Ka Myntri Sorkar Pdeng ba dei khmih ia ki Tnad Kam Pla Tyngka, Nirmala Sitharaman haba ka la wanrah ia ka mang tyngka 2024 jong ka Sorkar pdeng mynta ka sngi ha Parliament ka la ong, “Ki briew ki la ai ka lad kaba kyrpang ia ka sorkar jong ngi ba ngin ialam ia ka ri ha ka lynti jong ka roi ka par kaba khlain bad ka jingriewspah ha baroh ki bynta”.

PM Awas Yojana

Ha ka jingkren shaphang ka PM Awas Yojana, ka Myntri ka la ong ba la pynbna sa lai klur tylli ki iing hapoh ka PM Awas Yojana ha ki jaka nongkyndong bad ki jaka sor ha kaba la buh ia ka pisa kaba donkam ha ka mang tyngka. Ka la ong ruh ba hapoh ka PM Awas Yojana Urban 2.0, y pynbeit ia ki jingdonkam iing sah na ka bynta 1 klur ngut ki longiing kiba duna jingioh bad kiba pdeng ka jingioh lyngba ka jingbei tyngka kaba T 10 lak klur. Kane kan kynthup ia ka jingiarap pisa kaba T 2.2 lak klur na ka Sorkar Pdeng ha kine ki 5 snem ban wan. La thmu ruh ban pynbiang ia ka subsidy ha ka sut ban plie lad ia ka jingshim ram ha ka dor kaba jem.

Ki iing sah wai

Ha kaba iadei bad ki iing sah wai, ka Myntri ka la ong “Yn plie lad ia ki iing sah wai ha ki rukom jong ki dormitory na ka bynta ki nongtrei karkhana ha ka rukom treikam PPP ha kaba yn don ka jingkyrshan VGF bad ka jingbahkhieh na ki karkhana.” Ka la ong ruh ba yn sa wanrah ia ki polisi bad ki kyndon kiba plie lad ia ka jingshai ha ka jingai iing wai ha kaba yn kham bun kine ki jait iing.

Ki nongbah kum ki jaka pdeng jong ka roi ka par

Ka Niramala Sitharaman ka la ong shuh shuh ba ka Sorkar Pdeng kan iatrei lang bad ki jylla ban tei ia ki ‘Nongbah kum ki jaka pdeng jong ka roi ka par’. “Yn pynurlong ia kane lyngba ka jingpynkhreh ha ki kam ka ioh ka kot, bad ka jingkyntiew ia ki jaka sor ha ryngkat ka jingpyndonkam ia ki skhim kiba kyntiew ia ki nongbah,” la ong ka Myntri.

Ha ka jingai jingkren jong ka shaphang ka mang tyngka, ka Myntri ka la ong ba na ka bynta ka jingwanrah ia ka jingkylla ha ki nongbah, ka Sorkar kan pynkhreh ia ka rukom treikam kaba plie lad ia ki polisi, ki kam katkum ki iew bad ki kyndon.

Ha ka jingai jingkren jong ka shaphang ka mang tyngka, ka Myntri ka la pynbna ia ki jingpynkhreh ia ki kam kiba iadei bad ka leit ka wan na ka bynta 14 tylli ki nongbah ba heh kiba don palat 30 lak ki nongshong shnong ha ryngkat ka jingpyntreikam ia ka rukom pynbiang pisa.

Ka jingpynbiang um bad ki kam pynkhuid

Ha kaba iadei ba ka jingpynbiang um bad ka kam pynkhuid, ka Myntri ka la ong ba ka Sorkar Pdeng ha ka jingiatreilang bad ki Sorkar Jylla bad ki Multilateral Development Bank kin kyntiew ia ki projek jingpynpoi um, ka jingpynkhuid ia ki jaboh bad ki jaboh na ki painkhana na ka bynta 100 tylli ki nongbah kiba heh. Ka la ong ruh bay n pyndonkam ia kine ki projek ban pyndonkam ia ka um kaba la pynkhuid na ka bynta ka jingai um ha ki jaka rep bad ka jingpyndap ia ki jaka buh um ha ki jaka ba marjan.

Ki iew ba man ka taiew

Ka Nirmala Sitharaman ka la pynbna ba ka Sorkar ka thmu ban wanrah ia ka skhim ban ai jingkyrshan man u snem, ha kine ki san snem ban wan, ban kyntiew ia ki 100 tylli ki iew ba long man ka taiew lane ki jaka die mar bam ha rud surok ha katto katne ki nongbah kum ka jingbuddien ia ka jingjop jong ka skhim PM SVANidhi ban wanrah jingkylla ha ka jingim jong ki nongdie madan.

Ka stamp duty

Ka Myntri ka la ban jur ba ka Sorkar Pdeng kan pynshlur ia ki jylla kiba dang bteng ban buh ia ka dor stamp duty kaba heh ba kin pynduna ia kane ka dor ia baroh, bad ban pyrkhat ban pynduna ia ki duty na ka bynta ki jaka puta ba thied da ki longkmie.” Kane kan long ka bynta kaba kongsan jong ki skhim ban kyntiew ia ki jaka sor,” ka la bynrap.

***