صدرجمہوریہ ہند محترمہ دروپدی مرمو نے آج (4 اکتوبر، 2024) کو راجستھان کے ماؤنٹ آبو میں پرجاپتا برہما کماری  ایشوریہ وشو ودیالیہ کے زیر اہتمام ’صاف اور صحت مند معاشرے کے لیے روحانیت‘ پر ایک عالمی سربراہ اجلاس میں شرکت کی۔

اس موقع پر صدرجمہوریہ نے کہا کہ روحانیت کا مطلب مذہبی ہونا یا دنیاوی کاموں کو ترک کرنا نہیں ہے۔ روحانیت کا مطلب اندر کی طاقت کو پہچاننا اور طرز عمل اور خیالات میں پاکیزگی لانا ہے۔ خیالات اور اعمال میں پاکیزگی زندگی کے ہر شعبے میں توازن اور امن لانے کا ذریعہ ہے اور صحت مند اور صاف ستھرا معاشرہ بنانے کے لیے بھی ضروری ہے۔

صدرجمہوریہ نے کہا کہ جسمانی، ذہنی اور روحانی صفائی صحت مند زندگی کی کلید ہے۔ ہمیں صرف ظاہری صفائی پر توجہ نہیں دینی چاہیے بلکہ ذہنی اور روحانی طور پر بھی پاک ہونا چاہیے۔ کلی صحت ایک صاف ذہنیت پر مبنی ہے۔جذباتی اور ذہنی صحت کا دارومدار صحیح سوچ پر ہے کیونکہ خیالات ہی الفاظ اور رویے کی شکل اختیار کرتے ہیں۔ دوسروں کے بارے میں رائے قائم کرنے سے پہلے ہمیں اپنے اندر جھانکنا چاہیے۔خود کو کسی اور کے حالات میں ڈال کر، ہم صحیح رائے قائم کرنے کے قابل ہو جائیں گے۔

صدر جمہوریہ نے کہا کہ روحانیت نہ صرف ذاتی ترقی کا ذریعہ ہے بلکہ معاشرے میں مثبت تبدیلی لانے کا ایک ذریعہ بھی ہے۔ جب ہم اپنے اندر کی پاکیزگی کو پہچانیں گے تب ہی ہم ایک صحت مند اور پرامن معاشرے کے قیام میں اپناتعاون دے سکیں گے۔ روحانیت معاشرے اور زمین سے متعلق بہت سے مسائل ، جیسے پائیدار ترقی، ماحولیاتی تحفظ، اور سماجی انصاف کو طاقت دیتی ہے ۔

صدرجمہوریہ  نے کہا کہ مادیت ہمیں لمحاتی جسمانی اور ذہنی آسودگی دیتی ہے جسے ہم حقیقی خوشی سمجھتے ہیں اور اس سے وابستہ ہو جاتے ہیں۔ یہی لگاؤ ​​ہماری بے اطمینانی اور اداسی کی وجہ بن جاتا ہے۔ دوسری طرف، روحانیت ہمیں اپنے آپ کو جاننے، اپنے باطن کو پہچاننے کی اجازت دیتی ہے۔

صدرجمہوریہ نے کہا کہ آج کی دنیا میں امن اور اتحاد کی اہمیت اور بھی بڑھ گئی ہے۔ صرف اس صورت میں جب ہم پرامن ہیں، ہم دوسروں کے لیے ہمدردی اور محبت محسوس کر سکتے ہیں۔ یوگا کی تعلیمات اور برہما کماری جیسے روحانی اداروں سے ہمیں اندرونی سکون کا تجربہ ہوتا ہے۔ یہ امن نہ صرف ہمارے اندر بلکہ پورے معاشرے میں مثبت تبدیلی لا سکتا ہے۔

صدرجمہوریہ کی تقریر دیکھنے کے لیے یہاں کلک کریں-

********

ش ح ۔  ش  ت  ۔م ش

U. No.847