാൻഡ്(ചെറുകിട-ഇടത്തരം വ്യവസായമേഖല) സൃഷ്ടിക്കുന്നതിന് പരിഷ്കാരങ്ങളിലും വ്യവസായ നടത്തിപ്പുസുഗമമാക്കൽ 2.0ലും ശ്രദ്ധ കേന്ദ്രീകരിക്കും
അടിസ്ഥാനസൗകര്യങ്ങളുടെ ആവശ്യകതകൾ നിറവേറ്റുന്നതിൽ സ്വകാര്യ മേഖലയുടെ പങ്കാളിത്തം നിർണായകമാകും
2021 സാമ്പത്തിക വർഷം മുതൽ 2024 സാമ്പത്തിക വർഷം വരെയുള്ള കാലയളവിൽ പദ്ധതിച്ചെലവു തുടർച്ചയായി മെച്ചപ്പെടുത്തി; പൊതുതെരഞ്ഞെടുപ്പുകൾക്ക് ശേഷവും ഇത് 8.2 ശതമാനം വർധിച്ചു
2020 സാമ്പത്തിക വർഷം മുതൽ 2024 സാമ്പത്തിക വർഷം വരെയുള്ള കാലയളവിൽ പ്രധാന അടിസ്ഥാനസൗകര്യ മേഖലകളിലെ മൂലധനച്ചെലവ് 38.8 ശതമാനം വളർച്ച നേടി
ഇന്ത്യയുടെ ഉപഭോക്തൃ വില പണപ്പെരുപ്പം 2026 സാമ്പത്തിക വർഷത്തിൽ 4 ശതമാനം എന്ന ലക്ഷ്യതിലെത്തും എന്ന് ഭാരതീയ റിസർവ് ബാങ്കും ഐഎംഎഫും അഭിപ്രായപ്പെട്ടു
റീട്ടെയിൽ ശീർഷക പണപ്പെരുപ്പം 2024 സാമ്പത്തിക വർഷത്തെ 5.4 ശതമാനത്തിൽ നിന്ന് 2024 ഏപ്രിൽ - ഡിസംബർ മാസങ്ങളിൽ 4.9 ശതമാനമായി കുറഞ്ഞു
വായ്പവളർച്ച നിക്ഷേപ വളർച്ചയിലേക്ക് സംയോജിക്കുന്നതിനാൽ ബാങ്ക് വായ്പ സ്ഥിരമായ നിരക്കിൽ വളർന്നു
ഷെഡ്യൂൾഡ് വാണിജ്യ ബാങ്കുകളുടെ ജിഎൻപിഎ 12 വർഷത്തെ ഏറ്റവും താഴ്ന്ന നിരക്കായ 2.6 ശതമാനമായി കുറഞ്ഞു
2024 സെപ്റ്റംബർ വരെ പാപ്പരത്ത നിയമപ്രകാരം 1068 പദ്ധതികൾ പരിഹരിച്ച് ₹3.6 ലക്ഷം കോടി സമാഹരിച്ചു
2024 ഡിസംബർ വരെ ഇക്വിറ്റി, കടം എന്നിവയിലൂടെ ₹11.1 ലക്ഷം കോടി സമാഹരിച്ചു; മുൻ വർഷത്തേക്കാൾ 5% വർധന
ബിഎസ്ഇ ഓഹരിവിപണി-ജിഡിപി മൂലധന അനുപാതം 136 ശതമാനമായി; ചൈന (65 ശതമാനം), ബ്രസീൽ (37 ശതമാനം) എന്നിവയേക്കാൾ വളരെ കൂടുതൽ
2025 സാമ്പത്തിക വർഷത്തിലെ ആദ്യ ഒമ്പത് മാസങ്ങളിൽ മൊത്തത്തിലുള്ള കയറ്റുമതി 6 ശതമാനം വർധിച്ചു; സേവനങ്ങൾ 11.6 ശതമാനം (കഴിഞ്ഞ വർഷത്തെ അപേക്ഷിച്ച്) വർധിച്ചു
യുഎൻസിടിഎഡി പ്രകാരം ടെലികമ്മ്യൂണിക്കേഷൻ, കമ്പ്യൂട്ടർ, ഇൻഫർമേഷൻ സർവീസസ് എന്നിവയിൽ ഇന്ത്യ ലോകത്തിലെ രണ്ടാമത്തെ വലിയ കയറ്റുമതിക്കാരായി
640.3 ബില്യൺ യുഎസ് ഡോളറിന്റെ ഫോറെക്സ് 10.9 മാസത്തെ ഇറക്കുമതിയും 90 ശതമാനം ബാഹ്യ കടവും ഉൾക്കൊള്ളാൻ പര്യാപ്തം
ഗഗൻയാൻ ദൗത്യവും ചന്ദ്രയാൻ-4 ലൂണാർ സാമ്പിൾ റിട്ടേൺ ദൗത്യവും ഗവണ്മെന്റിന്റെ ബഹിരാകാശ വീക്ഷണം 2047ൽ ഉൾപ്പെടുന്നു
സ്മാർട്ട്ഫോൺ ഇറക്കുമതിയിൽ ഗണ്യമായ കുറവ്; ഇപ്പോൾ 99 ശതമാനവും നിർമിക്കുന്നത് ആഭ്യന്തരമായി: സാമ്പത്തിക സർവേ 2024-25
WIPO റിപ്പോർട്ട് 2022 - ആഗോളതലത്തിൽ മികച്ച 10 പേറ്റന്റ് ഫയലിങ് ഓഫീസുകളിൽ ഇന്ത്യ ആറാം സ്ഥാനത്ത്
എംഎസ്എംഇകൾക്ക് ഇക്വിറ്റി ഫണ്ടിങ് നൽകുന്നതിനായി ₹50,000 കോടിയുടെ സ്വയംപര്യാപ്ത ഇന്ത്യ നിധി ആരംഭിച്ചു
ഏപ്രിൽ മുതൽ നവംബർ വരെ 2025 സാമ്പത്തിക വർഷത്തിൽ ഇന്ത്യയുടെ സേവന കയറ്റുമതി വളർച്ച 12.8 ശതമാനമായി ഉയർന്നു; 2024 സാമ്പത്തിക വർഷത്തിൽ ഇത് 5.7 ശതമാനമായിരുന്നു
മൊത്തം ആഭ്യന്തര ഉൽപ്പാദനത്തിൽ വിനോദസഞ്ചാരമേഖലയുടെ സംഭാവന 2023 സാമ്പത്തിക വർഷത്തിൽ മഹാമാരിക്കു മുമ്പുള്ള 5 ശതമാനമെന്ന നിലയിലായി
കാർഷിക-അനുബന്ധ പ്രവർത്തന മേഖല നിലവിലെ വിലയിൽ 2024 സാമ്പത്തിക വർഷത്തിൽ (PE) രാജ്യത്തിന്റെ ജിഡിപിയുടെ ഏകദേശം 16 ശതമാനം സംഭാവന ചെയ്യുന്നു
മുൻ വർഷത്തേക്കാൾ 89.37 ലക്ഷം മെട്രിക് ടണ്ണിന്റെ വർധനയോടെ ഖാരിഫ് ഭക്ഷ്യധാന്യ ഉൽപ്പാദനം 1647.05 ലക്ഷം മെട്രിക് ടണ്ണിലെത്തുമെന്ന് പ്രതീക്ഷിക്കുന്നു
മത്സ്യബന്ധന മേഖലയിൽ 8.7 ശതമാനം എന്ന നിരക്കിൽ സിഎജിആർ ഏറ്റവും ഉയർന്ന നിലയിൽ; തൊട്ടുപിന്നാലെ 5.8 ശതമാനം സിഎജിആറുമായി കന്നുകാലിമേഖല
ഫോസിൽ ഇതര ഇന്ധന സ്രോതസ്സുകളിൽ നിന്നുള്ള സ്ഥാപിത വൈദ്യുതി ഉൽപ്പാദന ശേഷി മൊത്തം ശേഷിയുടെ 46.8 ശതമാനം
2005നും 2023നും ഇടയിൽ 2.29 ബില്യൺ ടൺ കാർബൺ ഡൈ ഓക്സൈഡിനു തത്തുല്യമായ അധിക കാർബൺ ശോഷകമുണ്ടായി
2030 ഓടെ, ജീവിത നിലവാര നിർണയ മാനദണ്ഡങ്ങൾ ആഗോളതലത്തിൽ ഏകദേശം 440 ബില്യൺ യുഎസ് ഡോളർ വരെ ലാഭിക്കാൻ ഉപഭോക്താക്കൾക്കു സഹായകമാകും
സാമൂഹിക സേവന ചെലവ് 2021 സാമ്പത്തിക വർഷം മുതൽ 2025 സാമ്പത്തിക വർഷം വരെ 15 ശതമാനം വാർഷിക വളർച്ചനിരക്ക് രേഖപ്പെടുത്തി
ഗവണ്മെന്റ് ആരോഗ്യ ചെലവ് 29.0 ശതമാനത്തിൽനിന്ന് 48.0 ശതമാനമായി വർധിപ്പിച്ചു; ആരോഗ്യരംഗത്തെ ജനങ്ങളുടെ ചെലവ് 62.6 ശതമാനത്തിൽനിന്ന് 39.4 ശതമാനമായി കുറഞ്ഞു
തൊഴിലില്ലായ്മ നിരക്ക് 2017-18 ലെ 6.0 ശതമാനത്തിൽ നിന്ന് 2023-24ൽ 3.2 ശതമാനമായി കുറഞ്ഞു
വികസിത ഭാരതമെന്ന കാഴ്ചപ്പാടു കൈവരിക്കുന്നതിന് അത്യാവശ്യമായ തൊഴിൽ സൃഷ്ടിക്ക്, വളർന്നുവരുന്ന ഡിജിറ്റൽ സമ്പദ്‌വ്യവസ്ഥയും പുനരുപയോഗ ഊർജ മേഖലകളും മെച്ചപ്പെട്ട അവസരങ്ങൾ പ്രദാനം ചെയ്യുന്നു
തൊഴിലവസരങ്ങൾ സൃഷ്ടിക്കുന്നതിനുള്ള പരിവർത്തന ഉത്തേജകമായി പിഎം-ഇന്റേൺഷിപ്പ് പദ്ധതി ഉയർന്നുവരുന്നു
വലിയ തോതിൽ നിർമിതബുദ്ധി സ്വീകരിക്കുന്നതിനുള്ള തടസ്സങ്ങൾ നിലവിൽ നിലനിൽക്കുന്നു; ഇത് നയരൂപകർത്താക്കൾക്കു പ്രവർത്തിക്കാനുള്ള വാതായനങ്ങൾ തുറക്കുന്നു
നിർമിത ബുദ്ധി അധിഷ്ഠിത പരിവർത്തനത്തിന്റെ പ്രതികൂല സാമൂഹിക പ്രത്യാഘാതങ്ങൾ കുറയ്ക്കാൻ ഗവണ്മെന്റ്, സ്വകാര്യ മേഖല, അക്കാദമികമേഖല എന്നിവ തമ്മിലുള്ള സഹകരണ ശ്രമം അത്യന്താപേക്ഷിതമാണ്
കേന്ദ്ര ധനകാര്യ-കോർപ്പറേറ്റ് കാര്യ മന്ത്രി ശ്രീമതി നിർമല സീതാരാമൻ ഇന്ന് പാർലമെന്റിൽ 2024-25ലെ സാമ്പത്തിക സർവേ അവതരിപ്പിച്ചു. സർവേയിലെ പ്രധാന ഭാഗങ്ങൾ ഇനിപ്പറയുന്നു:
സമ്പദ്‌വ്യവസ്ഥയുടെ അവസ്ഥ: അതിവേഗ പാതയിലേക്ക് മടങ്ങൽ
1. ഇന്ത്യയുടെ യഥാർഥ ജിഡിപി വളർച്ച 2025 സാമ്പത്തിക വർഷത്തിൽ 6.4 ശതമാനമായി കണക്കാക്കപ്പെടുന്നു (ദേശീയ വരുമാനത്തിന്റെ ആദ്യ മുൻകൂർ കണക്കുകൾ പ്രകാരം); ഇത് അതിന്റെ ദശാബ്ദ ശരാശരിക്ക് തുല്യമാണ്.
2. യഥാർഥ മൊത്ത മൂല്യവർധന (ജിവിഎ) 2025 സാമ്പത്തിക വർഷത്തിൽ 6.4 ശതമാനം വളരുമെന്ന് കണക്കാക്കപ്പെടുന്നു.
3. അടുത്ത അഞ്ച് വർഷത്തിനുള്ളിൽ IMF 3.2 ശതമാനം വളർച്ച പ്രവചിക്കവേ, 2023ൽ ആഗോള സമ്പദ്‌വ്യവസ്ഥ ശരാശരി 3.3 ശതമാനം വളർന്നു.
4. വളർച്ചയുടെ ഗുണദോഷങ്ങൾ കണക്കിലെടുത്ത് 2026 സാമ്പത്തിക വർഷത്തിൽ യഥാർഥ ജിഡിപി വളർച്ച 6.3 നും 6.8 നും ഇടയിൽ വളരുമെന്ന് പ്രതീക്ഷിക്കുന്നു.
5. ഇന്ത്യൻ സമ്പദ്‌വ്യവസ്ഥയുടെ ഇടക്കാല വളർച്ചാ സാധ്യതകളെ ശക്തിപ്പെടുത്തുന്നതിനും ആഗോള മത്സരശേഷി വർദ്ധിപ്പിക്കുന്നതിനുമായി അടിസ്ഥാനതലത്തിൽ ഘടനാപരമായ പരിഷ്കാരങ്ങൾക്കും നിയന്ത്രണങ്ങൾ നീക്കുന്നതിനും ഊന്നൽ നൽകുന്നു.
6. ഭൗമരാഷ്ട്രീയ സംഘർഷങ്ങൾ, നിലവിലുള്ള സംഘട്ടനങ്ങൾ, ആഗോള വ്യാപാര നയ അപായസാധ്യതകൾ എന്നിവ ആഗോള സാമ്പത്തിക വീക്ഷണത്തിന് കാര്യമായ വെല്ലുവിളികൾ നിരന്തരം ഉയർത്തുകയാണ്.
7. ചില്ലറ വ്യാപാര പണപ്പെരുപ്പം 2024 സാമ്പത്തിക വർഷത്തിലെ 5.4 ശതമാനത്തിൽ നിന്ന് ഏപ്രിൽ-ഡിസംബർ മാസങ്ങളിൽ 4.9 ശതമാനമായി കുറഞ്ഞു.
8. പദ്ധതിവിഹിതച്ചെലവ് (CAPEX) 2021 സാമ്പത്തിക വർഷം മുതൽ 2024 സാമ്പത്തിക വർഷം വരെ തുടർച്ചയായി മെച്ചപ്പെട്ടു. പൊതുതെരഞ്ഞെടുപ്പിനുശേഷം, 2024 ജൂലൈ-നവംബർ കാലയളവിൽ CAPEX കഴിഞ്ഞ വർഷത്തെ അപേക്ഷിച്ച് 8.2 ശതമാനം വളർച്ച നേടി.
9. ആഗോള സേവന കയറ്റുമതിയിൽ ഇന്ത്യ ഏഴാമതാണ്. ഇത് ഈ മേഖലയിലെ ഇന്ത്യയുടെ ആഗോള മത്സരശേഷിക്ക് അടിവരയിടുന്നു.
10. 2024 ഏപ്രിൽ മുതൽ ഡിസംബർ വരെയുള്ള കാലയളവിൽ, പെട്രോളിയം ഇതര, രത്ന-ആഭരണ ഇതര കയറ്റുമതി 9.1 ശതമാനം വർധിച്ചു. ഇത് അസ്ഥിര ആഗോള സാഹചര്യങ്ങൾക്കിടയിലും ഇന്ത്യയുടെ വ്യാപാര കയറ്റുമതിയുടെ പുനരുജ്ജീവനത്തെ പ്രതിഫലിപ്പിക്കുന്നു.
ധന-സാമ്പത്തിക മേഖലയിലെ വികസനങ്ങൾ
1. വായ്പ വളർച്ച നിക്ഷേപ വളർച്ചയിലേക്ക് മാറിയതോടെ, ബാങ്ക് വായ്പ സ്ഥിരമായ നിരക്കിൽ വളർന്നു.
2. ഷെഡ്യൂൾഡ് വാണിജ്യ ബാങ്കുകളുടെ ലാഭക്ഷമത മെച്ചപ്പെട്ടു. ഇത് മൊത്ത നിഷ്ക്രിയ ആസ്തികളിലെ (GNPA) ഇടിവിലും മൂലധന-അപായസാധ്യതാ ആസ്തി അനുപാതത്തിലെ (CRAR) വർധനയിലും പ്രതിഫലിച്ചു.
3. തുടർച്ചയായ രണ്ട് വർഷത്തേക്ക് വായ്പ വളർച്ച നാമമാത്ര ജിഡിപി വളർച്ചയെ മറികടന്നു. ക്രെഡിറ്റ്-ജിഡിപി അന്തരം 2025 സാമ്പത്തിക വർഷത്തിലെ ആദ്യ പാദത്തിൽ (-) 0.3 ശതമാനമായി കുറഞ്ഞു. ഇത് 2023 സാമ്പത്തിക വർഷത്തിലെ ആദ്യ പാദത്തിലെ (-) 10.3 ശതമാനത്തിൽ നിന്ന് സുസ്ഥിരമായ ബാങ്ക് വായ്പ വളർച്ചയെ സൂചിപ്പിക്കുന്നു.
4. ആസ്തി ഗുണനിലവാരത്തിൽ ബാങ്കിംഗ് മേഖലയിലെ പുരോഗതി, ശക്തമായ മൂലധന ബഫറുകൾ, കരുത്തുറ്റ പ്രകടനം എന്നിവ വ്യക്തമാക്കുന്നു.
5. ഷെഡ്യൂൾഡ് വാണിജ്യ ബാങ്കുകളുടെ മൊത്ത നിഷ്ക്രിയ ആസ്തി (GNPA) 2024 സെപ്റ്റംബർ അവസാനത്തോടെ 12 വർഷത്തെ ഏറ്റവും താഴ്ന്ന നിരക്കായ 2.6 ശതമാനമായി കുറഞ്ഞു.
6. പാപ്പരത്ത നിയമപ്രകാരം, 2024 സെപ്റ്റംബർ വരെ 1,068 പദ്ധതികളുടെ പരിഹാരമായി ₹3.6 ലക്ഷം കോടി ലഭിച്ചു. കടംവീട്ടൽ മൂല്യവുമായി താരതമ്യപ്പെടുത്തുമ്പോൾ ഇത് 161 ശതമാനവും ഉൾപ്പെട്ട ആസ്തികളുടെ ന്യായവിലയുടെ 86.1 ശതമാനവുമാണ്.
7. തെരഞ്ഞെടുപ്പ് അടിസ്ഥാനമാക്കിയുള്ള വിപണിയിലെ അസ്ഥിരതാ വെല്ലുവിളികൾക്കിടയിലും ഇന്ത്യൻ ഓഹരി വിപണികൾ വളർന്നുവരുന്ന വിപണി എതിരാളികളേക്കാൾ മികച്ച പ്രകടനം കാഴ്ചവച്ചു.
8. പ്രാഥമിക വിപണികളിൽ (ഇക്വിറ്റി, കടം) നിന്നുള്ള മൊത്തം വിഭവ സമാഹരണം 2024 ഏപ്രിൽ മുതൽ ഡിസംബർ വരെ ₹11.1 ലക്ഷം കോടിയാണ്. ഇത് 2024 സാമ്പത്തിക വർഷത്തിൽ സമാഹരിച്ച തുകയേക്കാൾ അഞ്ച് ശതമാനം കൂടുതലാണ്.
9. 2024 ഡിസംബർ അവസാനത്തോടെ ബിഎസ്ഇ ഓഹരി വിപണി മൂലധനം ജിഡിപി അനുപാതം 136 ശതമാനമായിരുന്നു. ചൈന (65 ശതമാനം), ബ്രസീൽ (37 ശതമാനം) തുടങ്ങിയ മറ്റ് വളർന്നുവരുന്ന വിപണി സമ്പദ്‌വ്യവസ്ഥകളേക്കാൾ വളരെ കൂടുതലാണ് ഇത്.
10. ഇന്ത്യയുടെ ഇൻഷുറൻസ് വിപണി ഉയർച്ചയുടെ പാത തുടർന്നു. മൊത്തം ഇൻഷുറൻസ് പ്രീമിയങ്ങൾ 2024 സാമ്പത്തിക വർഷത്തിൽ 7.7 ശതമാനം വളർന്നു, ₹11.2 ലക്ഷം കോടിയിലെത്തി.
11. ഇന്ത്യയുടെ പെൻഷൻ മേഖല ഗണ്യമായ വളർച്ച കൈവരിച്ചു, 2024 സെപ്റ്റംബർ വരെ മൊത്തം പെൻഷൻ വരിക്കാരുടെ എണ്ണം 16 ശതമാനം (കഴിഞ്ഞ വർഷത്തെ അപേക്ഷിച്ച്) വർദ്ധിച്ചു.
ബാഹ്യ മേഖല: നേരിട്ടുള്ള വിദേശനിക്ഷേപം കൃത്യമാക്കൽ
1. ആഗോള അനിശ്ചിതത്വങ്ങൾക്കും പ്രതിസന്ധികൾക്കും ഇടയിൽ ഇന്ത്യയുടെ ബാഹ്യ മേഖല അതിജീവനശേഷി പ്രകടിപ്പിക്കുന്നത് തുടരുന്നു.
2. 2025 സാമ്പത്തിക വർഷത്തിലെ ആദ്യ ഒമ്പത് മാസങ്ങളിൽ മൊത്തത്തിലുള്ള കയറ്റുമതി (ചരക്ക് + സേവനങ്ങൾ) 6 ശതമാനം (കഴിഞ്ഞവർഷത്തെ അപേക്ഷിച്ച്) വളർച്ച നേടി. അതേ സമയം സേവന മേഖല 11.6 ശതമാനം വളർച്ച കൈവരിച്ചു.
3. 'ടെലികമ്മ്യൂണിക്കേഷൻസ്, കമ്പ്യൂട്ടർ, ഇൻഫർമേഷൻ സർവീസസ്' മേഖലകളിൽ ആഗോള കയറ്റുമതി വിപണിയുടെ 10.2 ശതമാനം ഇന്ത്യക്കാണ്. ഇതിൽ UNCTAD പ്രകാരം ലോകത്തിലെ രണ്ടാമത്തെ വലിയ കയറ്റുമതിക്കാരാണ് ഇന്ത്യ.
4. 2025 സാമ്പത്തിക വർഷത്തിന്റെ രണ്ടാം പാദത്തിൽ ഇന്ത്യയുടെ കറന്റ് അക്കൗണ്ട് കമ്മി (CAD) ജിഡിപിയുടെ 1.2 ശതമാനമായിരുന്നു, അറ്റസേവന രസീതുകളുടെ വർധനയും സ്വകാര്യ കൈമാറ്റ രസീതുകളിലെ വർധനയും ഇതിന് പിന്തുണയേകി.
5. 2025 സാമ്പത്തിക വർഷത്തിൽ മൊത്തം നേരിട്ടുള്ള വിദേശ നിക്ഷേപം(FDI) വലിയ തോതിൽ തിരിച്ചുവരവ് രേഖപ്പെടുത്തി. 2024 സാമ്പത്തിക വർഷത്തിലെ ആദ്യ എട്ട് മാസങ്ങളിൽ 47.2 ബില്യൺ യുഎസ് ഡോളറിൽ നിന്ന് 2025 സാമ്പത്തിക വർഷത്തിന്റെ അതേ കാലയളവിൽ 55.6 ബില്യൺ യുഎസ് ഡോളറായി വർദ്ധിച്ചു, ഇത് വാർഷികാടിസ്ഥാനത്തിൽ 17.9 ശതമാനം വളർച്ചയാണ്.
6. 2024 ഡിസംബർ അവസാനത്തോടെ ഇന്ത്യയുടെ ഫോറെക്സ് കരുതൽ ശേഖരം 640.3 ബില്യൺ യുഎസ് ഡോളറായിരുന്നു. ഇത് 10.9 മാസത്തെ ഇറക്കുമതിയും രാജ്യത്തിന്റെ വിദേശ കടത്തിന്റെ ഏകദേശം 90 ശതമാനവും നികത്താൻ പര്യാപ്തമാണ്.
7. കഴിഞ്ഞ കുറച്ച് വർഷങ്ങളായി ഇന്ത്യയുടെ വിദേശ കടം സ്ഥിരത പുലർത്തുന്നു. 2024 സെപ്റ്റംബർ അവസാനത്തോടെ ബാഹ്യ കടം-ജിഡിപി അനുപാതം 19.4 ശതമാനമായിരുന്നു.
വിലകളും പണപ്പെരുപ്പവും: ചലനാത്മകത തിരിച്ചറിയൽ
1. IMF പറയുന്നതനുസരിച്ച്, ആഗോള പണപ്പെരുപ്പ നിരക്ക് 2022 ലെ ഏറ്റവും ഉയർന്ന നിരക്കായ 8.7 ശതമാനത്തിൽ നിന്ന് 2024 ഓടെ 5.7 ശതമാനമായി കുറഞ്ഞു.
2. ഇന്ത്യയിലെ ചില്ലറ പണപ്പെരുപ്പം 2024 സാമ്പത്തിക വർഷത്തിലെ 5.4 ശതമാനത്തിൽ നിന്ന് 2025 സാമ്പത്തിക വർഷത്തിൽ (ഏപ്രിൽ-ഡിസംബർ 2024) 4.9 ശതമാനമായി കുറഞ്ഞു.
3. ഇന്ത്യയുടെ ഉപഭോക്തൃ വില പണപ്പെരുപ്പം 2026 സാമ്പത്തിക വർഷത്തിൽ 4 ശതമാനം എന്ന ലക്ഷ്യവുമായി ക്രമേണ പൊരുത്തപ്പെടുമെന്ന് റിസർവ് ബാങ്കും ഐഎംഎഫും പ്രവചിക്കുന്നു.
4. കാലാവസ്ഥാ വ്യതിയാനങ്ങളുടെ പ്രത്യാഘാതങ്ങൾ ലഘൂകരിക്കുന്നതിനും ദീർഘകാല വിലസ്ഥിരത കൈവരിക്കുന്നതിനും കാലാവസ്ഥാ വ്യതിയാനങ്ങളെ പ്രതിരോധിക്കുന്ന വിള ഇനങ്ങളുടെ വികസനവും മെച്ചപ്പെട്ട കാർഷിക രീതികളും അത്യാവശ്യമാണ്.
ഇടക്കാല കാഴ്ചപ്പാട്: നിയന്ത്രണങ്ങൾ നീക്കുന്നത് വളർച്ചയെ മുന്നോട്ടു നയിക്കുന്നു
1. അഭൂതപൂർവമായ സാമ്പത്തിക വെല്ലുവിളിയെയും അവസരത്തെയും പ്രതിനിധാനം ചെയ്യുന്ന മാറ്റത്തിന്റെ നടുവിലാണ് ഇന്ത്യൻ സമ്പദ്‌വ്യവസ്ഥ. ആഗോളവൽക്കരണത്തിനു ബദലാകുന്ന ഭൗമ സാമ്പത്തിക വിഘടനം (GEF) ആസന്നമായ സാമ്പത്തിക യാഥാർഥ്യങ്ങളിലേക്കും പുനഃക്രമീകരണങ്ങളിലേക്കും നയിക്കുന്നു.
2. 2047 ഓടെ വികസിത ഭാരതമെന്ന കാഴ്ചപ്പാടു സാക്ഷാത്കരിക്കുന്നതിന്, ഒന്നോ രണ്ടോ ദശാബ്ദക്കാലം ഇന്ത്യ സ്ഥിരമായ വിലയിൽ ശരാശരി 8 ശതമാനം വളർച്ചനിരക്ക് കൈവരിക്കേണ്ടതുണ്ട്.
3. ഇന്ത്യയുടെ ഇടക്കാല വളർച്ചാ കാഴ്ചപ്പാട് പുതിയ ആഗോള യാഥാർഥ്യങ്ങളായ GEF, ചൈനയുടെ ഉൽപ്പാദന വൈദഗ്ധ്യം, ഊർജ പരിവർത്തനത്തിനുള്ള ശ്രമങ്ങൾക്ക് ചൈനയെ ആശ്രയിക്കൽ എന്നിവ പരിഗണിക്കണം.
4. ആഭ്യന്തര വളർച്ച പുനരുജ്ജീവിപ്പിക്കുന്നതിനും നിയമാനുസൃതമായ സാമ്പത്തിക പ്രവർത്തനങ്ങൾ എളുപ്പത്തിൽ പിന്തുടരാൻ വ്യക്തികളെയും സംഘടനകളെയും ശാക്തീകരിക്കുന്നതിനും ഇന്ത്യ വ്യവസ്ഥാപിത നിയന്ത്രണങ്ങൾ ഒഴിവാക്കുന്നതിൽ ശ്രദ്ധ കേന്ദ്രീകരിക്കണം.
5. വ്യക്തികൾക്കും ചെറുകിട വ്യവസായങ്ങൾക്കും വ്യവസ്ഥാപിത നിയന്ത്രണങ്ങൾ ഒഴിവാക്കുകയോ സാമ്പത്തിക സ്വാതന്ത്ര്യം വർധിപ്പിക്കുകയോ ചെയ്യുന്നത് ഇന്ത്യയുടെ ഇടത്തരം വളർച്ചാ സാധ്യതകളെ ശക്തിപ്പെടുത്തുന്നതിനുള്ള ഏറ്റവും പ്രധാനപ്പെട്ട നയപരമായ മുൻഗണനയാണെന്ന് പറയാനാകും.
6. വ്യവസായ നടത്തിപ്പു സുഗമമാക്കൽ 2.0 പ്രകാരം വ്യവസ്ഥാപിതമായ നിയന്ത്രണങ്ങൾ ഒഴിവാക്കുന്നതിലും ഇന്ത്യയുടെ ചെറുകിട ഇടത്തരം സംരംഭ മേഖലയെ (SME) പിന്തുണയ്ക്കുന്ന പ്രായോഗിക മിറ്റൽസ്റ്റാൻഡ് സൃഷ്ടിക്കുന്നതിലുമാണ് ഇനി പരിഷ്കാരങ്ങളുടെയും സാമ്പത്തിക നയങ്ങളുടെയും ശ്രദ്ധ കേന്ദ്രീകരിക്കേണ്ടത്.
7. അടുത്ത ഘട്ടത്തിൽ, മാനദണ്ഡങ്ങളും നിയന്ത്രണങ്ങളും ഉദാരവൽക്കരിക്കുന്നതിലും, നടപ്പിലാക്കുന്നതിനുള്ള നിയമപരമായ സുരക്ഷാ സംവിധാനങ്ങൾ സ്ഥാപിക്കുന്നതിലും, താരിഫുകളും നിരക്കുകളും കുറയ്ക്കുന്നതിലും, അപകടസാധ്യത അടിസ്ഥാനമാക്കിയുള്ള നിയന്ത്രണം പ്രയോഗിക്കുന്നതിലും സംസ്ഥാനങ്ങൾ പ്രവർത്തിക്കണം.
നിക്ഷേപവും അടിസ്ഥാന സൗകര്യവികസനവും: മുന്നേറ്റം തുടരുന്നു
1. അടിസ്ഥാന സൗകര്യവികസനമേഖലയിലെ ധനവിനിയോഗം മെച്ചപ്പെടുത്തുന്നതിലും, പദ്ധതികൾക്കുള്ള അംഗീകാരവും വിഭവ സമാഹരണവും വേഗത്തിലാക്കുന്നതിലുമായിരുന്നു കഴിഞ്ഞ അഞ്ച് വർഷവും സർക്കാർ ശ്രദ്ധ കേന്ദ്രീകരിച്ചത്.
2. സുപ്രധാന അടിസ്ഥാന സൗകര്യങ്ങൾ വികസിപ്പിക്കുന്നതിൽ കേന്ദ്ര സർക്കാരിന്റെ മൂലധന ചെലവ് 2020 സാമ്പത്തിക വർഷം മുതൽ 2024 സാമ്പത്തിക വർഷം വരെ 38.8 ശതമാനം നിരക്കിൽ വളർച്ച രേഖപ്പെടുത്തി.
3. റെയിൽ കണക്റ്റിവിറ്റി മെച്ചപ്പെടുത്തുന്നതിന്റെ ഭാഗമായി, 2024 ഏപ്രിൽ മുതൽ നവംബർ വരെയുള്ള കാലയളവിൽ 2031 കിലോമീറ്റർ റെയിൽവേ ശൃംഖല കമ്മീഷൻ ചെയ്തു. 2024 ഏപ്രിൽ മുതൽ ഒക്ടോബർ വരെ 17 ജോഡി പുതിയ വന്ദേ ഭാരത് ട്രെയിനുകൾ സർവീസ് ആരംഭിച്ചു.
4. റോഡ് ശൃംഖല മെച്ചപ്പെടുത്തുന്നതിന്റെ ഭാഗമായി, 2025 സാമ്പത്തിക വർഷം (ഏപ്രിൽ-ഡിസംബർ) 5853 കിലോമീറ്റർ ദേശീയ പാതകൾ നിർമ്മിച്ചു.
5. ദേശീയ വ്യാവസായിക ഇടനാഴി വികസന പദ്ധതിയുടെ കീഴിൽ, വിവിധ വ്യാവസായിക മേഖലകളുടെ ഉപയോഗത്തിനായി 3788 ഏക്കർ വിസ്തൃതിയുള്ള 383 പ്ലോട്ടുകൾ ഒന്നാം ഘട്ടത്തിൽ അനുവദിച്ചു.
6. പ്രധാന തുറമുഖങ്ങളിൽ, കണ്ടെയ്നർ കൈകാര്യം ചെയ്യുന്നതിനുള്ള ശരാശരി സമയം 2024 സാമ്പത്തിക വർഷത്തിൽ 48.1 മണിക്കൂറായിരുന്നത് 2025 സാമ്പത്തിക വർഷത്തിൽ (ഏപ്രിൽ-നവംബർ) 30.4 മണിക്കൂറായി കുറയ്ക്കാനായതിലൂടെ പ്രവർത്തനക്ഷമത മെച്ചപ്പെടുത്തി. തുറമുഖ കണക്റ്റിവിറ്റിയിലും ഗണ്യമായി പുരോഗതി.
7. 2024 ഡിസംബർ വരെയുള്ള കാലയളവിൽ സൗരോർജ്ജം, കാറ്റിൽ നിന്നുള്ള വൈദ്യുതി എന്നിവയുൾപ്പെടെ പുനരുപയോഗ ഊർജ്ജ ശേഷിയിൽ പ്രതിവർഷം 15.8 ശതമാനം വർദ്ധനവ് രേഖപ്പെടുത്തി.
8. ഇന്ത്യയുടെ മൊത്തം സ്ഥാപിത ശേഷിയിൽ പുനരുപയോഗ ഊർജ്ജത്തിന്റെ പങ്ക് ഇപ്പോൾ 47 ശതമാനമാണ്.
9. DDUGJY, SAUBHAGYA തുടങ്ങിയ സർക്കാർ പദ്ധതികൾ ഗ്രാമപ്രദേശങ്ങളിൽ വൈദ്യുതി ലഭ്യത മെച്ചപ്പെടുത്തി. 18,374 ഗ്രാമങ്ങൾ വൈദ്യുതീകരിച്ചു, 2.9 കോടി വീടുകളിൽ വൈദ്യുതി എത്തിച്ചു.
10. 2024 ഒക്ടോബറോടെ എല്ലാ സംസ്ഥാനങ്ങളിലും കേന്ദ്രഭരണ പ്രദേശങ്ങളിലും 5G സേവനങ്ങൾ ആരംഭിച്ചതോടെ സർക്കാരിന്റെ ഡിജിറ്റൽ കണക്റ്റിവിറ്റി സംരംഭങ്ങൾക്ക് വലിയ പ്രചാരം ലഭിച്ചു.
11. യൂണിവേഴ്സൽ സർവീസ് ഒബ്ലിഗേഷൻ ഫണ്ടിന്റെ (ഇപ്പോൾ ഡിജിറ്റൽ ഭാരത് നിധി) കീഴിൽ രാജ്യത്തിൻറെ വിദൂര പ്രദേശങ്ങളിൽ 4G മൊബൈൽ സേവനങ്ങൾ ലഭ്യമാക്കാനുള്ള ശ്രമങ്ങളിൽ ഗണ്യമായ പുരോഗതി. 2024 ഡിസംബറോടെ 10,700-ലധികം ഗ്രാമങ്ങളിൽ 4G മൊബൈൽ സേവനങ്ങൾ എത്തിച്ചു.
12. ജൽ ജീവൻ ദൗത്യത്തിനു കീഴിൽ, 12 കോടിയിലധികം കുടുംബങ്ങൾക്ക് ഇതുവരെ പൈപ്പിലൂടെ കുടിവെള്ളം ലഭ്യമാക്കി.
13. സ്വച്ഛ് ഭാരത് ദൗത്യം -ഗ്രാമീൺ, രണ്ടാം ഘട്ടത്തിനു കീഴിൽ, 2024 ഏപ്രിൽ മുതൽ നവംബർ വരെയുള്ള കാലയളവിൽ, 1.92 ലക്ഷം ഗ്രാമങ്ങളെ മാതൃകാ വിഭാഗത്തിൽ ODF പ്ലസ് ആയി പ്രഖ്യാപിച്ചു. ഇതോടെ ആകെ ODF പ്ലസ് ഗ്രാമങ്ങളുടെ എണ്ണം 3.64 ലക്ഷമായി.
14. നഗരപ്രദേശങ്ങളിൽ, പ്രധാനമന്ത്രി ആവാസ് യോജനയിലുൾപ്പെടുത്തി 89 ലക്ഷത്തിലധികം വീടുകളുടെ നിർമ്മാണം പൂർത്തിയാക്കി.
15. നഗര ഗതാഗത ശൃംഖല അതിവേഗം വികസിച്ചുകൊണ്ടിരിക്കുന്നു. 29 നഗരങ്ങളിൽ മെട്രോ, റാപ്പിഡ് റെയിൽ സംവിധാനങ്ങൾ പ്രവർത്തനക്ഷമമോ നിർമ്മാണത്തിന്റെ വിവിധ ഘട്ടങ്ങളിലോ ആണ്. മെട്രോ ശൃംഖലയുടെ വ്യാപനം 1,000 കിലോമീറ്റർ കടന്നു.
16. റിയൽ എസ്റ്റേറ്റ് (നിയന്ത്രണവും വികസനവും) നിയമത്തിലൂടെ മേഖലയുടെ നിയന്ത്രണവും സുതാര്യതയും ഉറപ്പാക്കി. 2025 ജനുവരിയോടെ. 1.38 ലക്ഷത്തിലധികം റിയൽ എസ്റ്റേറ്റ് പദ്ധതികൾ രജിസ്റ്റർ ചെയ്തു. 1.38 ലക്ഷം പരാതികൾ പരിഹരിച്ചു.
17. നിലവിൽ ഇന്ത്യയുടെ 56 ബഹിരാകാശ ആസ്തികൾ സജ്ജീവവും പ്രവർത്തനക്ഷമവുമാണ്. സർക്കാർ വിഭാവനം ചെയ്യുന്ന സ്‌പേസ് വിഷൻ 2047-ൽ ഗഗൻയാൻ ദൗത്യം, ചന്ദ്രയാൻ-4 ലൂണാർ സാമ്പിൾ റിട്ടേൺ മിഷൻ തുടങ്ങിയ അഭിമാന പദ്ധതികൾ ഉൾപ്പെടുന്നു.
18. അടിസ്ഥാന സൗകര്യമേഖലയിലെ വർധിച്ചു വരുന്ന ആവശ്യകതകൾ പൊതുമേഖലാ നിക്ഷേപത്തിലൂടെ മാത്രം നിറവേറ്റാൻ സാധ്യമല്ല. ഈ പരിമിതി മറികടക്കുന്നതിൽ സ്വകാര്യ മേഖലയുടെ പങ്കാളിത്തം നിർണായകമായിരിക്കും.
19. അടിസ്ഥാന സൗകര്യങ്ങളിൽ സ്വകാര്യ മേഖലയുടെ പങ്കാളിത്തം സുഗമമാക്കുന്നതിന് ദേശീയ അടിസ്ഥാന സൗകര്യ പൈപ്പ്‌ലൈൻ, ദേശീയ ധനസമ്പാദന പൈപ്പ്‌ലൈൻ തുടങ്ങിയ സംരംഭങ്ങൾക്ക് സർക്കാർ തുടക്കം കുറിച്ചിട്ടുണ്ട്.
വ്യവസായം: ബിസിനസ് മേഖലയിലെ സമഗ്ര പരിഷ്കാരങ്ങൾ
1. വൈദ്യുതി, നിർമ്മാണ മേഖലകളിലെ ശക്തമായ മുന്നേറ്റം കാരണം, 2025 സാമ്പത്തിക വർഷത്തിൽ വ്യാവസായിക മേഖല 6.2 ശതമാനം വളർച്ച കൈവരിക്കുമെന്ന് പ്രതീക്ഷിക്കുന്നു (അടങ്കൽ മതിപ്പ് കണക്കുകൾ).
2. സമർത്ഥ് ഉദ്യോഗ് കേന്ദ്രങ്ങൾ, സ്മാർട്ട് മാനുഫാക്ചറിംഗ് ആൻഡ് ഇൻഡസ്ട്രി 4.0 എന്നിവ സ്ഥാപിക്കുന്നതിന് സർക്കാർ സജീവ പ്രോത്സാഹനം നൽകുന്നു.
3. 2024 സാമ്പത്തിക വർഷത്തിൽ, ഓട്ടോമൊബൈൽ മേഖലയിലെ ആഭ്യന്തര വിൽപ്പന 12.5 ശതമാനം വർദ്ധിച്ചു.
4. ഇലക്ട്രോണിക് ഉത്പന്നങ്ങളുടെ ആഭ്യന്തര ഉത്പാദനം 2015 സാമ്പത്തിക വർഷം മുതൽ 2024 സാമ്പത്തിക വർഷം വരെ 17.5 ശതമാനം വാർഷിക വളർച്ച രേഖപ്പെടുത്തി.
5. 99 ശതമാനം സ്മാർട്ട്‌ഫോണുകളും ഇപ്പോൾ ആഭ്യന്തരമായി നിർമ്മിക്കപ്പെടുന്നു. ഇത് ഇന്ത്യയുടെ ഇറക്കുമതി ആശ്രിതത്വം ഗണ്യമായി കുറയ്ക്കുന്നു.
6. 2024 സാമ്പത്തിക വർഷത്തിൽ ഫാർമസ്യൂട്ടിക്കൽ മേഖലയുടെ മൊത്തം വാർഷിക വിറ്റുവരവ് ₹4.17 ലക്ഷം കോടിയായിരുന്നു. കഴിഞ്ഞ അഞ്ച് വർഷവും ശരാശരി 10.1 ശതമാനം വളർച്ച കൈവരിച്ചു.
7. WIPO റിപ്പോർട്ട് 2022 പ്രകാരം, പേറ്റന്റ് ഫയലിംഗിൽ ആഗോളതലത്തിൽ മികച്ച 10 രാജ്യങ്ങളിൽ ഇന്ത്യ ആറാം സ്ഥാനത്താണ്.
8. ഇന്ത്യൻ സമ്പദ്‌വ്യവസ്ഥയുടെ ഊർജ്ജസ്വലമായ മേഖലകളിലൊന്നായി സൂക്ഷ്മ, ചെറുകിട, ഇടത്തരം സംരംഭ (MSME) മേഖല ഉയർന്നു വന്നു.
9. വികസന സാധ്യതയുള്ള സൂക്ഷ്മ, ചെറുകിട, ഇടത്തരം സംരംഭങ്ങൾക്ക് ഓഹരി ധനസഹായം ഉറപ്പാക്കുന്നതിനായി, 50,000 കോടി രൂപ മൂലധനത്തോടെ സ്വാശ്രയ ഇന്ത്യ ഫണ്ട് സർക്കാർ രൂപീകരിച്ചു.
10. രാജ്യത്തുടനീളം ക്ലസ്റ്ററുകൾ വികസിപ്പിക്കുന്നതിനായി സൂക്ഷ്മ, ചെറുകിട സംരംഭ -ക്ലസ്റ്റർ വികസന പദ്ധതി സർക്കാർ നടപ്പിലാക്കി വരുന്നു
പഴയ പടക്കുതിരയ്ക്ക് പുതിയ വെല്ലുവിളികൾ
1. മൊത്തം GVA യിൽ സേവന മേഖലയുടെ സംഭാവന 2014 സാമ്പത്തിക വർഷത്തിലെ 50.6 ശതമാനത്തിൽ നിന്ന് 2025 സാമ്പത്തിക വർഷത്തിൽ 55.3 ശതമാനമായി ഉയർന്നു (അടങ്കൽ മതിപ്പ് കണക്കുകൾ).
2. മഹാമാരിയ്ക്ക് മുമ്പുള്ള വർഷങ്ങളിൽ (FY13 - FY20) സേവന മേഖലയുടെ ശരാശരി വളർച്ചാ നിരക്ക് 8 ശതമാനമായിരുന്നു. മഹാമാരിയ്ക്ക് ശേഷമുള്ള കാലയളവിൽ (FY23–FY25) ഇത് 8.3 ശതമാനമായി ഉയർന്നു.
3. 2023 ൽ ആഗോള സേവന കയറ്റുമതിയിൽ ഇന്ത്യ 4.3 ശതമാനം വിഹിതം നേടി. ആഗോളതലത്തിൽ ഏഴാം സ്ഥാനത്തെത്തി.
4. ഇന്ത്യയുടെ സേവന കയറ്റുമതി വളർച്ച 2025 ഏപ്രിൽ മുതൽ നവംബർ വരെയുള്ള കാലയളവിൽ 12.8 ശതമാനമായി ഉയർന്നു. 2024 സാമ്പത്തിക വർഷത്തിലെ 5.7 ശതമാനത്തിൽ നിന്ന് കാര്യമായ വളർച്ച രേഖപ്പെടുത്തി.
5. കഴിഞ്ഞ ദശകത്തിൽ (2013 സാമ്പത്തിക വർഷം മുതൽ 2023 സാമ്പത്തിക വർഷം വരെ) വിവരവിനിമയ, കമ്പ്യൂട്ടർ അധിഷ്ഠിത സേവനങ്ങൾ 12.8 ശതമാനം നിരക്കിൽ വളർന്നു. മൊത്തത്തിലുള്ള GVA വിഹിതത്തിന്റെ 6.3 ശതമാനത്തിൽ നിന്ന് 10.9 ശതമാനമായി വർദ്ധിച്ചു.
6. ഇന്ത്യൻ റെയിൽവേ 2024 സാമ്പത്തിക വർഷത്തിൽ യാത്രക്കാരുടെ എണ്ണത്തിൽ 8 ശതമാനം വളർച്ച രേഖപ്പെടുത്തി. 2024 സാമ്പത്തിക വർഷത്തിൽ ചരക്ക് വരുമാനം 5.2 ശതമാനം വളർച്ച രേഖപ്പെടുത്തി.
7. വിനോദസഞ്ചാര മേഖലയുടെ സംഭാവന 2023 സാമ്പത്തിക വർഷം GDP യുടെ 5 ശതമാനത്തിലെത്തി. മഹാമാരിയ്ക്ക് മുമ്പുള്ള വളർച്ചാ നിരക്കിലേക്ക് വിനോദസഞ്ചാര മേഖല തിരികയെത്തി.
അധ്യായം-9 കൃഷിയും ഭക്ഷ്യ മാനേജ്മെന്റും: ഭാവിയുടെ മേഖലകൾ
1. നിലവിലെ മൂല്യത്തിൽ കണക്കാക്കിയാൽ, 2024 സാമ്പത്തിക വർഷം (PE) രാജ്യത്തിന്റെ ജിഡിപിയുടെ ഏകദേശം 16 ശതമാനം സംഭാവന ചെയ്യുന്നത് ‘കൃഷിയും അനുബന്ധ പ്രവർത്തനങ്ങളും’ അടങ്ങിയ മേഖലയാണ്.
2. ഹോർട്ടികൾച്ചർ, കന്നുകാലി വികസനം, മത്സ്യബന്ധനം തുടങ്ങിയ ഉന്നത മൂല്യമുള്ള മേഖലകൾ കാർഷികമേഖലയുടെ സമഗ്ര വളർച്ചയുടെ പ്രധാന ചാലകശക്തികളായി മാറിയിരിക്കുന്നു.
3. 2024 ലെ ഖാരിഫ് ഭക്ഷ്യധാന്യ ഉത്പാദനം 1647.05 ലക്ഷം മെട്രിക് ടണ്ണിൽ (LMT) എത്തുമെന്ന് പ്രതീക്ഷിക്കുന്നു. മുൻ വർഷത്തേക്കാൾ 89.37 LMT വർദ്ധന.
4. 2024-25 സാമ്പത്തിക വർഷത്തിൽ, തുവര പരിപ്പിനും ബജ്‌റയ്ക്കും നിലവിലുള്ള കുറഞ്ഞ താങ്ങുവില യഥാക്രമം, ഉത്പാദന ചെലവിനേക്കാൾ ശരാശരി 59 ശതമാനവും 77 ശതമാനവും വർദ്ധിപ്പിച്ചു.
5. മത്സ്യബന്ധന മേഖല 8.7 ശതമാനമെന്ന ഏറ്റവും ഉയർന്ന സംയുക്ത വാർഷിക വളർച്ചാ നിരക്ക് (CAGR) രേഖപ്പെടുത്തി. 8 ശതമാനം CAGR മായി കന്നുകാലിവികസന മേഖല തൊട്ടു പിന്നിൽ.
6. 2013 ലെ ദേശീയ ഭക്ഷ്യസുരക്ഷാ നിയമവും (NFSA) പ്രധാനമന്ത്രി ഗരീബ് കല്യാൺ അന്ന യോജനയും (PMGKAY) ഭക്ഷ്യസുരക്ഷയോടുള്ള സമീപനത്തിൽ അടിസ്ഥാനപരമായ പരിവർത്തനം സാധ്യമാക്കി.
7. PMGKAY പ്രകാരം അഞ്ച് വർഷത്തേക്ക് കൂടി സൗജന്യ ഭക്ഷ്യധാന്യങ്ങൾ നൽകാനുള്ള തീരുമാനം, ഭക്ഷ്യ-പോഷകാഹാര സുരക്ഷയോടുള്ള സർക്കാരിന്റെ ദീർഘകാല പ്രതിബദ്ധതയാണ് പ്രതിഫലിപ്പിക്കുന്നത്.
8. ഒക്ടോബർ 31 വരെ, PM-KISAN യോജനയുടെ കീഴിൽ 11 കോടിയിലധികം കർഷകർക്ക് പ്രയോജനം ലഭിച്ചു, 23.61 ലക്ഷം കർഷകർ PM കിസാൻ മാന്ധാനിൽ ചേർന്നിട്ടുണ്ട്.
കാലാവസ്ഥയും പരിസ്ഥിതിയും: ഇണങ്ങിച്ചേരൽ പ്രധാനം
1. 2047 ഓടെ വികസിത രാഷ്ട്ര പദവി കൈവരിക്കാനുള്ള ഇന്ത്യയുടെ അഭിലാഷം അടിസ്ഥാനപരമായി സമഗ്രവും സുസ്ഥിരവുമായ വികസനം എന്ന ദർശനത്തിൽ അടിയുറച്ചതാണ്.
2. ഫോസിൽ ഇതര ഇന്ധന സ്രോതസ്സുകളിൽ നിന്ന് 2,13,701 മെഗാവാട്ട് വൈദ്യുതി ഉത്പാദന ശേഷി ഇന്ത്യ കൈവരിച്ചിട്ടുണ്ട്. 2024 നവംബർ 30 ലെ കണക്കനുസരിച്ച് മൊത്തം സ്ഥാപിത ശേഷിയുടെ 46.8 ശതമാനമാണിത്.
3. 2024 ലെ ഫോറസ്റ്റ് സർവേ ഓഫ് ഇന്ത്യ പ്രകാരം 2005 നും 2024 നും ഇടയിൽ 2.29 ബില്യൺ ടൺ CO2 ന് തുല്യമായ അധിക കാർബൺ സിങ്ക് സൃഷ്ടിക്കപ്പെട്ടു.
4. ഇന്ത്യയുടെ നേതൃത്വത്തിലുള്ള ആഗോള സംരംഭമായ ലൈഫ്‌സ്റ്റൈൽ ഫോർ എൻവയോൺമെന്റ് (LiFE), രാജ്യത്തിന്റെ സുസ്ഥിരതാ ദൗത്യങ്ങൾ മെച്ചപ്പെടുത്താൻ ലക്ഷ്യമിടുന്നു.
5. 2030 ആകുമ്പോഴേക്കും, ഉപഭോഗം കുറയ്ക്കുന്നതിലൂടെയും വില കുറയ്ക്കുന്നതിലൂടെയും LiFE മുഖാന്തിരം ആഗോളതലത്തിൽ ഉപഭോക്താക്കൾക്ക് ഏകദേശം 440 ബില്യൺ യുഎസ് ഡോളർ ലാഭിക്കാൻ കഴിയുമെന്ന് കണക്കാക്കപ്പെടുന്നു.
സാമൂഹിക മേഖല - വിപുലീകരണവും ശാക്തീകരണവും
1. സർക്കാരിന്റെ സാമൂഹിക സേവന ചെലവ് (കേന്ദ്ര-സംസ്ഥാന സർക്കാരുകൾ സംയുക്തമായി) 2021 സാമ്പത്തിക വർഷം മുതൽ 2025 സാമ്പത്തിക വർഷം വരെ 15 ശതമാനം സംയുക്ത വാർഷിക വളർച്ചാ നിരക്ക് കൈവരിച്ചു.
2. ഉപഭോഗ ചെലവിലെ അസമത്വത്തിന്റെ അളവുകോലായ ഗിനി കോയെഫിഷ്യന്റ് കുറയുന്നു. ഗ്രാമപ്രദേശങ്ങളിൽ ഇത് 2022-23 ലെ 0.266 ൽ നിന്ന് 2023-24 ൽ 0.237 ആയി കുറഞ്ഞു. നഗരപ്രദേശങ്ങളിൽ ഇത് 2022-23 ലെ 0.314 ൽ നിന്ന് 2023-24 ൽ 0.284 ആയി കുറഞ്ഞു.
3. സർക്കാരിന്റെ വിവിധ ധനനയങ്ങൾ വരുമാന വിതരണ പുനർനിർമ്മിതിയെ സഹായിക്കുന്നു.
4. ആരോഗ്യമേഖലയിലെ സർക്കാരിന്റെ ചെലവ് 29.0 ശതമാനത്തിൽ നിന്ന് 48.0 ശതമാനമായി വർദ്ധിച്ചു; മൊത്തം അപ്രതീക്ഷിതമായ ആരോഗ്യ ചെലവിന്റെ വിഹിതം 62.6 ശതമാനത്തിൽ നിന്ന് 39.4 ശതമാനമായി കുറയുന്നു. ഇത് കുടുംബങ്ങൾ അനുഭവിക്കുന്ന സാമ്പത്തിക പരാധീനതകൾ കുറയ്ക്കുന്നു.
5. ചെലവ് ഗണ്യമായി കുറയ്ക്കുന്നതിൽ ആയുഷ്മാൻ ഭാരത് പ്രധാൻ മന്ത്രി ജൻ ആരോഗ്യ യോജന (AB PM-JAY) നിർണായക പങ്ക് വഹിച്ചു. ₹1.25 ലക്ഷം കോടിയിലധികം രൂപ ലാഭിക്കാനായി.
6. ഗ്രാമപഞ്ചായത്ത് ബജറ്റുകൾ സുസ്ഥിര വികസന (SDG) ലക്ഷ്യങ്ങളുമായി പൊരുത്തപ്പെടുന്നുണ്ടെന്ന് ഉറപ്പാക്കാൻ ―സുസ്ഥിര വികസന ലക്ഷ്യങ്ങളുടെ പ്രാദേശികവത്ക്കരണം (SDGs) എന്ന നയം സ്വീകരിച്ചു.
തൊഴിൽ, നൈപുണ്യ വികസനം: അസ്തിത്വപരമായ മുൻഗണനകൾ
1. ഇന്ത്യൻ തൊഴിൽ വിപണി സൂചകങ്ങൾ മെച്ചപ്പെട്ടു. തൊഴിലില്ലായ്മ നിരക്ക് 2017-18 (ജൂലൈ-ജൂൺ) ലെ 6.0 ശതമാനത്തിൽ നിന്ന് 2023-24 (ജൂലൈ-ജൂൺ) ൽ 3.2 ശതമാനമായി കുറഞ്ഞു.
2. ജനസംഖ്യയുടെ ഏകദേശം 26 ശതമാനവും 10-24 വയസ്സിനിടയിൽ പ്രായമുള്ളവരാകയാൽ, ആഗോളതലത്തിൽ ശരാശരി പ്രായം ഏറ്റവും കുറഞ്ഞ രാജ്യങ്ങളിലൊന്നായ ഇന്ത്യ സവിശേഷമായ ജനസംഖ്യാ സാധ്യതകളുടെ പാരമ്യത്തിലാണ്.
3. വനിതാ സംരംഭകത്വത്തിന് പ്രോത്സാഹനം നൽകുന്നതിനായി, വായ്പകളിലേക്കുള്ള സുഗമമായ പ്രവേശനം, വിപണി പിന്തുണ, നൈപുണ്യ വികസനം, വനിതാ സ്റ്റാർട്ടപ്പുകൾക്കുള്ള പിന്തുണ തുടങ്ങി ഒട്ടേറെ സംരംഭങ്ങൾ സർക്കാർ ആരംഭിച്ചിട്ടുണ്ട്.
4. വളർന്നുവരുന്ന ഡിജിറ്റൽ സമ്പദ്‌വ്യവസ്ഥയും പുനരുപയോഗ ഊർജ്ജ മേഖലയും വികസിത ഭാരതത്തിന്റെ ദർശനം കൈവരിക്കുന്നതിന് അനിവാര്യമായ തൊഴിൽ സൃഷ്ടിയ്ക്ക് മെച്ചപ്പെട്ട അവസരങ്ങൾ ഒരുക്കുന്നു.
5. ഓട്ടോമേഷൻ, ജനറേറ്റീവ് എഐ, ഡിജിറ്റലൈസേഷൻ, കാലാവസ്ഥാ വ്യതിയാനത്തിന്റെ പ്രത്യാഘാതങ്ങൾ തുടങ്ങിയ ഉയർന്നുവരുന്ന ആഗോള പ്രവണതകൾക്ക് അനുസൃതമായി പ്രവർത്തിക്കാൻ സർക്കാർ ഉല്പതിഷ്ണുത്വവും പ്രതികരണസജ്ജവും വൈദഗ്ധ്യ പൂർണ്ണവുമായ ആവാസവ്യവസ്ഥ സൃഷ്ടിക്കുന്നു.
6. തൊഴിലവസരങ്ങൾ വർദ്ധിപ്പിക്കുന്നതിനും സ്വയം തൊഴിൽ പ്രോത്സാഹിപ്പിക്കുന്നതിനും തൊഴിലാളി ക്ഷേമം മെച്ചപ്പെടുത്തുന്നതിനുമുള്ള നടപടികൾ സർക്കാർ നടപ്പിലാക്കി വരുന്നു.
7. അടുത്തിടെ ആരംഭിച്ച പിഎം-ഇന്റേൺഷിപ്പ് പദ്ധതി തൊഴിൽ സൃഷ്ടിക്കുന്നതിനുള്ള പരിവർത്തനാത്മക സംരംഭമായി ഉയർന്നുവരുന്നു.
8. EPFO യുടെ കണക്കുകൾ പ്രകാരം കഴിഞ്ഞ ആറ് വർഷത്തിനിടെ മൊത്തം ശമ്പള വർദ്ധനവ് ഇരട്ടിയിലധികമായി. ഇത് ഔപചാരിക തൊഴിൽ മേഖലയുടെ ആരോഗ്യകരമായ വളർച്ചയെ സൂചിപ്പിക്കുന്നു.-
AI കാലഘട്ടത്തിലെ തൊഴിൽ: പ്രതിസന്ധിയോ അവസരമോ ?
1. സാമ്പത്തികമായി മൂല്യവത്തായ ജോലികളിൽ ഭൂരിഭാഗവും ഓട്ടോമേറ്റഡ് ആയ ഒരു പുതിയ യുഗത്തിന് തുടക്കമിടുമെന്ന് നിർമ്മിത ബുദ്ധി (AI) വികസിപ്പിച്ചെടുത്തവർ വാഗ്ദാനം ചെയ്യുന്നു.
2. ആരോഗ്യ സംരക്ഷണം, ഗവേഷണം, ക്രിമിനൽ നീതി, വിദ്യാഭ്യാസം, ബിസിനസ്സ്, സാമ്പത്തിക സേവനങ്ങൾ എന്നിവയുൾപ്പെടെ വിവിധ മേഖലകളിലെ നിർണായകമായ തീരുമാനമെടുക്കൽ പ്രക്രിയകളിൽ AI മനുഷ്യനെ മറികടക്കുമെന്ന് പ്രതീക്ഷിക്കുന്നു.
3. AI യെ സ്വീകരിക്കുന്നതിൽ വിശ്വാസ്യത, വിഭവ കാര്യക്ഷമതയില്ലായ്മ, അടിസ്ഥാന സൗകര്യങ്ങളുടെ കുറവ് എന്നിവയുൾപ്പെടെ ആശങ്കകളും വലിയ തോതിലുള്ള തടസ്സങ്ങളും വർത്തമാനകാലത്ത് നിലനിൽക്കുന്നു. AI-യുടെ പരീക്ഷണാത്മക സ്വഭാവത്തോടൊപ്പം ഈ വെല്ലുവിളികളും നയരൂപകർത്താക്കൾക്ക് സാധ്യതകളുടെ ജാലകം തുറക്കുന്നു.
4. ഭാഗ്യവശാൽ, AI നിലവിൽ ശൈശവാവസ്ഥയിലായതിനാൽ, ഇന്ത്യയ്ക്ക് സ്വന്തം അടിത്തറ ശക്തിപ്പെടുത്തുന്നതിനും രാജ്യവ്യാപകമായ സ്ഥാപന സംവിധാനം കെട്ടിപ്പടുക്കുന്നതിനും ആവശ്യമായ സമയം ലഭിക്കും.
5. യുവ, ചലനാത്മക, സാങ്കേതിക വിദഗ്ദ്ധ ജനസമൂഹത്തെ ഉപയോഗപ്പെടുത്തിക്കൊണ്ട്, തങ്ങളുടെ ജോലിയും ഉത്പാദനക്ഷമതയും വർദ്ധിപ്പിക്കുന്നതിന് AI-യെ ഉപയോഗിക്കാൻ കഴിയുന്ന തൊഴിൽ ശക്തി സൃഷ്ടിക്കാൻ ഇന്ത്യയ്ക്ക് ശേഷിയുണ്ട്.
6. 'ഓഗ്മെന്റഡ് ഇന്റലിജൻസ്' എന്നതിനെ ചുറ്റിപ്പറ്റിയാണ് ഭാവി കുടികൊള്ളുന്നത്. അവിടെ തൊഴിൽ ശക്തി മനുഷ്യരുടെയും യന്ത്രങ്ങളുടെയും കഴിവുകളെ സമന്വയിപ്പിക്കുന്നു. മനുഷ്യ ശേഷി വർദ്ധിപ്പിക്കുന്നതിനും മൊത്തത്തിലുള്ള പ്രകടന കാര്യക്ഷമത മെച്ചപ്പെടുത്തുന്നതിനും ഇത് ലക്ഷ്യമിടുന്നു, ഇത് ആത്യന്തികമായി സമൂഹത്തിന് പ്രയോജനം ചെയ്യും.
7. AI-അധിഷ്ഠിത പരിവർത്തനത്തിന്റെ പ്രതികൂല സാമൂഹിക പ്രത്യാഘാതങ്ങൾ കുറയ്ക്കുന്നതിന് സർക്കാർ, സ്വകാര്യ മേഖല, അക്കാദമിക് മേഖല എന്നിവ തമ്മിലുള്ള സഹകരണം അത്യാവശ്യമാണ്.
******
NK/GG/LPS/MS
(Release ID: 2098103)
Visitor Counter : 27