Ha ka jingialang bad ki lad pathai khubor ha New Delhi mynta ka sngi, u Mansukh Mandaviya, Myntri Sorkar Pdeng ba dei khmih ia ka Tnad ki Kam ialehkai, u la pynbna ia ka jingpynthymmai jong ka National Youth Festival (NYF) 2025. Katkum ka thong jong u Myntri Rangbah duh ban kyntiew ka jingiashim bynta jong ki samla ha ka jingsaindur ia ka lawei jong ka ri, ia kane ka tamasa yn tip kum ka "Viksit Bharat Young Leaders Dialogue." Kane ka rynsan kan pynkupbor ia ki samla jong ka ri ba kin nohsynniang ia ki buit bad ki jingsngew jong ki ban pynurlong ia ka thong jong ka Viksit Bharat.

Haba kdew ia ki jingthmu ba kongsan jong ka Viksit Bharat Young Leaders Dialogue, u Myntri Sorkar Pdeng Dr. Mansukh Mandaviya u la ong, “Ka tamasa ka thmu ban ithuh bad kyntiew ia ki sap jong ki samla, da kaba pynbiang ka rynsan ia ki ban iasam ia ki jingthmu jong ki na ka bynta ka Viksit Bharat. Ka bynta ba kongsan na ka bynta ki samla kan long ka kabu ban iakren markhmat bad u Myntri Rangbah duh bad ai ia ki jingthmu jong ki na ka bynta ka lawei jong ka India, bad kyntiew ia ka jingdon bynta ki samla ha ki kam sain pyrthei bad ha ka imlang sahlang.”

U Myntri Sorkar Pdeng u la kren shaphang ki jingthmu ba kongsan jong ka Viksit Bharat Young Leaders Dialogue mynta u snem, da kaba ong ba kane ka tamasa mynta u snem kadei kaba la saindur hapoh artylli ki thong ba kongsan. Kaba nyngkong, ban wanrah ia ki samla nongialam ba thymmai ha ki kam sain pyrthei, katkum ka jingkyntu u Myntri Rangbah duh ha ka jingai jingkren jong ha ka sngi Ioh jinglaitluid ka ri ban wanrah ia shi lak ki samla ki bym don jingiadei bad ki kam sain pyrthei ha kine ki kam. La saindur ia ka National Youth Festival ban ithuh bad kyntiew ia ki sap jong ki samla kiba don sap ha ka jinglong nongialam, da kaba pynbiang ka rynsan ia ki ban iasam ia ki jingthmu bad ka thong jong ki na ka bynta ka Viksit Bharat hakhmat jong u Myntri Rangbah duh.

Kaba ar, ban pynthikna ka jingnohsynniang ba don jingmut jong ki samla sha ka Viksit Bharat lyngba ka rukom kaba shai, bad kaba ryntih, ban kaba jied katkum ka sap. Kane ka sienjam ka ban jur ia ka jingkut jingmut jong ka sorkar ban pynkupbor ia ki pateng ban wan ban kyntiew ia ka roi ka par jong ka India.

U Dr. Mandaviya u la kyntu ia baroh ki samla kiba lah ban ioh ia kane ban iashim bynta ha kane ka jingiamir jingmut, da kaba pynthikna ia ka jingkut jingmut jong ka sorkar ban pyndonkam ia ka lad jong ka Yuva Shakti jong ka ban tei ia ka Viksit Bharat.

Ka jingsdang ia ka Viksit Bharat Challenge: Ka jingiakop kaba saw bynta

Ka Viksit Bharat Young Leaders Dialogue, ka National Youth Festival kaba la saindur thymmai, ka kynthup ia ka Viksit Bharat Challenge, ka jingiakop kaba saw bynta ban ai mynsiem ia ka jingiashim bynta ki samla ha ka jingsaindur ia ka lawei jong ka ri. Ka jingiakop ka iaid kumne harum.

1. Round 1: Viksit Bharat Quiz

Ki samla (hapdeng 15-19) snem ka rta kin iashim bynta ha ka digital quiz ba pynlong ha ka Rynsan Mera Yuva Bharat (MY Bharat) hapdeng ka 25 tarik u Naiwieng 2024 bad 5 tarik u Nohprah 2024, kum ka jingpeit ia ka jingnang jingstad ki samla bad ka jingsngewthuh jong ki ia ki jingjop ba kyrpang jong ka India.

2. Round 2: Ka jingthoh Essay/Blog

Ki nongjop na ka round ba la dep kin ai ia ki essay ha ki 10 tylli ki phang kum ka 'Tech for Viksit Bharat', 'Empowering Youth for Viksit Bharat’, bad kiwei kiwei, ha kaba kin pyni ia ki jingmut jong ki na ka bynta ka roi ka par jong ka ri. Kane ka jingiakhun kan long ha ka rynsan MY Bharat.

3. Round 3: Viksit Bharat Vision Pitch Deck – State-Level Presentations

Kito kiba shah jied ha ka Round 2 kin ai ia ki jingmut jong ki ha ki phang ba ki la jied ha ki jylla. Lyngba kane, man ka jylla kan pynkhreh ia ki kynhun ha ki phang bapher bapher da kaba pynlong ia ki jingiakhun ban jied ia ki nongialeh ha ka ri.

4. Round 4: Viksit Bharat National Championship ha ka Bharat Mandapam

Ki kynhun na ki jylla ha ki phang bapher kin iakhun ha ka National Youth Festival ha ka 11 – 12 tarik u Kyllalyngkot 2025, bad ki kynhun kiba jop kin ai ia ki jingmut jong ki na ka bynta ka Viksit Bharat sha u Myntri Rangbah Duh ka India, Narendra Modi.

Ka Viksit Bharat Young Leaders Dialogue – National Youth Festival 2025 kan wanrah lang ia ki samla ba shah jied ha ki lai tylli ki bynta. Ka kynhun kaba nyngkong kan kynthup ia ki nongiashim bynta na ka Viksit Bharat Challenge ba dang shu pynbna. Ka kynhun ba ar ka kynthup ia ki samla ba don sap kiba wan na ki district bad state-level youth festival, ha kaba kin iakhun ha ki bynta bapher bapher kum ka jingdro, ki science exhibition, ki jingpyni ia ka deiriti, ki jingiakhun declamation bad kiwei kiwei. Ka kynhun ba lai kan kynthup ia ki nongprat lynti bad ki samla ba pawnam ha ki kam bapher bapher ba kynthup ia ka jingseng kam lajong, ki kam ialehkai, ka rep ka riang, ka teknoloji bad kiwei kiwei.

Kumba 3,000 ngut ki samla kin shah jied ha kine ki thup na ka bynta ka porkram jong ka ri ha Bharat Mandapam ha New Delhi ha ka 11-12 tarik u Kyllalyngkot 2025.

Kiwei kiwei ki mat ba kongsan jong ka Viksit Bharat Young Leaders Dialogue - National Youth Festival 2025

Ka Viksit Bharat Young Leaders Dialogue kan don katto katne ki mat ba kongsan ha ryngkat ka Viksit Bharat Challenge:

1. Viksit Bharat Exhibition: Kane kan pyni ia ki sienjam na ka bynta ki samla na ki Jylla/UT bad ki tnad Sorkar Pdeng, kaba ai rynsan ia ki nongiashim bynta ba kin peit ia ka jingthmu na ka bynta ka roi ka par jong ka India. Kane kan kynthup ia ki State Exhibition, kiba pyni ia ki sienjam na ka bynta ki samla ha ka pule puthi, ka jingkyntiew ia ki sap bad ka jingseng kam lajong, bad ki Exhibition jong ki tnad Sorkar Pdeng, ha kaba kin pyni ia ki prokram ba kyrpang jong ki bad ki lad na ka bynta ki samla ha ka jinglong nongialam, ka jingkylla ha ka imlang sahlang bad ka jingsaindur thymmai.
2. Ki Plenary Session: Kane kan kynthup ki jingiakren, ki workshop jong ki riew pawkhmat bad ki samla ha kaba kin ai lad ia ki samla ban iakren shaphang ki jingsngew jong ki, ioh jinghikai bad jingsngewthuh na kine ki briew kiba ai mynsiem.
3. Ka jingrakhe ia ka hiar pateng jong ka India: Kane ka tamasa kan don ruh ka bynta jong ka deiriti, kaba rakhe ia ka hiar pateng kaba riewspah jong ka India kum shi bynta jong ka jingthmu kaba kham iar jong ka “Vikas Bhi, Virasat Bhi”. Lyngba ki kam kiba pyni ia ka jingiar jong ki jinglong tynrai jong ka India, kane ka prokram naka bynta ka deiriti kan kyrshan ia ka jingban jur kane ka tamasa ha ka jingkiew shaphrang. Kane ka prokram ka dei kaba yn pynlong ha baroh ki jylla ka India, ka ban wanrah ia ka jingiashim bynta bad ka jingrakhe ha kylleng ka ri.

Ka jingpynkupbor ia ki samla ka India na ka bynta ka Viksit Bharat

Ka Viksit Bharat Young Leaders Dialogue kam dei tang ka tamasa – ka dei ka jingiakhih ban pynkupbor ia ki samla ka India kum kiba nohsynniang sha ka lynti jong ka ri na ka bynta ka roi ka par. Lyngba ki sienjam kum ka Viksit Bharat Challenge, ka wanrah ia ka rynsan na ka bynta ka jingkylla ha kaba ki samla ki lah ban ai ia ki jingmut jong ki, iakren bad ki riewpawkhmat bad iatrei lang ban pynurlong ia ka thong ban ioh ia ka India kaba la kiew shaphrang.

Yn ai baroh ki jingtip shaphang ka Viksit Bharat Young Leaders Dialogue – National Youth Festival 2025 ha ka rynsan MY Bhart (https://mybharat.gov.in/).

******