କ୍ୟାବିନେଟ
ସ୍ୱରଗେଟ୍ ରୁ କାଟରାଜ ପର୍ଯ୍ୟନ୍ତ ଦକ୍ଷିଣ ଦିଗକୁ ୫.୪୬ କିଲୋମିଟର ବ୍ୟାପି ପୁଣେ ମେଟ୍ରୋ ଫେଜ୍ -୧ ପ୍ରକଳ୍ପ ସମ୍ପ୍ରସାରଣକୁ କ୍ୟାବିନେଟ୍ ଅନୁମୋଦନ
୨୦୨୯ ସୁଦ୍ଧା କାର୍ଯ୍ୟକ୍ଷମ ହେବାକୁ ଥିବା ଏହି ପ୍ରକଳ୍ପର ସମୁଦାୟ ଖର୍ଚ୍ଚ ୨୯୫୪.୫୩ କୋଟି ଟଙ୍କା ରହିଛି
Posted On:
16 AUG 2024 8:18PM by PIB Bhubaneshwar
ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କେନ୍ଦ୍ର କ୍ୟାବିନେଟ ବୈଠକରେ ପୁଣେ ମେଟ୍ରୋ ଫେଜ୍ -୧ ପ୍ରକଳ୍ପର ବର୍ତ୍ତମାନର ପିସିଏମସି-ସ୍ବରଗେଟ୍ ମେଟ୍ରୋ ଲାଇନର ସ୍ୱରଗେଟରୁ କାଟରାଜ ଭୂତଳ ଲାଇନ ସମ୍ପ୍ରସାରଣକୁ ଆଜି ଅନୁମୋଦନ ମିଳିଛି । ଏହି ନୂତନ ସମ୍ପ୍ରସାରଣ ଲାଇନ୍-ଏଲ୍ ବି ସମ୍ପ୍ରସାରଣ ନାମରେ ପରିଚିତ ଏବଂ ଏହା ୫.୪୬ କିଲୋମିଟର ପରିବ୍ୟାପ୍ତ ହେବ ଏବଂ ଏଥିରେ ତିନୋଟି ଭୂତଳ ଷ୍ଟେସନ ଅନ୍ତର୍ଭୁକ୍ତ ହେବ, ଯାହା ମାର୍କେଟ ୟାର୍ଡ, ବିବ୍ୱେୱାଡି, ବାଲାଜୀ ନଗର ଏବଂ କାଟରାଜ ଉପନଗର ଭଳି ପ୍ରମୁଖ ଅଞ୍ଚଳକୁ ସଂଯୋଗ କରିବ ।
ପୁଣେରେ ନିରବଚ୍ଛିନ୍ନ ଯୋଗାଯୋଗ ଯୋଗାଇବା ଉଦ୍ଦେଶ୍ୟରେ ଆରମ୍ଭ ହୋଇଥିବା ଏହି ପ୍ରକଳ୍ପ ୨୦୨୯ ଫେବ୍ରୁଆରି ସୁଦ୍ଧା ଶେଷ ହେବାକୁ ଲକ୍ଷ୍ୟ ରହିଛି ।
ପ୍ରକଳ୍ପର ଆନୁମାନିକ ମୂଲ୍ୟ ୨୯୫୪.୫୩ କୋଟି ଟଙ୍କା, ଯେଉଁଥିରେ ଭାରତ ସରକାର ଏବଂ ମହାରାଷ୍ଟ୍ର ସରକାର ସମାନ ଭାବରେ ପାଣ୍ଠି ବଣ୍ଟନ କରିବା ସହିତ ଦ୍ୱିପାକ୍ଷିକ ଏଜେନ୍ସିଗୁଡ଼ିକର ଅବଦାନ ରହିବ ।
ଏହି ସମ୍ପ୍ରସାରଣ ସ୍ୱରଗେଟ ମଲ୍ଟିମୋଡାଲ ହବ୍ ସହିତ ସମନ୍ୱିତ ହେବ, ଯେଉଁଥିରେ ମେଟ୍ରୋ ଷ୍ଟେସନ, ଏମଏସଆରଟିସି ବସ୍ ଷ୍ଟାଣ୍ଡ ଏବଂ ପିଏମପିଏମଏଲ ବସଷ୍ଟାଣ୍ଡ ଅନ୍ତର୍ଭୁକ୍ତ ଅଛି, ଯାହା ପୁଣେ ସହର ଭିତରେ ଏବଂ ବାହାରେ ଯାତ୍ରୀମାନଙ୍କ ପାଇଁ ନିରବଚ୍ଛିନ୍ନ ସଂଯୋଗ ପ୍ରଦାନ କରିବ । ଏହି ସମ୍ପ୍ରସାରଣ ପୁଣେର ଦକ୍ଷିଣତମ ଭାଗ, ପୁଣେର ଉତ୍ତର ଭାଗ ଏବଂ ପୂର୍ବ ଏବଂ ପଶ୍ଚିମ ଅଞ୍ଚଳ ମଧ୍ୟରେ ଜିଲ୍ଲା ଅଦାଲତ ଇଣ୍ଟରଚେଞ୍ଜ ଷ୍ଟେସନ ମାଧ୍ୟମରେ ଯୋଗାଯୋଗ ବୃଦ୍ଧି କରିବ ଏବଂ ପୁଣେ ସହର ଭିତରେ ଏବଂ ବାହାରେ ଯାତାୟାତ ପାଇଁ ନିରବଚ୍ଛିନ୍ନ ଯୋଗାଯୋଗ ପ୍ରଦାନ କରିବ ।
ସ୍ୱରଗେଟରୁ କାଟରାଜ ଭୂତଳ ଲାଇନ୍ ସଡ଼କ ଟ୍ରାଫିକ୍ ଭିଡ଼କୁ ଯଥେଷ୍ଟ ହ୍ରାସ କରିବ ଏବଂ ଦୁର୍ଘଟଣା, ପ୍ରଦୂଷଣ ଏବଂ ଯାତ୍ରା ସମୟର ବିପଦକୁ ହ୍ରାସ କରି ଏକ ସୁରକ୍ଷିତ, ଅଧିକ ଆରାମଦାୟକ ଯାତ୍ରା ଅନୁଭୂତି ପ୍ରଦାନ କରିବ, ଯାହା ନିରନ୍ତର ସହରୀ ବିକାଶକୁ ସମର୍ଥନ କରିବ ।
ଏହି ନୂଆ କରିଡରରେ ବିଭିନ୍ନ ବସଷ୍ଟାଣ୍ଡ, ରେଳ ଷ୍ଟେସନ, ରାଜୀବ ଗାନ୍ଧୀ ପ୍ରାଣୀ ଉଦ୍ୟାନ, ତାଳଜାଇହଲକ (ଟେକଡି), ମଲ୍ ଆଦି ମନୋରଞ୍ଜନ କେନ୍ଦ୍ର, ବିଭିନ୍ନ ଆବାସିକ ଅଞ୍ଚଳ, ଶିକ୍ଷାନୁଷ୍ଠାନ, କଲେଜ ଏବଂ ପ୍ରମୁଖ ବ୍ୟବସାୟିକ କେନ୍ଦ୍ରକୁ ସଂଯୋଗ କରାଯିବ। ଏହା ଦ୍ରୁତ ଏବଂ ଅଧିକ ଶସ୍ତା ପରିବହନ ବିକଳ୍ପ ପ୍ରଦାନ କରିବ, ଯାହା ଦ୍ୱାରା ହଜାର ହଜାର ଦୈନିକ ଯାତ୍ରୀ, ବିଶେଷକରି ଛାତ୍ରଛାତ୍ରୀ, କ୍ଷୁଦ୍ର ବ୍ୟବସାୟୀ ଏବଂ କାର୍ଯ୍ୟାଳୟ ଏବଂ ବ୍ୟବସାୟ କେନ୍ଦ୍ରକୁ ଯାତ୍ରା କରୁଥିବା କର୍ମଜୀବୀମାନେ ଉପକୃତ ହେବେ । ୨୦୨୭, ୨୦୩୭, ୨୦୪୭ ଏବଂ ୨୦୫୭ ବର୍ଷ ପାଇଁ ସ୍ୱରଗେଟ୍-କାତରାଜ ଲାଇନରେ ଦୈନିକ ଯାତ୍ରୀ ସଂଖ୍ୟା ଯଥାକ୍ରମେ ୯୫,୦୦୦,୧.୫୮ ଲକ୍ଷ, ୧.୮୭ ଲକ୍ଷ ଏବଂ ୧.୯୭ ଲକ୍ଷ ଯାତ୍ରୀ ହେବ ବୋଲି ଆକଳନ କରାଯାଇଛି।
ମହା-ମେଟ୍ରୋ ଦ୍ୱାରା ଏହି ପ୍ରକଳ୍ପ କାର୍ଯ୍ୟକାରୀ ହେବ, ଯାହା ସିଭିଲ, ଇଲେକ୍ଟ୍ରୋ-ମେକାନିକାଲ ଏବଂ ଅନ୍ୟାନ୍ୟ ଆନୁଷଙ୍ଗିକ ସୁବିଧା ଏବଂ କାର୍ଯ୍ୟର ତଦାରଖ କରିବ । ମହା-ମେଟ୍ରୋ ପ୍ରାରମ୍ଭିକ ଟେଣ୍ଡର କାର୍ଯ୍ୟ ଆରମ୍ଭ କରିସାରିଛି ଏବଂ ଟେଣ୍ଡର ଦସ୍ତାବିଜ ପ୍ରସ୍ତୁତ କରୁଛି ଏବଂ ଖୁବଶୀଘ୍ର ନିଲାମ ପାଇଁ ଚୁକ୍ତି ଆହ୍ୱାନ କରାଯିବ ବୋଲି ଆଶା କରାଯାଉଛି।
ଏହି ରଣନୈତିକ ସମ୍ପ୍ରସାରଣ ପୁଣେର ଅର୍ଥନୈତିକ ସାମର୍ଥ୍ୟକୁ ଆଗକୁ ଆଣିବ, ସହରର ଭିତ୍ତିଭୂମିକୁ ଗୁରୁତ୍ୱପୂର୍ଣ୍ଣ ପ୍ରୋତ୍ସାହନ ଦେବ ଏବଂ ଏହାର ସ୍ଥାୟୀ ବିକାଶରେ ଯୋଗଦାନ କରିବ ବୋଲି ଆଶା କରାଯାଉଛି ।
HS
(Release ID: 2046169)
Visitor Counter : 15