ইনফোর্মেসন অমসুং ব্রোদকাস্তিং মন্ত্রালয়
মিথুন দাগী নীংজবা, হন্বা লৈতনা হোৎনবা অমসুং ইন্দিয়ন সিনেমাগী মতোন লোম্নবা মঙখিবা মঙলান মঙফাওননবা চৎখিবা খোঙচৎপু সেলেব্রেত তৌরি
দাদাসাহেব ফাল্কে লাইফতাইম এচীবমেন্ত এৱার্দ ফোর ২০২২ মমিং লৈরবা এক্তর মিথুন চক্রবোর্তীদা পীরগনি
এক্তরশিংগী সিনেমাগী খোঙচৎ তশেংনা শিংথানিংঙাই অমসুং পুক্নিং থৌগৎনিংঙাইনি; মহাক্না কত্থোকপগা লোয়ননা কন্না হোৎনখিবনা মহাকপু নৌনা হৌগৎলক্লিবা এক্তর অমসুং আর্তিস্তশিংগী ফিদম্নফম ওইহল্লি: শ্রী অস্বিনী বৈষ্ণব
লিজেন্দরী এক্তর অসিনা মাগী সিনেমাগী লমদা লৌখিবা থৌদাং অমসুং ফিলান্থ্রোপী অমসুং মীয়ামগী থৌগলগী লমদা তৌরম্বা থবকশিংনা মীরোল কয়াবু পুক্নিং থৌগত্তুনা মীথোয় মীহেন্বা অমসুং মীনুংসিগী লোইনাইদ্রবা মমি অমা থম্লম্মি
Posted On:
30 SEP 2024 9:58AM by PIB Imphal
লিজেন্দরী এক্তর মিসস্তর মিথুন চক্রবোর্তীগী মফমদা ইং ২০২২গী দাদাসাহেব ফাল্কে লাইফতাইম এচীবমেন্ত এৱার্দ খুৎশিন্নদুনা ইকায়খুম্নবা উৎলগনি। ইনফোর্মেসন অমসুং ব্রোদকাস্তিং, রেলৱেজ অমদি ইলেক্ত্রোনিক্স অমসুং ইনফোর্মেসন তেক্নোলোজীগী কেন্দ্র মন্ত্রী শ্রী অস্বিনি বৈষ্ণবনা মনা অসি ইন্দিয়ন সিনেমাগী লমদা এক্তর অসিনা লৌরম্বা শিংথানিংঙাই ওইরবা থৌদাংবু শকখঙদুনা লাউথোকখিবনি। মন্ত্রীনা ফিল্ম ইন্দস্ত্রীদা খ্বায়দগী পাম্নবা অমসুং মশক নাইবা মীওইশিংগী মরক্তা অমা ওইরিবা, মহাক্কী ইচন্দা চন্নবা পর্ফোর্মেন্স অমসুং পুক্নিং চিংশিন্নিংঙাই ওইরবা স্ক্রীন প্রজেন্সকীদমক শকখঙনবা এক্তর অসিবু ইকায়খুম্নবদা হায়নিংঙাই লৈতনা নুংঙাইবা অমদি চাউথোকচবা পোকই হায়না ফোঙদোকখি।
মিথুন দাগী শিংথানিংঙাই ওইরবা খোঙচৎ
মিথুন চক্রবোর্তী, মিথুন দা হায়নসু খঙনবা মীওই অসি, মহাক্কী ইচন্দা চন্নবা শক্তমশিং অমসুং তোপ তোপ্পা জগোয় শাবগী মওং মতৌগীদমক খঙনবা মশক নাইরবা ভারতকী এক্তরো প্রদ্যুসর, অমসুং রাজনিতিৱালা অমনি। মহাক্না মাগী মুভীশিংদা খেন্নবা মখল কয়াগী শক্তমশিং লানদুনা এক্সন্না থল্লবা করেক্তরদগী হৌরগা মশক নাইরবা দ্রামাতিক পর্ফোর্মেন্সশিং উৎখি।
ইচম চম্বা ইমুং অমগী নহা অমা ওইরম্বদগী মীয়াম্না পাম্নবা এক্তর অমা ওইরকপা ফাওবগী মিথুন চক্রবোর্তীগী খোঙচৎ অসিনা পুক্নিং লুপ্পা অমসুং কত্থোকপনা কনাগুম্বা মীওই অমনা খ্বায়দগী চাউবা মঙলান ফাওবা ফংবা ঙমগনি হায়বা উত্তুনা থাজবা অমসুং হন্বা লৈতনা হোৎনবগী ৱাখল্লোন উৎলি হায়না মন্ত্রীনা হায়খি। মহাক্কী কত্থোকপা অমসুং হোৎনবা কন্বনা মহাকপু নৌনা হৌগৎলক্লিবা এক্তর অমসুং আর্তিস্তশিংগী ফিদম্নফম অমা ওইহল্লি।
জুন ১৬, ১৯৫০দা, কোলকতা, ৱেস্ত বেঙ্গলদা গৌরাঙ্গ চক্রবোর্তী হায়না পোকখিবা মহাক্না মাগী ইহান হান্বা ফিল্ম “মৃগয়া” (১৯৭৬) অসিদা নেস্নেল ফিল্ম এৱার্দ ফোর বেস্ত এক্তর ফংখি। লেমজনিংঙাই ওইরবা ফিল্ম এন্দ তেলিভিজন ইন্সতিত্যুৎ ওফ ইন্দিয়া (FTII)গী এলুম্নস, মিথুন চক্রবোর্তীনা মহাক্কী ক্রাফ্ততা হৈথোই শিংথোইবা তানখি অমসুং সিনেমাগী লমদা মহাক্কী মশক মচু নাইরবা করিয়রগী য়ুম্ফম থোনখি।
মৃনাল সেনগী ফিল্মদা সন্থল রেবেলগী শক্তম লাংখিবনা মহাকপু লৈবাক্কী থাক্তা থাগৎনখি। মিথুন্না ১৯০৮গী মতমদা, ভারত অমসুং মালেমগী থাক্তা চাউনা মায় পাকপা ফিল্ম অমা ওইখিবা “দিস্কো দান্সর” (১৯৮২)দা লাংখিবা শক্তমদা মীয়াম্না পাক শন্না খঙনরক্তুনা মহাকপু দান্সিং সেন্সেসন অমা ওইহনখি। মহাক্কী তোপ তোপ্পা জগোয় শাবগী হৈথোই শিংথোইবা উৎখিবতা নত্তনা ইন্দিয়ন সিনেমাদা দিস্কো ম্যুজিকপু মীয়াম্না পাম্নহনখিবা ফিল্ম দিস্কো দান্সর (১৯৮২)দা মহাক্কী মশক নাইরবা শক্লোন্না মরম ওইরগা য়ুমথোঙ খুদিং মহাক্কী মমিং শোন্নখি। অগ্নীপথ ফিল্মদা মহাক্না উৎখিবা পর্ফোর্মেন্সনা ১৯৯০দা মহাকপু ফিল্মফেয়র এৱার্দ ফোর বেস্ত সপ্পোর্তিং এক্তর মনা ফংহনখি।
তুংদা, তহদর কাথা (১৯৯২) অমসুং স্বামী বিবেকানন্দ (১৯৯৮) অসিদা মহাক্না লাংখিবা শক্লোনগীদমক নেস্নেল ফিল্ম এৱার্দ অনি অমগসু ফংখি। মহাক্কী শাংলবা করিয়র মনুংদা, মিথুন্না হিন্দী, বেঙ্গলী, ওরিয়া, ভোজপুরী, অমসুং তেলুগু য়াওনা ভারতকী তোঙান তোঙানবা লোলশিংদা ফিল্ম ৩৫০ হেন্না কুমখি। মহাকপু এক্সনদগী হৌরগা দ্রা অমসুং কোমেদী ফাওবদা খেন্নবা মখল কয়াগী পর্ফোর্মেন্সকীদমক শকখঙনৈ, অমসুং নেস্নেল ফিল্ম এৱার্দ ফোর বেস্ত এক্তর অহুম য়াওনা মনা কয়ামরুম ফংহনখি।
মিথুন দাগী অনি লোংবা লিগেসী
মিথুন দা অসি মহাক্কী সিনেমাগী লমদা মায় পাকপগী খক্ত নত্তনা খুন্নাইগী ওইবা ৱাফমশিংদা কত্থোকপগা লোয়ননা হোৎনবগীদমকসু মীয়াম্না শোন্নৈ হায়না কেন্দ্র মন্ত্রীনা ফোঙদোকখি। মহাক মহৈ মশিং, হকশেল, অমসুং চাকথুং ফিথুংদ্রবা মীওই কাঙলুপশিংবু শৌগৎনবা পান্দমদা তোঙান তোঙানবা চেরিতেবল ইনিসিএতিবশিংদা ইচঙ থৌনা শরুক য়াদুনা খুন্নাইদা অমুক হন্না পীথোকপগী মমি তাখি। মীয়ামগী থৌগল অমসুং লৈঙাক্লোন্দা লৈরিবা খোঙফম উত্তুনা মহাক্না মেম্বর ওফ পার্লিয়ামেন্ত ওইনসু লৈরম্মি।
দেকেদ মঙারোম লৈরম্বা মহাক্কী করিয়রদা, মিথুন চক্রবোর্তীনা, মহাক্কী করিয়রগী মতম পুম্বদা ইন্দিয়ন সিনেমাদা মাগী মশক থোকপা থৌদাংশিংগীদমক, মশিং থিঙমদ্রবা মনাশিং অমসুং থাগৎনবশিং ফংখি। মহাক্না ইন্দিয়ন সিনেমাদা মশক নাইনা থৌদাং য়ারম্বগীদমক কুইদ্রিঙৈদা মহাক্কী মফমদা পদ্ম ভুসন মনাসু লান্থোকখি। “দিস্কো দান্সর” অমসুং “ঘর এক মন্দির” গুম্বা ফিল্মশিং য়াওবা ফিল্মোগ্রাফী অমগা লোয়ননা মহাক্না মীওই মিলিয়ন কয়াবু নুংঙাইহনখিবতা নত্তনা বোলীৱুদ অমসুং রিজনেল সিনেমাগী হৌজিক ওইরিবা ফীভম অসিবুসু মমায় চুম্লমখি। মহাক্কী ইথিল অসি সিল্ভর স্ক্রীনগী ৱাংমদসু শন্দোরক্তুনা মাগী ফিল্ম অমসুং ফিলান্থ্রোপীগী থবকশিংগী খুত্থাঙদা মীরোল কয়া লেপ্তনা পুক্নিং থৌগৎলি।
মনা অসি ওক্তোবর ৮, ২০২৪, লৈবাকপোকপা নুমিত্তা পাঙথোক্কদবা ৭০শুবা নেস্নেল ফিল্ম এৱার্দ্স সিরেমোনী থৌরমদা লান্থোক্কনি। মখাদা পীরিবশিং অসি দাদাসাহেব ফাল্কে এৱার্দ সেলেক্সন কম্মিতীগী মেম্বরশিংনি:
১. মিস অসা পরেখ
২. মিস খুসবু সুন্দর
৩. মিস্তর বিপুল অম্রুতলাল সাহ
লেমজনিংঙাই ওইরবা দাদাসাহেব ফাল্কে লাইফতাইম এচীবমেন্ত এৱার্দ অসিনা মিথুন চক্রবোর্তীগী আর্তিস্ত অমা ওইবগী মতিক খক্ত নত্তনা মীওই কয়াগী পুন্সিদা মহাক্কী মীনুংসি চাউবা অমসুং কত্থোকপতনা থল্লবা মীওইই অমা ওইবগী হন্বা নাইদ্রবা লিগেসীবুসু শকখঙলি।
*****
(Release ID: 2060303)
Visitor Counter : 8
Read this release in:
Malayalam
,
English
,
Urdu
,
Marathi
,
Hindi
,
Bengali
,
Gujarati
,
Odia
,
Tamil
,
Telugu
,
Kannada