Ha ka jingbuddien ia ka jingpynbna ha ka Mang Tyngka 2024-25 jong ka Sorkar Pdeng, ka Myntri Sorkar Pdeng ba dei khmih ia ki tnad Kam Pla Tyngka bad Corporate Affairs, Nirmala Sitharaman kan plié paidbah ia ka skhim NPS Vatsalya ha ka 18 tarik u Nailur, 2024, ha New Delhi. Ki khynnah skul kin iadon lang ha kane ka jingplie paidbah.

Ka Myntri kan plié paidbah ruh ia ka rynsan online ban rung ha ka NPS Vatsalya, pyllait paidbah ia ka jingthoh kaba batai shaphang kane ka skhim, bad sam ia ki Permanent Retirement Account Number (PRAN) card sha kito kiba rung thymmai hapoh kane ka skhim.

Kum shi bynta ka jingplie paidbah ha New Delhi, yn pynlong ia ki prokram NPS Vatsalya ha kajuh ka por ha 75 tylli ki jaka ha kylleng ka ri. Kiwei kiwei ki jaka kin iasoh lang lyngba ka video conference bad yn sam ruh ia ki jinglong dkhot ka PRAN sha ki khynnah ha kine ki jaka.

Ka NPS Vatsalya ka plié lad ia ki kmie ki kpa ba kin kynshew pisa na ka bynta ka lawei jong ki khun jong ki da kaba bei tyngka ha ka account bai bam tymmen bad pynthikna ka jingriewspah. Ka NPS Vatsalya ka plié lad ia ki jingsiew kiba suk, bad ka plié lad ia ki kmie ki kpa ba kin bei tyngka haduh T. 1,000 shi snem ha ka kyrteng jong ki khun jong ki. Kane ka plié lad ia baroh ki longiing ba kin ioh bynta ha kane ka skhim.

La saindur ia kane ka sienjam ban sdang dang kloi ha ka jingpynthikna ia ka lawei jong ki khynnah ha ka pisa pilain, bad ka dei ka sienjam kaba kongsan ha ki kam bai bam tymmen jong ka India. Yn pyniaid ia ka Skhim hapoh ka Pension Fund Regulatory and Development Authority (PFRDA).

Ka jingplie paidbah ia ka NPS Vatsalya ka dei ka dak jong ka jingkut jingmut ka India ban pynshlur ia ka jingpynkhreh ba jrong samoi ha ki kam pisa pilain bad ka jingshngain ia baroh. Ka dei ka sienjam kaba heh sha ka jingpynthikna ia ka lawei jong ki pateng ban wan jong ka India ba kin kham don jinglaitluid ha ki kam pisa.

****